Ад быдлаын (< роч); ад гуран скр., шс.; вакрамеш

Н. Конаков

Öти фольклорса версия серти, вöралысьлы дышöдiс овны вöрас öтнасыслы и сiйö думыштiс вöчны аслыс ёртöс пуысь. Кералiс пипу керйысь морт мыгöра фигура да пондiс сыкöд варовитны, корис, мед сiйö ловзяс. Дыр корöм мысьт пипу мортыс ловзис, сувтiс да пондiс ветлыны да сёйны йöз моз. Найö кутiсны вöравны öтлаын. Кыйдöсыс вöлi уна. Но регыд вöралысь пондiс повныкодь пипу мортсьыс да думыштiс пышйыны сы дорысь. Лада здукö сiйö пышйис да воöдчис гортöдзыс. Пипу морт мунiс сы бöрся. Кöть и став керка öдзöсыс вöлi игналöма кевмысьöмсорöн, сiйö йирис öдзöсъяссö да писькöдчис пытшкас. Но горöдiс петук и пипу мортыд уси муö. Сiйöс сотiсны.

Мöд версия серти, пипу мортöс вöчöма код тöдас кодi. Тайö вöлöма вöрса пу сёртас либö морт мыгöра идол. Вöралысь скöрмöма омöль кыйдöс понда да пипу мортöс аддзöм мысти ёрччöма. Пипу морт ловзьöма да мунöма сы бöрся. Вöралысь повзьöма, пышйöма вöр керкаöдзыс, игнасьöма да пернапасалöма öдзöссö. Пипу морт вой шöрöдз йирöма öдзöссö, но абу вермöма пырны. Тадз жö вöлöма и мöд войнас. Коймöд войнас пипу мортыд пырöма пернапасавтöм юрйыв öшиньöдыс да виöма вöралысьсö.

Литература: Жаков 1901, Сорокин 1910-20.

Н. Конаков

Чайтлiсны, мый плакун турун позис аддзыны сöмын виччысьтöг, шуам, чери кыйысьлы вöв юрлы пытшкын быдмысь плакун турун вермис сюрны ветеляс. Ладанкаö вурöм да перна кöв бердö öшöдöм плакун турун вуж бура видзис быдсяма туналöмсьыс. Медым тöдмавны, эз-ö тун пыр керкаас, öдзöс куричö тшукöдлiсны нянь пурт да öшöдлiсны сы вылö ладанкаа перна кöв. Таысь туныс эз вермы петны керкасьыс. Прöстöй мортлы плакун турун эз имитлы. Татшöм сяма жö чайтöм-гöгöрвоöмъяс плакун турун йылысь, кодысь полiсны бесъяс да тунъяс, вöлiны и рочьяслöн. Плакун турун вуж корсьлiсны Иван лун войö.

Рочьяслöн моз жö комияслöн вежа Плор да Лавр вöлiны вöв дорйысьясöн. Плор-Лавра лунö эз позь уджавны, вежа мученикъяс понда нуöдлiсны молибенъяс. Вичко дорö вайöдлiсны öтув ньöбöм öшкöс да сэн жö и начкылiсны. Коймöд пайсö сетлiсны казнаö, мöд коймöд юкöнсö вичкосаяслы, а кольöм яйсö пулiсны вичко дорас да öтув сёйлiсны. Юлiсны öтув пызьысь да чужысь пуöм сур. Торйöн нин паськыда Плор-Лавра лун пасйылiсны перым-коми Коча сиктын. XIX нэмын тайö луннас сэнi вайлiсны висьö 80 öшкöс, кодъясöс месайясыс кöсйысьлiсны вежаяслы. XX нэм заводитчигöн налöн лыдыс чинiс, но пыр на вöлi ыджыд, шуам, 1908 воын Плор-Лавра лунö вöлi виöма 47 öшкöс. Важ ног моз 18. лунöдзса войö водзвыв пывсьöм бöрын Кочаö чукöртчылiсны став матiгöгöрса крестьяна, еджыд дöрöмаöсь да выль нинкöмаöсь. Сьöрсьыс вайöдлiсны мыськöма жö öшъясöс. Чукöртчылiсны часовня бердö, а асывнас, часовнясö восьтöм бöрын, ставöн тэрмасисны пуктыны сись вöвъяслöн вежа дорйысьяслы. Вежа Плорлöн да Лаврлöн иконаясыс вöлiны часовняас шöринын: öтиыс ыджыд орскöн вöтлö вöвъясöс ваö, а мöдыс кутö найöс вöжжиöдыс да мыськö. Сэсся ставöн мунлiсны ю дорö, кöнi орчча Юксево сиктса попъяс служитлiсны молибен. Молибен дырйиыс ставöн пырлiсны коскöдзыс ваö, пыртöдлiсны и висьысь вöвъясöс. Молибен бöрас заводитчылiс вись вайöм. Быдöн начкылiс ассьыс öшсö ачыс сьöрсьыс вайöм ныж пуртöн. Чайтлiсны, мый мыйöн ёнджыка мучитчис öшкыс ныж пуртнас голясö вундiгöн, сiйöн мусаджык сiйö вöлi енлы. Куяссö козьнавлiсны кочаса часовняö, кывъяссö да вöркъяссö сетлiсны сэтчöс администрацияö, юръяссö – сиктса юралысьлы, а яя öш бекъяссö – молибен служитысь попъяслы. Коляс яйсö пулiсны пöртйын часовня бердас. Пусьылiс медпöрысь мортыс. Став вись ваян кöлуйсö (пöртъяс, пуртъяс, вилкаяс, тасьтiяс) видзлiсны часовня бердас торъя креста чомйын. Яйсö пуöм бöрын сёйлiсны. Сёйны позис быдöнлы, тшöтш и корысьяслы, кодъяс Плор-Лавра лунö волiсны Кочаö зэв унаöн.

Н. Конаков

Дендрологическöй код серти пожöмыс – семиотическöй ай полеын. Та боксянь сiйö сувтöдсьö паныд кыдзлы – нывбаба символлы. Артмö, мый пожöм негативнöй сюрöса. Öти версия серти, перым-коми фольклорса Пера кувсис кыйсян везöтсö зэвтiгöн. Везöтыслысь öтар помсö сiйö кöрталiс ас, веськыд берегса кыдз бердö, а мöдар помсö кöрталiс мöдлапöвса, шуйга берегса пожöм бердö. Мöд оппозицияын (пожöм / коз), кöнi кыкнан пуыс ай символа, пожöмыс позитивнöй семантикаа нин. Мöд версияын Пера кöрталö везöтсö ас берегса джуджыд пожöмö, а мöд помсö – мöдлапöвса коз бердö, но козйыс чегö. Пера усьö да кувсьö. Тайö кык пусö паныд сувтöдöмын пожöм петкöдчö вынаджыкöн. Тадз, тöдысь туналöмöн косьтö коз, но лыддьö вынаджыкöн мöд тöдысьöс, кодi косьтö пожöм.

Комияслöн традицияа мöвпсямын тöдчö кык нога отношение пожöм дорö. Пожöм йитчöма и вылi, и улi муюгыдкöд, космослöн вылi да улi юкöнкöд. Пожöм йитö тайö юкöнъяссö сувтсаногыс.

Му ув муюгыдкöд йитöд вылö индöны перым-коми эскöмъяс “шапкаа пожöмъяс” йылысь, кодъяс быдмöны шойнаын да шутлялöмöн кайтöны кодлыськö кулöм. Чайтöны, мый кык джуджыд пожöм костö гуалöма Пераöс. Перым-комияслöн важ юралысь да культурнöй герой Кудым-Ош кузь туйö петтöдзыс локтö айыслöн гу дорö джуджыд пожöм бердö да некымынысь лыйö пожöмас ньöввужйысь. Став ньöвнас сiйö веськалö пу шöрас да мöдöдчö туйö тöдöмöн, мый ставыс лоö лючки. Зырян абумойда фольклорын вевтыртö пожöмлöн йитöдыс му ув озырлунъяскöд. Öнöдз на уна удораса да эжваса сиктын эмöсь легендаяс коркö быдмылöм джуджыд пожöмъяс йылысь, кодъяс улын вöвлöмаöсь туналöм чуд кладъяс. Коми Йиркап корсьö пожöм-ас пу да вöчö сыысь шемöса лызь.

Чайтöм-гöгöрвоöмъяс сы йылысь, мый пожöм йитчöма енэжкöд да мый сы отсöгöн позьö шыöдчыны Ен дiнö, вöлiны неважöн на. Тадз, 20. воясö кöсйисны бырöдны вичко службаяс, та вöсна Емва бердын гожся рытъясö уна нывбаба ветлiс юбердса джуджыд пожöм дорö, найö öзтавлiсны пожöм увъясас сисьяс да юрбитлiсны. Айму вöсна ожман бöрын нин печораса важ крестлы юрбитысьяс, кор бара пондiсны сиптавны налысь кевмысян керкаяссö, мунлiсны вöрö, öшлiсны енпöвъяссö пожöм вылö да юрбитлiсны сэнi.

Перым-комияс чайтлiсны, мый вына тунъяс вермисны пöртны пожöмö мортöс. Зыряналöн аниматическöй чайтöм-гöгöрвоöмъяс серти, пожöмъяс гöгöрволiсны морт сёрни, а войнас сёрнитлiсны öта-мöдныскöд, ылöдз юöртлiсны луннас аддзылöм да кывлöм йылысь.