Жалпы отырысы
жүктеу/скачать 0.68 Mb. Pdf көрінісі
|
| МӘЖІЛІС ОТЫРЫСЫ 2023 жылғы 6 қыркүйек
Стенографиялық есеп 27 Екіншіден, «Жастар саясаты туралы» Заңға енгізілген өзгерістерге сәйкес жастар санаты 29 жастан 35 жасқа дейін өсті. Сәйкесінше үй алған жастар бүгінде жастар санатынан әлі шыға қойған жоқ. Бес жылда балалы болған жастарымыз қаншама, кішкентай бала-шағамен қайда бармақ? Ал елде жастарға арналған бірыңғай мемлекеттік бағдарлама жоқ. Үшіншіден, жалдамалы пәтер алған жастар өзге де мемлекеттік бағдарламалар мен үй кезегінде тұру мүмкіндігінен айырылған. Ал кезекте болғандар кезектен алынып тасталған. Төртіншіден, бүгінде елде баспана алуға тиімді бағдарлама жоқтың қасы. Мен бұл мәселені бірінші сессияда да көтерген едім. «7-20-25» аты бар, заты жоқ бағдарламаға айналды. Ал «Отбасы банк» арқылы 50 пайыздық бастапқы жарнаны жастарға жинау бес жылда мүмкін емес. 2019 – 2020 жылдардан бері нарықтағы үй бағасы екі есеге дейін өскен. «Көп қайда болса, шындық сонда» демекші жастардың назына назар аударалық. Жоғарыда аталған факторларды ескере отырып, жастардың тиімді баспана алуына жағдай жасау және кемі 10 пайыздық бастапқы жарнамен өздері тұрып жатқан баспанасын сатып алуға мүмкіндік беру мәселелесін қарастыруды сұраймын. Және де нарықтағы «Елорда жастары», «Алматы жастары» ипотекалық бағдарламалары секілді пайыздық мөлшерлемесі де 5 пайыздан аспаса екен деймін. Құрметпен депутат Д. Мұқаев». ТӨРАҒА. Сөз депутат Бейсенбаев Ержан Алмабекұлына беріледі. БЕЙСЕНБАЕВ Е.А. Рақмет. «Ақ жол» фракциясының депутаттық сауалы Ауыл шаруашылығы министрі Сапаровқа. «Құрметті Айдарбек Сейпелұлы! Еліміздің дәстүрлі мал шаруашылығы және егін шаруашылығымен айналысып отырған Шығыс Қазақстан, Абай, Павлодар, Атырау, Ақмола, Жамбыл, Маңғыстау облыстарында, өкінішке қарай, биылғы қуаңшылыққа байланысты жұт басталып келе жатыр. Оны ақпарат құралдарынан баршаңыз біліп отырсыздар. 2023 жылы Қазақстанның барлық аумағында қыста қар аз жауды, жауын- шашынның қажетті мөлшері болмады және жоғары температура болды. Жауын- шашынның болмауынан басқа республикада 2021 жылдан бастап мал шаруашылығына, шабындықтарға қажетті өзендерде су деңгейінің төмендеуі байқалуда. Оның үстіне ыстық ауа райына байланысты шабындықтардың, егіннің, дәнді дақылдардың өртенуі де орын алды. Биыл дәнді дақылдардың және малдың негізгі азығы шөптің шығымдылығы да өте төмен. Мысалы, Павлодар облысында 1,5 миллион тонна шөп жинау жоспарланған болатын. Іс жүзінде әзірге 156 мың тонна ғана алынған. Бұл оннан бір бөлігінен сәл ғана асты. Абай ауданында жоспар 1,1 миллион тонна болды, бірақ 413 мың тонна дайындалды. Маңғыстауда жоспардың төрттен бірі ғана дайындалған. Бұл тамыз айындағы өте төмен көрсеткіштер. Шаруа қожалықтары кестеден кешігіп қысқы мерзімге үлгере алмайды. МӘЖІЛІС ОТЫРЫСЫ 2023 жылғы 6 қыркүйек 28 Стенографиялық есеп Ағымдағы жағдайға байланысты мал шаруашылығын және жеке қосалқы шаруашылықтарды дамыту болашағына қауіп төніп тұр. Осының бәрі күзде мал басының саны мен асыл тұқымды ауыл шаруашылығы малдарының жойылуына әсер етпей қоймайды. Шөп жоқ болғандықтан мал сойылады. Деректер бойынша Маңғыстау, Шығыс Қазақстан, Ақмола облыстарында мал көбірек сойылған. Дәл осы аймақтарда құрғақшылық, жақсару перспективасы жоқ. Мұның бәрі енді жаңа жылға дейін еттің амалсыз арзандайтынын білдіреді. Бірақ келесі жылы елде ет тұтыну үздіксіз өсіп жатқандықтан баға тағы көтеріледі деп күтілуде. Осындай климаттық жағдайларға байланысты ауыл шаруашылығы тауарын өндірушілерге құрғақшылық пен өзендердің тайыздануының кері әсерін жою үшін қолдау мен шұғыл шаралар қажет. Бұған қоса, қыркүйек айында несиелік ұйымдар – «Қазагроқаржы» АҚ, «Аграрлық несие корпорациясы» АҚ, несие серіктестіктері, тұқым, гербицидтер мен тыңайтқыштарды жеткізуші ұйымдар келісімшарт бойынша ақшаны қайтаруды және төлемді талап ете бастайды. Бұл ретте несие серіктестіктері банкротқа ұшырайды, жеткізушілер сот ісін бастайды. Бірақ қиыншылық мұнымен бітпейді, 2024 жылдың көктемінде егістік маусымы басталады, диқандардың астықты қай ақшаға себетінін де ешкім ойлаған жоқ. Ағымдағы өнімді ескерсек, шаруалардың кепілі де, қаражаты да жоқ. Жолдауда Мемлекет басшысы: «Еліміздің стратегиялық мақсаты – Еуразия құрлығының жетекші ауыл шаруашылығы орталықтарының біріне айналу. Шағын шаруа қожалықтарын қолдау – ауылды дамыту үшін түбегейлі маңызды. Етті, сүтті және астықты терең өңдеу, өнеркәсіптік жылыжайларды дамыту – біз үшін перспективалы салалар біздің басымдықтарымыз болуы керек», – деген болатын. Ал мемлекет тарапынан қолдау болмаса, мұның бәрі қалай жүзеге асады? Жоғарыда айтылғандарды негізге ала отырып, «Ақ жол» партиясының депутаттары талап етеді: 1) ауыл шаруашылығы тауарын өндірушілермен Қазақстан Республикасындағы ағымдағы жағдай туралы нақты түсініктемелер беруді; 2) құрғақшылық фактілері бар аймақтарда төтенше жағдай жариялауды; 3) республика бойынша агрометеорологиялық болжамдар туралы алдын ала ақпарат беруді; 4) осы жағдайда ауыл шаруашылығы тауарын өндірушілерге қаржылық қолдау көрсету үшін барлық қажетті шаралар қабылдауды. Құрметпен «Ақ жол» фракциясының депутаттары. ТӨРАҒА. Сөз депутат Иса Қазбек Жарылқасынұлына беріледі. ИСА Қ.Ж. Рақмет, құрметті Төраға. «Ақ жолдың» сауалы Бас Прокурор Асыловқа. «Президент биылғы экономикалық Жолдауында кәсіпкерлерді қудалауды тоқтатуды тағы да көтерді. |