Отарланы Омар Ноталаны жазгъан Аслан Дауров Музыка редактору Этчеланы Музафар
жүктеу/скачать 3.21 Mb.
|
- Бұл бет үшін навигация:
- КЮЙЛЕ Гошаяхны кюйю
- Орусбийланы Исмаилны жыры
Сенден къалсам, ёлейим Жалан башымы салып жатханма Россейни сууукъ ташына. Иги умут эте, иги умут эте, Аман кюн келди башыма. Почтагъа письмо келгенди, дейле, Ашыгъып бардым алыргъа. Ёлейим деп да неге тилейме, Келип салырмы къабыргъа? Мени жанчыгъым кетип барады, Ой, менде къалгъанд сураты. Бизден сора да кёпле бардыла Жартылай къалгъан мураты. Бир бирибизни бир бек сюебиз, Алай, мен бираз ёнгелеп, Жазыу болмаса, бузулсун дунья, Тауладан ташла тёнгереп. Ой, сени бла да мени ючюн, Таулагъа газет урулсун. Ах, сенден къалгъан мени дуньям Тюбю башына бурулсун. Мен суу бойнуна баргъанма, анам, Анга тынгылай, талгъанма. Энди кимни да башха этмейме, Бек сюйгенимден къалгъанма. 
Сюймеклик да кюймеклик Жерлени талгъыр жиляны болуп, Мен сууну эншге баргъыем. Дуниягъа урлукъ менми боллукъ эдим, Жаратылмайын къалгъыем. Мени сюйгеним кетип барады, Столда къалгъанд сураты, Бизден сора да кёпле бардыла да, Жартылай къалгъан мураты. Минг сёлешсем да, бир сёлешмейди Устол юсюнде суратынг. Нек тынгылайса, ачыкъдан айтчы сен, Къалайды манга муратынг? Бир бирибизни бир бек сюйюучек, Алай мен сенден ёнгелеп. Экибиз ючюннге дуния бузулгъуед, Тауладан ташла тёнгереп. Ой, сени бла мени ючюн, наным, Таулагъа газет урулсун. Ай, сенден къалгъан, ох, мени дуниям Тюбю башына бурулсун. Ой, сюймекликден былай таралып, Сейир этеме жаныма. Хунада ташла эрий болурла да Бир-бир кюнледе халыма. Мен суу бойнуна баргъанма, алан, Суудан бир ташчыкъ алгъанма. Энди кимни да мен башха этмейме, Бек сюйгенимден къалгъанма. Сёлешген сайын бир ариу болад, Бети тюрленнген дарийча, Къайгъыларымы ол сейир чачады, Жангы тилленнген сабийча. Мени сюйгеним кетгенли, ой, ой, Мен ышармайма, кюлмейме, Ызындан жиляй барлыгъем, ой, алан, Да баргъан жолун билмейме. Стол юсюнде мешинам, алан, Мен аны неге бурлукъма? Къайда айлансанг да, сау айлан, наным, Мен сени сакълап турлукъма. 
Жашны жыры Таула башлары къаралып келеди, Ол жауунмуду, къармыды? Жерни юсюнде жанла да, къызчыкъ, Сенден ариучукъ бармыды? Юйюмю аллында битгенди, къызчыкъ, Бир ариу алма терекчик. Ох, ариу къызчыкъ, ким кёрлюк болур Сенича ариу мёлекчик? Бир бек сюйгенме, ёлюп къалама, Жанынга къурман болайым. Алтын къанатлы чыпчыкъ мен болуп, Кёкюрегинге къонайым. Кёкюрегинге мен къонсам, къызчыкъ, Не келир сени эсинге? Кесинг жангызлай тюбесем эди, Сёлешир эдим кесинге. Эшикни къаты бегитчи, къызчыкъ, Чыракъны жарыкъ жандырчы, Танг атхынчыннга ушакъ этейик, Сюйген жюрекле къаннгынчы. Ой, сен кийиучю жыйрыкъларынгдан Бизни къызла да киерле, Ой, сен алагъа келин болсанг а, Жанларындан сюерле. Алтын къанатлы чыпчыкъ мен болуп, Терек башыгъызгъа къоннгуем. Аяулу къызчыкъ, асыулу къызчыкъ, Ананга киеу болгъуем. Юйюмю аллында уллу суу барды, Сюзюлюп барады тенгизге. Мындан кёп мени жалындырмайын, Келип къалсангта бизни юйге. Юйюмю аллында уллу суу барад, Ашыгъып барад тенгизге. Сени бла къалай барлыкъ болурма Мен, уялмайын, сизни юйге? 
Къызны ийнары Сен кетдинг узакъ, тёзалмай чыдап, Ызынгдан барлыкъ болурма. Хапар жазмасанг, жолдан ажашсам, Элинги кимге сорурма? Эрке сёзлеринг, ала кёзлеринг Жюрек жаууму ашайла. Узакъда, кенгде бек сюйген тенгле, Билмейме, къалай жашайла? Ишде тенглерим озмайла мени, Мен толтурама антымы. Сени тансыкълап къалдым узакъда, Унуталмайма атынгы. Мен сени сюйюп, таралып, кюйюп, Армау болургъа жетгенме. Мени багъалым, къайдаса, жаным? Тарыгъыу кюйле этеме. Сюйгеним-наным, сендеди жаным, Ишинг тюзелип махталсын, Сюйгени болгъан кетмесин жолдан, Аны ашырып сакъласын. 
Кёгюрчюнюм Айлана, жюрюй келгенме, алан, Тутханма кёксюл кёгюрчюн. Къанатларынгы кесим кесерме, Иерик тюйюлме ёлгюнчю. Къарангы кече къалай жылтырайд Бахсан сууну къундузу. Нафисат мёлекни несин айтасыз, - Кёклени чолпан жулдузу. Орамдан алып келелле, медет, Жарлы Нафисатны ёлюсюн. Сюйген сюйгенден къачып айланад, Кёргенмисиз мындан телисин? Кюнлюм талагъа ёртен тюшгенди, Кёкден элия ургъанлай, Таша сёзюбюзню эшитгендиле, Абезеххе бара тургьанлай. Келчи, ариуум, жюрек инжитме, Да бизни элге ауайыкъ! Мен туман болуп, сен жауун болуп, Хауадан жерге жауайыкъ. Кёкюрегими ачып тилейме Мен кёкден жаугъан жаууннга. Этер мадарым болмайын къалса, Жиляп барлыкъма Дауумгъа. 
Улан бла къыз -Къара агъачда къар барды, Терк жюрюсенг, жетерсе, Эмен терек мен болуп, Жерге кирсем, нетерсе? -Эмен терек сен болул, Жерге кирген сен болсанг, Жютю балта мен болуп, Кесип алсам, нетерсе? -Жютю балта сен болуп, Кесип алгъан сен болсанг, Сабан темир мен болуп, Жерге кирсем, нетерсе? -Сабан темир сен болуп, Жерге кирген сен болсанг, Сегиз ёпоз мен болуп, Тартып алсам, нетерсе? - Сегиз ёгюз сен болуп, Тартып алгьан сен болсанг, Кёк кёгюрчюн мен болуп, Учуп кетсем, нетерсе? - Кёк кёгюрчюн сен болуп, Учуп кетген сен болсаиг, Сары илячин мен болуп, Къуууп жетсем, нетерсе? - Сары илячин сен болуп, Къуууп жетген сен болсанг, Тары бюртюк мен болуп, Жайылышсам, нетерсе? - Тары бюртюк сен болуп, Жайылышхан сен болсанг, Балалы тауукъ мен болуп, Чёплеп алсам, нетерсе? - Балалы тауукъ сен болуп, Чёплеп алгъан сен болсанг, Къыйын ауруу жабышып, Ауруп жатсам, нетерсе? - Къыйын ауруу жабышып, Ауруп жатхан сен болсанг, Бакъгъан устанг мен болуп, Багъып турсам, нетерсе? - Бакъгъан устам сен болуп, Багъып тургъан сен болсанг, Кезиу келип, дуниядан ёлюп кетсем, нетерсе? -Кезиу келип, дуниядан Ёлюп кетген сен болсанг, Акъ кебининг мен болуп, Чулгъап алсам, нетерсе? 
Алай болурун билсемед Къайсы жайлыкъда отлай болурла Иесиз къалгъан малларым? Сюйгенинг эрге къачды дегенде, Къырылып тюшдюле санларым. Къырылып тюшген мени санларым Энди тирилмейдиле ёрге. Ай, бу бедишге къалгъандан эсе, Кирип къалгъыем мен жерге. Сен эки сёзлю болмасанг, бетсиз, Мен бу бедишни кёрмезем. Ай, медет, ол кече алайда болсам, Жан алдырмай а, бермезем. Алай этеринги билген а болсам, Эшикни сакълап турурем. Ант-тоба болсун, сени элтгеннге Мен уллу чырмау болурем. Ариу сёз айта, кёп кукалана, Сен адамсызлыкъ этгенсе. Сёзюнгю ашап, бетинги жоюп Башхагъа къачып кетгенсе. Ай, медет, Аллах, алгъындан билсем, Билирем санга этерни, Ышаннган башны ит ашар, дейле, Сен кёрюр эдинг хатерни. Сенден къалдым деп ичим кюймейди, Барды ичими кюйдюрген. Кёп этерими этмей оздурдум, Олду башны жерге ийдирген. Жер юсюндеди, узакъ тюйюлдю, Таныйма баргъан эринги. Эсингде болсун, айтып къояма: Къапдырмай къоймам эрнинги. Айхай, чыдаб'а къалай болалгъын, Кечилмез бедиш этгенди. Чачы чалды деп, башы малды деп, Хыликкя этип кетгенди. Манга этерни этип кетгенсе, Бек сакъ бол энди кесинге. Терк ёлюп кетсем, сени насыбынг, Ёлмесем - тюшер эсинге. 
Кёзлеринг кёзюр ойнай Кёзлеринг кёзюр а ойнай, Сёзлеринг жюрекни байлай, Жюрегиме ауруу бергенсе. Келиб'а къатымда олтуруп, Жюрегими да толтуруп, Кёп ахтыннганымы уа кёргенсе. Керти да сюеме деученг, Сюймеклик салам бериученг, Ой, адамла сени бузгъунчу Башынг а акъылдан толсун, Жюрегинг таукел а болсун, Кетейик, ишибиз озгъунчу. Юйюнгю аллындан къарап, Мени да узакъдан танып, Келиб'а къолуму тутуучу. Къара кёзлериме къарап, Сёлешген сёзюмден танып, Чайнамай, ичине жутуучу. Энди уа къатыма да келмейди, Салам да жазып да иймейд, Бир кенжи айланып кетеди. Келип, къатымда олтуруп, Жюрегими да толтуруп, Бир аман ачыула этеди. Кёкледе учхан кёгюрчюн, Саламла айтсын мени ючюн, Ол узакъ тауладан келеди Гюняхымы сен аласа, Жюрекге жара саласа, Мен да санга тарапып, ёлюп. Къолунгдагъы къобузунгу, Башлыкъ тиксенг, къол ызынгы Кишиге да сормай билиучем. Ма сен айланнган жерледе, Мен сени кёрген кюнледе Санга жюрегими бериучем. 
Сени ариулугъунг Ой, сенден ариу мен кёрмегенем Ол мен айланнган жерледе. Сени ариулугъунг алай айтылгъанд Тау этекледе элледе. Нечик ариуду сени санларынг, Юлгю бла бичгенча, къыйылып. Къара чачынгда окъача жылтырай, Ол бурма болуп, жыйылып. Къарангы кечени жарыкъ этелле Ма кёзлеринги аласы. Эки къашынг а, бирден кенг тохтап, Сютден да акъды арасы. Бир терс акъылынг болмагъанлай, Сейир ариудула халларынг. Кече тюшюмде кёрюнюп туралла Сени субай ёсген санларынг. Сени ариулугъунг жюрегими алгъанды, Чыдаялмайма жеримде. Ариулугъунгу айтып турсам да, Жазып бошамам ёмюрде. Сени ариулугъунгу битеу дунияда Бир адам билалмаз багъасын. Сени кесине алалгъан жаш а - Кесин насыплыгъа санасын. Ариу кийинсенг, кёз тиерик сунуп, Тургъуенг, дейме, кийинмей. Сени кёргенледе бир жаш къалмайды, Жангыз кёргенлей, сюйюнмей. Эрттен сайын а кьара чачынгы Сен бизни отоуда тарагъын, Мен ишге кетсем, сен, тансыкъ болуп, Бизни терезеден къарагъын. Жюреклерибиз таза болсунла, Кирсиз суулача кёлледе. Биз экибизни алгъышха айтсынла Келин-къыз чыкъгъан жерледе. 
Бургусант Ол Бичесындан а жауун а жауады да, Бургусантдан туман къайнайды. Ол мени наным а, бюгече кетип, Элде тойлада ойнайды. Алты кюн болады мени наным кетгенли, Ол алты ай кибик кёрюндю. Келмейди наным, аллына къарайма, Кеч болду кюню, бёлюндю. Тауладан бийиг' а мени жюрегим Тары бюртюкден аз болду. Тойлада ойнаучу сабий санларым, Сапран чабакълай, саз болду. Ол тас болгъанды да, тапмайма бюгюн Ма машинамы ийнесин. Ой, мени тенгим да, ким болса да, Болмазлыкъ ишни сюймесин. Тауланы башы уа къар, чыран, дейди, Чыранны тюбю къаяды. Бир бек эришдим, он жыл кюрешдим, Къалмай къыйыным заяды. 
Бурмабыт Он, Бийчесындан жауун жауады, Ой, Бурмабытдан къаралып. Сюйгеним дегинчи, жан ала эди, Кёзлери кёкге аралып. Ой, нечик къычырад, дейди, Кичибалыкъны къундузу, Бюгече тойда ойнап тургъанды Жюрегими жарыкъ жулдузу. Ой, бууунумда сагъатым мени - Баууна дери сары алтын, Таза жанымдан болгъанма мен а, Сюйгеним, сени амалтын. Аузумдан чыкъгъан аууз тылпыуум Эринлерими кюйдюред, Мени сюйгеними ариу сыфаты Сюймегенлени сюйдюргенд. Тауладан бийиг а мени жюрегим Тары бюртюкден аз болду Тойлада ойнаучу мени санларым, Сапран чабакълай, саз болду. 
Арбачыны сюйгени Сау жылны кийсем да, тауусалмайма Чурукъ олтанымы хырларын, Айып этмегиз, айтып башлайым Арбачы жашны жырларын. Арбачы жашчыкъ тыхырдап келед, Арба атларын тыялмай. Мен арбачыгъа къалай барайым, Тенг къызларымдан уялмай? Бадражан жыя турама, наным, Челеклерими толтуруп, Ойнай, кирпилдей кетип, къалгъаем Ат арбасына олтуруп. Мени сюйгеним болурму, къызла, Орам башында букъу этген? Этген муратын тапмайын къалсын Экибизден да аз сюйген. Мен сени аллай бир сюер кибик, Нек кёрюннгенсе кёзюме? Термилте кетип, бир сёз айтханенг, Ие бол энди сёзюнге! Мени ич сырымы билгенден сора, Сен да бир акъыл этгененг. Мен саламлашыргъа тебрегенде, Сен а бурулуп кетгененг. Мен бу жырымы этгенме санга, Бир сууукъ ташха тыянып, Бир белек жылны термилдим санга, Сюеме дерге уялып. Санга письмола жазгъанлыгъыма, Жууап тапмайма сёзюме. Тап, жан къалдырлыкъ дарман болгъанча Кёрюндюнг мени кёзюме. Алырдан болсанг, алчы, балачыкъ, Сыйсызлыкъ келмез мени ючюн. Алмаздан болсанг, да неди амал, Мен да ёкюнмем сени ючюн. Ишни келиши аман кёрюнмейд, Болургъа ушайд тилегим, Чийсил айтдыргъан бир сёзюнге уа Разы болмады жюрегим. 
Кишмир жыйрыкъ Байрым кюн бичген кишмир жыйрыгъым, Окъа чалыудан жагъасы, Мен сюйгеними сатып алырем, Не болур аны багъасы? Юсюме кийген мени жыйрыгъым - Ариу жарашад жагъасы, Мен сюйгеними сатып алырем, Сан жесирд, дейле, багъасы. Стол юсюнде "Зингер" машинам, Аны солпусун бурайым. Сюйгеним мени алырдан болса, Юч жыл сакълап турайым. "Ташкент" маркалы кёк патефонум, Сюйген жыр салып, жырлайым, Юч жыл дегенинг адам ёмюрдю, Юч жылны къалай жиляйым? Ой, башымдагъы чилле жаулугъум, Ауур чачагъы бойнумда. Менден да сюйюп алгъан къызчыгъынг Бир ай жашасын къойнунгда. Акъ орундукъда жумушакъ тёшек, - Ол мени ючюн жетгенди. Мени сюйгеним, кёзюме къарап: "Къой, сен телисе", - дегенди. Атлагъан сайын абына-сюрюне, Сюйгенимледен келеме. Сюйгенинг сени сюймейд деселе, Анга ачыудан ёлеме. Тарыгьыу жырла, жиляй, жырлайма, Сюйгени болгъан эс салыр. Кече да, кюн да термиле кетип, Менича къурлай ким къалыр? Бууунумдагъы алтын сагъатым, Ненча сагъатха бурлукъма? Кюйген жюрекни сууутуп къоймай, Энтта да сакълап турлукъма. 
КЮЙЛЕ 
Гошаяхны кюйю Ори-ой-ой-ой. Къаншаубийим тау эллеге туугъан кюн Тау эллеге тейри эшиги ачылды. Къаншаубийим тау элледен кетген кюн Тау эллери, къуш тюгюнлей, чачылды. Ори, ой, ой, ой. Къаншаубийим кетгенди да, тапмайма, Кече, кюн да аны жолун сакълайма. Ол кетген кюнден бери бир кечени, Белими тешип, тёшекге жатмайма. Ори-ой, ой, ой. Кел, Къарачач, Къара ташха барайыкъ, Къара ташдан тёбен таргъа къарайыкъ. Къаншаубийим келе эсе, жырлайыкъ, Келмей эсе, жиляп, ташны жарайыкъ. Ори-ой, ой, ой. Алай бла Къара ташха келгенек, Мухур тюзде юч атлыны кёргенек. Ортадагъы генже тайгъа ушайды, Сыртында уа башха адам ойнайды. Ори, ой, ой, ой. Ала сабанлада тюлкю къуудула, Аны къууа кетип, бёрю этдиле. Хадаужукъ бийчеле Къаншаубийими, Эшек мыйысын ашатып, тели этдиле. Ори, ой, ой, ой. Тар аузунда таракъ-таракъ къаяла, Ала энди бир бирине аусунла! Хадаужукъланы сары бийчелеге Энди манга жаугъан къанла жаусунла! Ори, ой, ой, ой. Къаншаубийни тапмай, айлана, жюрюй, Къарачайда Къарт-журт элге келгенме, Кече, кюн да Къаншаубийими сакълай, Жиляй-жиляй, аман бла ёлгенме. Ори, ой, ой, ой. Ким биледи, хапарымы айтырла Бир заманда Къарачайны къартлары, Манга бу кюнлени келтиргенлени Аман бла къуругъуед артлары! 
Гошаях бийчени жыры Ори, о, эй, эй. Къаншаубийим тау эллеге туугъан кюн Тау эллеге тейри эшиги ачылды. Ой, Къаншаубийим тау элледен кетген кюн Тау эллери да къуш тюгюнлей чачылды, ой. Ори, о, эй, эй. Эчкиле кирдиле Тар аузу акълагъа, Башым къалды къанлы Тар аузун сакъларгъа. Ой, Тар ауузну таракътаулары, бузлары, Менлей къалсынла Хадаужукъланы къызлары, ой. Ори, о, эй, эй. Къаншаубийими излейме да, тапмайма, Къаншаубийсиз белими тешип жатмайма. Келлик жолуна къарайма да, кёрмейме, Бёрю болмасам, не этерге билмейме, ой. Ори, о, эй, эй. Ким ёлюр бу зорлукъдан къутулуп, Тура болур, бирледе жесирге тутулуп. Жиляй-жиляй, къан чапханды кёзюме, Нек ийнандым къахме бийчени сёзюне, ой? Ори, о, эй-эй. "Кел, Къарачач, Къараташха барайыкъ, Жиляй-жиляй, Къара ташны жарайыкъ, Къаншаубийим келе эсе, къарайыкъ, Махар тюзден келгенлеге сорайыкъ, ой. Ори, о, эй-эй. Къаншаубийни изледик да, тапмадыкъ, Айландыкъ да, Къара ташдан атландыкъ. Биягьы къанлы къаялагъа ёрледик, Къаншаубийни тапмазлыгъыбызны билдик, ой. Ори, о, эй-эй. Тютюню тюлкюсю къызылды къандан, Къаншаубий багъалыд сау дунияны малындан. Бу Тар аууз бири бирине аусун, Къаншаубийсиз Бахсан таргъа къан жаусун, ой. Ори, о, эй-эй. Кел, Къарачач! Къаншаубийим кетгенди. Биз кёралмаз узакъ жерге ётгенди. Энди саулай келирми ол бу таугъа? Келсе, келтирир бизге ол кёп саугъа, ой. Ори, о, эй-эй. Саугъалары, Къарачач, - сени болсун! Къарап, жангъыз кёрюмю - мени болсун. Къан кечиуден ары жанына ётгенд Къаншауну генже тайыны ызлары, ой. Ори, о, эй-эй. Къаншаубийими эки къызы бар эди, Аллах-Аллах, Къантинмеди, Къазмеди? Къаншаубий тау эллеге бюгюнлюкде Бир ёлюмге, бир бушуугъа азмеди, ой? Ори, о, эй-эй. Къан жауарыкъ Бахсан тардан алыгъыз, Къабырымы Къарт-Журт элде салыгъыз. Къаншаубийим! Аман бла ёлгенме, Сени ючюн кёп къыйынлыкъ кёргенме, ой. Ори, о, эй-эй. Бештамакъгъа гетен кёпюр салгъан кюн, Аман Элбуздукъ бла мен къалгъан кюн, Андан эсе мен жарылып къалгъаем, Неда кичи Гилястаннга баргъаем, ой. Ори, о, эй-эй. Къаншаубийим, сен, ёлмейин, сау келсенг, Къарт-Журт элде кешенеми кёрюрсе. Бу дунияда тюзлюк деген бар эсе, Сен да, менича, термилип ёлюрсе, ой. Ори, о, эй-эй. Манга келген ачы къыйынлыкъланы Айтыр санга Къарачайны къартлары. Мени бу кюннге къойгъан бийчелени Болгъаеди бир да къалмай артлары, ой. 
Орусбийланы Исмаилны жыры Къаялада ойнайды къашха эчкини Маркъа улагъы. Тардан а ёрге къараб'а келеди Тор атынгы эки къулагъы. Орусбийланы, ой, уллу Исмаил, Орус ийнаралланы да ийнагъы. Орусбий улу, ой, уллу бий ёлгенди, Элтаркъачха къуугъун келгенди. Исмаил жатыучу жыялы ундурукъда ким жатар? Исмаил а тартыучу жия къобузну ким тартар? Исмаил а сатыучу къараууз къызыл ууаныкланы, ТаунуАртына аудуруп, ким сатар? Ой, сары алтындан кёремен а, кёреме, Чубур а берданкангы чюйлери, Исмаил а ёлгенли, жайлыкълагъа Эркин болдула къабарты чанка бийлери. Къан жилямукъдан толгъанды, толгъанды Къартларыбызны кёзлери, Ийнараллагъа письмо болуп урулуучед Исмаилны жаш заманында айтхан а акъыл сёзлери. 
Хасанны жыры Жанбаш сыртда жангыз терек битмесин, ой-ой, Битсе - битсин, ууалмасын, сынмасын, ой-ой, Аналагьа жангыз улан туумасын, ой-ой, Тууса - туусун, аурумасын, ёлмесин, ой-ой. Хасан беш жыл жалчы болуп жашады, Ол суу бла сууукъ гыржын ашады, Беш жылны ол жалчылыкъны кётюрдю, Бийинг сени малынг ючюн ёлтюрдю. Къама кирди къолтугъунгу кенгинден, Къан агъады чепкенинги женгинден. Чыкъгъан эди, жашнап, сыртха мал бла, Тигелейди Жанбаш сыртдан сал бла. Къан кюнле келгендиле Хасаннга, Сууукъ къуугъун барады Бахсаннга. Ёлтюргенле барадыла къачаргъа, Мурат этелле жалчы ырысхынгы чачаргъа. - Беш жылны мен жалчылыкъда да айландым, Кече бёрю болуп, кюндюз ит болуп. Жанбаш сыртда, къама кирип, сойландым, Мен барама зор дуниядан, тюп болуп. Хасан чыкъды аман кюнде Жалпакъгъа, Осуят этед Дауумхан этген къалпакъгъа. Аны малларын дорхха уруп сатдыла, Кюмюш къамасын залогга салып тартдыла. Тулпар Хасан ёлюп, Сынла сыртында жатады, Къаны саркъад, кёк кырдыкны толтуруп, Сюйген къызы ариу Дауумхан жиляйды, Жаз башында кёк кырдыкга олтуруп. Хасан ёлдю, Дауумханны чакъыра, Къойлары къалдыла ызындан макъыра, Тууралгъан санлары сырт башында солуйла, Итлери уа тёгерегинде улуйла. Жаш тенглери къуугъунуна келелле, Жалчы уланла бий-бай къолдан ёлелле. Жалчыла жалчылыкъ жолну баралла, Байла къан бла абдез алалла. Жан береди тулпар Хасан, кериле, Ёлюп барад, Дауумханнга термиле. Тулпар Хасан ёлдю, энди ол жатар, Дауумханнга не хадагъ а танг атар? Ариу мёлек Кечеле узун а, да кюнле къысха, Тангнга деричи, ой! Сюймеклик ачыуун мен а сынамагъан эдиг Санга деричи, ой. Мен баргъан эдим уллу Тебердиден Таш-кёпюр элине къонакъгъа, Башым а къалгьанды, ах, мен жазыкъны Быллай таурух бла жомакъгъа. Огъары Тебердиге биз жетгенлей, Бир белек атлы кёрюндю. Аланы кёргенлейин а, сабий акъылым Ол таугъа-ташха бёлюндю Алларында келген ана къарындашым, Ол мени сарнатды, улутду. Шибиля тийгенча, жетип ургъанлай, Сау санларымы къурутду. Къулгъа баргъанса деп да, мен жазыкъны Къайтарып элтдиле элиме. Ат къамичиле да, дейди, шууулдап, тиелле Мени, къылча, инчге белиме. Гюняхым а жетсин ана къарындашларыма - Ол Герий бла Къасботха. Мен жазыкъны, дейди, была миндирдиле Былай агъач атха. Бу манга жетген къыйынлыкълагъа Да тюз адамла къарайла. Атны юсюнден акъгъан къанымы Бу калак итле жалайла. Къамичиле тийген санларымдан Тынч жаталмайма, керилип. Энди ёлюп, кетип барама, Рамазан, Жюрегим а санга термилип. 
жүктеу/скачать 3.21 Mb. Достарыңызбен бөлісу:
|