Жаман жолдас
Екі дос келе жатты. Достардың бірі әлсіз, ауру еді, екіншісі мықты, сау жігіт болатын. Кенет алдарынан аю шықты.Дені сау жігіт ауру жолдасын тастап, бір үлкен ағаштың басына шығып кетті. Ауру жігіттің ағашқа шығуға күші жоқ, жерге құлады да, өлген кісі болып жатты. Естуі бар еді, аю өлген кісіге тимейді деп. Аю бұл жатқан кісінің қасына келіп, иіскелеп тұрды да, кетіп қалды. Біраздан кейін ағаштың басынан түсіп, жолдасы қасына келді.
- Достым, аю құлағыңа не сыбырлап кетті? – деп сұрады.
Ауру жолдасы:
- Аю құлағыма ақыл сыбырлады, екінші рет тар жерде жолдасын тастап қашатын адаммен жолдас болма деді,- дейді.
(Ы.Алтынсарин)
|
