АКЪ КЪАЯДАН ЧЫНГАБ КЕЛГЕН КЪАРА СУУ

КЪАРА КЪУЛ

Къойчу къойлагъа айтханын этдиреди,

Имам дин ахлулагъа башчылыкъ этеди,

Эл башчы Элге оноу этеди,

Алим илму иш бла кюрешеди,

Тёре тюзге, терсе къарайды,

Чегетчи чегетге къарайды,

Хеким ауругъанлагъа къарайды,

Хар ким бирер затха джарайды.
Сен а – джазыучуса. Сени юйюнг-юйдегинг да,

Халкъынг, джуртунг, табигъатынг, малынг да –

Сёздю. Сёздю сени иманынг, имамынг да.

Сени бийинг, къулунг да – сёздю.

Сени юйюнг, къаланг да, къалкъанынг, къаманг да – сёздю.

Сени ауалынг, ахырынг да – сёздю.

Джанынг джашагъан джерди сёз.

Джанынг учарыкъ Кёкдю сёз.

Сени джанынг сёзденди, сёздеди, сёзгеди

Сёздю сени джаратхан, сен джаратхан да – сёздю.

Сёздеди джашарыгъынг ёлгенден сора да.

Сёз Аллахынгды, ёлюмсюзлюгюнгдю сени.

Джангыз ол эски-джангы Сёзню, джанлы Сёзню

Табыб, айта билирге керексе. Анга бойсуна,

Аны бойсундура да билирге керексе.
- Халкъгъа айтханымы этдиралмайма дейсе,

- Къатыным, сабийле да меннге бойсунмайла дейсе.

Аны ючюн сеннге этмейме айыб.
Алай а, кесинге «джазыучума» деб,

Айтханынгы уа сёзлеге да этдиралмай эсенг,

Сёзлени кесинге бойсундуралмай эсенг,

Кесинги да Хакъ сёзге бойсундуралмай эсенг.

Кесинги кесинге да бойсундуралмай эсенг,

Айтханынгы кеси кесинге да этдиралмай эсенг,

«Джазарыгъем, джазаргъа къоймайла ансы»,-деб,

Бош сылтаула бла кесинги, бизни да алдаргъа кюреше эсенг –
Сора, сен, джазыучу да тюлсе, - алдауукъчуса.

Сени фахмунг, бетинг, ётюнг да джокъду.

Кесинге джазыучума дерге уял,

Ёзденме, Адамма дерге уял кесинге.

Къулса – Акъ Сёзге, Хакъ Сёзге тыйыншлы болмагъан къул.

Тюз иннети, керти сёзю, керти иши болмагъан къара къул.

КЕРТИ ЭРКИШИ-АДАМ-МУСЛИМАН

Не кёб аманлыкъ кёрдю кёзюм.

Не кёб адамдан чыкъды кёлюм

Быллай сыйсызлыкъгъа-учузлукъгъа къалай джетди адам?

Адам айырылады адамлыкъдан.

Харам рысхы ючюн кеселле бир-бирин.

Алдайла, тонайла ёлтюрелле бир-бирин.

Саталла бир-бирин, халкъларын, джуртларын да,

Аямайла узакъларын, джууукъларын да.
Бурулалла амантишге, къулгъа, къахмеге...

Дагъыда тартылмайла махкемеге,

Ёрлей баргъан болмаса кърал къуллукъгъа, ёрге.

На ахырат азаб, не дуния намыс тыймайды аланы –

Къарынлары бла, къарын тюблерине табыннган сыйсызланы.
Ол сылыкъла

Кеслери булгъаннган бла къалмай харамгъа-гюнахха,

Бютеу халкъны да тарталла кирге-палахха.

Оноу этгенле бюгюн – адамла тюл – аманла:

Саталла бетлерин, миллетлерин, джуртларын да ала.
Кёрмегенме болгъанын чыгъанакъдан Терек.

Къумдан юй болмаз, къулдан бий болмаз, къахмеден да – мёлек.

Бюгюн а, оноу этгенле алалла бизге.

Ма аны ючюн тюб бола барады халкъ.

Хакъ ючюн кюрешмеген халкъ –

Эртде-кеч болса да, болады талкъ.

Къалмагъанчады ёзденлик, ёзден.

Иннетибиз, сёзюбюз, ишибиз да – сыйсыз, учуз, аман...

Халкъ ичинде кёрюнмейди Адам.

Бир толу Адам кёрюнмейди халкъда.

Адамлыкъ-муслиманлыкъ-эркишилик къайда?

Къатынынг нек айланады базарлада –

Игиге-аманнга тюбей узакълада?
Юйдегинги асраргъа джокъ эсе башха джол –

Кесинг джюрю сатыугъа-алыугъа,

Къатын а юйде сабийлеге къарасын...
Тиширыуларын, къызларын сатыулада айландыргъан халкъ,

Эркекле тишилерине кеслерин асратхан халкъ,

Юйюрге тишилери оноу этген халкъ,

Эркиши бла тиширыуну орунлары ауушуннган халкъ,

Эркиши халларын тас этген халкъ –

Дуниядан болады талкъ.

Алача иче, тюйюше, джаншай,

Дин, тил, адет – бары седирей,

Анга къууана, харс ура Эресей.

Не кёб адамдан чыкъды кёлюм.

Адам айырылада адамлыкъдан...

Быллай сыйсызлыкъгъа къалай джетди адам?

Къаршчы турмай, турсанг тынгылаб,

Башхалыгъынг бармыды ёлгенден,

Не да къалгъандан бармыды башхалыгъынг?

Миллет, инсан хакълары ючюн кюрешиудю,

Ёлгюнчю Хакъ ючюн кюрешиудю,

Джангыз кесинг эсенг да сермешген.

Сен кесинги борчунгу толтур –

Эркишилик, адамлыкъ, муслиманлыкъ борчунгу.
Тейри адамы эсенг –

Иннетинг, сёзюнг, ишинг бла –

Бютеу джашауунг, ёлюуюнг бла да,

Адам атынга тыйыншлы бол,

Аллахынга тыйыншлы бол.
«Джанынгы аямай кюрешдингми

Адамынгы, халкъынгы къорууларгъа, къутхарыргъа?»-

Деген соруугъа Соруу кюн:

«Кюрешдим»,- дерча бол

Къалгъаннга Аллах оноу этер.

«Бу шейит –

Керти Эркиши эди, Адам эди, Муслиман эди».