Ислам тарихи вә он дөрд мәсумларын (Ә) ҺӘЈаты тәҺгигат групу бисмиллаһир-рәһманир-рәһим

ИМАМ ЗАМАНЫН МӨ`ҸҮЗӘЛӘРИ

1. Шејх Туси, Аббаси хәлифәси Мө`тәзидин мә`мурларындан олан Рәшигдән бу һадисәни белә нәгл етмишдир:

Рәшиг белә дејир: Бир ҝүн Аббаси хәлифәси Мө`тәзид мәни чағырыб «ешитдијимә ҝөрә имам Һәсән Әскәринин евиндә бир ушаг вардыр» - деди вә мә`мурларындан ики нәфәри мәнә гошуб белә әмр етди: Тезликлә Самирраја, имам Һәсән Әскәринин евинә ҝедиб һәмин ушағы өлдүрүн вә башыны мәнә ҝәтирин. Биз сүр`әтлә ҝәлиб имамын евинин гапысына чатдыг. Гапыда бир гул отурмушду. Она әһәмијјәт вермәјиб евә ҝирдик. Чох ҝөзәл бир ев иди. Бир буҹагда бир пәрдә асылмышды. Пәрдәни галдырыб су илә долу бир бөјүк отаг ҝөрдүк. Сујун үстүндә бир халча вар иди, халчанын үстүндә дә бир оғлан ушағы намаз гылырды. Мә`мурлардан бири отаға ҝирди вә дәрһал суја батды. Биз ону чәтинликлә гуртардыг, амма өзүндән ҝедиб биһуш олду. О бири мә`мур да отаға ҝирән кими суја батды. Ону да чыхардыг вә о да биһуш олду. Бир мүддәтдән сонра икиси дә һуша ҝәлди. Горхудан титрәјәрәк атларымыза миниб хәлифәнин сарајына доғру һәрәкәт етдик. Ҝеҹә јарысы ораја чатдыг. Хәлифә јатмајыб бизи ҝөзләјирди. Әһвалаты олдуғу кими онун үчүн данышдыг. О да бизим кими горхудан титрәјиб «һеч ким бундан хәбәрдар олмасын вә бу сирри һеч кимә демәјин, јохса сизи өлдүрәрәм» - деди. Аббаси хәлифәси Мө`тәзид нә гәдәр ки, сағ иди бу мәҹараны бир кәсә данышмамышдым.

2. Әли ибни Синанын гејд етдијинә ҝөрә, Гум әһалисиндән бир дәстә имам Һәсән Әскәринин хидмәтинә јетишмәк үчүн бир мигдар пул илә бирликдә Самирраја доғру јола дүшмүшдүләр. Ора јетишәндә һәзрәтин шәһид олдуғуну ешитдиләр. Нә едәҹәкләрини билмирдиләр. Нәһајәт онлары имам Һәсән Әскәринин гардашы Ҹә`фәрә танытдылар. Онлар Самирраја ҝәлмәкләринин сәбәбини Ҹә`фәр үчүн данышдылар. Ҹә`фәр дә онлара «пулу мәнә верин, онун хәлифәси мәнәм» - деди. Амма онлар «имамын јанымыздакы пулларын мигдарыны вә һәр бир кисәнин кимин олдуғуну билмәси лазымдыр. Әввәлләр дә биз белә едәрдик» - дедиләр. Ҹә`фәр һирсләниб белә деди: Гардашым да бунлары билмирди. Сиз јалан дејирсиниз. Бу гејби бир мәсәләдир. Аллаһдан башга һеч ким гејбдән хәбәр верә билмәз. Амма онлар сөзләриндән дөнмәдиләр. Нәһајәт Ҹә`фәр онлардан хәлифәјә шикајәт етди. Хәлифә дә онлара әмр етди ки, пулу Ҹә`фәрә версинләр. Амма онлар «бу пул бизим јанымызда әманәтдир. Имамын хәлифәси варса, пулу она вермәлијик, јохса саһибләринә гајтармагдан башга һеч бир чарәмиз јохдур» - дедиләр. Хәлифә онларын сөзүнү тәсдиг едиб онлары сәрбәст бурахды.

Онлар Гума гајытмаг истәдикләри вахт бир ҹаван оғлан онлара јахынлашыб «имам сизи чағырыр» - деди. Һамысы севиниб онунла бирликдә имам Һәсән Әскәринин евинә ҝетдиләр. Орада үзүндә имамлыг нишанәси ашкар олан ҝәнҹ имамы ҝөрдүләр.

Онлар Ҹә`фәрә дедикләри сөзү һәзрәт имам Замана да сөјләдикдә, һәзрәт ҝүләрәк онлара белә бујурду: «Отурун, сизә бу кисәләрин саһибләринин кимләр олдуғуну сөјләјим». Сонра пул кисәләринин саһибләрини вә ичиндә нә гәдәр пул олдуғуну бир-бир бәјан етди. Онлар ахтардыглары шәхси тапдыгларына ҝөрә севиниб кисәләри һәзрәтә вердиләр вә мәсәләләрини сорушдулар. Һәзрәт (ә) мәсәләләринин һамысынын ҹавабыны верди, сонра исә әмр етди ки, бундан сонра ораја пул ҝәтирмәјиб, Бағдадда тә`јин етдији вәкилинә апарсынлар. Суаллары олдугда да һәмин вәкилә мүраҹиәт едиб онун васитәсилә ҹаваблары өјрәнсинләр. Онлар имамла худафизләшиб евдән чыхдылар вә Аллаһа бу не`мәтинә ҝөрә шүкр етдиләр.

ИМАМЛА ҜӨРҮШӘНЛӘР

1. Шәмсәддин ибни Исмаил Һергәли атасы һаггында белә демишдир:

Атамын будунда бир јара изи вар иди. Бир ҝүн атам һәмин јара барәдә белә деди: Ҹаванлығымда будум јараланмышды вә мәнә чох әзијјәт едирди. Бир ҝүн Һиллә шәһәриндә достум Сејид Рәзијәддин ибни Тавусун јанына ҝетдим. О, һәкимләри чағырды ки, будумун јарасыны мүалиҹә етсинләр. Онлар белә нәзәр вердиләр ки, әҝәр будум үзәриндә ҹәрраһијә әмәлијјаты апарылса, дамарым кәсиләр вә өләрәм. Ҝәлән ил дә Сејид мәни Бағдада апарды. Бағдадын һәкимләри дә Һиллә һәкимләринин сөзүнү тәкрар етдиләр. Бир ҝүн үмидсиз бир һалда Самирраја имамлары зијарәт етмәк үчүн ҝетдим. Ҝеҹәни орада галдым вә имам Заманы (ә.ф.) көмәјә чағырдым. Сәһәрчағы Дәҹлә саһилинә ҝедиб палтарымы јудум вә гүсл етдим ки, јенидән зијарәтә гајыдым. Јолда дәвәјә минмиш ики нәфәрлә гаршылашдым. Онларын чөлдә јашајан әрәбләр олдуғуну ҝүман етдим. Онлар мәнә салам вердиләр. Онлардан бири мәнә «јахын ҝәл» - деди. Мән палтарымы тәмизләдијим вә чөл әрәбләрини пак билмәдијим үчүн јахын ҝетмәдим. Чүнки палтарым һәлә јаш иди вә горхудурм ки, онларын әли палтарыма тохундугда палтарым вә бәдәним јенидән мурдар олсун. Елә бу фикирдә идим ки, бирдән онлардан бири мәни өзүнә тәрәф чәкәрәк әлини будумун јарасынын үстүнә гојуб басды вә «еј Исмаил, раһат олдун. Артыг ағры чәкмәјәҹәксән» - деди. Мән тәәҹҹүбләниб онун мәним адымы һарадан билдијини дүшүнүрдүм ки, худафизләшиб ҝетди. Мән өз-өзүмә «бәлкә имамымдыр» - дејә дүшүнүб далынҹа ҝетдим вә јалвардым ки, дајансын. Бирдән гајыдыб «еј Исмаил, гајыт ҝет» - деди. Мән гулаг асмадым вә јенә дә онун далынҹа ҝетдим. Имамла бирликдә олан киши деди: «Еј Исмаил, имамын әмринә табе олмадығындан утанмырсан?» Бу вахт мән јәгин етдим ки, о, бу үммәтин башчысы вә имамыдыр. Дајаныб она бахдым вә бир аздан сонра даһа онлары ҝөрмәдим.

Шәмсәддин белә дејир: О ҝүндән сонра атам ардыҹыл олараг һәр ил Самирраја ҝедирди ки, бәлкә бир даһа имамы ҝөрсүн. Лакин даһа имамы ҝөрмәди вә ону ҝөрмәк һәсрәтилә дә дүнјадан ҝетди.

2. Сејид Мәһәммәд Ҹәбәламили достларындан бири үчүн етдији сәфәри белә нәгл етмишдир: Мәшһәдә ҝетмишдим. Кифајәт гәдәр пулум олмадығымдан чох чәтинликлә кечинирдим. Бир ҝүн карванын һәрәкәт етмәјә һазырлашдығыны ешитдим. Мән гарнымы дојурмаг үчүн бир тикә чөрәјим дә олмадығына ҝөрә һәрәмә ҝедиб ағладым. Сонра өзүмү карвана јетирмәк гәрарына ҝәлдим. Чүнки әҝәр галсајдым, гышын сојуғунда өләрдим. Аҹ-аҹына јола дүшдүм вә гуп-гуру гызмар бир бијабана чатдым. Сусузлугдан һәрәкәт етмәјә гадир дејилдим. Јемәк үчүн от-әләф дә тапылмырды. Һава гаранлыглашандан сонра јыртыҹы һејванларын нә`рәси мәни дәһшәтә ҝәтирмишди. Мән ағлајыб өлүмә тәслим олдум. Чох кечмәмишди ки, ај чыхды вә һејванлар сусдулар. Бу заман бир јүксәклик ҝөрүб она тәрәф ҝетдим. Орада бир булаг ҝөрдүм. Чох севиндим, дәстәмаз алыб намаз гылдым. Аҹлыгдан даһа һәрәкәт едә билмирдим. Орада јатыб өлүмә тәслим олдум. Бирдән мәнә тәрәф ҝәлән бир атлыны ҝөрдүм. Өз-өзүмә «оғрудур, амма һеч бир шејим олмадығына ҝөрә һирсиндән мәни өлдүрәҹәк» - дејә дүшүндүм. Лакин мәним јаныма чатанда салам верди. Саламыны алдым. Билдим ки, оғру дејилдир. Сонра мәнә - бурада нә едирсән? - деди. Чәтинликлә ҹавабыны вердим: Чох аҹам вә јолуму азмышам. Деди: «Јанында нечә дәнә говун вардыр, нијә аҹсан?» Мән һәр јери ахтарыб һеч бир шеј тапа билмәдијим үчүн зарафат етдијини сандым. Она дедим: Мәни лаға гојма. Бурах елә бурада өлүм. Деди: «Зарафат етмирәм. Архана бах.» Архама бахдыгда үч дәнә говун ҝөрдүм. Деди: «Онлардан бирини је, икисини дә сахла. Бу јолдан дүз ҝет, ахшамүстү бир чадыра чатаҹагсан. Онлар сәни карвана јетирәрләр.» Сонра ҝөзүмдән гејб олду. Тез өзүмә ҝәлиб баша дүшдүм ки, имам Заман (ә.ф.) имиш. Әмрә ујғун олараг говунлардан бирини једим, икисини дә ҝөтүрүб јола дүшдүм. Сабаһысы ҝүн наһар вахты говунлардан бирини дә једим вә бујурдуғу кими ахшамүстү бир чадыра чатдым. Онлар мәни чадырын ичинә апарыб дојунҹа једиртдикдән сонра мәни карвана јетирдиләр.

ИНСАН БУ ГӘДӘР ЈАШАЈА БИЛӘРМИ?

Инсаны гоҹалдан, һүҹејрәләрин фәалијјәтини дајандыран вә инсаны өлүмә тәрәф сөвг етдирән шеј, мүхтәлиф јолларла инсанын бәдәнинә ҝирән вә һүҹејрәләрә һүҹум едәрәк онлары мәғлуб едән микроблардыр.

Тибб елми сүбут етмишдир ки, өз ҹисми вәзијјәтини, зәрәрли гида вә маддәләри өјрәнән, еләҹә дә сәһијјә үсулларына риајәт едән шәхсин өмрү даһа узун олар вә тез гоҹалмаз.

Елә буна ҝөрә дә алимләр мүхтәлиф тәҹрүбәләрлә бә`зи һејванларын өмрүнү бир нечә дәфә чохалтмаға мүвәффәг олублар. Беләләликлә, инсанлар да ҝениш билик вә сәһијјә гајдаларыны һәјата кечириб тәтбиг етмәклә узун өмүрлү ола биләрләр.

Алимләр бир елми сирри өјрәнмәк үчүн илләр боју чалышмалыдырлар. Лакин бүтүн елмләр Аллаһ тәрәфиндән она әта олунмуш имам Заманын (ә.ф.) бу узун јолу ҝетмәјә еһтијаҹы јохдур вә јүз иллик јолу бир анда кечиб нәтиҹәјә чата биләр.

Буна ҝөрә дә онун тәрәфиндән бу мөвзуда һеч бир проблем јохдур. Онун елми Аллаһ тәрәфиндән тә`мин олдуғундан, јүз илләрлә ҹаванлығыны горујараг јашаја билир.

Диҝәр тәрәфдән исә, имам Заманын (ә.ф.) өмрүнүн узунлуғу одун Ибраһимә сојумасындан, Мусанын кечә билмәси үчүн Нил чајынын јарылмасындан, онун әсасынын илана чеврилмәсиндән вә јүзләрлә бу кими өрнәкдән даһа һејрәтләндириҹи дејилдир. Бу Аллаһ-тааланын гүдрәтиндән бариз нүмунәдир.

Бунлардан әлавә Гур`ан вә тарих кечмиш пејғәмбәрләрин вә ҹамаатдан бә`зиләринин узун өмрүнү ачыг ајдын бизә ҝөстәрмәкдәдир. Мисал үчүн һәзрәт Нуһ (ә) 950 ил, Логман (ә) 400 ил, Бухтун-нәср 1507 ил, Сүлејман (ә) 712 ил вә Һиндистан падшаһы Фирузрај исә 537 ил јашамышдыр.

Бүтүн бунлар ону ҝөстәрир ки, инсанын узун өмүрлү ола билмәси елм вә билијә зидд дејилдир, әксинә һәмишә мүмкүндүр.

ИМАМ ЗАМАН (Ә.Ф.) ДҮНЈА ГҮДРӘТЛӘРИНӘ НЕҸӘ ГӘЛӘБӘ ЧАЛАҸАГДЫР?

Әҝәр дүнјада баш верән ингилаблара диггәт јетирсәк, баша дүшәрик ки, ингилаб рәһбәрләринин мүвәффәгијјәт әлдә етмәләринин әсас сәбәби ҹәмијјәтдә ујғун зәминин јаранмасындан ибарәт олуб, зүлмкар рәһбәрләрин тәзјиги нәтиҹәсиндә халг һакимијјәти ингилабчылара тәһвил верибдир.

Буна ҝөрә дә Меһдинин гијам вә ингилабы бир тәбии базаја, јә`ни ҹәмијјәтдә мөвҹуд олан әлверишли шәраитә әсасән баш верәҹәкдир. Һәзрәтин ингилабы реҝионал дејил, үмумдүнја характери дашыдығына ҝөрә бүтүн халглар бу ингилабы гәбул етмәјә һазыр олмалыдырлар. Бу да о вахт мүмкүндүр ки, Пејғәмбәрин дедијинә ҝөрә, зүлм, фәсад вә позғунчулуг бүтүн дүнјаны бүрүсүн вә һөкумәтләрин шиддәтли тәзјиги нәтиҹәсиндә халг күтләләри јардым әлләрини она тәрәф узадыб сәмими гәлбдән дә`вәтини гәбул етсинләр.

Белә бир шәраитдә дүнјанын фөвгәл-гүдрәтләри, бүтүн һәрби техника вә тәҹһизатларына бахмајараг, онларын ингилабынын гаршысыны алмаға гадир олмајаҹаглар.

Дүнја руһи бир бөһран ичәрисиндәдир вә фөвгәладә бир рәһбәрә мөһтаҹ олаҹагдыр. Елә бир рәһбәр ки, инсан мәдәнијјәти вә тарихи илә јахындан таныш олуб, јүз илләр бојунҹа бүтүн тарихи һадисәләрин билаваситә шаһиди олуб вә һисс едибдир.

Аллаһ тәрәфиндән верилән вәзифәнин һөкмүнү алдыгдан сонра әдаләт вә инсанлыг фәрјадыны јајаҹаг вә тарих боју мүхтәлиф зүлмләрә мә`руз галан мәзлум халг күтләләрини әтрафында ҹәмләшдирәрәк залым һөкумәтләри девирәҹәкдир. О, ваһид дүнја ислам дөвләтинин сајәсиндә гүввәләриндән бир-биринә гаршы истифадә едән халгларын үрәјини бирләшдирәҹәк вә онлар да бир-бирләринин рифаһ вә динҹлији үчүн чалышаҹаглар. Беләликлә горху вә ниҝаранчылыгдан узаг, не`мәт вә рифаһла долу парлаг бир дүнја јаранаҹагдыр.

ИМАМЫН ШӘХСИЈЈӘТИ

АШАҒЫДАКЫ СУАЛЛАРА ҸАВАБ ВЕРИН

2. Нәјә ҝөрә имамын тәвәллүдү башга имамлардан фәргли иди?

3. Анасы Нәрҹисин маҹәрасы нә иди?

4. Гејбәти-сүғра вә гејбәти-күбра нәдир?

5. Имамын ҹанишинләри һансы хүсусијјәтләрә малик олмалыдырлар?

6. Бир инсан неҹә бу гәдәр јашаја биләр?