Қазақстан Республикасындағы мемлекеттiк жоспарлау жүйесi туралы

жүктеу/скачать 189.77 Kb.

Дата	04.03.2016
өлшемі	189.77 Kb.
	#38061

Қазақстан Республикасындағы мемлекеттiк жоспарлау жүйесi туралы

Қазақстан Республикасы Президентiнiң 2009 жылғы 18 маусымдағы N 827 Жарлығы

Қазақстан Республикасының ПҮАЖ-ы, 2009 ж., N 30, 259-құжат

Қазақстан Республикасы Президентi
мен Үкiметi актiлерiнiң жинағында
жариялануға тиiс

Мемлекеттiк жоспарлаудың тұтас және тиiмдi жүйесiн қалыптастыру мақсатында ҚАУЛЫ ЕТЕМIН:

      1. Қоса берiлiп отырған Қазақстан Республикасындағы мемлекеттiк жоспарлау жүйесi (бұдан әрi - Мемлекеттiк жоспарлау жүйесi) бекiтiлсiн.
      2. Қазақстан Республикасының Үкiметi жергiлiктi атқарушы органдармен және Қазақстан Республикасының Президентiне тiкелей бағынатын және есеп беретiн мемлекеттiк органдармен бiрлесiп 2010 жылғы 1 желтоқсанға дейiн қолданыстағы стратегияларды, тұжырымдамаларды, доктриналарды, мемлекеттiк, салалық (секторалдық) және өңiрлiк бағдарламаларды осы Жарлыққа сәйкес келтiрсiн.
      3. Қазақстан Республикасының Үкiметi:
      1) Қазақстан Республикасының Стратегиялық даму жоспарын, Елдiң аумақтық-кеңiстiктiк дамуының болжамды схемасын, мемлекеттiк бағдарламаларды, аумақтардың даму бағдарламаларын, мемлекеттiк органдардың стратегиялық жоспарларын әзiрлеу, iске асыру, мониторинг, бағалау және бақылау жүргiзу ережесiн 2009 жылғы 1 қыркүйекке дейiн белгiленген тәртiппен Қазақстан Республикасы Президентiнiң Әкiмшiлiгiне енгiзсiн;
      2) Әлеуметтiк-экономикалық даму, салалық бағдарламалардың болжамын әзiрлеу ережесiн 2009 жылғы 1 қыркүйекке дейiн бекiтсiн;
      3) осы Жарлықтан туындайтын өзге де шаралар қабылдасын.
      Ескерту. 3-тармаққа өзгерту енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      4. Осы Жарлықтың 2-тармағын iске асыруға байланысты
бағдарламаларды әзiрлеудi қоспағанда, Қазақстан Республикасында Қазақстан Республикасының 2020 жылға дейiнгi стратегиялық даму жоспары бекiтiлгенге дейiн мемлекеттiк, салалық бағдарламаларды, аумақтардың даму бағдарламаларын әзiрлеуге тыйым салу енгiзiлсiн.
      5. Осы Жарлықтың орындалуын бақылау Қазақстан Республикасы
Президентiнiң Әкiмшiлiгiне жүктелсiн.
      6. Осы Жарлық қол қойылған күнiнен бастап қолданысқа енгiзiледi және ресми жариялануға тиiс.

Қазақстан Республикасының

Президентi Н. Назарбаев

Қазақстан Республикасы

Президентiнiң
2009 жылғы 18 маусымдағы
N 827 Жарлығымен
БЕКIТIЛДI

Қазақстан Республикасындағы мемлекеттiк жоспарлау жүйесi

1. Жалпы ережелер

1. Мемлекеттiк жоспарлау жүйесi - мемлекеттiк жоспарлау принциптерiнен, құжаттарынан, процестерiнен және оған қатысушылардан тұратын, елдiң ұзақ мерзiмдi (5 жылдан аса), орта мерзiмдi (3-5 жыл) және қысқа мерзiмдi (3 жылға дейiн) кезеңдерге арналған дамуын қамтамасыз ететiн өзара байланысты элементтер кешенi.

2. Мемлекеттiк жоспарлау мемлекеттiк билiк органдарының және елдi дамыту процесiне өзге де қатысушылардың Қазақстанның әлеуметтiк-экономикалық даму деңгейiн көтеруге, азаматтардың әл-ауқатын өсiруге және ел қауiпсiздiгiн нығайтуға бағытталған қызметiн қамтиды.

2. Мемлекеттiк жоспарлау жүйесiнiң принциптерi

3. Мемлекеттiк жоспарлау жүйесi мынадай принциптерге негiзделедi:

      1) бiрлiк және тұтастық - мемлекеттiк жоспарлау саласындағы заңнаманың, Мемлекеттiк жоспарлау жүйесiн ұйымдастыру және оның жұмыс iстеу принциптерiнiң бiрлiгi, мемлекеттiк жоспарлау процесiн жүзеге асыру тәртiбiнiң бiрлiгi;
      2) iшкi теңгерiмдiлiк - Мемлекеттiк жоспарлау жүйесi құжаттарының даму мақсаттары, мiндеттерi және нәтижелер көрсеткiштерi бойынша бiр-бiрiмен келiсiмдiлiгi;
      3) нәтижелiлiк және тиiмдiлiк - мақсаттарды, мiндеттердi және нәтижелер көрсеткiштерiн таңдау барынша дұрыс (нәтижелi) болуға, ағымдағы ахуалды терең талдауға және ресурстарды барынша аз жұмсай отырып, қойылған нәтижелерге қол жеткiзу қажеттiлiгiне негiзделуге тиiс;
      4) мiндеттердi шешу жолдарын таңдау дербестiгi - мемлекеттiк жоспарлау процесiне қатысушылардың мақсаттарға қол жеткiзу жолдары мен әдiстерiн таңдаудағы және өз құзыретi шегiнде елдiң даму мiндеттерiн шешудегi дербестiгi;
      5) мемлекеттiк жоспарлау процесiне қатысушылардың жауапкершiлiгi - Қазақстан Республикасының заңнамасына сәйкес өз құзыретi шегiнде мiндеттердi шешудiң тиiмсiздiгi және күтiлетiн нәтижелерге қол жеткiзiлмегенi үшiн жауапкершiлiктi қамтамасыз ету;
      6) айқындық (ашықтық) - мемлекеттiк құпияларға жататын ақпаратты қамтитын ережелердi қоспағанда, Мемлекеттiк жоспарлау жүйесiнiң құжаттарын мiндеттi түрде жариялау;
      7) шынайылық және нақтылық - Мемлекеттiк жоспарлау жүйесiнiң құжаттарында белгiленген даму мақсаттарына қол жеткiзудiң негiзделген мүмкiндiгi, сондай-ақ мемлекеттiк жоспарлау процесiнде пайдаланылатын нәтижелер көрсеткiштерiнiң негiздiлiгi;
      8) үздiксiздiк, сабақтастық және дәйектiлiк - Мемлекеттiк жоспарлау жүйесiнiң сатылы сипаты, яғни жоғары тұрған құжаттардың мақсаттарына, мiндеттерiне, нәтижелер көрсеткiштерiне кол жеткiзудiң сәттiлiгi төмен тұрған құжаттарды жоспарлау мен олардың мақсаттарына, мiндеттерiне, нәтижелер көрсеткiштерiне кол жеткiзудiң сапасына және уақтылығына байланысты, сондай-ақ оның жұмыс iстеуiнiң үздiксiз тетiгi;
      9) ресурстық қамтамасыз етiлу - қойылған мақсаттар мен мiндеттерге қол жеткiзу үшiн мемлекеттiк органдардың стратегиялық жоспарларының негiзгi бағыттары бойынша қаржыландыру көздерi мен көлемiн, адами, басқа да материалдық және материалдық емес ресурстарды айқындау.

3. Мемлекеттiк жоспарлау жүйесiнiң құжаттары

4. Мемлекеттiк жоспарлау жүйесiнiң құжаттарына мыналар жатады:

      1) Қазақстанның 2030 жылға дейiнгi даму стратегиясы;
      2) Қазақстан Республикасының 10 жылға арналған стратегиялық даму жоспары, елдiң аумақтық-кеңiстiктiк дамуының болжамдық схемасы;
      2-1) Қазақстан Республикасы Ұлттық қауiпсiздiгiнiң стратегиясы;
      3) 5-10 жылға арналған мемлекеттiк бағдарламалар;
      4) 5 жылға арналған әлеуметтiк-экономикалық даму болжамы;
      5) аумақтарды дамытудың 5 жылға арналған бағдарламасы;
      6) мемлекеттiк органдардың 5 жылға арналған стратегиялық жоспарлары;
      7) ұлттық басқарушы холдингтердiң, ұлттық холдингтердiң және жарғылық капиталына мемлекет қатысатын ұлттық компаниялардың (бұдан әрi - ұлттық компаниялар) 10 жылға арналған даму стратегиялары және 5 жылға арналған даму жоспарлары;
      8) салалық бағдарламалар;
      9) 3 жылға арналған республикалық (жергiлiктi) бюджет.
      Ескерту. 4-тармаққа өзгерiс енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз), 2011.12.30 N 213 Жарлығымен.
      5. Қазақстан Республикасының Президентi елдегi жағдай мен Қазақстан Республикасының iшкi және сыртқы саясатының негiзгi бағыттары туралы Қазақстан халқына жыл сайын Жолдау арнайды. Мемлекет басшысы Жолдауының ережелерi Мемлекеттiк жоспарлау жүйесiнiң құжаттарын түзету үшiн негiз болып табылады.
      Жолдаудың ережелерiн iске асыру мақсатында тиiстi жалпыұлттық iс-шаралар жоспары әзiрленедi.
      Жалпыұлттық iс-шаралар жоспарын Қазақстан Республикасының Президентi бекiтедi.
      Ескерту. 5-тармаққа өзгерту енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      6. Қазақстан Республикасы Президентiнiң тапсырмасы бойынша тұжырымдамалар мен доктриналар әзiрленедi.
      Тұжырымдама белгiлi бiр аяны, саланы дамытудың пайымын, тиiстi мемлекеттiк саясаттың негiздемесiн көрсететiн құжат болып табылады және осы саясаттың негiзгi принциптерi мен жалпы қағидаттарын қамтиды.
      Тұжырымдаманы Қазақстан Республикасының Президентi, Қазақстан Республикасының Үкiметi не консультативтiк-кеңесшi орган бекiтедi немесе мақұлдайды.
      Доктрина - белгiлi бiр мәселе бойынша көзқарастар жүйесiн, саяси қағидаттардың жиынтығын айқындайтын құжат.
      Доктринаны Қазақстан Республикасының Президентi бекiтедi немесе мақұлдайды.
      Тұжырымдамалар мен доктриналар стратегиялық және бағдарламалық құжаттар, мемлекеттiк органдардың стратегиялық жоспарлары және заңдар арқылы iске асырылады.
      Тұжырымдамалар мен доктриналарды әзiрлеу тәртiбiн Қазақстан Республикасы Президентiнiң Әкiмшiлiгiмен келiсiм бойынша Қазақстан Республикасының Үкiметi айқындайды.
      Ескерту. 6-тармақ жаңа редакцияда - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.

3.1. Қазақстанның 2030 жылға дейiнгi даму стратегиясы

7. Қазақстанның 2030 жылға дейiнгi даму стратегиясы Қазақстан Республикасы дамуының жаhандық көрiнiсi мен стратегиясын, елдiң экономикалық, саяси, қоғамдық дамуының ұзақ мерзiмдi бағыттары мен басымдықтарын айқындайтын стратегиялық құжат болып табылады, оны iске асыру мақсатында Мемлекеттiк жоспарлау жүйесiнiң құжаттары әзiрленедi.

3.2. Қазақстан Республикасының стратегиялық даму жоспары

8. Қазақстан Республикасының стратегиялық даму жоспарлары Қазақстанның 2030 жылға дейiнгi даму стратегиясын iске асыру мақсатында 10 жылға арналып әзiрленедi және тиiстi он жылдық кезеңдегi елдiң әлеуметтiк-экономикалық және қоғамдық-саяси дамуының стратегиясын, мақсаттарын, мiндеттерiн, басым бағыттарын, олардың көрсеткiштерiн, кезең-кезеңдiк мақсатты индикаторларын көрсете отырып, күтiлетiн нәтижелерiн нақтылайды.

      9. Қазақстан Республикасының алдағы кезеңге арналған мемлекеттiк даму жоспарының жобасын әзiрлеудi мемлекеттiк жоспарлау жөнiндегi уәкiлеттi орган елдiң мұның алдындағы стратегиялық даму жоспарын iске асырудың тоғызыншы жылынан кешiктiрмей жүзеге асырылуы мүмкiн.
      10. Қазақстан Республикасының мемлекеттiк даму жоспарын Қазақстан Республикасының Президентi бекiтедi.
      11. Қазақстан Республикасының стратегиялық даму жоспарының iске асырылуына мониторинг пен оны бағалауды мемлекеттiк жоспарлау жөнiндегi уәкiлеттi орган жүргiзедi, олардың негiзiнде түзету жүзеге асырылуы мүмкiн.
      12. Қазақстан Республикасының стратегиялық даму жоспарын iске асыруды бақылауды Қазақстан Республикасы Президентiнiң Әкiмшiлiгi жүзеге асырады.
      13. Қазақстан Республикасының стратегиялық даму жоспарын әзiрлеу тәртiбiн Қазақстан Республикасының Президентi айқындайды.
      14. Қазақстан Республикасының стратегиялық даму жоспарын iске асыру мақсатында елдiң тиiстi кезеңге арналған Аумақтық-кеңiстiктiк дамуының болжамдық схемасы әзiрленедi. Елдiң аумақтық-кеңiстiктiк дамуының болжамды схемасы - бұл елдiң тұрақты дамуын қамтамасыз ету үшiн өндiрiстiк күштердi, көлiк-коммуникациялық, әлеуметтiк және басқа инфрақұрылымды оңтайлы орналастыру және ел халқын өңiрлер тұрғысынан таратып орналастыру жүйесi.
      Ескерту. 14-тармаққа өзгерту енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      15. Елдiң аумақтық-кеңiстiк дамуының болжамды схемасын және оны әзiрлеудiң тәртiбiн Қазақстан Республикасының Президентi бекiтедi.
      Ескерту. 15-тармаққа өзгерту енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.

3.2.-1. Қазақстан Республикасы Ұлттық қауiпсiздiгiнiң стратегиясы

Ескерту. Жүйе 3.2.-1-бөлiммен толықтырылды - ҚР Президентiнiң 2011.12.30 N 213 Жарлығымен.

      15-1. Қазақстан Республикасы Ұлттық қауiпсiздiгiнiң стратегиясы Қазақстанның 2030 жылға дейiнгi даму стратегиясын, Қазақстан Республикасының Стратегиялық даму жоспарын iске асыру мақсатында әзiрленедi және ұлттық қауiпсiздiктi қамтамасыз ету саласындағы негiзгi проблемалар мен қауiп-қатерлердi, стратегиялық мақсаттар мен нысаналы индикаторларды, мiндеттер мен нәтижелер көрсеткiштерiн, сондай-ақ ұлттық қауiпсiздiктi қамтамасыз ету критерийлерiн айқындайды.
      15-2. Қазақстан Республикасы Ұлттық қауiпсiздiгiнiң стратегиясын мемлекеттiк жоспарлау жөнiндегi уәкiлеттi орган орта мерзiмдi (5 жылға) немесе ұзақ мерзiмдi (5 жылдан астам) кезеңдерге әзiрлейдi.
      15-3. Қазақстан Республикасы Ұлттық қауiпсiздiгi стратегиясының құрылымын, базалық тәсiлдерi мен негiзгi мазмұнын Қазақстан Республикасының Қауiпсiздiк Кеңесi мақұлдайды. Қазақстан Республикасы Ұлттық қауiпсiздiгiнiң стратегиясын әзiрлеудiң тәртiбiн Қазақстан Республикасының Президентi айқындайды.
      15-4. Қазақстан Республикасы Ұлттық қауiпсiздiгiнiң стратегиясын Қазақстан Республикасының Президентi бекiтедi.
      15-5. Қазақстан Республикасы Ұлттық қауiпсiздiгiнiң стратегиясын iске асыру үшiн оны iске асыру жөнiндегi Iс-шаралар жоспары әзiрленедi.
      Iс-шаралар жоспарын мемлекеттiк жоспарлау жөнiндегi уәкiлеттi орган әзiрлейдi және Қазақстан Республикасы Ұлттық қауiпсiздiгiнiң стратегиясы бекiтiлген күннен бастап үш ай мерзiмде Қазақстан Республикасы Президентi Әкiмшiлiгiнiң келiсiмi бойынша Қазақстан Республикасының Үкiметi бекiтедi.
      15-6. Iс-шаралар жоспарын iске асыру қорытындыларын мемлекеттiк жоспарлау жөнiндегi уәкiлеттi орган жыл сайын Қазақстан Республикасы Қауiпсiздiк Кеңесiнiң қарауына енгiзедi.

3.3. Мемлекеттiк бағдарламалар

16. Мемлекеттiк бағдарламалар Қазақстан Республикасының стратегиялық даму жоспарын iске асыру мақсатында 5-10 жылға арналып әзiрленедi.

      Мемлекеттiк бағдарлама - бұл белгiлi бiр қызмет саласын дамытудың стратегиясын, стратегиялық бағыттарын, мақсаттарын, мiндеттерi мен қажеттi ресурстарды көрсете отырып, күтiлетiн нәтижелерiн айқындайтын жалпыұлттық, салааралық сипаттағы құжат.
      17. Мемлекеттiк бағдарламаларды тиiстi мемлекеттiк орган әзiрлейдi және мемлекеттiк жоспарлау жөнiндегi уәкiлеттi органмен келiсiледi.
      Ескерту. 17-тармақ жаңа редакцияда - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      18. Мемлекеттiк бағдарламаларды Қазақстан Республикасының Президентi бекiтедi.
      19. Мемлекеттiк бағдарламалар жобаларының тiзбесiн Қазақстан Республикасының Президентi бекiтедi.
      19-1. Мемлекеттiк бағдарламаны iске асыру үшiн Қазақстан Республикасының Үкiметi Қазақстан Республикасы Президентiнiң Әкiмшiлiгiмен келiсiм бойынша оны iске асыру жөнiндегi iс-шаралар жоспарын бекiтедi.
      Ескерту. Ереже 19-1-тармақпен толықтырылды - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      20. Мемлекеттiк бағдарламаның iске асырылуына мониторингтi әзiрлеушi мемлекеттiк орган, мемлекеттiк жоспарлау жөнiндегi уәкiлеттi орган жүргiзедi.
      Мемлекеттiк бағдарламаның iске асырылуын бағалауды әзiрлеушi мемлекеттiк орган, мемлекеттiк жоспарлау жөнiндегi уәкiлеттi орган және Республикалық бюджеттiң атқарылуын бақылау жөнiндегi есеп комитетi жүргiзедi.
      Республикалық бюджеттiң атқарылуын бақылау жөнiндегi есеп комитетi мемлекеттiк бағдарламалардың iске асырылуын бағалауды өзiнiң жұмыс жоспарына сәйкес жүргiзетiн бақылау iс-шаралары шеңберiнде жүзеге асырады.
      Iске асырылуына мониторинг пен бағалау нәтижелерi бойынша мемлекеттiк бағдарлама және оны iске асыру жөнiндегi iс-шаралар жоспары түзетiлуi мүмкiн.
      Ескерту. 20-тармақ жаңа редакцияда - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      21. Мемлекеттiк бағдарламаның iске асырылуын бақылауды Қазақстан Республикасы Президентiнiң Әкiмшiлiгi жүзеге асырады.
      22. Мемлекеттiк бағдарламаларды әзiрлеу тәртiбiн Қазақстан Республикасының Президентi айқындайды.

3.4. Әлеуметтiк-экономикалық даму болжамы

23. Әлеуметтiк-экономикалық даму болжамы Қазақстан Республикасының стратегиялық даму жоспары, мемлекеттiк бағдарламалар және Қазақстан Республикасы Президентiнiң жолдаулары ескерiле отырып, стратегиялық, экономикалық және бюджеттiк жоспарлаудағы өзара байланысты орнату мақсатында жыл сайын жылжымалы негiзде бес жылдық кезеңге әзiрленедi және мыналарды:

      1) мемлекеттiк басқарудың орталық деңгейiнде - макроэкономикалық көрсеткiштер болжамын, әлеуметтiк параметрлер болжамын, Қазақстан Республикасы әлеуметтiк-экономикалық дамуының үрдiстерiн, басымдықтарын, жылдар бойынша бөлiп көрсете отырып, мақсатты индикаторлары мен көрсеткiштерiн;
      2) мемлекеттiк басқарудың жергiлiктi деңгейiнде - жылдар бойынша бөле көрсете отырып, өңiрдiң әлеуметтiк-экономикалық дамуының болжамын, үрдiстерiн, басымдықтарын, мақсатты индикаторлары мен көрсеткiштерiн;
      3) 3 жылға арналған бюджет параметрлерiнiң болжамын қамтиды.
      Сандық және сапалық нәтижелердi айқындау үшiн шешушi бағыттар (салалар) бойынша мақсатты индикаторлар мен көрсеткiштер белгiленiп, оған қол жеткiзу үшiн бес жылдық кезең iшiнде Қазақстан Республикасының әлеуметтiк-экономикалық саясаты бағытталуға тиiс.
      24. Әлеуметтiк-экономикалық даму болжамын Қазақстан Республикасының Үкiметi немесе жергiлiктi атқарушы орган мақұлдайды және бұқаралық ақпарат құралдарында жариялануға тиiс.
      25. Әлеуметтiк-экономикалық даму болжамын әзiрлеу тәртiбiн Қазақстан Республикасының Үкiметi айқындайды.

3.5. Аумақтарды дамыту бағдарламасы

26. Аумақтарды дамыту бағдарламасы Қазақстан Республикасының стратегиялық және бағдарламалық құжаттары, әлеуметтiк-экономикалық даму болжамы негiзiнде бес жылдық кезеңге арналып әзiрленедi.

      Аумақтарды дамыту бағдарламасы, олардың көрсеткiштерi, қажеттi ресурстар көрсетiле отырып, өңiрдi дамытудың негiзгi бағыттарын, мақсаттарын, мiндеттерiн, күтiлетiн нәтижелерiн қамтиды.
      27. Облысты, республикалық маңызы бар қаланы, астананы дамыту бағдарламасын мемлекеттiк жоспарлау жөнiндегi уәкiлеттi органның, мүдделi орталық мемлекеттiк органдардың және Қазақстан Республикасы Президентi Әкiмшiлiгiнiң келiсiмiмен облыстың, республикалық маңызы бар қаланың, астананың мемлекеттiк жоспарлау жөнiндегi уәкiлеттi органы әзiрлейдi.
      Ауданды (облыстық маңызы бар қаланы) дамыту бағдарламасын облыстық мемлекеттiк жоспарлау жөнiндегi уәкiлеттi органның, облыстың мүдделi атқарушы органдарының келiсiмiмен ауданның (облыстық маңызы бар қаланың) мемлекеттiк жоспарлау жөнiндегi уәкiлеттi орган әзiрлейдi.
      Ескерту. 27-тармаққа өзгерту енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      28. Аумақтарды дамыту бағдарламасын жергiлiктi өкiлдi орган бекiтедi.
      28-1. Аумақты дамыту бағдарламасын iске асыру үшiн жергiлiктi атқарушы орган мемлекеттiк жоспарлау жөнiндегi жоғары тұрған уәкiлеттi органмен келiсiм бойынша оны iске асыру жөнiндегi iс-шаралар жоспарын бекiтедi.
      Ескерту. Ереже 28-1-тармақпен толықтырылды - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      29. Облысты, республикалық маңызы бар қаланы, астананы дамыту бағдарламасының iске асырылуына мониторинг пен оны бағалауды облыстың, республикалық маңызы бар қаланың, астананың мемлекеттiк жоспарлау жөнiндегi уәкiлеттi органы мен мемлекеттiк жоспарлау жөнiндегi уәкiлеттi орган жүргiзедi.
      Ауданды (облыстық маңызы бар қаланы) дамыту бағдарламасының iске асырылуына мониторинг пен оны бағалауды ауданның (облыстық маңызы бар қаланың) және облыстың мемлекеттiк жоспарлау жөнiндегi уәкiлеттi органдары жүргiзедi.
      Ескерту. 29-тармаққа өзгерту енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      30. Iске асыруға мониторинг пен оны бағалаудың нәтижелерi бойынша аумақтарды дамыту бағдарламалары және оларды iске асыру жөнiндегi iс-шаралар жоспарлары түзетiлуi мүмкiн.
      Ескерту. 30-тармаққа өзгерту енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      31. Аумақтардың дамыту бағдарламасының iске асырылуын бақылауды тиiстi жергiлiктi өкiлдi орган жүзеге асырады.
      32. Аумақтарды дамыту бағдарламасын әзiрлеу тәртiбiн Қазақстан Республикасының Президентi айқындайды.

3.6. Мемлекеттiк органдардың стратегиялық жоспарлары

33. Мемлекеттiк органның стратегиялық жоспары Қазақстан Республикасының стратегиялық және бағдарламалық құжаттарының, әлеуметтiк-экономикалық даму болжамының негiзiнде әрбiр үш жыл сайын бес жылдық кезеңге арналып әзiрленедi.

      Мемлекеттiк органның стратегиялық жоспары мемлекеттiк орган қызметiнiң стратегиялық бағыттарын, мақсаттарын, мiндеттерiн, нәтижелер көрсеткiштерiн айқындайды, қаржыландыру көлемi бар бюджеттiк бағдарламаларды қамтиды.
      Ескерту. 33-тармаққа өзгерту енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      34. Мемлекеттiк органның стратегиялық жоспарын мемлекеттiк жоспарлау жөнiндегi уәкiлеттi органның келiсiмiмен тиiстi мемлекеттiк орган әзiрлейдi.
      35. Қазақстан Республикасының Президентiне тiкелей бағынатын және есеп беретiн мемлекеттiк органның стратегиялық жоспарын Қазақстан Республикасының Президентi немесе ол уәкiлеттiк берген лауазымды тұлға бекiтедi.
      Қазақстан Республикасы Үкiметiнiң құрылымына кiретiн мемлекеттiк органныңстратегиялық жоспарын Қазақстан Республикасының Үкiметi бекiтедi.
      Қазақстан Республикасы Жоғарғы Сотының, Қазақстан Республикасы Парламентi Шаруашылық басқармасының, Қазақстан Республикасы Адам құқықтары жөнiндегi ұлттық орталықтың, Қазақстан Республикасы Орталық Сайлау комиссиясының стратегиялық жоспарларын аталған мемлекеттiк органдардың басшылары Қазақстан Республикасы Президентiнiң Әкiмшiлiгi мен Қазақстан Республикасы Үкiметiнiң келесiмiмен бекiтедi.
      Жергiлiктi бюджеттен қаржыландырылатын атқарушы органның стратегиялық жоспарын жергiлiктi атқарушы орган бекiтедi.
      Жергiлiктi бюджеттен қаржыландырылатын атқарушы органдардың стратегиялық жоспарлары тиiстi жоғары тұрған салалық мемлекеттiк орган келiсiм бергеннен кейiн бекiтiледi.
      Ескерту. 35-тармаққа өзгерту енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      36. Стратегиялық жоспарды iске асыру үшiн мемлекеттiк орган жыл сайын операциялық жоспар әзiрлейдi.
      Операциялық жоспар мемлекеттiк органның ағымдағы қаржылық жылдағы стратегиялық жоспардың мақсаттарына, мiндеттерiне және нәтижелер көрсеткiштерiне қол жеткiзу жөнiндегi iс шаралардың ресурстарымен, жауапты орындаушыларымен және жүзеге асыру мерзiмдерiмен байланысқан нақты iс-қимылын қамтитын құжат екенiн бiлдiредi.
      37. Мемлекеттiк органның стратегиялық жоспарының iске асырылуына мониторингтi әзiрлеушi мемлекеттiк орган жүзеге асырады.
      38. Қазақстан Республикасының Президентiне тiкелей бағынатын және есеп беретiн орталық мемлекеттiк органдардың стратегиялық жоспарларының iске асырылуын бағалауды - Қазақстан Республикасы Президентiнiң Әкiмшiлiгi, Қазақстан Республикасы Үкiметiнiң құрылымына кiретiн орталық мемлекеттiк органдардың стратегиялық жоспарларының iске асырылуын бағалауды мемлекеттiк жоспарлау жөнiндегi уәкiлеттi орган жүзеге асырады.
      Республикалық бюджеттiң атқарылуын бақылау жөнiндегi есеп комитетi өзiнiң жұмыс жоспарына сәйкес жүргiзетiн бақылау iс-шаралары шеңберiнде орталық мемлекеттiк органдардың стратегиялық жоспарларының, мемлекеттiк және бюджеттiк бағдарламалардың iске асырылуын бағалауды жүзеге асырады.
      Ескерту. 38-тармаққа өзгерту енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      39. Жергiлiктi бюджеттен қаржыландырылатын атқарушы органның стратегиялық жоспарының iске асырылуын бағалауды мемлекеттiк жоспарлау жөнiндегi жергiлiктi уәкiлеттi орган жүзеге асырады.
      Мәслихаттың тексеру комиссиясы өзiнiң жұмыс жоспарына сәйкес жүргiзетiн бақылау iс-шаралары шеңберiнде жергiлiктi атқарушы органның стратегиялық жоспарларының және бюджеттiк бағдарламалардың iске асырылуын бағалауды жүзеге асырады.
      Ескерту. 39-тармаққа өзгерту енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      40. Қазақстан Республикасының Президентiне тiкелей бағынатын және есеп беретiн орталық мемлекеттiк органдардың стратегиялық жоспарларының iске асырылуын бақылауды - Қазақстан Республикасы Президентiнiң Әкiмшiлiгi, Қазақстан Республикасы Үкiметiнiң құрылымына кiретiн орталық мемлекеттiк органдардың стратегиялық жоспарларының iске асырылуын бақылауды Қазақстан Республикасының Үкiметi жүзеге асырады.
      Жергiлiктi бюджеттен қаржыландырылатын атқарушы органдардың стратегиялық жоспарларының iске асырылуын бақылауды тиiстi жергiлiктi атқарушы орган жүзеге асырады.
      Ескерту. 40-тармаққа өзгерту енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      41. Мемлекеттiк органдардың стратегиялық жоспарларын әзiрлеу тәртiбiн Қазақстан Республикасының Президентi айқындайды.

3.7. Ұлттық басқарушы холдингтердiң, ұлттық холдингтердiң, ұлттық компаниялардың даму стратегиялары мен жоспарлары

42. Ұлттық басқарушы холдингтердiң, ұлттық холдингтердiң, ұлттық компаниялардың даму стратегиялары Қазақстан Республикасының стратегиялық және бағдарламалық құжаттарының негiзiнде 10 жылға арналып әзiрленедi.

      Ұлттық басқарушы холдингтердiң, ұлттық холдингтердiң, ұлттық компаниялардың даму стратегиялары олардың стратегиялық бағыттарын, мақсаттары мен қызметi нәтижелерiнiң көрсеткiштерiн айқындайды және акциялары (қатысу үлестерi) ұлттық басқарушы холдингтерге, ұлттық холдингтерге, ұлттық компанияларға осы заңды тұлғалар қабылдайтын шешiмдердi айқындауға құқық беретiн заңды тұлғалардың даму стратегиялары ескерiле отырып әзiрленедi.
      Ұлттық басқарушы холдингтердiң, ұлттық холдингтердiң, ұлттық компаниялардың даму стратегиялары Қазақстан Республикасының стратегиялық және бағдарламалық құжаттарында, тиiстi мемлекеттiк органдардың стратегиялық жоспарларында баяндалған мақсаттар мен мiндеттерге, және Әлеуметтiк-экономикалық даму мен бюджет параметрлерi болжамында көрсетiлген бюджеттiк параметрлерге сәйкестiгi тұрғысында мемлекеттiк жоспарлау жөнiндегi уәкiлеттi органның келiсiмiмен, Қазақстан Республикасының Үкiметi бекiтедi.
      Ұлттық басқарушы холдингтерге, ұлттық холдингтерге, ұлттық компанияларға арналған даму стратегияларын әзiрлеу мен бекiту тәртiбiн Қазақстан Республикасының Үкiметi айқындайды.
      Ескерту. 42-тармаққа өзгерту енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      43. Ұлттық басқарушы холдингтердiң, ұлттық холдингтердiң, ұлттық компаниялардың даму жоспарлары олардың даму стратегияларын iске асыру мақсатында 5 жыл мерзiмге арналып әзiрленедi.
      Ұлттық басқарушы холдингтердiң, ұлттық холдингтердiң, ұлттық компаниялардың даму жоспарлары акциялары (қатысу үлестерi) ұлттық басқарушы холдингтерге, ұлттық холдингтерге, ұлттық компанияларға осы заңды тұлғалар қабылдайтын шешiмдердi айқындауға құқық беретiн заңды тұлғалардың даму жоспарлары ескерiле отырып әзiрленедi және мақсаттарды, мiндеттердi, нәтижелер көрсеткiштерiн және инвестицияларды, кiрiстердi, шығыстарды, қарыздарды, дивиденттер мен басқа да мәлiметтердi қоса алғанда, қаржы-шаруашылық қызметтiң негiзгi шоғырландырылған және шоғырландырылмаған көрсеткiштерiн қамтиды.
      Ұлттық басқарушы холдингтердiң, ұлттық холдингтердiң, ұлттық компаниялардың даму жоспарлары Қазақстан Республикасының стратегиялық және бағдарламалық құжаттарында баяндалған мақсаттар мен мiндеттерге, және Әлеуметтiк-экономикалық даму мен бюджет параметрлерi болжамында көрсетiлген бюджеттiк параметрлерге сәйкестiгi тұрғысынан мемлекеттiк жоспарлау жөнiндегi уәкiлеттi органның келiсiмiмен, директорлар кеңестерi (қадағалау кеңестерi) бекiтедi.
      Ұлттық басқарушы холдингтердiң, ұлттық холдингтердiң, ұлттық компаниялардың даму жоспарларын әзiрлеу мен бекiту тәртiбiн Қазақстан Республикасының Үкiметi айқындайды.
      Ескерту. 43-тармаққа өзгерту енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      44. Ұлттық басқарушы холдингтердiң, ұлттық холдингтердiң, ұлттық компаниялардың даму стратегияларының iске асырылуын бағалауды Қазақстан Республикасының Үкiметi айқындайтын тәртiппен мемлекеттiк жоспарлау жөнiндегi уәкiлеттi орган жүзеге асырады.
      Ұлттық басқарушы холдингтердiң, ұлттық холдингтердiң, ұлттық компаниялардың даму жоспарларының iске асырылуын бағалауды Қазақстан Республикасының Үкiметi айқындайтын тәртiппен директорлар кеңестерi (қадағалау кеңестерi) жүзеге асырады.

3.8. Салалық бағдарламалар

45. Салалық бағдарламалар салалық мәнi бар маңызды мiндеттердi шешу, сондай-ақ мемлекеттiк органдар мен мемлекеттiк емес сектор ұйымдарының iс-қимылдарын ведомствоаралық үйлестiру мақсатында Қазақстан Республикасының стратегиялық және бағдарламалық құжаттарының iске асырылуы үшiн орта мерзiмдi және қысқа мерзiмдi кезеңге әзiрленедi. P040231

46. Салалық бағдарламаларды және оларды әзiрлеу мен мониторинг тәртiбiн Қазақстан Республикасының Үкiметi бекiтедi.
Ескерту. 46-тармақ жаңа редакцияда - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.

3.9. Республикалық (жергiлiктi) бюджет

47. Республикалық (жергiлiктi) бюджеттi мемлекеттiк жоспарлау жөнiндегi уәкiлеттi орган Қазақстан Республикасының стратегиялық және бағдарламалық құжаттары, мақұлданған әлеуметтiк-экономикалық даму болжамы, мемлекеттiк органдардың стратегиялық жоспарлары негiзiнде жыл сайын үш жылдық кезеңге арнап әзiрлейдi.

      Республикалық бюджет Қазақстан Республикасының Бюджет кодексiнде айқындалған түсiмдер есебiнен қалыптасатын және орталық мемлекеттiк органдардың, оларға ведомстволық бағыныстағы мекемелердiң мiндеттерi мен функцияларын қаржылық қамтамасыз етуге, сондай-ақ мемлекеттiк саясаттың жалпы республикалық бағыттарын iске асыруға арналған орталықтандырылған ақша қоры болып табылады.
      Республикалық бюджет Қазақстан Республикасының заңымен бекiтiледi. Z080096
      Ескерту. 47-тармаққа өзгерту енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
       48. Жергiлiктi бюджет Қазақстан Республикасының Бюджет кодексiнде айқындалған түсiмдер есебiнен қалыптастырылатын және облыстық (республикалық маңызы бар қаланың, астананың), сондай-ақ аудандық деңгейдегi (облыстық маңызы бар қалалардың) жергiлiктi мемлекеттiк органдардың, оларға ведомстволық бағынысты мемлекеттiк мекемелердiң мiндеттерi мен функцияларын қаржылай қамтамасыз етуге және тиiстi әкiмшiлiк-аумақтық бiрлiкте мемлекеттiк саясатты iске асыруға арналған орталықтандырылған ақша қоры болып табылады.
      Облыстық (республикалық маңызы бар қаланың, астананың) және аудандық (облыстық маңызы бар қалалардың) бюджеттерi тиiсiнше облыстық мәслихаттардың, республикалық маңызы бар қалалар, астана мәслихаттарының және аудандар (облыстық маңызы бар қалалар) мәслихаттарының шешiмдерiмен бекiтiледi.
      49. Республикалық бюджет жобасын әзiрлеу тәртiбiн Қазақстан Республикасының Президентi айқындайды.
      Жергiлiктi бюджеттер жобаларын әзiрлеу тәртiбiн Қазақстан Республикасының Үкiметi айқындайды.

4. Мемлекеттiк жоспарлау жүйесiнiң процесi және процесiнiң қатысушылары

50. Мемлекеттiк жоспарлау жүйесiнiң процестерi оның құжаттарының әзiрленуi мен бекiтiлуi, iске асырылуы, оған мониторинг, бағалау, түзету жүргiзiлуi, iске асырылуын бақылау болып табылады.

      Мониторинг - бұл Мемлекеттiк жоспарлау жүйесi құжаттарының iске асырылу барысы туралы ақпаратты жинау, жүйелеу, талдау және тұжырымдау.
      Бағалау - бұл Мемлекеттiк жоспарлау жүйесiнiң құжаттарын iске асырудың нәтижелiлiгi мен тиiмдiлiгiне қол жеткiзу дәрежесiн айқындау құралы.
      Бақылау - бұл Мемлекеттiк жоспарлау жүйесi құжаттарының толықтығына және уақтылы орындалуына, соның iшiнде заңбұзушылақтарды анықтау, жою және оларға жол бермеу мақсатында жоспарлы және жоспардан тыс тексерулер жолымен талдауды жүзеге асыру.
      Түзету - аталған құжаттың iске асырылуына мониторинг пен бағалау нәтижесiнде стратегиялық және бағдарламалық құжаттарға, мемлекеттiк органдардың стратегиялық жоспарларына өзгерiстер мен толықтырулар енгiзу.
      Ескерту. 50-тармаққа өзгерту енгiзiлдi - ҚР Президентiнiң 2010.03.04 № 931 (қолданысқа енгiзiлу тәртiбiн 5-т. қараңыз) Жарлығымен.
      51. Мемлекеттiк жоспарлау жүйесi процестерiнiң қатысушылары мемлекеттiк билiк органдары, мемлекет қатысатын заңды тұлғалар, қоғамдық, ғылыми және жекеше ұйымдардың өкiлдерi, жеке тұлғалар болып табылады.

жүктеу/скачать 189.77 Kb.

Достарыңызбен бөлісу: