Ад быдлаын (< роч); ад гуран скр., шс.; вакрамеш

О. Уляшев, В. Шарапов

Эжва катыдса преданиеын сизим вок мöдöдчисны вöравны Из сайö. Найö воисны морт юр изйöдз – морт юр мыгöра кыртаöдз, код бердын эз позь шумитны. Шумсьыс кыптылiс бушков, турöб да лëкавлiс. Öти вок вöзйис видлыны морт юр из дорас вынсö – чеччыштны из вомöныс. Вокъяс сьöрсьöн-бöрсьöн чеччалiсны из вомöныс да пöрисны изъясö. Тадзикöн морт юр из бердö артмис нöшта сизим кырта.

Мöдар югыдлöн образыс торйöдны позьтöма йитчöма чайтöм-гöгöрвоöмъяскöд кулöм йылысь да кулöмбöрся олöм йылысь. Мифологическöй чайтöм-гöгöрвоöмъяс мöдар югыдлöн ин йылысь абу öткодьöсь. Öтар боксянь, чайтöны, мый мöдар югыдсö ловъя муюгыдысь торйöдö збыль географическöй кост, мый сiйö важ йöзлöн ылi войвывса оланiн. Мöдар югыдö кулöма мунö кузь да сьöкыд туйöд, вуджö джуджыд гöраяс, вöръяс да юяс. Мöдар боксянь, мöдар югыдыс быттьöкö ловъяяслöн муюгыд “пытшкын”, сiйö – ловъяслöн тыдавтöм ылдöс йöзлöн тыдалана ылдöс пиын. Та вöсна кулöмаяс отсасьöны (либö торкалöны) гортгöгöрса уджъясын, вöралiгöн, чери кыйигöн, му выв уджъясын да с.в. (видзöд кулöма). Мöдар югыд йылысь кык нога тöдмöсъяссö казявлiсны нин мöдар югыдсö медводдза туялысьяс. Такöд йитöдын В. П. Налимов чайтлiс, мый кулöмаяс олöны ловъяяс пиын сэтчöдз, кытчöдз найöс казьтылöны, а сэсся мунöны “мöд планета” вылö.

Мöдар югыд версияыс абу уна. Öти версия серти, мöдар югыдас сир би гуран бердын сулалö кузь кокъяса ыджыд пöрт. Омöль (танi – дявöл, космогонияын – “пемыд” демиург) шыблалö пöртъяс морт ловъяс. Орччöн сулалöны веськыда олысьяслöн еджыд керкаяс. Паськыдджык версия пасйöма XIX нэм шöрын Н. Заварин. Сы серти, мöдар югыд – тайö крут да вильыд чой, а сы гöгöр биа ю. Чой йылас рай, кытчö тэрмасьöны кулöмаяслöн ловъясыс. Михаил архангел пыжöн вуджöдö веськыда олысьяслысь ловъяссö ю вомöныс, а мыжаяслöн ловъясыс вуджöны вöсньыдик потш кузя. “Биа ю” образын позьö тöдмавны ад, кытчö веськалöны мыжаяс. Мöд версияяс серти, рай чой гöгöрыс сир биа ю, пöсь ва, ю либö саридз. Öнiя пасйöдъяс мöдар югыд йылысь – тайö ëнджыкасö вöтъяс, кöнi медшöр мотивыс – (ловъя мортлöн) мöдар югыдö ветлöм. Öнiя пасйöдъясын мöдар югыдлöн архетипическöй схема шöр параметръясыс кольöны. Татшöм ногöн, мöдар югыдлöн концепцияыс петкöдчö муюгыдлöн медвылi да медулi пунктъяссö – рай да ад – паныд сувтöдöмын. Рай да ад образъясöн лоöны чой да чойсö кытшовтысь ва (би). Улi муюгыд пырö ва ылдöсö. Адлöн, кыдз космос “вылi” тшупöдкöд öткодь инöда “улi” тшупöдлöн, артмöмыс мифологияын подулавсьö некымын версияöн: 1) енэжысь шыбитöм “пемыд” демиург Омöль пырö улi муюгыдö тувйысь кольöм розь пыр; 2) кор Ен ëрö медводдза нывбабаöс, кодi Омöльлöн тшöктöм серти виö ассьыс дас кык нывсö, ачыс вöйö адö да лоö кулöмöн, а нывъясыс – висьöм ловъясöн; 3) комияслöн мифическöй пöльясыс (чудь) гуалöны асьнысö либö пырöны муö. Тадзи найö восьтöны “улi муюгыдсö” да лоöны медводдза кулöмаясöн; 4) адсö “восьтöны” медводдза мыжаяс – вина гаг да ад горш морт (видзöд ад).

Первойсö кулöмаяслöн ловъясыс вöлiны сöмын улiса муюгыдын. Сëрнитчöм серти Ен сетiс став ловсö Омöльлы кöрт дорны велöдöмысь. Веськыда олысьяслысь да мыжаяслысь ловъяссö, а тшöтш и налысь оланiнсö торйöдтöмыс оз лöсяв христианскöй доктринакöд. Мифологическöй мыв гöгöрвоö торйöдтöмлунсö хаосöн, космослöн öтвесьталун торксьöмöн. Кризиссö бырöдö Исус Кристос, кодлöн танi петкöдчöны демиург функцияяс. Сiйö лэччö адö, торйöдö югыдсö пемыдысь, лунсö войысь (öдзыс вöлi йылавек лун), шуйга веськыдысь, мыжаясöс сувтöдö шуйгаладорас, а веськыда олысьясöс веськыдладорас. Öнi сэсся мöдар югыдсö ад да рай вылö юкöмлöн лоö онтологическöй подулалöм. Ад лоö “улын”, шуйгаладорын, пемыдын, а рай – “вылын”, веськыдладорын, югыдын. Тадзи жö юксьöны кулöмаяслöн ловъясыс.

Би либö ва мыджöд вуджигöн да чойö кайигöн кулöма ловъяс мучайтчöны. Кыкнан мотивсö подулалö мыжсö да “пежсö”, кыдз “сьöктаа” субстанция гöгöрвоöм. Мыж лыдыс быттьöкö содтö кулöмалы “сьöктасö” и кулöма пыдöджык вöйö адлöн ваа-биа йирö. Öнiя гижöдъясын героиня вуджö васö подöн да вöйö нырöдзыс, чояс кавшасигас сiйö некымынысь исковтö, сэсся кöнкö вылын ки улас пондöны веськавны кустъяс. Мыжъяслöн сьöкта сертиыс биа ю вомöн вуджасыс вермис лоны паськыд кöрт поскöн, керйöн, потшкöн да вöсни черань везйöн. Черань вез йитчöма черань образкöд, кодi вуджöдö кулöмаяяссö везтiыс (öтл. эскöм, мый аддзан кö чераньöс, сiдзкö, регыд воас юöр). Вуджны позьö и ки чышкöдъяс (либö дöра торъяс) кузя, кодъяс вылын гортсö лэдзöны гуö. Удораын – сiдзшусяна “муртöс” кузя. Муртöсöн шуöны горт кузьта бедь, кодöс кöрталöны гу выв крест бердö. XX нэмöдз Комиын кутшöмсюрö районъясын кулöмаясöс дзеблiсны кодйöм гортъясын-колодаясын. Найö пасйисны пыж, кодi тшöтш жö колiс биа ю вуджигöн. Та кындзи, XX нэм заводитчигöн на додьсö, код вылын гортсö нулiсны шойнаас, кольлiсны гу вылас, медым, буракö, лолыс вермис сiйöн ветлыны мöдар югыдас. Мый чояс кайнысö сьöкыд, висьталö и крут, “вильыд”, “майтöга”, “кöрт” чойлöн образыс. Кайигас мыжъясыслöн сьöктаыс кыскö мыжа ловсö увлань и сiйö исковтö пыдöстöм ад йирö. Колö пасйыны, мый чойö кайнысö мöдар югыдö сьöрсьыс босьтлiсны олöм чöж чукöртöм гыжъяс. Та понда тшöтшöдöм гыжъяссö эз шыблавлыны, а чукöртлiсны торъя местаö, медым сэсся пуктыны гортъяс. Гортъяс пуктылiсны сiдзжö и кулöмалысь олöм чöжыс гылалöм юрсисö. Кулöма кайлiс чой йылас да веськавлiс öдзыс кулöм матыса йöз дiнö. Вöтъясын важ йöзлöн оланiныс петкöдчö нюдзвиж туруна лудöн. Öтл. коми енэж < ен + эж. Кулöмаяс тшöкыда пукалöны пызан сайын. Такöд тшöтш пасйöны, мый пеж кулöма абу пызан сайын, а пон чомйын либö кöнкö мöдлаын. Кулöмаяс корöны вöталысьсö пызан сайö, но сiйö öтдортчö.

Мöдар югыдö ветлöм тема ëнакодь паськалöма коми фольклорын, кöть и абу петкöдчöма ясыда. Медводз тайöс позьö пасйыны шемöса мойдъяс йылысь, кöнi висьтавсьö геройлöн мöдар югыдö гöтрасьöмöдзса ветлöм йылысь. Шуам, “Шомвукваын” геройыс ветлö овтöм войвыв дi вылö, кöнi дзебсясьö сылöн гöтырыс. Туй выв сьöкыдлунъяс,да дi вылö вуджöм семантикаын, а сiдзжö и гöтырсö да воштöм озырлун косöдöмын – сiдзкö, мöд социальнöй статусö воöдчöмын – позьö казявны мöдар югыдö ветлöм идея. Мöдар югыдлöн мойда образъяс лыдö пырöны “вöр”, “гöра”, “терем”, кытчö туйыс мунö “саридз” либö “ю” вомöн. Тшöкыда “дивö муюгыдыс” му улын либö ва улын. Кöлысьдырся бöрдöдчанкывъясын мöдар югыдö ветлöм тема лоö структура пыдди, кодi гöгöрвоöдö öбрадыслысь вежöртассö. Мöдар югыдö ветлысьнас лоö мыйкö, мый мыччöдö невестасö – ныв вöля, кодi метафораясын петкöдчö “кöсаöн”, “ленточкаöн”, “мича ныв нимöн” да с.в. Туйыс заводитчö öшиньсянь, код бердын бöрдö невестаыс, либö пывсян трубасянь, кытысь “ныв вöляыс” лэбзьö тшынöн, пöртчö зарни косысьö, лэбзьö вичкоöдз, но крест вывсьыс аслыс ин оз аддзы. Сэсся вöляыс лэбö енэжö, вöрса кушинö, тылаö и бöръявылас кывтö ю кузя. Кутшöмсюрö бöрдöдчанкывъясын висьтавсьö героинялöн уна ю вожöд ветлöм йылысь, кодi помасьö гыа саридзын вынтöг васö куралöмöн.