Қазақстан республикасының Ұлттық банкі №4 баспасөз релизі «Ұлы қолбасшылар» монеталар сериясынан

№ 4 БАСПАСӨЗ РЕЛИЗІ

«Amir Timur» күміс монетасының бет жағында (аверсінде) Қазақстан Республикасы елтаңбасының алтындатылған бейнесі, монетаның номиналын білдіретін «100 TENGE» деген жазба, ат үстіндегі жауынгердің бейнесі және соғылған жылын білдіретін «2014» деген сан бар. Айналдыра мемлекеттік тілде «ҚАЗАҚСТАН ҰЛТТЫҚ БАНКІ» және ағылшын тілінде «NATIONAL BANK OF KAZAKHSTAN» деген жазба бар. Жазбалар нүктелермен бөлінген.

Монетаның сырт жағында (реверсінде) антрополог М.М. Герасимовтың орындауындағы ұлы қолбасшы Әмір Темірдің (Amir Timur) мүсіндік портреті, оның артында Әмір Темірдің бұйрығымен салынған Ахмед Ясауи кесенесінің және сауда керуенінің бейнесі салынған. Жоғары бөлігінде ағылшын тілінде «AMIR TIMUR» деген жазба және қолбасшының өмір сүру жылдарын білдіретін «1336-1405» деген сандар бар. Төменгі бөлігінде Қазақстан теңге сарайының тауар белгісі және монета дайындалған металды, оның сынамы мен массасын білдіретін «Ag 925 31,1 g» деген жазу бар.

Монетаның бет және сырт жақтарындағы бейнелер мен жазбалар бедерленген. Айналдыра шығыңқы жиек жүргізілген. Қыры (гурты) бедерлі. Монета 925 сынамды күмістен жасалған, массасы – 31,1 грамм, диаметрі – 38,61 мм, дайындау сапасы – «proof», ең көп таралымы – 13 мың дана.

Номиналдық құны 100 теңгелік ескерткіш монета Қазақстан Республикасының бүкіл аумағында көрсетілген құнымен төлемнің барлық түрлері бойынша, сондай-ақ банк шоттарына есептеу үшін және аударым жасау үшін қабылдануға міндетті, Қазақстан Республикасының барлық банктерінде шектеусіз ұсақталады және айырбасталады.

Монеталар Қазақстан Республикасының Ұлттық Банкі, «Польша монета сарайы» акционерлік қоғамы және «Қазақстан Республикасы Ұлттық Банкінің Қазақстан теңге сарайы» шаруашылық жүргізу құқығындағы республикалық мемлекеттік кәсіпорны арасындағы Монеталар шығаруға және сатуға арналған келісімге сәйкес дайындалды.

Әмір Темір (Amir Timur) – Орта, Оңтүстік және Батыс Азияның, сондай-ақ Кавказдың, Поволжье мен Русьтің тарихында айтарлықтай рөл атқарған басқарушы және қолбасшы. Астанасы Самарқанд болған Тимуридтер империясының негізін қалаушы (1370 жыл).

Монетаның дизайны Қазақстан Республикасы Президентінің 2003 жылғы 25 қыркүйектегі № 1193 Жарлығымен бекітілген Қазақстан теңгесі – ұлттық валюта банкноттары мен монеталары дизайнының тұжырымдамасына сәйкес әзірленген.

«Proof» сапасымен жасалған ескерткіш монета коллекциялық құны бойынша сатуға арналған. Ол кәдесыйлық ораумен шығарылады және Қазақстан Республикасы Ұлттық Банкінің мемлекеттік, орыс және ағылшын тілдеріндегі нөмірлік сапа сертификатымен жабдықталған.