ЧАБАДЫЛА ТЁГЕРЕГИНЕ КЁЛНЮ

Кёлню тёгерегине,

айланадыла чабыб адамла.

Дуния-ахрат сагъышладан

къутуладыла табигъатда ала.

Рахат эте джюрекни-кёлню,

Кёлден къарайдыла алагъа

не чабхан адамлагъа,

не учхан къанатлылагъа

къошулалмай,

бир джангыз терекни къатында,

ташха таяныб турама.

Билесиз, болсала Таш бла Терек,

Кёлге, аны ичиндегилеге,

къараб, тынгылайбыз.

Бир-бирибизни сёзсюз да ангылайбыз

Таш, Терек, Мен.

 

ЗАРЛЫКЪ ЁЛТЮРЛЮКДЮ АЛАНЫ

Акъ Сёзню сёзюн этерге кюрешгенле — 

тилкъауладыла бары,

джюреклери сокъурду, сангырауду.

Аланы сан этмейик.

Зарлыкъ ёлтюрлюкдю аланы.

Биле эсек аны,

Аланы сагъыныб,

сыйын тюшюрмейик Сёзню.

 

АКЪ СЁЗГЕ ТЫЙЫНШЛЫ

1

Джашаргъа тыйыншлы Сенсе джангыз.

Сенден айырылалмай танг аласында,

джукълана да джана турлукъду джулдуз.

Поэтни да Акъ Къаласында

Сёзюн, кесин да этсенг а сансыз —  

шайыр ёллюкдю танг аласына.

Ол ёллюкдю, Сен а турлукъса

Сёз къаладан къараб ышарлыкъса,

ариулугъунг бла джумшата дунияны.

Сёзге джан салгъан — шайыр тюл, — Сенсе,

Джети къат Кёкден эниб келгенсе,

биз ёлюр ючюн сюймекликден.

2

Шайыр Бийме мен — билесе.

Сени уа, Къамгъутча, урлаб келиб,

Акъ Сёзюме джыйгъанма, кечерсе.

Не бек къаладан да къачаргъа боллукъду,

Ол Акъ Къалада джашаб тургъан

Сатанай Бийчеге, Гошаях Бийчеге да,

Айджаякъгъа, Акътамакъгъа да

аны ючюн этеме сени аманат.

Гитче эгечлерисе сен аланы.

акъылы, саулугъу бла да,

ариулугъу, фахмусу бла да

озады»,- дейле. Сеннге къарасам — 

Сёзню тюзлюгюне болама шагъат.

3

уста тизилген назму да болур,

хакъ сёз да болур, нарт сёз да болур,

алай а, болургъа унамаз Акъ — 

къарамай андан Айджаякъ, Акътамакъ...

Сёз къарауаш къуллугъун да этер,

тёрт дуниягъа да джетер — 

ёзге, къалыр къаралай:

бийче тюрсюн алалмаз,

къанат битиб, учалмаз,

кирмей анга  ичкери

бийчеле: Гошаях, Сатанай...

Акъ Сёз да, кёзюу кёзюую бла,

къурур, къаралыр кёлча, кёзлеуча,

къара суулары таркъайгъан.

Акъ Кёлню, къурургъа къой эсенг,

къара суулагъа, зем-зем суулагъа

болурму махтау салмагъан?!

4

ишлегенме Юй — сен анда, къууана, джашарча.

«Джылайса,- демезле,- бек къууаннгандан», — 

кёз джашларынгы, джаным, дуниядан джашырчы.

Къууаннгандан джылагъанынгы да терсине сюрюрле...

Ала ёллюкдюле зарлыкъдан.

Къалгъанла уа тюзюн билсинле:

Сен болмасанг — болмаз эди санат.

Акъ сёз болмаз эди тилде,

къууанч тойла бармазелле элде,

къачхы хауа турур эди Джерде.

Хауасыз болурму Адам,

Джандетден къыстатса да бизни,

мен Хауагъа салама махтау.

«Джандетми, Хауамы — сайла»,-

Узалсам да джулдузгъа, Айгъа,

излемем къояргъа Джерни.

5

Джашаргъа тыйыншлы Сенсе джангыз.

Сенден айырылалмай танг аласында,

джукълана да джана турлукъду джулдуз.

Поэтни да Акъ Къаласында

Сёзюн, кесин да этсенг а сансыз —  

шайыр ёллюкдю танг аласына.

Ол ёллюкдю, Сен а турлукъса

Сёз къаладан къараб ышарлыкъса,

ариулугъунг бла джумшата дунияны.

Сёзге джан салгъан — шайыр тюл, — Сенсе,

Джети къат Кёкден эниб келгенсе,

биз ёлюр ючюн сюймекликден.

 

ДЖАУАРЫКЪ БОЛУР

Джау джауарыкъ эсенг,

Огъесе,

Кёк чартламаса,

суу гыбытларын бошламайды булут.

Кёкге уа — т илекден башха,

Басыныбды. Джауарыкъ болур,

Тохтагъыз, къайры барасыз —

сизсиз да кёбдю сууу кёлню.

Кетедиле булутла — кёл таба, тенгиз таба.

джаугъан да кёлге джауа эсе.

Алай эсе,

не суусуз джашаргъа юренейик,

не суу тартайыкъ джангур джаугъан кёлден.

Не да,

 

ЧАКЪЫРАМА, КЕЛ

Шимал Джолдан джазама Сеннге,

Кёз аллымда турады Минги,

этегинде да — сен джашагъан Эл.

«Ашыкъгъан суу тенгизге джетмез»,-

Туугъан джер а кетмейди эсден —

тартханлай турады кесине.

Дуппур башында чырмалыб тоннга,

Неда, джалан аякъ,  къырдышда

сабий болуб, бир чабар эди...

Ай медет, заман къайытмаз  артха.

ата да джокъ миндирирге атха...

Къой, тынглайым, айтмайым джукъ.

Ансы, эс къобан бир къобса,

къан джугъу этерикди мени — 

къозгъамагъан игиди аны...

...Къызыл Къалада къалгъанса кесинг,

Къаншау Бийча, къайытыб келсем,

джашау башланырмы джангыдан?

Ой, дагъыда, кетерге тюшер —

Ол джилигими бютюн да юзер —

эски къыйынлыкъ башланыр.

Джюрекде бир кёбдю джара бла таб — 

Къайсы дунияда, ёмюрде, джылда

Джашагъанымы да унутханма таб.

Шимал Къалада улуйду джанлы:

Сен эсенг — джангыз, мен эсем —  ...

Ишибиз болурму къолай?

Чырт да болмаса джазыу,

чынгагъанча къаядан Бийнёгер,

тенгизге чынгарма къайыкъдан.

Не Ата джуртда, не тыш джерде

Сеннге, кесиме, халкъыма да

джарар дарманны табалмадым мен.

Ай Къаладан джазама мектуп.

Джашауумдан айтмайым джукъ,

кел, кёрюрсе — чакъырама, кел.

 

Апрелни 12, 2012 джыл, Stavanger.

 

ЧАЙКЪАЛАДЫ БАЗМАН

Джашау-Ёлюм базман энтда  чайкъалады,

Кёб ишим, кёб назмум бошалмай къалады,

шакъасы тауусулады къаламымы да.

Бир къысха назмугъа джетер чакълы бирди,

«Дуниягъа айтыр ахыр сёзюнг неди — 

сюйгенингча айт, излемейин кеб.

Кеб  керекди дуниялыкъгъа, субайлыкъгъа,

Айтсанг да: «Аллахдан башха джокъду илях»,-

Табыннганса Терекге, Ташха да...».

Табынмагъанма мен адамгъа, халкъгъа,

Къуллукъ этгенме бир Аллахха-Хакъгъа,

башхалагъа болмагъанма къул-къарауаш.

Алай а, мен малаик къауумдан тюлме,

Туугъан джерни сюеме аны ючюн,

ташына, терегине да сый бере назмум.

Джаным а, — билесиз — нюрденди,

Тёнгегим джерденди, рухум а — Кёкденди:

Мен баласыма Кёк бла Джерни.

Джашау-Ёлюм базман энтда  чайкъалады,

Кёб ишим, кёб назмум бошалмай къалады,

къоярыкъма кимге къаламны да?

Чайкъалады базман — бир-бирде кёкге,

Не келеди, не келмейди кёлге:

сууабыммы дженгер, гюнахыммы?

 

БАРАБЫЗ КЪАЙРЫ?

Сен кёктюн, мен джертин

Бу барыудан барсакъ,

тюбеяллыкъ тюлбюз ёлгюнчю.

Сен кёктюн, мен джертин

Ауалгъамы, ахыргъамы —

къайрыды джолубуз?

Тюберге да болурбуз, алай а,

Джан кёктюн, тёнгек джертин —

бир-бирибизни ангылаялмай,

барабыз кетиб.

 

ШАЙЫР ЭСЕНГ

Шайыр эсе ёзюнг, Акъ эсе сёзюнг,

Акъ сёз бла байыныргъа этсенг а умут —

поэт болгъанынгы унут.

Малкёз адам — шайыр болалмаз,

Халал къыйынынг бла байын, бай бол.

Акъ сёзню уа — излеме этерге къул.

Акъ сёзню басхыч этерге,

излегенледен — илгениб, джийиргениб,

кете тургъанды къуру да Акъ сёз.

Акъ сёз бла къара иннет, харам иш

Хакъ сёзден чыкъгъанды Акъ сёз.

Боракъ ат джегилирге, минилирге тюл,-

адамны Кёкге чыгъарыргъа,

Хакъгъа джууукълашдырыргъа деб, джаратылгъанды.

Аны джегерге излегенле уа,

айырыладыла адамлыкъдан да, шайырлыкъдан да,

дуниядан, ахыратдан да къаладыла къуру.

Учаллыкъ, чыгъаллыкъ тюлдюле ала Кёкге.

Не бай болсала да ала —

къаллыкъдыла джарлылай, мискинлей.

Шайыр эсе ёзюнг, Акъ эсе сёзюнг,

Акъ сёз бла байыныргъа этсенг а умут,

Акъ сёзню дуния мал этерге этсенг а умут —

Адам болгъанынгы, Поэт болгъанынгы унут.

 

КЕЧ БОЛГЪАНДЫ

Башын суугъа атхан адам бла,

ангыларгъа боллугъелле бир-бирин.

Энди уа кеч болгъанды.

Джуртда Джангыз Терек бла Мен

Алай а, не келсин,

кеч болгъанды энди.

 

ДЖУЛДУЗ ТАШ

Учхан джуздуз

Кёкню, джулдузланы да

Ташдан бек ангылагъан болмаз.

 

МЕН А ИЗЛЕЙМЕ БУЗАРГЪА ДЖОРУКЪНУ

Бир джанынады джол:

Шыйых, шейит да бол — 

джол джокъду артха.

Мен а излейме

Кёрмейме да

алда джарыкъны.

Джандет, джаханим да

Къучакълаб джерни

джашайма, ёлеме.

Бир-бирде уа

Тёнгегим джанымдан да

болгъанча дженгил.

Болама сезгенча

болама юзгенча

тартыуун Джерни.

Аллай кёзюуде

Тёнгек бла бирге

учады джаным.

Бир башха дуния

Андан хапар

айтырем сизге.,

Алай а,

сизге да андан

ургъунчу джарыкъ.

Саныгъыз, джаныгъызча,

тюшюнюу, тюрлениу

сизге да келир.

Учуу, учунуу

Энерле Кёкден

аятлача, сёзле да.

Тюрленир джюрек,

болуб хапарлы

дуниядан, ахыратдан.

Аллай кёзюу

турлукъду адам

джашамай, ёлмей.

Аллай болумгъа

Кесим да ёлюб,

тирилгенме кючден.

Башха дуниягъа

джерде джашаргъа

Бер, Аллах, тёзюм.

Не къыйналсам да

Ёлюмге эшик къой,

терезе да ачмам.

Джаханимни

бу дуниягъа

салгъанма кёл.

Джашау ючюн

сермеширикме,

Аллах кеси

буюргъунчу: «ёл».

 

КИТАБ. КЪАЛАМ. ДЕФТЕР

Джукълайды тау, таяныб Кёкге. Акъ тюшле кёре, татлы джукълайды. «Сен Кёкге джете мийиксе» деб, белляу айталла анга мёлекле. Къар джууургъаны тая юсюнден (табигъат да аны ызына къайтара), Кюн тюбюнде джукълайды сабий. Болса да Минги — сабийди ол, бир нарт сабий. Табигъатны ийнагъыды, къууанчыды ол. Багъалаталла Кёк, Джер да аны. Кёк аны сылай башын, къулагъына къычырады азан. Ышарады Минги.

Мени кёлюм да болады рахат. Кёз тууурама келиб тохтайла Къалам бла Китаб.

«Джазыуубузну джазмасакъ кесибиз — Адам, Халкъ болалырбызмы биз? Бу сабийни да тамбласы болурму?».

Быллай сагъышла келе башыма, къолум узалады Къаламгъа. Къаламны къатында Хакъ Сёзге да къарай, джазыууму башлайма джаза. Кёк чууакъды, хауа да таза.

Сабаннга себилгенча урлукъ, Дефтерге Акъ сёзле тюшелле — бу джандет джуртха ала келишелле.  Джазама халкъымы тарихин, кёлюн, джазыуун да. Джазама адамны кёлюн, тарихин, джазыуун да. Азан таууш, зикир таууш да келе къулагъыма, къарайма Кёкге, Джерге, Ауалгъа, Ахыргъа. Къарайма кесиме, къарайма Сизге. Къарайма Сёзге, тынгылайма Сёзге.

Ачылады Китаб. Джазылады джазыу.

Чыракълачадыла харифле, сёзле. Ариудула ала джарытхан таула, тенгизле, тюзле... . Ариудула ала джарытхан ангы, джюрек, кёл. Ариудула ала джарытхан халкъ, джурт, эл.

Джазыуладан тола барады дефтер. Я Аллах, кюч-къарыу бер, сёзюм джарарча халкъгъа, джууукълащдырырча аны Хакъгъа. Къара таныгъандан, къара танытхан сууаблыды. Къара таныгъан — Аллахны, адамны аллында да джууаблыды. Къалам тутхан, къара таныгъан — къара халкъгъа (къарангы халкъгъа) къара танытыргъа борчлуду.

Къалам бла Китаб. Къалам бла дефтер.

Къара таныгъан кюнюнден башланнганды Акъ джолу дунияны. Хакъ Сёзден башланнганды адам болууу адамны. Акъ сёз да Хакъ Сёзден чыкъгъанды.

Джазады къалам. Джазады адам. Шош болуб, къарайды, тынгылайды Алам. Джазыуладан тола барады дефтер. Я Аллахым, онг бер, къуру Акъ сёзден толурча дефтер.   

 

КААБАНЫ КЁЛЕККЕСИ

 

«Кстати, искусствоведы любят говорить о “Черном квадрате” Казимира Малевича как о гениальном художественном произведении, давшем мощный толчок развитию современного искусства, одном из высших итоговых свершений русской иконописной традиции (в полемике Малевича с Бенуа прозвучала характеристика этой картины как “голой иконы”). Но ведь очевидно же, что “Черный квадрат” — это всего лишь двухмерная реплика с Каабы, ее проекция на плоскость». Юрий МИХАЙЛОВ

«Къара тёртгюлю» Казимирни

Кёлеккесиди Каабаны.

Дагъыда махтайла аны.

Урлаб Каабаны кёлеккесин,

не да аллайгъа санагъанла аны —

чамландырмазламы дунияны, ахыратны?

«Къара тёртгюл» - «Чёрный квадрат».

аркъадашларым, къаламдашларым

чайкъайдыла башларын.

Каабаны кёргюзтеме алагъа.

Тынгылайдыла айталмайын джукъ.

Каабадан сейирлик болурму бир джукъ?

Мен джети къат айланнганма аны тёгерегине.

Тюбегенча болгъанма Ташыма, Терегиме,

Кёк бла байламлы сезимни сынагъанма.

Затны кёрмей, билмей кесин,

«Къара тёртгюлю» Казимирни

сагъышлы этгенлей турады мени.

 

КЁЛ БЛА ТЕНГИЗ

Адам кёлюне ушайды тенгиз,

Къалгъан кюнюмде адамсыз, тенгсиз,

джюрегим къыйналса кемсиз — 

анга элтелле эс да, ангы да.

Кёлюм аман кюн — тенгизге кирсем,

Джазыу басымлача, толкъунларында,

сууаб-гюнах базманда кибик,

«Джашау, ёлюм да — хакъ» дей, чайкъалама.

Мийик таугъа чыкъгъанча болама,

дагъыда джерге къайытханча болама,

Ауалгъа, Ахыргъа да джууукъча болама,

чайкъала тургъан тенгизге кирсем.

Ёз кёлюме киргенча болама,

Тау сууча анга къошулама,

аны бла бирге чайкъалама,

айырыллыкъ а болурма... ёлсем.

Адам кёлюне ушайды тенгиз,

Къалгъан кюнюмде адамсыз, тенгсиз,

джюрегим къыйналса кемсиз — 

кёлде-тенгизделле  эс да, ангы да.

 

ТЕНГИЗ ДЖАГЪАДА

Тенгиз джагъада сюеледи къыз.

Толкъунла да болгъанла джууаш.

Чайкала да этмейле къычырыкъ.

Шошлукъну бузгъан — джюрегимди джангыз.

Тебгени алай кючлюдю джюрекни — 

къоркъарчады, «чачар» деб, кёкюрекни.

Къызгъа алай тартады джюрек,

Къыз а мени этеди сансыз — 

Джашамазымы билмейди ансыз.

Джазыуум джазылады былайда:

Кёк да, джер да алыб арагъа,

къарайдыла Адам бла Хауагъа.

Джерде биринчи адамла болурбузму биз?

Джангыз кесинг сюелесе, элибча.

Турама мен да — джашарыкъча , ёллюкча.

Сакълайма джууаб — сенденми, Кёкденми?

Кесибизбиз — башхала ташалла кёзден.

Дуния джашау башланныкъча бизден —

алайды хал, алайды сезим.

Энтда бир атлам этеме къызгъа.

Дагъыда эки атлам этеме артха.

Тамблагъа кёчюреме болджалны.

Къобуб, чайкъалады тенгиз.

Джагъада сюелеме сенсиз.

Тюненеге бурулуб эсим,

 

ИТМИСЕ, БЁРЮМЮСЕ?

Итни барды иеси,

Итмисе, бёрюмюсе —

айтчы тюзюн-кертисин.

Болгъан сагъатда биз

иелери биз эдик

тюзлени эм тауланы.

Дин, тил ючюн, джурт ючюн

Энди уа сюек ючюн

талашабыз итлеча.

Ой бу барыудан барса,

Джыйын джанлы итлеге

кесин хорлатды къалай?

Бёрю улуу чыкъмайды, 

Амантишле бла джаула

бий болгъандыла бизге.

Аладыла оноуда,

Халкъны, джуртну да сатыб,

чын, саугъа аладыла.

Алкъын барла бёрюле,

ёзге билмей бирлеше,

хорлаталла итлеге.

Ой ит джорукъ, ит джашау

Къатышдырды, булгъады

къараны да, акъны да.

Къара джагъылды акъгъа,

Айырылмазча болдула

ётюрюк да,  керти да.

Алай а, келир заман,

Не бек кюрешселе да — 

ит болуб къалмаз адам.

Дуния былай турмаз.

Не бек юрешселе да,

ит болуб къалмаз бёрю.

Итни барды иеси,

Итмисе, бёрюмюсе —

айтыллыкъды кертиси.

Итни барды иеси,

Итмисе, бёрюмюсе —

сагъыш эт анга кесинг,

джууаб эт анга кесинг.

 

КЪЫЙЫНЛЫКЪ КЕСИБИЗДЕДИ БИЗНИ

«Джаныгъыз саудан болмагъыз шау!» -

Таш башында этерге джашау

юретеди къаяда терек да.

Джуртну тауу, ташы, сууу да,

Джерингден, Элингден сууума,

аладанды ангы бла эс.

Джеринги чегетин, къаясын,

Джазыулу ташын, къаласын

унутургъа боллукъду къалай?

Минги Тауну буз сюммеклерин эмиб,

Сосуркъа туугъан сослан ташны кёрюб,

кёлюнг да кёлтюрюлмез къалай?

Джаратылгъан эсек да мийик Кёкню башында,

Аллах джаратды бизни джокъдан джукъ этиб,

джандет джерни да берди бизге Джурт этиб.

Кёзюбюз къарамазча этди тенгизге, тюзге.

Борч этди

Динни, тилни, джуртну да сакъларгъа,

Адам болуб, миллет болуб, Эл болуб джашаргъа.

Джашамасакъ а буюргъанча Аллах,

энтда сынарыкъбыз кёб тюрлю палах,

эки дуниядан да къаллыкъбыз къуру.

Къарыусуз болгъандан иманыбыз, динибиз,

Узакъгъа, джууукъгъа да къарагъыз — 

халкъ бармыды кесин ёлтюре тургъан, бизнича?

Не ючюн берилгенди бизге Къалам бла Китаб?

Джуртубузда динибиз, тилибиз бла джашар ючюн.

Биз а, Къаламны, Китабны да этиб сансыз,

Къаламдан, Китабдан дуния малны тутханла ёрге,

малча джашаб, ыз да къоймай, киргендиле кёрге.

Ол затны ангыламаса халкъыбыз,

башхалагъа боллукъду къул-къарауаш.

Тилин тас этиуден башланады кетиую халкъны.

Ёлюмден сакъларыкъ халкъны — халкъ кесиди.

Сакъларыкъ — иманыды, ангысыды, эсиди.

Айырылмаса Къаламдан, Китабдан —

Башха джол джокъду ёлмезге.

Сынау кюн, сайлау кюн да келгенди бизге.

Джашауну сайласакъ — джашарыкъбыз,

Терслемейик узакъны, джууукъну да:   

къыйынлыкъ — кесибиздеди бизни.

 

НАСЫБЛЫ КЪАУУМБУЗ БИЗ

Ислам динди динибиз,

Кавказ джуртду джерибиз,

Минги Тау да — белгибиз.

Биз джашайбыз мийикде.

Джарытады Ай, джулдуз,

кёрюнеди джолубуз.

Шумер, хун, хазар, булгар,

кёбдю атыбыз бизни,

тарих джолубуз алайд.

Ёмюрледен къалгъанды

«Адам» деб атагъанды

уллу Аллах а бизге.

Керти атыбыз Адамды,

Мен хакъ джолда атлайма,

аякъ тюбде сынмай чёб.

Азан таууш келеди

Кёлню рахат этеди

шайтан къауумну дженгиб.

Мен да абдез алама,

Ай бла джулдуз джарыгъы

тёгюлгенди Кавказгъа.

Ислам динди динибиз,

Кавказ джуртду джерибиз,

Минги Тау да — белгибиз.

Джурту, Эли да болгъан,

аланы сакълаялгъан

насыблы къауумбуз биз.

 

САБИЙ, ДЖЫЛАРГЪА КЪУТУРГЪАНСА

Аягъы басханны кёзю танымай,

«Сабий, джыларгъа къутургъанса»,-

дейдиле уллула.

Джылгъа, хауагъа да къарамай,

«Сабий, джыларгъа къутургъанса»,-

дейди анга ангы.

Этмей сокъуранады ангы,

Экисине да къараб, джылай,

кюкюрейди, джашнайды Кёк.

 

STAVANGER

Къыбыладан айланса джел,

орамгъа тёгюледи эл.

Шималдан айланса уа джел,

къышхы кийимин киеди эл.

Джелни къайдан ургъанына кёре,

Къыбыланы толу багъасын

Шималда ангылагъанм мен да.

Къыбылагъа айланыб

джылыу андады,

андады Кавказ да.

Шимал Джолда барама кетиб.

Барама кетиб, барама кетиб.

Шимал Джолда къалсам а ёлюб...

ёлсем да Шималда къалмазма.

Джаным

къыбыла таба барады кетиб.

Эки дуниям да Акъ Сёздю мени.

ол насыбны бергенди Аллах.

Алай а,

аллай насыб берилмегенле бла

Ол сынау болур.

Ансы,

келишелле къалай?

Джерде джюрюген бла Кёкде учхан

бир-бирине да илешелле къалай?

Бир-бирине ушамагъан эки джанны

Ёле болурламы ала

керти да сюймекликден?

Къанатсызгъа къанатла битиб

Къанатлары болуб, къанатсыз къалгъанлагъа уа

тюртюле келгенме.

Къайсыды кючлю:

Джангыз бир къанаты болгъан джан

туууб къалса уа аладан...

Аллай къыйынлыкъдан сакъласын Аллах.

не къанатлы болсун, не къанатсыз болсун — 

бир къанатлы уа болмасын, огъай.

Къуру бир къанаты бла туугъан къанатлыны

Къанатлы джан бла къанатсызгъа

(аладан ким, не джаратылырын билмей)

некях этерге уа боламыды?

 

КЪАЯ ТАШ БЛА ДЖУЛДУЗ ТАШ

Къаядан юзюлген таш айтыр,

Сына, чачыла, ёзеннге тюшгюнчю,

чекген азабын да айтыр ол.

Къутхаралмасам да джарсыудан,

джулдуз ташны къатына сюегенме.

Джулдуз таш джабсарады аны кёлюн:

«Сен аллай бир неге къыйналаса.

къаянгдан кетсенг да, джерингде тураса.

Керти къыйынлы, сен тюлсе, менме,

мен тюшгенме джети къат Кёкден.

Джана, кюе тюшгенме Кёкден...».

Къая таш бла, джулдуз таш,

тынгылайдыла. Къарайдыла:

бири — къаягъа, бири да — Кёкге.

Ол ташла да тюше эсиме, кесим да

Шимал тенгизни джагъасында

Джурт таба къараб, сюелеме.

 

КЁЛЮНГЮ ТАКЪЫР* ЭТМЕ

Къуругъан кёл — такъыр.

 

*Такыр (от тюркского — гладкий, ровный, голый), 1) дно периодически пересыхающих озёр, расположенных в районах распространения глинистых пород пустынных и полупустынных зон.