Лайпанов б. А

БИЯГЪЫ САГЪЫШЛА

Эллиу джылдан Эл да джангырады, дейле.

Аны айтхан джангылады дейме.

Джангырмайбыз, не эсе да, биз.

Огъесе, Эл тюлбюзмю биз?
Анда болурму къыйынлыгъыбыз?

кишичикле, кишиле бардыла – Эркиши уа джокъ.

элчикле, элле бардыла – Эл а джокъ.

адамчыкъла, адамла бардыла – Халкъ а джокъ.

Сатлыкъ къуллукъчула бардыла –

Халкъ башчы, Халкъ тёре уа джокъ.

Бир болургъа керекди иннет,

Хакъ болургъа керекди иннет.

Аллай иннет бармыды бизде?

Демеген – «Хакъ», болалырмы Халкъ?
Бусагъат къуугъун-хахай эшитилинникди «патриотдан»,

Ол кёлек киерикди отдан:

«Поэт бизни учуз этиб кюрешеди,

Халкъ, Миллет тюлбюз деб, сёлешеди»…

«Бар эсе сени ийманынг, Аллахынг,

Нек тыймайса кесинги, халкъынгы да харамдан-гюнахдан,

Нек къорууламайса ёз башынгы, халкъынгы да палахдан?

Къууанчына, бушуууна – джазыуууна нек этмейсе ие?

Нек кюрешмейсе, сермешмейсе аны ючюн?
Халкъ кёлтюрмесе кесини сыйын,

Ким кёлтюрлюкдю аны сыйын?

Халкъ «Хакъ» дерге унамай эсе,

Аны ючюн къозгъалыб, ёрге турмай эсе,

Эркинлиги, Тюзлюгю ючюн кюрешмей эсе,

Эгеменлиги ючюн эмегенле бла сермешмей эсе,

Анга не айтыргъа боллукъду сора?
Белгилидиле халкъны Халкъ этген затла:

Джурт. Тил. Къраллыкъ. Эгеменлик.

Тилибиз барды, ёзге, кърал тилча джюрюймюдю ол?

Не халда джюрюйдю ол?

Кимге къуллукъ этеди ол –

Иймансыз джорукъгъамы, огъесе Хакъгъамы (Халкъгъамы)?

Энчи кърал болгъан къой,

Кърал ичинде бармыды къраллыгыъыбыз?

Бармыды миллет орайдабыз, байрагъыбыз, тамгъабыз?

Халкъ бармыды, джокъ эселе ала?

Халкъ ючюн турмай эсек ёрге,

Биз адамбызмы-эркишибизми-муслиманбызмы?
Къраллыкъсыз тура эсек,

Джуртубузну, тилибизнида тас эте бара эсек,

Ала ючюн кюрешмей, сермешмей джашай эсек,

Хакъдан эсе, харамны-гюнахны сайлай эсек,

Сора Халкъбызмы, Адамбызмы, Муслиманбызмы биз?

КЪАЙСЫННГА ДЖОКЪДУ ЁЛЮМ

Джюрек кенг эди Къайсында.

Бюгюннгю джазыучуланы къайсында, къайсысында

Барды аллай халаллыкъ, адамлыкъ?

Хар бирибизни къайгъысында,

Бютеу халкъыбызны къайгъысында,

Тюз адамны къайгъысында

Айланды Къайсын, кесин аямай.

Дунияда бар эсе да, билмейме,

Бизни арабызда уа джокъду, энди.
Ол хар бирибизни сакъларгъа кюрешди,

Хар бирибизни ёрге тутаргъа кюрешди,

Иги затыбызны кёрюрге кюрешди,

Кёллендирирге, учундурургъа кюрешди –

Тау поэзияны шыйыхы Къайсын.
Туугъан джерибизге, Ана тилибизге

Кертиликни, бегимекликни белгиси-юлгюсю эди Къайсын.

Тамблабызгъа къоркъа, къайгъыра,

Бизлени да тюшюндюре, сагъайта,

Халкъ, тил ёлмез ючюн джашады, ёлдю Къайсын.
Поэзияны джукъланмаз чырагъы – Къайсын.

Адамлыкъны хорланмаз байрагъы – Къайсын.

Тилибизни нарт сёзю – Къайсын.

Тилибизни акъ сёзю – Къайсын.

Ана тилинде джырлагъан, сёлешген къадарда,

Халкъыбыз, тилибиз сау къадарда,

Биз Аны осуятына тюз болгъан къадарда –

Къайсыннга джокъду ёлюм.

ЁЛСЕК ДА АЛАЙ ЁЛЕЙИК

Кёзден кетсе да, кёлден кетмей,

Терслик турады джюрек джара.

Алай болса да –

Кёб болса да джюрек джара,

Мен этеме иги джора.

Эл ашагъан эмегенден

Эл Тейриси кючлю.
Тынгласакъ да айтмай бир джукъ,

Эсден ауур болмаз бир джюк.

Зулму, зорлукъ кетмей эсден,

Бошайдыла бир кюн бизден:

Къаныбыз уруб мыйыбызгъа

Не джарылыб джюрегибиз –

Ёлебиз биз.
Кёлдеги ачыкъ айтылмайын,

Тюзю, кертиси айтылмайын,

Терс, терслик да багъанагъа,

Къара багъанагъа тагъылмайын,

Саулукъ къалай къалыр бизде?

Тюзлюгюбюз къалмаз тюзде.

Кишилик, адамлыкъ бизде

Джашар ючюн – тюз болайыкъ

Бир-бирибизге, тарихибизге да.
Халкъ Хакъдан айырылмаз ючюн,

Ичибизден кюйюб тюл,

Тюзлюк ючюн кюреше,

Тюзлюк ючюн сермеше,

Ёлсек да алай ёлейик.

ИЧ, ТЫШ ДУНИЯЛАГЪА КЪАРАЙ

Бу дунияда ёмюрлюк зат

Бар болуб, билмейме мен.

Джашау деген эмилик ат

Атады бизни юсюнден.
Бу дунияда сюелген да

Къая болуб, баш болуб,

Ахыры джатад джерде

Зыгъыр болуб, таш болуб.

Сюелеме чегетде.

Джулдузланы бири болуб,

Джаным да джанад Кёкде.

Тохтайма арыб, талыб.

Къарайма дуниягъа

Бир терек болуб къалыб.

Таша белгиле бере,

Ким Ташдан, ким Терекден

Къарайбыз кетгенле.

Джагъада Таш бла Терек.

Суудан, Ташдан, Терекден

Къарыу алады джюрек.

Эсими эм Элими.

Кюрешеме джашаргъа

Адамыча Тейрини.

НЕЧИК СЕЙИРДИ, АЛАМАТДЫ ДЖАШАУ

Кёкге джарашханча джулдуз,

Таугъа джарашханча кийик,

Къаягъа джарашханча нарат,

Ташха джарашханча терек,

Ёзеннге джарашханча суу –

Сен меннге джарашаса алай.
Къарангыгъа батса да,

Джулдузсуз джашаяллыкъды Кёк

(къарангыда джашау джашаумуду ансы?);

Джансызча кёрюнселе да,

Таш да, къая да, тау да

Джашаяллыкъла агъачсыз, кийиксиз;

Къуу ёзеннге, къуру ёзеннге бурула аты,

Ёзен да турлукъду суусуз.

Алай а,

Хауасыз джашаяллыкъ тюлдю Адам;

Ташсыз, Терексиз, суусуз, джулдузсуз –

Джерсиз, Кёксюз – алагъа сюймекликсиз

Джашаяллыкъ тюлдю адам:

Аланы барлыкъларына, бирликлерине айталла джашау деб.

Джансынла джулдузла кёлде,

Джансынла джулдузла Кёкде,

Джашасынла къаяда терекле,

Ёзен суудан рахат ичсинле кийикле,

Сюймекликден къууансынла джюрекле.
Нечик сейирди, аламатды джашау!

жүктеу/скачать 2.02 Mb.

Достарыңызбен бөлісу: