Кызьы уте но саклало анай кылэз милям гуртамы

Шунды одиг, нош калык портэм. Калык портэм, но одиг кадь зеч.Адямиос ваньзы огкадесь: чуваш но , зуч но ,бигер но, удмурт но.Мынам малпамея, ваньзылы соослы огкылысь тупаса улоно.Тани милям но Пермь улосысь куеда еросамы уло чувшъес но, татаръес но ,башкиръес но, удмуртъес но.Нош мон туннэ тиледлы маде аслам гуртэ сярысь,кытын улэ удмурт калык аслаз историеныз ,культураеныз, шуг-секытъесыныз но вормонъесыныз.

Мон вордиськи но улисько Кирга гуртын. Нырысети арзэ ужасько школаын. Милям школамы быдэс Пермь улослы одиг , кудаз преподавать кариське (нуиське)удмурт кыл но литература. Удмурт кыл ортчытиське арняяз 2 час, нош литература - одиг. Ми шумпотиськомы таче луонлыклы. Улиськомы азьланезлы осконэн: анай кылмы уз быры шуыса. Дышетскисьесынымы поталляськомы межрегиональной олимпиадаосы Ижкаре , таизлы туж бадзым тау кареме потэ Кузиева Маргарита Катиповналы, со сюлмыныз висе удмурт кыл понна.

Нылпиос удмурт кылэз медаз вунэтэ но мед яратозы, тодэменызы мед данъяськозы шуыса, школамылэн воспитательной ужез бордын одигез задачаез: аслад вордскем шаередлы яратон мылкыд пычатон.Та задачаез быдэстон понна дышетскисьесынымы ортчытъяськом праздникъес: обрядовой праздник «Быдзынал», календарной праздник «Чожи сиен» но вашкала удмурт шудонъес. Берло аръесы апрель толэзе школаямы гурт калык азьын, общественной организациослэн кивалтисьессы азьын, егитъес азьын лэсьтиськомы быдэс арлы йылпумъянъес. Соос ортчытисько творческой отчет амалэн.Отын нылпиосмы возьмато асьсэлэсь вормонъессэс но быгатэмъессэс.

Школаын старшой классъесын дышетскисьеслэн кужыменызы поттиське «Чингыли куараос» газета, кытын печатлаське асьсэлэн люкам материалъессы. Туж чем пумиськылэ 7-ти классын дышетскись Менликаева Миланалэн кылбуръесыз, кудиз сиземын котырысь инказьлы.

Гуртмылэсь но удмурт калыклэсь историзэ медаз вунэтэ шуыса, бадзым уж лэсьтиз школаысьтымы краеведческой музей.Быдэс ёросмылы со одигез паспортизированной ,историко-этнографической музей. Вань сюлмыныз, дырзэ, кужымзэ жалятэк кутскиз но радъяз та ужпумез Армагинова Анастасия Гавриловна. Гуртысьтымы гажано дышетись.Арлы быдэ нылпиосын чош потто буклет «Даур куара». Краеведческой ужъессы потыло «Куединский вестник», «Ошмес» газетъесы. Музейлэн экспозициосыныз тодматскыны луэ школамылэн сайтаз.

Кирга гуртамы вань улисьес куспазы верасько удмурт кылын. Удмурт кылзэс уг вунэто гуртысьтымы егитъес но. Культура юртамы соосын кылдытэмын фольклорной коллектив.Кудаз удмурт сямен кырзало но верало, выль улон сето вашкала, вунэтыны кутскем кырзанъеслы ,эктонъеслы но шудонъеслы. Еросысьтымы бускель зучомем удмурт гуртъсти концертной номеръесын ветлыса анай кылэз данъяло. Возьмато макем со чебер, жингрес, пуш сюлэмез бугыртоз но отчы ик буйгатоз.Та концертъесты возьмало мойыос, но шумпотыса потто пиналъес но егитъес. Паймо удмурт кылмылэн узырлыкезлы.

Вераме потэ на вал Гондыр гурт поселениямы удмурт егтъслэн ортчылись портэм чошатсконъессы : волейбол, теннис, мини-футбол,куасэн бызьылонъес сярысь. Та ужпумъесты радъя Гадиятов Станислав Идиятович – Пермь шаерысь удмуртъеслэн огазеяськонэнызы кивалтись.Куеда еросысьтымы удмурт гуртъесысь сяна отчы отемын луо Янаул, татышлы .Чернушка,Бураево, Калтасы еросъесысь удмурт егитъес.Люкаськем егитъесыз шумпотыса возьма милям школамы, гурт калык.

Мынам малпамея, удмурт кылэн чош ик вунэтыны кулэ овол традициосыз но обычайесыз. Даурмы ортчыса, егитъесмы современной улонын ке но уло, соос тырмашо гуртысьтымы пересьеслэсь обычайессэс, традициоссэс ,тодэмлыкзэс улоназы кутыны.Одиг обряд но :сюан, солдатэ келян , выль корка потон, нуны ваен соостэк уг ортчы.

Котькуд адями азьын – бадзым улон! Нош со сярысь малпаськыны кулэ парта сьорын пукыкуд, отияз медаз луы возьыт ас калыкед, бускельесыд,эшъесыд, анай-атед азьын. Мон удмурт шуыса, котькытын но котьку данъяськыса вераны мед быгатомы.

Веран кылме йылпумъяло Ада Диевалэн «Синмаськон» кылбурысьтыз чуръесыныз

Синмаськон! Данъяськон!

Яратон! Шумпотон!

Со одиг гердзетын Даурлы думемын!

Мон соин данъясько вордиськем шаерме

Сюлмысьтым гажасько вань удмурт калыкме!