Отарланы Омар Ноталаны жазгъан Аслан Дауров Музыка редактору Этчеланы Музафар
жүктеу/скачать 3.21 Mb.
|
- Бұл бет үшін навигация:
- Байлагъа, бийлеге къажау жырла Бекболатны жыры
- Баллада жырла Къубадийланы жыр
- СЮЙМЕКЛИК ЖЫРЛА БЛА ИЙНАРЛА Айжаякъ
- Биз ушайбыз бир бирибизге
Абдулкеримни жыры Балыкъ айланчындан тизилип чыгъад Бу эркечлени аллары. Ол окъ тийгенлей, къырылып тюшгенд Абдулкеримни санлары. Абдулкеримим, мени Хызирим, Малланы таудан аудургъан. Ой, Бекки улучукъ, алай а кёреме, Бизге къара къанла жаудургъан. Ол Беккяланы ол Рамазан, Къуууп, ызларындан жетгенди. Ол Беккя улуну алай жангыз огъу Былай тёртеуленден ётгенди. Ол Беккяланы ол Рамазан, Жыйырма жылы жетмеген, Быллай сейир, тамаша, айтхылыкъ ким кёрюр, Атхан огъу тюзге кетмеген? Энди бир ушкокла чыкъгъандыла, кюнюм, Ой, инчге болуп тешиги, Бахсанчылагъа барып, кесинги ёлтюртмесенг, Атангы малы жокъмеди? Ол аман кюнде сауут алгъанед Бу Беккя улучукъ къолуна. Алай кесим кёпме, дел айтыученг, жазыкъ, Бахсанчыланы онуна. Кимледен эсе да уста тыныучуем Абдулкеримни жашлыгъын. Ах кюнюм, кимле тешип алдыла Къан жугъу болгъан башлыгъын? Сюрген малларынгы сюрюп баралла Ол Бургусантда базаргъа. Мен орус писарь болуб'а къалгъыем Протоколунгу жазаргъа. Протоколунгу мен жазсам эди, Женгил битеред ишлеринг. Алай багъыр окъла санагъандыла, ах кюнюм, Нанымы къозу тишлерин. Ой, къолумдагъы къобузум, алан, Ол калиндордан кетерик. Ол Беккя улучукъ ёлтюргенди, дейле, Кезиую анга жетерик. Ол Балыкъ бла Бахсанны арасы, Ой, адам ётмез тау болсун. Уручуланы къырып къойгъан эсе, Ол Беккя улучукъ сау болсун. Абдулкеримге окъ тийгенд, дейле, Ой, анга дарман жарамаз. Ол окъ тийгеннге дарман жарамайды, Сют баш гыбытха кьарамаз. 
Байлагъа, бийлеге къажау жырла Бекболатны жыры Алай бек битгенди Холам агъачны, он, кёгёти, Бий Омар болгъанды жаш келинлени, ой, ёлети, Алай къул жигити къаты болады, ой, бек болад, Ой, аллай жигит а ол Махийланы, ой, Бекболат. - Ой, Акъ къаяда да мен токълуланы, ой, кютеем, Ой, Акъ къаяда да мен кёп жугъутур, ой, кёргенем, Ой, санга сормай а атаргъа болмай, ой, келгенме. Кел, Омар, бюгюн биз ол Акъ къаягъа, ой, барайыкъ. Ала азыкъларын а, ой, къолларына, ой, алдыла, Алайдан ёрлеб'а ол Акъ къаягъа, ой, бардыла, Омар бийден Бекболат кийиклени, ой, жашырды, Артындан тюртюб'а ол Акъ къаядан, ой, ашырды. Ой, Акъ къаяда ол артиш чырпыла, ой, кёп болур, Холам жарлысы да ол бий Омардан, ой, бир солур, Ой, Бекболат эди ол кийиклеге, ой, къараучу. Бий Омар да болгьанды жаш келинлени, ой, мараучу. Уугъа чыкъгъаненг ол кийиклеге, ой, буулагъа, Эркин этмей эди ол жерден чыкъгъан, ой, суулагъа, Ой, энди Омар а ол кийиклеге, ой, къарамаз, Жаш келинлени да ал кечелерин, ой, марамаз. Ой, Акъ къаяды да жугъутурлу, ой, текели, Къаяда къалгъанды ол Омар бийни, ой, кекели. 
Къанаматны жыры Сау жети жылны да мен Морх башында тургъанем, Он, ийнаныгъыз, кийикле бла къош болуп, Ит бийле бла уа ачы къазауат этерем, Акъбаш къамама ол эки къолум бош болуп. Ол жети жылны да мен къара агьачда жюрюдюм, Кече бёрю болуп, кюндюз ит болуп, Къолайсыздан юсюм сирке, бит болул, Асыры ачдан бу къара суула сют болуп. Ой, мен жазыкъны да киши алмайды, жюк болуп, Ой, да мен бюгюнлюкде кетип барама, Сау Къарачайда бу кесим биле, тюп болуп, Къанамат хариб'а бир алай айтып сёлешди: Къобугъуз, уланла, бу туруу - туруу тюйюлдю, Ол дуния баргъан бу Россейге ётейик, Бу жарлы халкъгъа да бир тюзлюк излей кетейик, Оноуубузну да Хубий улуна айтайыкъ. Хубий улу айтды: "Ой, къонакъларым, жанларым, Мени хатымы да оноучула уста таныйла, Гюллюланы Хажи-Бекирге барыгъыз". Гюллюланы Хажи-Бекирге бардыла. Ит Хажи-Бекир а тюлкю кибик сюйюндю, Аны къатыны да бир жаулу-бишли хант этди, Ол итден туугъан Къуран алып, ант этди, Сауутларыбызны бу къолубуздан тас этди. Къасбот эрттен бла, ой, алай айтып сёлешди: - Мени къарындашым, жигит туугъан Къанамат! Тур, Къанамат, бизге болур болгъанды, Тёгерегибиз да ма часовойдан толгъанды. Эбзеланы Алийни жашы Къанамат, Тулпар болсанг да, ёлген кюнюнге жарамад. Тёнгереп тюшдюнг сен, бердан окъну кётюрмей, Ант этген эдинг жауну къоймазгъа ёлтюрмей. Ол дуниялада жилягъан тёре бар эсе, Да жиляй болур Къанаматны анасы. Къазауатда аны къолуна жетмей къалгъанды Дюгерли Азнор берген а акъбаш къамасы. 
Гапалау Жайлыкъланы къоруй кетди, ханс болду, ой, Жарлы балам бу дуниядан тас болду, ой, ой, Анасына жигит туугъан Гапалау! Стаутда толу къазан къайнайды, ой, Сени юсюнгде тогъуз а къазыкъ ойнайды, ой, ой, Анасына жигит туугъан Гапалау! Галалауну ёлтюрдюле, сойдула, ой, Жаш къатынын ау тюбюнде къойдула, ой, ой, Анасына жигиттуугъан Гапалау! Стауатынг жилян жырмаз мурсады, ой, Сени ёлтюрген Ижаланы Мусады, ой, ой, Анасына жигиттуугъан Гапалау! 
Домалайны жыры Эрттеден бери мен Къарачайгъа кирмеучем, Байгъа болмаса, жарлы адамгъа тимеучем. Къапхынладан а мен жюзден азын сюрмеучем, ой тай-та, Къапхынланы да бир белюп-белюп сюрюучем. Вагоннга къуюп да не Армавирге ийиучем, Армавирде да бир гиняз кибик жюрюучем, Мен тура эдим да ол къонакъ юйде олтуруп, Столуму да сыйлй ичгиледен толтуруп. Гапполаны не Ойдур келди юсюме, Кюндюз жолукъгъанма мен, кече керген тюшюме. - Турсанг а, Домалай, турур кезиуюнг болгъанды, Элкъушну башы да бир къапхын атдан толгъанды. Ол кезиуде да бир атланыргъа сюймеучем, Чыгъара барып а елтюрлюклерин билмеучем. Ёрлеб а биз Элкъуш башына баргъанбыз. Гаппо улу да не керохуна узалды, Чолакъ Бияслан а, тартып, къамасын чыгъарды. Элкъушну башы да ол къызыл къандан къызарды. Сени жауунг а аман ниет тутсун тенгине. Сени жауунг аман ниет тутсун тенгине, Баш токъмагъымы да кесип сукъдула женгиме. Ана къарындашым ма Голаланы Наныды, Оруслу къатыным теппе кекелимден таныды. Елген елюгюмю да элтип жаордан атдыла, Мени ол кек атымы, Теркден ётдюрюп, сатдыла, Алтын къамамы да, залогга салып, тартдыла, Олтургъан жерде да мени жырымы айтдыла. Шиткъаладады эки ийнарал жууугъум, Дунияны да ма къол аязлай жюрютген. Къанымы да алалмай, кетип барама, Ой, Гапполаны да ма Ойдур деген бир итден. Сюйген тенгинг Гапполаны Ойдурду, Чыгъара барып, чолакъ Биясланнга сойдурду, Халал къанымдан харам итлени тойдурду Ойдур да кетгенди бу дуниядан, тюп болуп. Домалай жатады, ма къая ыранда, къурт болуп, Ёлген а ёлюгюмю, элтип, жардан аталла, А, къая ыранда да бир жау чыракъла жаналла. 
Баллада жырла Къубадийланы жыр Ахгон ари алатон къаратоннга улан туумайд, къыз туумайд. Болсада, алатон къаратоннга туугъанед Къубадий жангыз ул, ой. Къубадийге уа бир да улан туумайд, къыз туумайды, ой, Эте эдиле, къартлыкъ тонунг деп, ала тон. Къубадий къалды тогьуз къатындан къаратон, ой-ой. Ахшы жууукъла жыйыла, къуюла келе эдиле, ой-ой. Ахшы жууукълары жыйыла, къуюла келе элле, ой-ой. Анда, жаным, сыйлы ичгиле иче эдиле, ой-ой. Къубадий да бир да, бир да ышармайды, кюлмейди, ой. - Къубадий, сен а нек ышармайсан а, кюлмейсе? - делле. - Ай, аланла, ким къызына, ким жашына кюледи, - деди, ой-ой. - Да мен сора неме къарап кюлейим? - деди. Анда делле Къубадийге: "Кимни алыргъа?" - дедиле, дейди, ой-ой. Анда, къуртхаланы жыйып, былай сордула, дейди. Къуртхаланы таматалары Ашдырхан алай айтып сёлешди, ой: - Ай, уланла, муну сиз бизге сора эсегиз, - деди, - Анда барды Бийкъанлада эки ариу эгеч, ой-ой. Аладан бирин Къубадийге алыгъыз. Таматаларыны аты болур Мёлеуше, - дейди. - Кичилерини уа аты болур Жансарай. Мёлеушени тили аман, къолу ахшы, ой-ой. Жансарайны къолу аман да, тили ахшы, ой-ой. Анда, жаным, тили аманны кюню аман, делле, ой-ой. Тили ахшыны болур, жаным, кюню ахшы. Ахшы кёрдюле Жансарайны, Къубадийге алдыла, ой-ой. Жансарайдан туугъан эди Къубадийге тогъуз улан. Тогъузусу тогъуз киши болдула быланы, ой-ой. Тогъузусу бирер кёк шаулухха минелле. Жаш келин отоулагъа была сормай кирелле, ой-ой. Жайылдыла, къолларына Къуран алып, ант этдиле. Тапхан ана бла эгечден сора, бир аманлыкъдан таймайын жюрюрге делле. Бир аманлыкъдан да тыйылмайын, была бардыла. Аналарыны эгечлерине - Мёлеушеге была жетдиле. Мёлеуше уа быланы ма былай айтып къаргъады: - Сиз аманла, тели ауруудан къутуруп, къара агъачха кетигиз, - дейди, ой, - Сизни анда ёлсюн экигиз, къайтсын бери жетигиз. - Жер жарылды, жексиз жерден жек чыкъды, ой-ой, Биз хариплеге бу аман ауруу нек жукъду? - дейди. - Этген аманлыкъларыбызны тоба бла къоярек, - делле, ой-ой. - Биз бу ауруудан къырылмай, саулай къутулсакъ, - делле, - Къурманлыкъгъа къуба ёпозле соярек, - делле, ой-ой, - Жаш келин отоулагъа кириучюбюзню кьоярек, - делле. Къубадийни къатыныны аты - Сарайды, дейди, ой-ой. Бийкъанлада тогъуз саусузгъа къарайды, дейди, Аны юсюне да тогъуз жамычылыкъ тарайды, дейди. Орамны ёрге бир жаш келинле келдиле. Келе келип, кенгешле, ушакъла этдиле, ой. - Бу аманла къорасынла, - деп, жийиргенип, артха айланып кетдиле. Къубадийге уа туугъан эди тогъуз ул, Таматалары болур быланы Иналукъ. Иналукъ жатады, ма тели ауруудан къыйналып, Ауруу тийип, къызыу ауруп, сылыт болуп, ой-ой-ой. Иналукъ да аланы терезеден къарап кёргенде, ой-ой: - Кичи къарындашым эр Элкъач, - деди, - Орамны ёрге бир жаш келинле келедиле, - деди, ой-ой. - Келе келип, кенгеш ушакъла этдиле, бизден жийиргенип, артха айланып кетдиле. Сен айланнган жерде адам кирмеген жер кёрдюнгмю? - Мен айланнган жерде, - деди, - анда Акъ сууланы башында къыз дорбунла, - деди. Тебрелле была, Акъ сууланы башы дорбунлагъа бардыла. Кичилери Элкъач ёлтюргенед саулукъ марал, дейди. Саулукъ маралны сютюн суулукъгъа саудула, ой-ой. Суулукъ толу сютню, элтип, дорбуннга салдыла. Жерден чыкъды бир къызыл жилян. Келип, ол суулукъда сютню ичгенди, ой-ой. Къайтып, тешигине сыйынмай, биягъы суулукъгъа къусханды. Таматалары Иналукъ, аны къарап кёргенде, дейди, ой-ой: - Туругъуз, уланла, къысха ёлюр кибик от тапханма, - деди. Бирден къопдула, суулукъда сютню, къашыкъ юлюш этип, ичдиле. Мында ёлдю экиси, бурун кибик, сау болдула мындан жетиси. Дюгер Бадинаты, Малкъар Басияты жыйылдыла Голлугъа, дейди. Къубадийлагъа ала тюп оноула эте эдиле, ой, ой. - Ол биченлик мени, бу сабан сени, - дей элле, дейди. Жыйылдыла да, тюп оноула этдиле, дейди. Аланы ичлеринден чыкъды ахшы киши Ийнакку, дейди, ой-ой. Ийнакку да былагьа былай айтып сёлешди, ой-ой: - Ай, аланла, бюгече жатдым, жукъладым, тюш кёрдюм, - дейди, ой-ой, - Бу сиз этген ишлени болмазлыкъча иш кёрдюм, - деди. - Къыбыладан тогъуз жулдуз учдула, - деди, ой-ой, - Экиси мутхуз, жетиси жарыкъ жулдузла, - деди. - Келе келип, кюн батханда, къара булутха кирдиле, - деди, ой-ой, - Андан да бирер кёгюрчюн къапха кирип чыкъдыла, - деди. - Экиси быланы Къубадийланы уллу арбазда ат илкичге къондула. - деди, - Жетиси уа, кирип, Къубадийлада къонакъ болдула, - деди. Огъары Оккумгъа бу тейри эшикле ачылды, ой-ой, Тёбен Оккумну къала ташы чачылды. 
СЮЙМЕКЛИК ЖЫРЛА БЛА ИЙНАРЛА 
Айжаякъ Айжаякъ, ала жаулугъунг Ариу жарашады бойнунга. Мен а сукъланама, ёлеме Мамукъдан жумушакъ къойнунга. Он, жылкъы анасы - акъ байтал, Ол а къарыш къулакъ тай табар. Мен сени анангы уста таныйма, Ол а къалгьан къатынладан файгъамбар. Ой, жылкъылада хора тай, Салчы аягъынгы тузакъгъа. Манга эки къанат а битгееди, Айжаякъны алып кетерге узакъгъа. Ойра, тузакъ, дейле, къоймайла, Къанжыгъамда жибек аркъаннга. Сора хора дейле, къоймайла Кесим миниучю тарпаннга. Ой, тарпан тайла ойнайла, Ала ойнагъандан тоймайла. Сени ананг манга сормай берлигед, Къалгъан сюймегенле къоймайла. Ой, тулгъа барлыкъ сен болсанг, Санга менден игини ким табар? Иги тулгъа бармай къалгъан а къатын, Артда бушуу этип, жер къабар. Ой, жылкъы анасы - акъ байтал, Ол а сакъат болду, ырахын. Ойра, мен сюйгенлей сюймесенг, Сени болсун мени гюняхым. Ой, Багъыр улу къурурукъ, Къаллай хоралагъа минеди, Къара кёрпе тонла киеди, Эрсиз къатынланы сюеди. Кел, биз Тебердиге барайыкъ, Жашарбыз, къанжалбаш юй салып. Башыбызгъа уллу кюн салып, Эшиклеге къаты чюй салып. Багъыр улу Къаспот деген - кюл аякъ. Тапкада болур, жаным, чын аякъ. Тапкадан тюшюп, аякъ ууалсын, Шахар Тебердини суу алсын. Ойра, тауда отлагъан кийикле, Ала жукъламайла, сойланмай. Мен сени алай алып къоялмам, Иги сагъыш этип, ойламай. Туура болумунгу мен айтсам, Айжаягъым, ариу акъ жаулукъ, Къалмагъанды энди сени юсюнгде Керти алгъын кибик махтаулукъ. 
Кулина Ма сууну ёрге жюзеди, дейле, Ол ала чабакъ, акъ чабакъ. Мени жанымдан сюйгеним сенсе, Кулина деген акътамакъ. Ой, Сенден ариу кёрмедим, Кулина, Ой, мен жашагъан журтлада. Санга ушатып, гокка хансланы Басмай жюрюйме сыртлада. Ой, сенден ариу кёрмедим, Кулина, Да мен айланнган элледе. Санга ушатып, сапран чабакъны Излеп айланама кёлледе. Ой, сенден сора болурму, Кулина, Биринчи майда акъ кийген? Ой, менден тели болурму, жашла, Сау жети жылны къыз сюйген? Ариу Кулинаны сюйюп тебредим Аны эки къара къашындан. Ол сени ючюн кетип къалама Жарыкъ дунияны башындан. Сени келтирсем, соярма, Кулинам, Юйде асырагъан къоюму. Юч кюн, юч кече этерме, Купинам, Сени келтирсем, тоюнгу. Ой, къолумдагъы жюзюгюм, Кулина, Алып салгъанма базманнга. Мени жанымы жашлай жояргъа Не кёрюннгененг сен манга? Аманны, игини къайдан билейим? Къайынды аны билмеклик. Жанымдан сюйген затым жокъ эди, Аны унутдургъанд сюймеклик. Сыртлагъа жауун жаудургъан Кулина, Ёзенлеге кюнню тийдирген. Кулинадан сора мен кёрмегенме Жыйырма жашны сюйдюрген. 
Таукъан Мени сюигеним Таукъан болгъанды, Тау кийиклени мараучу. Сени таныгъанлы, кесим болгъанма Келлик жолунга къараучу. Къараучу кесим болгъанма, Таукъан, Ол сен жюрюучю жоллагъа. Мен сени бла уа тюшюп къалгъыем Таулада терен къоллагъа. Ол аргъы ёзеннге кюн тиймейд, Таукъан, Мен кюн тийгеннге барлыкъма. Арсарлы бола уа сен турлукъ эсенг, Болжалны кенгнге саллыкъма. Болжалны кенгнге мен салсам, Таукъан, Кимле жюрютюр жуубын? Эки сюйгеннге уа себеп болгъанны Айтып айтмайла сууабын. Ой, къолумдагъы къобузум, алан, Акъ кюмюшденди тюеги. Таукъанны сюймейин, ой, мен не этейим, Суратха ушайды сюеги. Аргъы таулада туманла, алан, Берги таулагъа къоналла. Келип, къатыма уа олтурсанг, Таукъан, Ол ушагъыусуз суналла. Таукъан таулагъа кетгенди бюгюн, Тау кийиклени мараргъа. Келигиз, къызла уа, ма биз барайыкъ Таукъанны аллына къараргъа. 
Сюймеклик жыр Кел, мин, ариу, файтоннга, Байду да минер биргенге. Эй, мен жюз файтоннга приказ бергенме Сени биргенге тебрерге. Жюз файтон бла барырем, Юйюнгю аллына жол салып, Эй, отоу терезеден бир къарагъыем, Эки жан сюекге къол салып. Къаяда къаплан жатханлай, Къамагъа бичакъ такъгъанлай, Эй, жазыуунг жетсе, келип къалырса Жалан аякълай, чапханлай, Мен таугъа тогъай салмасам, ариу, Тюзде файтон бла бармасам, Эй, ёлсем, къабырым а эки жарылыр, Дуниямда сени алмасам. Кел, мин, ариу, фаитоннга, Хамут салгъанма сары атха, Эй, жай чилледе да безгек боллукъса, Алып кетмесем наратха. Бал чибиним бал этер, Къанатын жайып кенг, жетер. Эй, ажал инбашда, болжал тау башда, Толу муратына ким жетер? Суу шорхагъа минейим, Темирден кюбе киейим, Эй, этген тузагъыма аягъынг а тюшюп, Амалсыз кюнюнге тюбейим. Тау артында жылкъыла, Эбзеде токълу къыркъыла. Эй, ариу, алакёзюм, къайдан келесе, Базар мамукълай сытыла? Тауну артында чилле сюргенме, Керекли болсанг, алырса. Эй, алтын челеклеринг, кюмюш суу агъачынг, Эриксенг, суугъа барырса. Кел, мин, ариу, фаитоннга, Да къобуз согъа, чайкъала. Эй, сол жанынгда кесим барлыкъма, Сорсанг а, жууап къайтара. Кел, мин, ариу, фаитоннга, Бирден минейик, аудурмай. Эй, устол ашаугъа сени къаратмам, Черномор ийнекле саудурмай. Ой, ариучугъум, къайдан келесе, Кесинг кесинги сюйдюрюп? Эй, алып кетерикме ариу алдакёзню, Автомобильге миндирип. 
Чийгоша бийче Ай! Мени да атым Чийгоша бийче, о, болмасын! Генчыкъадан да Бир сырма аягъына ётгюнчю. Ай! Эки аралыкъгъа да, Мен сокъгъан окъа бир къурдурмасам, Къабартыны да Къыздан а айбат жашларын Юч такъыйкъагъа да Мен тик кюнлюмден бир къуйдурмасам, Балыгь'а сууун да адам мыллыкдан Мен тыйдырмасам. Ай! Мен аллай жашха барлыкъма: Жангыз айыл бла да Бир ючлю тайгъа миннгеннге, Андан да жыгъылмай, Ма тик кюнлюмден эннгеннге. Мен барлыкъ тюйюлме Тик кюнлюмден чыкъмай ёлгеннге. Ай! Мен аллай жашха барлыкъма: Къарындашларымча, жангыз айыл бла Бир ючлю тайгъа миннгеннге, Андан а жыгъылмай, Биртик кюнлюмден эннгеннге. Балыкъ сууунда да, Къара балыкълай жюзгеннге. Ай! Мен аллай жашха барлыкъма: Акъ къаптал да, Бир къара чепкен да кийгеннге, Къара чепкеннге уа Акъбаш хазырла тизгеннге, Атха да минсе уа, Ол атны белин юзгеннге. Ай! Жибег'а аркъанны О тёбеннгиде юзгеннге, Балыгъ'а сууунда да, Къара балыкълай жюзгеннге. О тик кюнлюмню уа Башы да къырпакъ, тюбю - буз. Чийгоша бийче да - Сёзюне керти, ариу къыз. Ай! Къабартыдан а Жашла тохтаусуз келелле. Барыб'а-барыб'а, Ма Чийгошаны кёрелле, Жангыз айыл бла да Бир ючлю тайгъа минелле. Аны бла да Ол тик кюнлюмге ёрлейле. Ай! Андан а чабып, Тик кюнлюмден а энелле, Суудан а чыгъалмай, Ол жарлы жашла ёлелле, Тик кюнлюмню да Тюбю да терен кемеуюл, Чийгоша бийче да Бир элни жутхак эмеуюл. Ай! Ол киши энмейди да Ма Чийгошаны къапханындан. Талау тийсин а Ючлю тай атынгы жапхагъындан. Ай! Энди киши да Келмейд деген заманда Бир атлы келиб'а Тохтады алай арбазда. Кёк кийимли, Тюбюнде да кёк ючлю тайы, Ат жерни тыйгъан а Болур а жангыз айылы. Ай! Чийгоша бийче да, Адамла ий да, келсинле, Ол мен этерик да Ат оюнланы кёрсюнле! Ол къызыу чыгъа эд Тик кюнлюмню бузуна, Чапдырып эне эд Ол тик кюнлюмден ызына. Ай! Атылып келди да Ол Чийгошаны юйюне, Тыяндырды да Чийгошаны аман кюнюне: - Итле, жыйылыб'а, Гажини юсюнде ёлгенча, Халкъны къырдынг да, Аллайдан бир сый кёргенча! Ай! Керегинг жокъду да, Мен сени алмам, уялмай. Жашауунг кетсин а Бир да жарымай, къууанмай? Чийгоша къалды да Ит ийисгеген сюекча, Багъасы чыкъмады, Багуш кюреген кюрекча. Ай! Ючлю тай эди да Ол эр кишини миннгени. Чегемли сохтады Ма Чийгошаны сюйгени. 
Мажирни жыры Ол Мажир атлы, тор атлы, Кючлю аракъьщан бал татлы, Киеу жёнгерле чыкъдыла, Жыйырма бла алты атлы. Ол Мажир къысхан акъ башлыкъ, Мутхуз кечени жарытхан. Къарабашланы къантор ат, Мажирни манга танытхан. Ма кюн тийгенди классха, Сал терезени жабыуун. Душманла, жаула тыймазла Эки сюйгенни жазыуун. Мен терезеден къарайма, Мажирни орамда кёреме. Мажир мени таба къарамайд, Ачыуум келип ёлеме. Чегет агъачха къарасам, Чегет агъачда бёрю бар. Мажирни сюймей не этейим, Эки кёзюнде нюрю бар. Акътамакъ баппуш келеди Аргъы Къобанда, жёбелеп. Ой, тауну башына къар жауса, Келеди андан, себелеп. Ма кёкде баргъан къолан къуш, Къанатларынгы къагъа бар. Мажирге салам жазгъанма, Сен къанатынга тагъа бар! Къайдады деб'а сорсанг а - Къобанда окъуйд школда. Ысхарла башлыгъы бойнунда, Орус китабы къойнунда. 
Сюймеклик жыр Ой, алакёзюм, ай, къаракъашым, Биз Акъ-къалагъа кетейик. Ол алмаса да, не этерикме? Ариу ийнарла этейик. Мен суугъа сюек алай атханма, Ызындан эгер сюргенлей. Мени сюйгеним къоюп кетгенди, Башха сюйгеними билгенлей. Ой, мени дуниям жарыкъ болуучед, Сен бизни юйге киргенлей. Ой, мени къоюп, къайры бараса, Да сюйгеними билгенлей? Ой, кёзюм чыракъ алай барады, Ол сыфатынга, сынынга. Бичакъчыкъ болуп, тюшюп къалгъыем Ол къама тюбю къынынга. Сен терезеге нек тыянаса? Артынгда тура шинтигинг, Сен, мени къоюп, башханы сюйсенг, Ол болгъуед кишилигинг. Ой, кёзюм чыракъ алай барады Тургъан юйюнпо башына. Жангыз къашынгы ауушдурмазем Сау Нарсананы жашына. Ой, кёзюм чыракъ алай барады Да белингдеги къамагъа. Сен мени ала неге бармайса Да Акъ-къалада ананга? Къара чачлыса, ёхгем жашчыкъса, Бурма чачынгы тарачы. Ызынгдан къарап, термиле къалгъанма, Бурулуп, манга къарачы. 
Биз ушайбыз бир бирибизге Ой, сары дарийд мени да кийгеним, Да саргъалат да билегим, Сени уа жашлай бир бек сюйгенме, Жарылып къалад жюрегим. Терезе аллында мен жатханма, Айны жарыгъы кёрюнсюн. Атамы, анамы харам этерме, Ой, ариучугъум, сени ючюн. Ой, эрттенликде кюнню тийгенин Кече къарангы сунама, Мен сен ариудан къалгъан заманда Айланып къалсын къыяма. Ой, санга жазгъан да письмоларым - Терезе башы къангада. Ой, манга берилген сюймекликден Къадарынг берсин санга да. Ой, санга жазгъан письмоларыма Кесингден башха къарамаз. Ой, сюймекликден къыйын зат жокъду, Унутуп къойсанг, жарамаз. Экибиз бирге бир бек ушайбыз, Бир атаны къызы, жашынлай. Экибиз бирге алай ушайбыз, Тирменни эки ташынлай. 
жүктеу/скачать 3.21 Mb. Достарыңызбен бөлісу:
|