Ад быдлаын (< роч); ад гуран скр., шс.; вакрамеш

Н. Конаков

Петыр Епим – тöдысь, Эжва катыдса тунъяс йылысь висьтъясса персонаж. Петыр Епим нимкöд йитчöма некымын сюжет. Тадз, ёна паськалöм “ин месайяс” йылысь быличкаясса “пыж кö сувт, и чужва сувт” сюжетын сiйö вермасьö выльгортса тункöд да вермö сiйöс, тшöктö бырöдны нимкывсö пыж вывсьыс, ачыс нимкывъялö чужвасö. Петыр Епим петкöдчö танi пон бöж кералысьöн, “вына” тунöн, кодi колльöдö кöлысясьысьясöс Вöльдiнысь Помöсдiнö.

Важ крестлы юрбитысьяслöн быличкаясын Петыр Епим висьталö эсхатологическöй серпасъяскöд йитчöм водзö лоöмторъяс йылысь: “пöтöса олöм бöрын воас кад, кор мамыс пондас кагаыслöн вомсьыс нянь мырддьыны”, “кутасны лэбавны кöрт лэбачьяс”, “кöрт пемöсъяс пондасны му сёйны”, “ай чин да энь чин öткодьöсь лоöны” да с.в. Тшöкыда тайö висьталöмъясыс йитчöны Петыр Епимлöн Карп пиыскöд.

Öти сюжетын тунъяс вермасьöны вöралiгöн. Öти вöралысь-тöдысь тшыкöдöма Петыр Епимлысь понсö. Таысь Петыр Епим бергöдöма сылысь кöм вольöссö и вöралысьыс абу вермöма мунны видлавны лэчьяссö, а лунтыр бергалöма вöр керка гöгöрыс. Бöрыннас ковмöма корны Петыр Епимöс сiйöс мездыны.

Тайö циклас медся аслыспöлöсöсь быличкаяс Петыр Епим йылысь кыдз ин кутысь йылысь: “Петыр Епим “кутiс” вöльдiнса вуджанiн: быдöнлы, кодi печораса миртуй кузя мунлiс, колiс пыравны сы ордö, чай юны, висьтасьны, кодi, кытчö да мыйла”. Тайö сюжетыслысь гижöма кык шöр вариант. Öтиас висьтавсьö мужичöй йылысь, кодi мöдöдчöма Изьвалань да вуджöма вöльдiнса вуджанiнтi Петыр Епим ордö пыравтöг. Мужичöйыд лунтыр мунöма, а рытнас бöр воöма вуджанiнас, но таладорас. Мöд вариантас кодкö мунöма Изьвасянь Помöсдiнлань да абу жö пыралöма Петыр Епим ордö, кöть и вуджöдчысьыс ёна тшöктöма. Сэсся Помöсдiнö вотöдз сiйö лэччöма Мачека шор дiнö, но мыйлакö веськалöма Эжва сайö вöльдiнса вуджанiн мöдарас. Сöмын Петыр Епим ордö пыралöм мысьт мунысьяс лючкиа мöдöдчöны водзö. “Ю вомöн шыбитöм” сюжет комияслöн устнöй абумойда прозаын гежöд, тшöкыдджыка паныдасьлö “ю вылын сувтöдöм” либö “ю пöлöн шыбитöм” (видзöд Петыр Öлексан).

Тшöтш жö гежöд сюжет сы йылысь, кыдзи Петыр Епим накажитö вöралысь артельса шмонитысь ёртъяссö. Найö мöдöдчöны гортас да шмонитöмсорöн шуöны кольччысь Петыр Епимлы, мый узясны сылöн гöтырыскöд. Петыр Епим шуö налы, мый тадзи сёрнитöмнад найö гортас регыдöн оз воны. И збыль, сиктöдзыс кык верст вотöдз, Вöль кумлöсын, кодöс лыддьылiсны гажтöминöн, лыбис бушков да пöрлалiс туй вылас пуяссö. Вöралысьяс повзисны да косiсны бöр. Найö корисны Петыр Епимлысь прöща да петiсны туйö сыкöд нин. Кор воисны гажтöминöдзыс, пöрöм пуясыс пондiсны бöр сувтавны. Таысь шмонитысьяс нöшта на повзисны.

Мукöд “торъя местаса тунлöн” образысь öтдор Петыр Епимöс оз лыддьыны лёк тунöн. Та вöсна сыкöд абу йитчöмаöсь традиционнöй сюжетъяс сы йылысь, мый тунöс виöны сиктса олысьяс либö вынаджык тун. Кеслöг торкöмысь накажитöмсö информаторъяс мыччöдöны кыдз тешитчöм либö арт-лад видзны кöсйöм. Петыр Епим йылысь текстъясын абу и “тунлöн сьöкыд кулöм” мотив, сы вöсна мый чайтöны, мый кувтöдзыс сiйö удитöма сетны вынсö ичöт пиыслы Карплы. Эжва катыдын Карпсö тöдлiсны кыдз важ крестлы юрбитысьöс. Сiйö нималiс ёнджыкасö водзö лоöм йылысь висьтасьöмъяснас, а эз тунасьöмöн.

Литература: Уляшев 1997, АЧМ.

О. Уляшев

Библия серти, Петыр апостол вöлöма чери кыйысьöн. Та вöсна рочьяслöн тайö луныс эз прöста вöв “чери кыйысь Петыр лунöн”, а ачыс Петырыс чери кыйысьясöс дорйысьöн. Комияслöн Петыр лунсянь позис кыйны чери, а Петыр апостол (стöча кö, кыкнан апостолыс, сы вöсна мый найöс гöгöрволiсны öти мортöн – Петыр-Павелöн) дорйис чери кыйысьясöс. Чери кыйны мунiгöн шулiсны: “Петыр-Павел, сет чери”. Медводдза черисö сёйöм бöрын кевмылiсны: “Енмöй, Петыр-Павел, сет чери кыйысьлы дзоньвидзалун да сымда пуд да пунт чери, мында сьöмыс да лыыс”.

Тöдчана вöлi и вöралöм. Петыр лун вöлi и вöралысьяслöн лунöн. Петыр лунöдзса войö вöралысьяс мунлiсны вöрö корсьны Петыр вуж либö Петыр перна. Быдмöгсö тадзи нимтöма сы вöсна, мый сылöн коръясыс артмöдöны крест. Вужсö видзлiсны ен пельöсын, а вöравны мунiгöн быд вöралысь кöртавлiс сiйöс перна кöв бердас неминучаысь видзчысьöм могысь.

Комияс Петыр-Павеллöн образын тöдчöдöны кык чери кыйысьлы колана аслыспöлöслун – горшлун (азарт) абутöм да терпенньö: “Шуöны, мый Петыр-Павел 25 во кыйсьöма, кыйöма öти йöршöс, да и сiйöс лэдзöма”. Петыр-Павел, кодi вöлöма и райса ворота ключ кутысьöн, горш мортöс раяс оз лэдз. Мойдъясын (“Салдат да Кулöм” сюжет) Петыр-Павелöс петкöдлöма ироническöя: стрöг, но бур сьöлöма да бöбоват пöль, кодöс оз кывзы Кулöм да пöръялö Салдат.

Апостолъяслöн лунö помасьö Петыр видз. Изьватас Петыр лунöдзса лунö гажöдчылiсны. Том йöз, шöр арлыда да пöрысь нывбабаяс чукöртчылiсны торъя котыръясö. Том йöз котырö пырлiсны и нывъяс, и зонъяс, а верстьöджык чукöрö – сöмын нывбабаяс. Чукöртчылiсны кодлöнкö гортас. Вайлiсны пöжасъяс (шаньгаяс да с.в.), сур, вина да бытьöн шыдöс да нöк. Нöксьыс вöчлiсны вый да сэсся пулiсны выя рок. Сёйöм бöрын гажöдчылiсны асылöдзыс. Том войтыр пулiсны Петыр роксö и ывлаын. Ныв-зон мунлiсны видз вылö, пулiсны выя рок, а сэсся сьылiсны да йöктiсны. Петыр лунö быдлаын ворслiсны луд вылын.

Литература: Ветошкина 1982, Громыко 1975, Дукарт 1975, Заварин 1870/1, Конаков 1993, Микушев, Чисталев 1960, Плесовский 1963, ОУ ЧМ.

Н. Конаков
ПЕТЫР ПЕРВОЙ быдлаын, Петыр Первой уд., Петыр Первой вэ., Пет Первой вэ., печ., Пет Первой уд., Петра Великöй п.-к., Пет Великей вэ., Цар Петр изь. – историческöй прототип – Петр I (1672-1725), роч сар, Россияса медводдза император, коми быличкаясса, мойдъясса да апокрифическöй легендаясса герой.

Ыджыд сар-реформатор Петр I лои вöвлöм Роч империяса уна войтырлöн фольклорса геройöн (ёнджыкасö историческöй да топонимическöй легендаясын да преданиеясын). Комияслöн Петыр Первой прöстöй сюжета бытöвöй мойдса герой: Петыр Первой ылалö вöралiгöн и вöрсьыс сiйöс петкöдö мужик либö збой салдат. Мойдъясын, кöнi мездысьнас петкöдчö салдат, висьтавсьö налöн олöм йылысь сьöд вöр шöрын рöзбойникъяслöн керкаын. Найö олöны сэнi пöчкöд (вариантъяс: пöч да кывтöм кеслач ныв, пöч нывбабакöд да нывкöд). Салдатлöн сюсьлун да повтöмлун отсöгöн рöзбойник керкаын олысьясыс кулöны, а салдат да Петыр Первой петöны вöрсьыс да нуöны налысь став гуöм эмбурсö. Тайö Эжва катыдын гижöм мойд вариантсö ёнакодь мифологизируйтöма. Тадз, пöч, кодi Петыр Первойлöн да салдатлöн воигöн керкаас öтнас, петкöдчö Ёмаöн. Гöбöчас – олан ылдöслöн улi юкöнын – видзöны шойяс: рöзбойникъяс сёйöны морт яй. Петыр Первой да салдат узьмöдчöны йирк вылын – оланiнлöн вылi юкöнын. Буретш сэнi салдатыс öтиöн-öтиöн виалö рöзбойникъясöс, кодъяс кöсйöны найöс помавны. Салдат кералö налысь, а сэсся и Ёмалысь юрсö, öтл. буретш татшöм ногöн коми мойдса герой-багатыр виö уна юра Гундырöс.

Мöд Эжва катыдса текстын Петыр Первой ачыс петкöдчö шöр геройнас. Тайö – нарратива апокриф Исус Кристослöн адö лэччылöм йылысь. Кор Исус Кристос юкис адса олысьясöс мыжаяс да мыжтöмъяс вылö да кöсйис петкöдны найöс адсьыс, Петыр Первой (сöмын сiйöс пасйöма ним сертиыс) шуис: “Исус Кристос, босьт менö тшöтш!” Кристос вочавидзис: “Му вылын тэ ёна сюсь вöлiн, сюсьлуннад ачыд и петан татысь”. Öтнасöн кольöм Петыр Первой пондö муртавны адсö аршинöн да мелöн вöчалö пасъяс. Адын ыджыдалысьлöн отсасьысьыс, бес, юалö Петыр Первойлысь, мый сiйö вöчö. Мöдыс вочавидзö, мый адас лои уна места и сiйö кöсйö лэптыны вичко. Ыджыдалысьыс тайöс тöдмалö да тшöктö вöтлыны Петыр Первойöс райö.

Тайö фольклорса сюжетыслöн артмöмыс, буракö, йитчöма коми важ крестлы юрбитысьяс пöвстын бергалысь ки помысь гижöм апокрифъяскöд. Важ крестлы юрбитысьяслöн Петр I дiнö торъя отношениеыс чужис ёнджыкасö сы понда, мый сiйö кöсйис легализуйтны табакöн вузасьöм да куритчöм. Сiйö кедзовтiс весиг веськыд эскана вичколысь табак вылö лёка видзöдöмсö.