Ад быдлаын (< роч); ад гуран скр., шс.; вакрамеш

Н. Конаков

Унджык мифологическöй мöвпсямын моз жö коми космогонияын медъëнасö тöд вылö босьтöма вöчан процесс, кодi мунö сiдз шусяна мифа кадö. Космогоническöй мифъясын му пуксьытöдзса муюгыдсö (хаос) пасйöма символъясöн либö дзик абу пасйöма. Унджык версияас хаоссö пасйö ва. Паныдасьлöны тшöтш и “ру да пемыд”, “кымöр” да “нюр”. Öти версия серти, муюгыдыс прöста “вöлi куш”, эз вöв нинöм, вöлi сöмын Ен-вöчысь. Вермас лоны, мый тайö версияыс артмис библия мифология имитöм понда.

Унджык коми космогоническöй версияын муюгыдсö артмöдöны кык демиург (зыряналöн Ен да Омöль, перым-комияслöн Ен да Куль). Ачыс му пуксьöмыс заводитчö мога мунöмсянь, а мусö артмöдысьясыс лоöны антиподъясöн. Комияслöн космогоническöй видзöдласъяс йылысь унджык гижöдын тöдчöдöма, мый первосö демиургъяс вöлöмаöсь нейтральнöйясöн. Буретш та понда найöс шуöма “вокъясöн”, “ыджыд вокöн (Ен) да ичöт вокöн (Омöль, Куль)” либö “ëртъясöн”. Тайö жö мöвпсö мöдпöвсталöма налöн лэбач мыгöрын – кык гулю, кык косысьпи. Такöд лöсялöны и фольклор гижöдъяс, кöнi Ен да Омöль (Куль) вокъяс, но абу öткодь мыгöраöсь: юсь да гöгöра, косысь да гöгöра. Тайö вариантъясас тöдчöдöма кыкпöвста идея: и öткодьлун, и медпервойсяньыс нин торъялан тенденция. Юсь да косысь вылi муюгыдса лэбачьяс, стöчджыка кö – шöр да вылi муюгыд костын медиаторъяс, а гöгöра – зэв бур сунласьысь – медиатор шöр да улi муюгыд костын, та понда сiйö улi муюгыдса лэбач. Вылiсö да улiсö (Ен да Омöль) лэбач кода паныд сувтöдöмсö позьö казявны и вариантысь, кöнi демиургъяс петкöдчöны лягушаясöн, но мусö судзöдöны оз найö, а налöн лэбачьяс – гулю да кырныш. Татшöм жö сяма му пуксьöм серпас, кор вермасьöны кык демиург, эм уна войтырлöн мифологияын, тшöтш и Сибирын олысь аборигенъяслöн.

Мый му пуксьöмыс заводитчис вежöртöм мога мунöмсянь, торйöн нин ясыда тöдчö фольклор текстын, кöнi демиургъяснас петкöдчöны гулюяс. Тайö версияас абу на мукöд версияса торйöдтöм юкöныс, кык антагонистическöй подув (вокъяс-демиургъяс), стöчджыка кö, найö эмöсь, но торйöн, и öта-мöд йывсьыс оз тöдны. Му пуксьöм заводитчытöдз найö мунöны öта-мöдыслы воча, “мöдöдчисны öта-мöдыслы воча... Шусисны вокъясöн”. Демиургъяслöн мога мунöмсянь заводитчö хаос бырöм и мöд космогоническöй вариантын: “Öтчыд... нюрысь петiсны кык лягуша, зэв öткодьöсь”.

Став лыддьöдлöм гозйыслöн, хаосын медводдза олысьяслöн ипостасьяслöн, а бöрыннас демиургъяслöн алыспöлöслуныс сыын, мый символика боксяньыс ставныс найö медиаторъяс, кодъяс йитöны “вылi/улi” оппозиция понятиеяс. Лягуша – ваын и косын олысь пемöс. Та вöсна сiйö медиатор му да ва костын, шöркост да улi муюгыд костын. Сiдзжö и гöгöра. Став лэбачыс, кодъяс кужöны лэбавны, но кодъяслöн оланiныс (позъясыс, сëян да с.в.) йитчöма мукöд (вакöд) – медиаторъяс шöркост да вылi муюгыд костын. Лунвылын тöвйысь лэбачьяс мöдпöвсталöны тайö идеясö (мифопоэтическöй мыв серти, лунвыв, кöнi шондiыс юр весьтын, “вылi” кодь, а войвыв, артмö, “улiкöд” öткодь). Та кындзи ваын уялысь лэбачьяс да лягуша йитчöмаöсь и валöн уна вежöртаса символикакöд.

Öти гижöдын Ен да Омöль петкöдчöны гöгöраöн да юсьöн. Найöс нимтöма ëртъясöн либö, мöд вариант серти, вокъясöн, и, колö пасйыны, öти вокыс чужис мöдыслöн сьöлыштöмысь. Гöгöра-Омöль судзöдö мусö ва пыдöсысь. Татшöм сяма жö миф гижöма войвыв перым-комияслысь, сöмын юсь пыддиыс сэнi косысь, а Омöль пыддиыс Куль. Лэбач мыгöра демиургъяса вариантыс, буракö, зэв важ сибирса вужъяса. Сiйöс позьö реконструируйтны кыдз прауральскöй мифологияса медшöр космогоническöй сюжет. Нöшта важджык морт мыгöра демиургъяса вариант: помтöм-дортöм саридз кузя пыжöн кывтiс Ен. Кывтiс сiйö дыр, мудзис, но шойччыны сувтны вöлi некытчö. Скöрысла Ен сьöлыштiс ваас и аддзис: сы бöрся сэтшöм жö пыжöн локтö сы кодь жö морт. Пондiсны кывтны öтлаын. Ен пöртiс туйëртсö гöгöраö. Гöгöраыд сунiс ваö, судзöдiс пыдöссьыс мутор да пондiс кыпöдчыны. Ен кынтiс саридз веркöссö. Йисö юрнас поткöдлiгас гöгöра пыркöдiс вомсьыс мусö. Тадзи вöлi мöдысь и коймöдысь. Бöрвылас сэсся гöгöра вермис кыпöдны куим лыа чир. Наысь Ен вöчис му. Ёртыслы Ен сетiс сöмын муö тшукöдöм тувйысь розь. Мöдыс розьöдыс петкöдiс быд сяма лëк тварсö. Мöд версия серти, Ен сетiс Омöльлы тув розьсö сэк, кор Омöль ворссис Енлы енэж да му вöсна вермасьöмын.

Дзоньнас тайö сюжетыс петöма Балканъясысь. Сiйö ëна паськалiс Асыв Европаса войтыръяс пиын роч йöзкост-христианскöй (апокрифическöй) традиция понда. “Улiса” демиурглы тув розь сетöм йылысь сюжет тшöтш жö ëна паськалöма, эмöсь параллельяс Асыв Европаын да Сибирын.

Му пуксьöм йылысь мöд вариант мыччöдöма кузь фольклор текстын, кодöс пасйöма 1923. воын ки помысь гижöм коми кывъя гижöдысь. Сэнi хаосса медводдза олысьнас петкöдчö косысь. Сiйö уялö “помтöм-дортöм саридз-океантi” да пытшкас новлö олöм чужтан колькъяс. Косысь дыр корсьö места, кöнi эськö позис пöжны колькъяссö, но сiдз оз и аддзы. Медводдза нëль колькйыс вöйöны. Бöръя кыксö сiйö вермö видзны да пöжö бордъяс улас. Колькъяссьыс петöны кык косысьпи: Ен да Омöль. Ёнмытöдзныс мамыс новлö найöс мыш вылас, а сэсся тшöктö судзöдны саридз пыдöсö вöйöм колькъяссö да пазöдны сылы мышкас. Та бöрын сiйö качö, уськöдчö увлань да кувтöдзыс вачкысьö ваас. Первойнас сунö Ен, а Омöль кынтö океансö. Но пондö гымавны, и Ен жуглö йисö чардбиöн. Ен судзöдö кык кольк да жугöдö найöс мамыслы мышкас. Öти кольксьыс косысь-мамлöн тушаыс паськалö-быдмö, вевттьысьö вöрöн да турунöн, а енэжын öзйö шондi. Мöд кольксьыс Ен вöчö отсасьысьясöс-идöгъясöс. Омöль тшöтш жö судзöдö кык кольк: öти кольксьыс лоöны тöлысь, тыяс да зыбучьяс, а мöдсьыс Омöльлöн отсасьысьяс. Сэсся Ен да Омöль морт мыгöрасьöны да лэччöны муö.

Тайö космогоническöй версия сертиыс, му артмö и кольк отсöгöн (енъяс-демиургъяс, шондi, тöлысь), и космос объектъяслöн биологическöй чужöм пыр, кор ачыс вöчысьыс кулö (му). Мулöн колькйысь артмöм мотив лöсялö уялысь лэбач мотивкöд, сöмын лэбачыс сунлö оз мула, а колькла. Позьö чайтны, мый мула сунлöм мотив и тайö версияыслöн подулын. Колькъяс, кодъясöс судзöдö Омöль, нюйтöсьöсь. Сунласьысь лэбач йылысь мифъясын нюйт пасйö ва пыдöсысь судзöдöм му. Сэкжö сiйö петкöдчö коми космогоническöй гижöдъясын. Нюйт вайö и öти гулю-демиург, кор найö “шуöны тöдмавны пемыдлысь да рулысь пыдöссö”. Мöд сюжетын Ен ыстö гулюöс мула и гулюыс тшöтш жö вайö буретш нюйт.

Вермас лоны, мый коми космогонияын му артмöдан кольклöн мифопоэтическöй символика вöлi йитчöма сöмын шондi да тöлысь артмöдöмкöд. Этша вылö, сэк гöгöрвоана “космос колькъяссö” нерациональнöй видзöм öдзыс видлалöм космогоническöй версияын му артмöдан процессын: космосса объектъяс пиысь наысь артмöдöма сöмын шондi да тöлысь. Му пуксьöм процессас найö инмöны сöмын ылöсас. Та дор висьтасьö и вöвлöм эскöм, мый “öти нывбаба кö гусялас мöдлысь курöг улысь кольк, то тайö лоö шондi гусялöм кодь жö”. Та кындзи синмö шыбитчö и “космос колькъяслöн” лыдыс, сы вöсна мый му артмöдан кольк йылысь мифлöн “классическöй” вариантын му вöчигöн тырмымöн öти кольк.

“Классическöй” вариантлы матiджык вариант эм перым-комияслöн, но сiйö тшöтш жö йитчöма сунласьысь лэбачкöд. Öдзыс вöлöма помтöм-дортöм океан. Сэнi уялöма косысь. Сiйö вайöма кольк да уськöдöма сiйöс ваас. Гöгöра сунлöма океан пыдöсас, судзöдöма кольксö да жугöдöма. Колькйыслöн вылi юкöнсьыс артмöма енэж, а улi юкöнсьыс му.

Перым-комияслöн эм некымын космогоническöй миф вариант, кöнi эм сöмын öти демиург. Вермас лоны, мый найö артмисны сëрöнджык, мый найö сöмын воддза мифологическöй чайтöм-гöгöрвоöмъяслöн реминисценцияяс. Öти версия серти, öдзыс вöлi сöмын кымöр. Ен ëна грöмитiс и кымöрсьыс чегис тор. Ен киськалiс кымöр торсö зэрöн, сiйö пондiс быдмыны. Тадзи артмис му. Тайö текстас кольöма гым вылын, а сiдзкö и, чардби (“енэж би”) вылын Енлöн (му пуксьöмöдзса) ыджыдалöм мотив. Öтл. зырян мифын Ен (юсь) да Омöль (гöгöра) уялiсны океантi да пондiсны вензьыны, кодныслöн гöлöсыс гораджык. Кор юсь горöктiс – гымыштiс, а гöгöра бердö вартiс чардби.

Традицияа мöвпсямын быдсяма вежсьöм гöгöртасын, торйöн нин места вежöм, гöгöрвосьö космос артман кадö бергöдчöмöн, кор муюгыдыс вöлi “нюдз” на. Му пуксян кадся космос моделируйтiгöн вöдитчисны сылöн символъясöн-маркеръясöн. Тадз, шуам, Емва бердын олысьяс ытшкан видзьяссö юклiсны бöрйöм войтыр отсöгöн, кодъяс “соборуйтiсны” ю шöрö якöрасьöм пыжъясын (öтл. мифологическöй дi ва хаос шöрын). Брыкаланскса том йöз Иван лунö, а Изьва сиктса том войтыр Илля лунö (шондi бергöдчöм да гожöма-ара кост) ворслiсны дiвывса видзьяс вылын.

Мöд перым-коми фольклор текстын му пуксьöмын тшöтш жö петкöдчö Ен, но быттьöкö ылöсас, кöсйытöг. Коркö важöн вöлöма сöмын Ен. Öтчыд сiйö рöдтöма аслас вöв вылас. Вöлыс вöлöм вывтi сëйöма да рöдтiгас уськöдöма тупыль. Сiйö тупыльсьыс и артмöма му.

Видлалöм версияясыслы кык матi перым-коми космогоническöй версияын му артмöдысьыс лэбач мыгöра, но уджалö öтнас и оз тöдчы некутшöм йитöд сунласьысь лэбач мифкöд. Öти версия серти, öдзыс вöлöма сöмын кымöр. Кытыськö воöма лэбач да пондöма корсьны пуксянiн. Пуксянiныс абу сюрöма да, лэбачыс орöдöма тычувсö да шыбитöма сiйöс кымöр вылас. Кымöрыс чорзьöма да пöрöма муö. Лэбачыс овмöдчöма му вылас. Мöд текстас висьтавсьö, мый му абу вöлöма, а вöлöма сöмын саридз. Лэбöма лэбач да сiталöма. Сiтсьыс артмöма “му вуж”. Воöн сiйö ëна быдмöма, муыс чорзьöма. Сунласьысь лэбач йылысь мифлöн танi эм сöмын кык реалия: ва хаос да му артмöдысь лэбач, но сунласьöмыс абу.

Öти перым-коми космогоническöй мифын демиургыс дзик абу. Стöчджыка кö шуны, сiйöс абу мыччöдöма. Öдзыс ва кындзи нинöм абу вöлöма. Кытыськö тöлöн вайöма бус да шыбитöма ваас. Лоöма неыджыд дi да пондöма быдмыны. И артмöма му. Му вылас быдмöма вöр. Вöрас лоöмаöсь вöрпаяс, а вöрпаяссьыс артмöма морт. Тайö версиясö гижöма неважöн (1987. воын). Тайö гижöдыс – комияслöн медся тöдса му пуксьöм йылысь мифлöн трансформация. Шöр концепцияыс сiйö жö: ва хаос, мутор (бустор), кодысь быдмö дi, а дiсьыс му, вöр артмö ачыс. Но мифас абу(öсь) демиург(ъяс). Та вöсна вöрпаяс да морт артмöны асьныс.

Уна мукöд войтырлöн моз жö комияслöн эз позь нимтыны пежъясöс “ним” сертиыс, сы вöсна мый позис чукöстны найöс. Торйöн нин эз позь казьтывны мöдар югыдсаясöс вой улö, уджалiгöн, пежлöн нимöн нимтыны (омöльтны) либö пежлы ыстыны челядьöс да подаöс: сöтлы ыстыны, сöтлы сетны. Пасъям, мый сöтны кывлöн кык вежöртас: ‘сöтöн нимтыны’ да ‘друг вартны, керыштны’. “Сöтлы ыстöм” челядьöс, понъясöс гусялöм да вежöм йылысь видзöд вежöм, шувгей, вöрса. Лëк ловъясысь видзчысьöм могысь мутиясöс нимтöны мöд ногöн. Татшöм сайöдöм вежöртаса нимыс уна. Найö эмöсь и мукöд войтыръяслöн.

Кутшöмсюрö нимъяс пасйöны ловъяслысь тырмытöмлунъяссö – китöм, кывтöм, пельтöм, ныртöм, чукля, чикля, пони чуня либö йöзысь торъялöм – кöрт кока, кöрт пиня, порсь кока, мöс гыжъя, сюра-пеля. Ловъяслысь тырмытöмлунъяссö быличкаясын гöгöрвоöдöны, öтар боксянь, морткöд паныдасьлöмöн, а мöдар боксянь, найö индöны, мый найö “мöдар югыдысь” (öтл. мöдарса, орчча). Тырмытöмлуныс мутияслöн сэтшöм жö аслыспöлöслун, кыдзи и вуджöр абутöмлун либö тыдавтöмлун (невидим, тыдавтöм).

Кутшöмсюрö нимъясын тöдчöны чайтöм-гöгöрвоöмъяс мöд войтыръяс йылысь, кыдз “öтдор” муюгыдсаяс йылысь: яран, тынгус. Орччöн олысь войтыр нимъяслöн синонимъясöн вöлiны тшöтш жö и тун, мисьтöм, тöлктöм.

Мутияслöн уна ним (бес, мути, сöтана, лешак да с.в.) воöма рочысь. Воöм кывъясыслы тшöкыда сетлiсны выль вежöртас. Тадз, лешакöн нимтöны не сöмын вöрса лолöс, но и висьöм лолöс (Эжва катыдса), и каститчöм (Эжва катыдса да кывтыдса, Печораса), и ортöс (Эжва катыдса). Овмöс ловъяс кындзи, бес кывйöн пасйöны быдсяма ловсö: васа бес, тыса бес, тыла бес да с.в. Мутилöн уна нимын эм не- юкöн: некошнöй, невидим, нешуть. Мукöдыслöн на пиысь эм мöдпöвста этимология: некошнöй кыв йитöны котшыс кывкöд, та понда чайтöны, мый мойдса Коштшей моз жö тайö лолыс воö тшын пиын. Удораын нешуть ним гöгöрвоöны шутлялöм öлан нимöн – не-свисть.

Нешуть нимöн повзьöдлiсны шутлялысь челядьöс: “Эн шутляв, нешутьыс нуас”. А сiдзсö вöлiны торъя терминъяс, кодъясöн повзьöдлiсны челядьöс, медым видзны найöс ковтöм вöчöмторъясысь: апа, апань, тюля-бука, сьöд дядь, сьöд пон, куття. Удораын бöрдысь кагалы шулiсны: “Эн бöрд, сьöд дядьяс воасны”; Эжва катыдын – “куття нуас”, “лешö локтас”. Тюля-букаöн повзьöдлiсны пырджык ворсан формаын: “Кодi мамöс оз кывзы, кодi айöс оз кывзы, кодi рок оз сëй, тюля-бука дзикалас”, а чуньяснас петкöдлiсны öти кок вылас (пев) чеччалысь “сюра” (водз чунь да чаль чунь) повзьöдчысьöс. Апаöн повзьöдлiсны ыждалысь челядьöс да пöсьлань, билань, пуан валань нюжöдчысь челядьöс, сы вöсна мый челядь кывйын апа кывлöн вежöртасыс не сöмын ‘апавны’, но и ‘пöсь, сотас’.

Мутияслöн öтвывтан нимъясыс тшöкыда индылiсны пежлöн лыд вылö: бес йылэм, беспиян, мутивöйяс, лешакъяс, лешак чукар, лешак стад, сьöд дядьяс да с.в.

Пежъяслöн образъяскöд йитчöм кывъяс да кывтэчасъяс комияслöн вöлiны и видчан кывъяс пыдди да мустöмтан эпитетъяс пыдди. На отсöгöн тöдчöдлiсны туйтöм оласног, вежöртöмлун, мисьтöмлун (видзöд мич).

Литература: Климов 1971, Лыткин, Гуляев 1970, Рочев 1972а, Старцев 1929, АЧМ.

О. Уляшев
МУ ШУД быдлаын – торъя гöран му вылын локализуйтöм магияа чужтан вын.

Коми мифологическöй чайтöм-гöгöрвоöмъяс серти, му шуда му зэв бура чужтö, сэтчö оз волыны тшыкöдчысьяс и поводдя вежсьöмъяс оз имитны няньпиянлы. Му шуд персонифицируйттöм, но зырян эскöмъяс серти, мöд мулысь чужтан вынсö позьö ëнмöдны, нуны кö неуна мусö “шуда” му вылысь ас му вылö да корны (вуджöдны) му шуд. Öтл. олысяöс вуджöдöм мöд керкаö, а тшöтш и важ керкаысь выль керкаö шуд вуджöдöм рöдитель керка гöбöчысь босьтöм мукöд либö гöбöчса “шуда му” сьöрысь босьтöм туйö: “Шуда олöм вылö гöбöч му босьтлiсны”. Йöз му шуд гусялöм вöлi зэв сьöкыд мыжöн. Татшöм мыжа кулöмалöн лолыс эз вермы öтлаасьны мöдар югыдын мукöд ловъяскöд да ветлöдлiс сир биа ю пöлöн, кодi торйöдö таладор да мöдар югыдсö. Мукöддырйиыс сiйö петкöдчылiс ловъяяслы, каитчис да элясис аслас рöк вылö.