Диктанттар мен мазмұндамалар жинағы 4-сынып Ақтөбе-2017 Қазақ тілі

Ерте заманда бидай өз бетімен өседі екен. Бір жылы қуаңшылық болады. Судың тапшылығынан өсімдік біткен қатты торығады. Басқа өсімдіктер Ақ бидайды алқымға алады. Тамыры мықтылары бидай өсіп тұрған жердің суын тартып алады.

Ақ бидайдың жағдайы күннен-күнге нашарлай түседі. Ақырында ол өлер халге жетеді. Ақ бидайға садақ асынған адам тап болады.Ол аңшыға мүшкіл халін баяндайды.

Адам білегін сыбанып жіберіп, іске кіріседі. Ақ бидайдың айналасындағы арам шөптерді отайды. Бұлақтан су әкеліп, суарады. Күзге дейін қамқорлығына алады. Күзде бидай піседі. Баданадай дәндерін Адамға тарту етеді. Адам дәнді қыс бойы әрі жылы, әрі құрғақ жерге сақтайды.Көктемде жер жыртып, дәнді егеді. Жаз бойы арам шөбін жұлып күтіп-баптайды.

Күзде бір дорба бидай алады. Келер жылы-бір қап. Бірнеше жылдан кейін-мың қап. Бара-бара адамзат әлденеше миллион қап етіп алатын болады.

Адам мен Ақ бидайдың достығы осылай басталған.