Йошкар-Олан дӓ Мары сӓндӓлӹкӹн Высокопреосвященнейший архиепископ Иоаннын Когечӹ доно кымылангдымыжы

«Ти кечӹ – Йымын пуйырымы кечӹ: ти кечӹн ӹвӹртен сусу линӓ!» – тенге мӓ тагачы кого сусу доно мыренӓ, вет ӹвӹртӓш вир улы. Ытарышы Господьна короп гӹц ӹлӹж кӹньӹлӹн! Ти кечӹм дӓ ти ӹвӹртӹмӓшӹм мӓлӓннӓ Господь пуэн. Мӓмнӓн ытаралтмашнан негӹцшӹ пиштӓлтӹн. Йымын Эргӹжӹ Крестеш колымыжы дӓ лӹмлештӓрӓлт ӹлӹж кӹньӹлмӹжӹ доно диаволым сӹнген, адын капкажым пыдыртен дӓ Пӹлгомыштышы Кугижӓншӹн амасажым пачын. Тӹдӹн ӹлӹж кӹньӹлмӹжӹ – мӓмнӓн ӹнянӹмӓшнӓн ӹрдӹжӹ.

Ти празныкым эдем йых сакой веремӓн сакой семӹнь вӓшлин. Христосын ӹлӹж кӹньӹлмӹ веремӓӓш эдемвлӓӓт ти событим сакой семӹнь вӓшлинӹт. Иктӹвлӓжӹ Йымым ӹвӹртен хваленӹт, весӹвлӓжӹ тидӹ гишӓн ойхыренӹт дӓ Тӹдӹм ужын керддӹмӓшӹм молнамшы дорц эче когон ӹлӹжтенӹт.

Миром кандышы ӹдӹрӓмӓшвлӓ Христосын ӹлӹж кӹньӹлмӹжӹм кого ӹвӹртӹмӓш доно вӓшлинӹт. Ангел нӹнӹлӓн келесен: «Тӓ идӓ лӱд. Пӓлем, тӓ пыдален сӓкӹмӹ Иисусым кӹчӓлӹдӓ. Тӹдӹ тиштӹ уке, попымыжы семӹньок Тӹдӹ ӹлӹжӹн… Вара пӹсӹн кедӓ дӓ Тӹдӹн тыменьшӹвлӓжӹлӓн келесӹдӓ: Тӹдӹ колымаш гӹц ӹлӹжӹн дӓ тӓмдӓм Галилейӹштӹ вӓшлиэш. Тӹштӹ тӹдӹм ужыда» (Мф. 28: 5 – 7).

Иудейвлӓн шӹдӹштӹ гӹц лӱдде, Христосын коропшы сага остатка минут якте мӓгӹрен шалгышы дӓ, остатка уанымашыштым ямдымы семӹнь ӓклен, Тӹдӹм коропыш ыжатышывлӓӓт Тӹдӹн Ӹлӹж кӹньӹлмӹжӹм кого сусу доно вӓшлинӹт. Христосын ӹлӹж кӹньӹлмӓштӹ Йымын ти цоравлӓжӹ ӹвӹртӹмӓшӹн виржӹм веле агыл, а Йымын тӧржӹн сусужым дӓ Йымын сӧрӹмӹжӹн шокталтмыжым ужыныт.

Христосын лачокат Йымы ылмыжым Римӹштӹшӹ шӱдӹвуй доно иквӓреш Крестӹ сага попен шалгышы эдемвлӓмӓт кого сусу нӓлӹн. Ӹшке онгыштым шин, разбойник сага иквӓреш «Господь, Ӹшке Кугижӓншӹшкет толмыкет, мӹньӹмӓт ӓшӹндӓрӹ!» (Лк. 23: 42) манын келесӹшӹвлӓмӓт, кого ӹвӹртӹмӓш ӓрен нӓлӹн. Ти эдемвлӓлӓн Господьын ӹлӹж кӹньӹлмӹжӹ лачокат ыш дон шижмӓшӹм леведшӹ мычашдымы сусу лин.

Но весӹвлӓӓт ылыныт. Иудейвлӓн вуйлатышывлӓ дӓ первосвященниквлӓ, фарисей дон книжник, Каиаф дӓ Пилат ганьвлӓ, Иисусым выжалышы Иудывлӓ дӓ кокшы разбойник гань мыскылышывлӓӓт ылыныт. Нӹнӹ Иисусым пушташ ядын сасленӹт. Тӹдӹ крестӹ вӹлнӹ кечен, а нӹнӹ мыскыленӹт: «Йӓлӹм ытарен, а ӹшкӹмжӹм ытарен ак керд… Ӹнде крестӹ гӹц валыжы! Тидӹм ужмыкы, мӓ ӹняненӓ…» (Мк. 15: 31 – 32). Нӹнӹлӓн Ӹлӹж кӹньӹлмӓш – ойхын виржӹ, Христос дӓ Тӹдӹн тымдымашыжы докы ӹшке шӹдӹштӹн дӓ ужын керддӹмӓшӹштӹн кушмыжын виржӹ лин. Колымаш гач ӹлӹж кӹньӹлӓш сусу улы гӹнь, Тӹдӹ каждыйлан пӓшӓжӹ семӹнь пӧртӹлтен кердеш манын, нӹнӹ яжон пӓленӹт.

Эдемвлӓ ик пӓшӓмок угӹц шӹрен ӹштӓт. Христосын Ӹлӹж кӹньӹлмӹжӹ смирнӓ дӓ Йымы гӹц лӱдшӹ цоравлӓжӹм кӹзӹтӓт сусуэмдӓ, кӱ Кого пост гач кечӹнь Христос сага иквӓреш орлана, остатка орлыкан ӓрнян Тӹдӹ сага крестӹм намалмы корны доно кеӓ, крестӹ вӹлнӹ кечӹмӹжӹм ужын, жӓлӓйӓ дӓ Кого когарнян короп докы мӓгӹрен ыжата. Техеньӹвлӓжӹ Христосын Ӹлӹж кӹньӹлмӹжӹм кӹзӹтӓт ужыт дӓ ӹвӹртен мырат: «Ти кечӹ - Йымын ӹштӹмӹ кечӹ: ти кечӹн ӹвӹртен сусу линӓ!»

Яратымы шӱмбелвлӓ, ӓки-шыжарвлӓ! Улы йӓнг вашт тӓмдӓм кого дӓ сусу Соты Когечӹ празнык доно кымылангдем! Мӓ логӹцнӓ каждыйжы Ӹлӹж кӹньӹлшӹ Христосым ышма дон веле агыл, а пӓшӓжӹ дӓ пуры ӹлӹмӓшӹжӹ доно хвальыжы. Тӹнӓм веле Когечӹ мӓлӓннӓ сусу, ирӹктӹмӓшӹм кандышы дӓ ытарышы лиэш, кынам Христосын ӹлӹж кӹньӹлмӹжӹн лачокшы мӓмнӓн лачокна лиэш, ӹнянӹмӓшнӓн негӹцшӹ дӓ ӹлӹмӓшнӓн ӹрдӹжӹ лиэш. Тӹнӓм мӓмнӓн сусунаат цицмӓш сусу лиэш. Тидӹ гишӓн Иоанн Богослов попа: «Тӓмдӓн сусудам иктӓт шыпшын ак нӓл» (Ин. 16: 22).

«Йымы Ӓтя дӓ Ӓтян Эргӹжӹ Господь Иисус Христос дорц благодать, жӓлӓйӹмӓш, тыр тӓ сагада лачок дӓ яратымаш доно лиштӹ» (2 Ин. 1: 3).

Христосын Когечӹжӹ,