КИРЬЯН ВАРЬЯН – Эжва кывтыдса эпическöй геройлöн мифологизируйтöм образ

КИРЬЯН ВАРЬЯН – Эжва кывтыдса эпическöй геройлöн мифологизируйтöм образ.

Жанр боксяньыс Кирьян Варьян йылысь сьыланыс, буракö, духовнöй кывбур да героическöй сьылан костын. Сюжетыслöн роч аналогияыс – сëръя былина Бутман йылысь, кодi эм сöмын чилимдiнса эпическöй традицияын. Тайö öткодьлун вылас индöны и сьылан сюжетсö артмöдысь формульнöй темаяслöн типичностьыс да сiйö, мый багатыр нимлöн артмöмыс абу ясыд. “Роч муса сар” Левоник нимлöн да роч багатыр сюжетъясса сар нимлöн кыланногыс öткодь. Коми сьыланын персонаж системаыс условнöй, зэв матын мойдсалы. Мойдса колорит вылö индö и багатыр вöв Сивка-буркалöн петкöдчöмыс. Сiйö паныдасьлö и мукöд коми героическöй сяма сюжетын. Мойдса поэтика сяма и сьыланлöн заводитчöмыс: лэбачьяс юöртöны сарлы вöрöглöн уськöдчöм йылысь Роч му вылö. Тайöс жö вöталö и Педöр Кирон. Сьыланас медкузя висьтавсьö сы йылысь, кыдзи сар корö Кирьян Варьянöс дорйыны Роч мусö. Кирьян Варьян нинöм оз тöд неминуча йывсьыс да олö важ мозыс. Геройлöн вичкоын (тайö местаыс пыр фигурируйтö коми эпическöй сьыланъясын) сулалöмлöн ыджыд тöдчанлун абу. Кирьян Варьянлысь ожман кежлö дасьтысьöмсö петкöдлöма кыдз тöдса юкöн “багатыр вöлöс седлöалöм йылысь”. Ачыс тышыс – тшöтш жö тöдса мотив: “Сiя мунас дай войска вылö,/ Öтарö гöнитлас – пурысь усьö,/ Мöдарö гöнитлас – пурысь усьö,/ Коймöдорö гöнитлас – пурысь усьö...” Бöръя юкöнас сар аттьöалö багатырöс да кöсйö мынтысьны. Сьыланлöн медбöръя визяс Кирьян Варьян öтдортчö мынтысьöмсьыс.

Кирьян Варьян йылысь сьылан – сьылöмöн мыччöдöм новелла сяма типичнöй мойда сюжет багатырлöн подвиг йылысь. Тадзи висьталö и ачыс сьылысьыс (“сьылана коми мойдъяс”).

Роч му дорйысьлöн абу некутшöм пас, кодi эськö мыччöдiс сiйöс кутшöмкö торъя типа геройöн. Не артавны кö татшöм паснас сылысь тшаплунсö сар водзын – мынтысьöмысь öтдортчöм.

Мифоэпическöй рöмыс тайö сюжетас эм, буракö, сöмын геройлöн кодируйтöм нимас. А. К. Микушев чайтлiс, мый этимология боксянь Кирьян Варьян сулалö öти визьын мукöд христианствоöдзса нимкöд – Зук, Тунныръяк, Пам, Юрка, Йиркап. Эжва кывтыдса сëрнисикасса кирйыны, гирйыны ‘петляяс разявны, сунисъяс орлавны’, варйыны, варкöдны, варöдны ‘лямöдны, личкыны’ подув вылын позьö чайтны, мый Кирьян Варьян нимлöн вежöртасыс ‘пусь-пасьвартысь’. Тайö тыдалö и сыын, кыдзи Кирьян Варьян вермасьö вöрöгкöд. Сайöдöм этимологияа нимыс вуджö аснимö, лоö персонажыслöн характер сюрöснас. Тöдмавны геройöс отсалö и уджсикасыс: сiйö вöралысь. Татшöм ногöн, висьтсö тэчöма сiдз, медым кывзысьяс “тöдмалiсны” выль нима геройöс. И став художественнöй средствоыс уджалö та могысь жö. Буракö, Кирьян Варьянöс оз ков сувтöдны öти визьö роч багатыръяслöн традицияа эпическöй образъяскöд. Регыдджык Кирьян Варьян лоö локальнöй ëн морт образлöн типöн сëръя преданиеясын, кодъяс тöдсаöсь Войвыв пасьтала. Преданиеясыс петкöдлöны сëръя тшупöд эпическöй мыв сöвмöмын – массöвöй йöзкостсасянь исполнительно-индивидуальнöйö вуджöм.

Литература: Микушев 1973.

А. В.
КОДАЧСА ЯКОВ – Печораса комилöн фольклорса герой, тун-тöдысь, кодлöн прототипнас вöлi збыль морт.

Тун тöдöмлунъяснас Кодачса Яков вöдитчылiс ëнджыкасö вöралiгöн да бурдöдчигöн. Сiйö веськыда шулiс, мый Енлы оз эскы, а эскö сöмын “отсасьысь ëртъясыслы” (ловъяслы). Öтчыд Кодачса Яков босьтчис петкöдлыны ассьыс тун вынсö. Сiйö вöзйис öти нывбабалы ветлыны вöрö да аслыс видзöдлыны, мый Кодачса Яковлöн тшöктöм серти вöрас пода йöрö чукöтрчас этша вылö кыксë ветымын руч. Кодачса Яков эз пöръяв. Быличкаясын ëна паськалöма сюжет сы йылысь, кыдзи сiйö бурдöдöма синтöм вöралысьöс. Кык воча вок Иван да Василей вензьöмаöсь, кодныс бурджыка вöралö. Ичöтджык Иван вокыс вöлöма тунöн. Сiйö босьтöма часовня бердысь китыр му, шыбитöма Печора шöрö да шуöма нимкыв. Таысь мöд вокыслöн визувтöма кыкнан синмыс.

Кодачса Яков босьтчöма бурдöдны Василейсö. Тшöктöма ломтыны пывсян, вайöдöма пывсянас синтöм Василейсö да корöма, мед колясны найöс öтнанысö. Регыд сэсся чукöртчöм войтырыс аддзöмаöсь, мый пывсяныс гöгöр сотчö лöз биöн. Некод абу матыстчöма, сы вöсна мый Кодачса Яков водзвыв öлöдöма. Сöмын Иван шыбитчылöма пывсянланьыс, но сiйöс абу лэдзöмаöсь. Василейöс бурдöдiгöн сылöн вокыс вöлöма быттьöкö кык ипостасьын: öти Иваныс узьöма гортас, а мöдыс кöсйöма пырны пывсянас. Регыд биыс кусöма и пывсянсьыс петöмаöсь Кодачса Яков да синма нин Василей. Кодачса Яков висьталöма, мый Василейлöн синмыс вöлöма Печора шöрын джуджыд йир пыдöсын. Кодачса Яков кувсьöма 65 арöсöн. Винëвлунсö петкöдлiгас сiйö лыйöма асьсö пищальысь, но абу думыштöма, мый пиньыскöд тшöтш бырöма и тун выныс.

Кодачса Яков образлöн эмöсь веськыд аналогъяс шаман мифъясын: отсасьысь ловъяслöн петкöдчöм, бурдöдiгöн мöд муюгыдö символическöй ветлöм, винëвлун петкöдлöм.

Коми йöзкостса бурдöдчан практикаын вылö донъявсьылiс кодзувкотъяслöн да “кодзувкот выйлöн” бурдöдан выныс. “Кодзувкот выйыс” кольквижоват рöма, недыр кежлö мыччысьлö кодзувкоткаръясын водз тулысын. Вöлiны ас чвет йылысь эскöмъяс кодь жö чайтöм-гöгöрвоöмъяс кодзувкот вый йылысь. Мортлы пö сöмын öтчыд мойвиö аддзывны тайö шемöса вына выйсö. И оз кö сiйö некодлы висьтав да мавччас кодзувкот выйнас, лоас шуда, дзоньвидза да кутас овны лючки-бура. Кодзувкотъяссö бурдöдчан вина вылö чукöртiгöн видзöдiсны: пырöны кö найö кодзувкоткар вылас сувтöдöм сулляö, висьысьыс бурдас, а оз кö – бурдöдчöмысь тöлк оз ло.

Татшöм жö сяма эскöмъяс кодзувкоткарвывса “магияа шуд быг” йылысь пасйöма и башкиръяслысь да мукöд войтырлысь.

Литература: Ильина 1997.

И. Ильина
КОЗ быдлаын; коз пу зырян; кöз перым-коми.

Комияслöн традицияа мöвпсямын коз вöлi мужичöй семиотическöй полеын. Зыряна чужöм кагалöн батьлысь юавлiсны: “Ньыв али коз?”. Коз вежöртiс пиöс. Перым-коми мойдын висьтавсьö, мый пöль-пöчлöн вöлi куим пи. Найö мунiсны вöравны да вочаалiсны лëк тунöс. Туныс пöртiс найöс куим том козйö. Регыд пöль-пöчлöн чужис нöшта öти пи. Сiйö быдмис да мунiс корсьны вокъяссö. Сылы отсалiс бур тун. Бур тун пöртiс лëк тунсö куим лун кежлö козйö. Ичöт вокыс корсис сiйöс да кералiс. Ыджыдджык вокъясыс бöр лоины йöзöн.

Вöралысьяс чайтлiсны, мый вöрын медбур войколавны коз улын. Но сылысь быть колiс юасьны. Сэк козйыс видзис узьмöдчысьсö быд неминучасьыс. Вöралан быличкаясын бура тöдса сюжет сы йылысь, кыдзи коз видзö сы улын узьмöдчöм вöралысьлысь унсö. Войнас мöд коз корö сiйöс вокыслöн нимлун вылö, но сiйö шуö, мый колö видзны мортлысь унсö, да оз мун. Кык вöралысь юасьöмöн узьмöдчöны коз улö. Войнас найö кылöны, мый кодкö матыстчис да шуис, мый козйыслöн мамыс кулан выйын. Козйыс вочавидзис, мый сетiс йöзлы юрсюянiн да мамсö видлыны ветлыны оз вермы. Асывнас неылысь вöралысьяс аддзасны пöрöм пу. Сiйö и вöлöма козлöн мамыс. Вöралысь войколалiс коз улын. Туйö петiгас кылiс: “Ме абу на дась”. Кор сiйö кежис коз дорсьыс, лыбис тöв и козйыс пöрис дзик сы мыш сайö, но эз инмы.

Олöм / кулöм оппозицияын тöдчö козлöн йитöд кулöмаяслöн муюгыдкöд. Кулысь тöдысьлы вöрысь вайлiсны вужнас кодйöм ичöтик коз пу. Тайö козйыслы тöдысьыс висьтасьлiс. Кулöм бöрас козсö бöр нулiсны вöрö да садитлiсны важ местаас. Öти версия серти, перым-коми Пера-багатыр кувсис сьöкыд лэбач кыян ермöг везöт зэвтiгöн. Öтар помсö сiйö кöрталiс джуджыд пожöм бердö ю öтарас, а мöдар помсö пондiс кöртавны джуджыд коз бердö ю мöдарас. Везöтыс öшöдчис. Пера пондiс мый вынсьыс зэлöдны и козйыс чегис. Пера усис козйыскöд тшöтш да доймалöмсьыс кувсис. Йöзкостса эскöмъяс серти, ош кö вочаавлiс зонмöн нöбасьысь нывбабаöс, косявлiс сiйöс, а пытшписö öшöдлiс коз вылö. Дзебан öбрадын шойна вылö нуöдысь туй вылын гуалысьяс водзö вольсавлiсны коз лапъяс. Сiдз жö мичмöдлiсны невесталысь туйсö пывсянысь. Пывсянас сiйö колльöдчис нывкадыскöд, сiйö быттьöкö кулiс важ социальнöй статусас.

Перым-коми мойдын коз отсöгöн позьö веськавны мöд, енэжвывса муюгыдö. Чоя-вока кольöны бать-мамтöг да мунöны шуд корсьны. Найö воöны джуджыд коз дiнöдз да аддзöны пу вывсьыс быдсяма сëянсö да паськöмсö. Вокыс кавшасьö, но бöрсö лэччыны оз вермы, лясö коз бердас. Чойыс тшöтш кавшасьö, но и сiйö оз вермы лэччыны. Челядь гöгöрвоöны, мый му вылö найö бöрсö оз веськавны, кайöны вывлань, воöны енэжöдз да кольччöны сэтчö овны.

Литература: Грибова 1975, Климов 1990, Ожегова 1971, Ожегова 1989, Рогов 1858, Рочев 1984, Сорвачëва 1977, Sarapov 1993, ИИ ЧМ.

Н. Конаков