Мазмұны: Қалыптасқан қазақстан -2050 стратегиясы

Бағдарлама бойынша білім алып жатқан стипендиаттар оқуының орташа шығыны 13,5-14 млрд. теңге, бір стипендиатқа жылына 5 млн. 623 мың теңге жұмсалады екен. Ал айына студент 2 мың АҚШ доллары көлемінде шәкіртақы алады. Демек, білім алуына материалдық жағдай жасалуда. Әрине, талап та қатаң. Министрлік Ұлттық қауіпсіздік комитетімен бірлесіп, «Шетелдегі студент» ақпараттық жүйесін енгізіпті. Яғни, бітірушілердің елге оралуы және жұмыс істеуі қатаң бақылауда болады. Министр­дің мәлімдеуінше, 1994-2013 жылдар аралығында 9250 стипендия тағайындалыпты. Бітірген түлектер саны – 5714 болса, 2 796 стипендиат әлемнің 33 елінде білім алуда екен. Ал жоғары кәсіби біліктіліктің үлгісін көрсетіп жүрген түлектердің 20 пайызы мемлекеттік секторда, 21 пайызы ұлттық компанияларда, 55%-ы жекеменшік компанияларда, 4%-ы халықаралық ұйымдар мен үкіметтік емес ұйымдарда жұмыс істейді. Оқуын биыл бітіріп келген 87 түлек әзірге жұмыссыз. «Олардың жұмысқа орналаспауының басты себебінің бірі – әр мемлекетте диплом құжаттарын дайындау мерзімі 3 айдан 9 айға дейін созылады. Сондықтан қолдарына диплом тимей отыр. Дипломдарын алғаннан кейін барлығы жұмысқа орналастырылатын болады», – деді Б.Жұмағұлов. Соңғы жылдары аймақтар үшін бағдарламаға қолжетімділік артыпты. 2005-2010 жылдар аралығында Алматы, Астана қалаларынан үміткерлер саны шамамен 75 пайызды құраған екен. Бұл көрсеткіш қазір өзгерген. Еліміздің барлық азаматтарына электронды үкімет, Халыққа қызмет көрсету орталықтары арқылы құжаттар тапсыруға мүмкіндік жасалып, нәтижесінде аймақтардан үміткерлердің қатысу үлесі 2011 жылы 39 пайыз болса, 2012 жылы 47 пайызға жеткен. Сондай-ақ, министр «Қазақстан – 2050» стратегиясында қойылған жаңа міндеттерді орындау мақ­сатында аймақтарды экономиканың сұранысына сәйкес білікті мамандармен қамтамасыз ету қолға алынғанын атап өтті. Бұл орайда, Өңірлік даму министрлігі жергілікті атқарушы органдармен бірлесіп, жыл сайын аймақтың мамандарға сұранысы бойынша мақсатты өтінім (заявка) жасамақ. Министрдің айтуынша, диссертациялық және зерттеу жұмыстарының тақырыптарын таңдауда стипендиаттарды министрлік «Қазақстан – 2050» Стратегиясындағы міндеттерді іске асыруға бағыттайтын болады.

«Самұрық-Қазына» ұлттық әл-ауқат қорының 22 компаниясында «Болашақ» бағдарламасының 324 түлегі жұмыс істейді екен. Қордың Басқарма төрағасы Өмірзақ Шөкеев келтірген деректерге жүгінсек, «ҚазМұнайГаз» ұлттық компаниясында – 117, Қазақстан теміржолында – 37, Қордың орталық аппаратында – 20 түлек қызметке тартылған. Кейбір түлектердің 5 жылға дейін еңбек өтілі бар.

Үкімет отырысын қорытындылаған Премьер-Министр Серік Ахметов Білім және ғылым министрлігіне «Болашақ» бағдарламасы түлектерін жұмыспен қамтудың кешенді іс-шараларын қабылдауды, сондай-ақ, орталық және жергілікті атқарушы органдарға экономиканың даму басымдықтарын және еңбек нарығының нақты қажеттілігін ескере отырып, кадрларды даярлау жоспарын жасауды тапсырды.

//Дала мен Қала.-2013.-20 сәуір.-3 б.

32

Гүлнар ТАЙҚҰЛАҚОВА,экономика ғылымдарының кандидаты, доцент, «Болашақ» бағдарламасының стипендианты

Қазақстанда білім алушы жастар үшін білім беру үдерісін жүзеге асыратын 144 жоғары оқу орны бар. Десек те, экономика мамандықтары бойынша оқытатын жоғары оқу орны деңгейлес бизнес мектептер көп емес, солардың ішінде Т.Рысқұлов атындағы Қазақ экономикалық университеті, Халықаралық бизнес академиясы, Халықаралық бизнес университеті және тағы басқалары бар. Аталған ұйымдар арасында инновациялық, қарқынды түрде даму үстіндегі әрі барлық бағытта транспаренттік танытатын Халықаралық бизнес академиясы айрықша назар аудартады. Академияның даму стратегиясы қашан да мамандарды – бизнес класс өкілдерін даярлау деңгейінің жоғары болуын, оқытушылардың білім сапасын тұрақты түрде көтеріп тұруын, политілдікті күшейтуді, тек отандық қана емес, халықаралық білім беру кеңістігіндегі үздік бизнес ЖОО ретіндегі имиджін сақтауды көздейді. Егер Қазақстан ЮНЕСКО мәліметтері бойынша Норвегия, Жапония, Германия елдері әлемдегі білім беруді дамытудың жоғары көрсеткіші бойынша төртінші орынға ие болса, Халықаралық бизнес академиясы өзінің оқытушылық құрамына халықаралық «Болашақ» бағдарламасы бойынша шетелден білім алу мүмкіндігін қамтамасыз еткен еліміздің ең мықты 5 жоғары оқу орны рейтингісіне енді. 2013 жылы жоғары оқу орнының 25 жылдық мерейтойы тойланып, бұл жыл Халықаралық бизнес академиясының тарихына білім беру жүйесіндегі үлкен жетістіктерімен: идеялардың креативтілігімен, студенттер мен оқытушылар ұжымының белсенділігімен және білім алушы және білім беруші қызметкерлердің мамандандырылу деңгейін жоғарылата жақсартуымен ерекшеленеді.

Академияның жиырма жеті оқытушысы Қазақстан Республикасының халықаралық «Болашақ» стипендиясын жеңіп алды. Ректор, үш проректор, төрт кафедра меңгерушісі, профессорлар, доценттер «Кәсіпорындар мен кешендерді ұйымдастыру және басқару, инновацияны басқару» бағыты бойынша АҚШ-тағы атақты Berkeley-Haas School of Business және Швейцариядағы Montreux School of Business университеттерінде, сондай-ақ жеке жоспарлар бойынша Оңтүстік Корея мен Ұлыбританияда ғылыми тәжірибеден өту құқығына ие болды. Қазақстанның жоғарғы бизнес мектебі ретінде тек Академия ғана кәсіби құзыреттілігін дамыта отырып, педагогикалық деңгейді және білім беру жетістіктерін тереңдете отырып, институционалдық әдісті талмай насихаттау нәтижесінде ҚР Президентінің 2012 жылғы Қазақстан халқына Жолдауында айтылған жаңа ойларға сәйкес озық идеяларын жүзеге асыра алды. Бұл жетістіктер Бағдарламалар орталығының вице-президенті А.Абдуалиевтің биылғы 8 ақпанында халықаралық «Болашақ» бағдарламасының стипендияттарына мемлекеттік сертификаттар тапсырар алдындағы тестілеу және сұхбаттасу кезеңдері аясында жүзеге асырылды.

Бір ғана жоғары оқу орнының отыздан астам өкілі жаппай бір мезгілде «Болашақ» бағдарламасының спипендиаларын жеңіп алатындай ауқымды жоба Қазақстан Республикасындағы білім беру мен халықаралық бағдарламалар орталығы қызметінің тарихында бұрын-соңды болмаған. Бұл – оқыту жүйесіндегі тиімді білім берудің алғашқы қадамы ғана емес, еліміздегі кәсіптік

33

мектептердің зияткерлік мүмкіншіліктерін көтерудегі жетістік. Академияның жиырма жеті қызметкері – IELTS-қа дайындықтағы барлық қиындықтардан, қазақ тілінен және психологиялық тестілерден сүрінбей өтіп, өздерін Тәуелсіз Қазақстанға лайық мамандар екендерін таныта білді. Еліміздің Ата заңы және өз елінің тарихын білу – «Болашақ» стипендиясы үміткерлерінің бұлжымас парызы. Ұлт тарихын үйренуге деген талпыныс кең-байтақ Қазақ елінің ежелден бергі тарихын, бастан кешірген соқтықпалы, соқпақты кезеңдерін, соңғы ғасырлардағы ел өміріндегі қоғами өзгерістерді зерделей зерттеуге түрткі болды. Халықаралық бизнес академиясының Қазақстандағы ең ілгері дамыған кәсіптік жоғары оқу орны болуында академия президенті А.Қожахметов мырзаның қосқан үлесі зор. Мұндай алпауыт идеяны жүзеге асыру барысындағы академия жетістігі бұл күндері басқа ЖОО-лар арасында қызығушылық тудыруда.

34

Университеттер – көп, қайтарымы – аз

Парламент Мәжілісінің Әлеуметтік-мәдени даму комитетінің төрайымы Дариға Назарбаеваның жетекшілігімен кезекті комитет отырысы өтті. Онда комитет мүшелері «Жұмыспен қамту-2020» жол картасының жобасы туралы» және «Қазақстанның жоғары оқу орындары жүйесін оңтайландыру туралы» мәселелерді талқылады.

Еңбек және халықты әлеуметтік қорғау министрі Серік Әбденов жобасын алып келген «Жол картасы-2020» бағдарламасының басты мақсаты жұмыссыздықты жою, кедейшіліктің алдын алу мен өзін өзі жұмыспен қамтығандардың кірісін асыру болып табылады. Осы мақсатты дұрыс орындағанда еліміздегі жұмыссыздық деңгейі 5 пайызға төмендеп, тұрмысы төмен отбасылар жыл сайын 0,5 пайызға азаймақ. Өзін өзі жұмыспен қамтушылардың үлесі жыл сайын 30 пайызға артып отырмақ.

2013-2015 жылдары мемлекеттік және салалық бағдарламалар шеңберінде мемлекеттік қаржы есебінен 113,5 мың жұмыс орнын ашу болжанып отыр. Шағын жеке кәсіпкерлікті қолдауға (шағын несиелендіру) 19,3 млрд. теңге қарастырылған.

Жұмысқа орналастыру үшін қайта оқыту шаралары да жүргізіледі. Ол тікелей жұмысқа орналастыру, біліктілігін көтеруге қайта әзірліктен өткізіп барып жұмысқа орналастыру, ауылдық жердегі жастар мен әйелдерді әлеуметтік жұмыс орындарына орналастыру карта бойынша жүргізіледі. Оқып жүргендерге материалдық көмек көрсетіледі. Осылардың ішінде 29 жасқа дейінгілер, балалар үйінде өскендер, ата-анасының қамқорлығынсыз қалғандар, оралмандар мен бас еркіндігінен айыру орындарынан босағандар, штаттық қысқартуға түскендер және 50 жастан асып, зейнет жасына жақындаған адамдарға көрсетілетін арнайы басымдықтар бар.

Министрдің баяндамасын мұқият тыңдаған комитет мүшелері мәселеге ерекше назар аударып, жан-жақты талқыға салды.

Қазақстанның жоғары оқу орындары жүйесін оңтайландыру туралы Білім және ғылым вице-министрі Мұрат Орынханов баяндап берді. Президент Нұрсұлтан Назарбаев өзінің кезекті Жолдауында «Жоғары білім саласында техникалық білім беруге ерекше көңіл бөле отырып, жоғары оқу орындары желілеріне оңтайландыру жүргізу қажет» деп атап өткен болатын. Бүгінгі күні Қазақстан жоғары білім беру жағынан әлемде алдыңғы лектегілерден де асып кетіп тұр. Дамыған елдерде 1 миллион тұрғын халыққа 1-ден 6-ға дейін жоғары оқу орны келсе, ал Қазақстанда 2011 жылы 9 жоғары оқу орнынан келген (елімізде 149 жоғары оқу орны болды).

Өңірлерде жергілікті еңбек нарығын дамытуға лайықталған және шағын мамандықтарға негізделген академия, институт сияқты жоғары оқу орындары аз. 63 жекеменшік жоғары оқу орнының 42-сі университет атын иеленген. Өңірлердегі жоғары оқу орындарында мамандықтардың 61%-ы бір-бірін қайталайды.

35

2012 жылғы мемлекеттік тексерудің нәтижесі бірқатар түйінді мәселелердің бетін ашып берді. Мемлекеттік аттестаттау кезінде жүргізілген кешенді тестілеу нәтижесінде жекеменшік жоғары оқу орындарында оқитын студенттердің 60%-ы «3» және «2» деген баға алды. Ал мамандықтардың 17%-ы бойынша студенттер тестілеуден түгелімен өтпей қалды.

Ендігі басталатын оңтайландыруда Қоғамдық кеңес мүшелері жоспар бойынша жоғары оқу орындары басшыларымен түсіндіру жұмыстарын жүргізу және оңтайландыруға әсер ету үшін өңірлерге шығады. Жоғары оқу орындары жүйесін оңтайландыруды іске асырудың тетіктері жасалды.

Оңтайландыру нәтижесінде Алматы, Астана қалаларымен Оңтүстік Қазақстан және Қарағанды облыстарын қоспағанда, өңірлердің көпшілігінде бір ірі мемлекеттік және бір дәл сондай дәрежедегі жекеменшік жоғары оқу орны жұмыс жасайтын болады, яғни өңірлік экономиканың шынайы сұранысын қамтамасыз етуге бағытталған ғылым мен білімнің ірі орталықтары ғана қалады.

Министрлік жабылған жоғары оқу орны студенттерінің мүддесін қорғай отырып, олардың басқа жоғары оқу орнына оқу ақысының мөлшерін өзгертпестен ауысуына мүмкіндік жасайды.

//Егемен Қазақстан.-2013.-20 сәуір.-4 б.

36

Бибігүл ОРЫНТАЕВА,университет баспасөз хатшысы.

ҚР Мемлекеттік аттестаттау комиссиясы бірлескен жоғары оқу орнында дайындалатын 30 бакалавр, 11 магистратура мамандықтары бойынша мемлекеттік аттестациядан толық өткізді. Сонымен қатар, мемлекеттік комиссия бітіруші түлектерден бақылау тестін қабылдап, нәтижесінде студенттердің білімдерін жоғары деп қорытындылады.

Білімнің биік шыңдарын бағындыруды мақсат тұтып, осы жолда талмай еңбек етіп келе жатқан үлкен ұжымның тыңғылықты да тиянақты жұмысының нәтижесіне осы жоғарыдағы көрсеткіштер дәлел.

Халқымызда «Бірлік түбі – береке!» деген қанатты сөз бар. Бірлігі жарасып, татулығы тамсантқан оқу ордасы жоғары білікті мамандарды дайындау мен тәрбиелеуде алдағы уақытта да зор жетістіктерге жетіп, еліміздің ғана емес, халықаралық дәрежедегі жоғары оқу орындарының қатарынан көрінетіндігіне сеніміміз мол.

//Егемен Қазақстан.-2013.-20 сәуір.-5 б.

37

Бақытжан ЖҰМАҒҰЛОВ, ҚР Білім және ғылым министрі, «Нұр Отан» ХДП Саяси кеңес Бюросының мүшесі

1993 жылы Елбасы Н.Ә.Назарбаевтың стратегиялық бастамасымен «Болашақ» халықаралық стипендиясы тағайындалды. Содан бері 20 жыл өтті. Бұл әлемдік практикада бірегей бағдарлама болды. «Болашақ» бағдарламасы әрқашан елімізге қажетті мамандарды даярлауға бағытталды.

1994-2013 жылдар аралығында 9250 стипендия тағайындалды. Бітірген түлектер саны – 5714. Ал, 2 796 стипендиат әлемнің 33 елінде білім алуда. «Болашақ» бағдарлама­сының түлектері жоғары кәсіби біліктіліктің үлгісін көрсетуде. Олардың көпшілігі мем­лекеттік органдар мен ұлттық компанияларда жауапты қызмет атқаруда. Бүгінде түлектердің 20 пайызы мемлекеттік секторда жұмыс істейді. Сонымен қатар, ұлттық компанияларда – 21 пайыз, жекеменшік компанияларда – 55 пайыз, халықаралық ұйымдар мен үкіметтік емес ұйымдарда – 4 пайыз. Негізінен, болашақ түлектері табысты еңбек етуде. Жалпы, «Болашақ» бағдарламасы экономика мен қоғамға зор үлес қосып отыр деп сеніммен айтуға болады. Осы орайда, «Болашақ» бағдарламасының материалдық емес активтеріне тоқталғым келеді. Біріншіден, еліміздің әлемдік деңгейдегі беделін арттыру. Екіншіден, идеологиялық фактор. «Болашақ» бағдарламасы еліміздің жетістіктері мен мүмкіндіктерінің символына айналды. Бағдарлама сапалы білімнің жастар үшін тамаша әлеу­меттік сатысы екенін көрсетті. Үшіншіден, бағдарлама түлектері әлемнің үздік жоғары оқу орындарында өз құрдастарымен, яғни әлемнің болашақ элитасымен қарым-қа­тынас жасап, әлеуметтік капиталға да ие болуда. Мұндай ресурстың келешекте маңызы өте зор. Бағдарлама соңғы екі жылда барынша жаңартылды. Біріншіден, 2011 жылдан бастап бакалавр даярлау тоқтатылды. Қазіргі кезде бағдарлама магистрлер мен PhD докторлар даярлауға бағытталған және академиялық, ғылыми мобильдік шеңберінде тәжірибеден өтуге баса назар аударылған. Шетелдік университеттердің тізімі қайта қаралды. Қазір олардың саны әлемдік рейтингі жоғары 200 университетті ғана құрайды. Екіншіден, түлектерді жұмысқа орналастыру мәселесі түбегейлі шешілді. Бағдарламалы-мақсатты әдіс енгізілді. 2011 жылдан бастап мамандарды даярлау мақ­сатты өтінімдер негізінде жүргізіледі. Өз қызметкерлерін оқуға жіберген ұйым шарттың бір тарабы болады. Оған маманның жұмыс орнын сақтау бойынша міндеттемелер бекітілді. Стипендиат оқуын бітірген соң жіберуші ұйымға, өндіріске келіп 5 жыл міндетті түрде жұмыс істейді.

Замана үрдісі тудырған сұранысқа орай қазір «е-Болашақ» ақпараттық жүйесі іске қосылды. Ол стипендиаттар бойынша мониторингті, қаржыландыруды және статистикалық есепті қамтамасыз етеді. «Шетелдегі студент» ақпараттық жүйесі де енгізілді. Енді бітірушілердің елге оралуы және жұмыс істеуі қатаң бақылауда болады.

Аймақтар үшін бағдарламаға қолжетімдік артты. 2005-2010 жылдар аралығында Алматы-Астана қалаларынан үміткерлер саны шамамен 75 пайызды құрады. «Болашақ» стипендиясына құжаттар қабылдау мемлекеттік қызметтер тізіміне енгізілді. Енді Қазақстан Республикасының барлық азаматтары елдің кез келген жерінен электрондық Үкімет порталы, Халыққа қызмет көрсету орталығы арқылы құжаттар тапсыра алады. Нәтижесінде аймақтардан үміткерлердің қатысу үлесі 2011 жылы 39 пайыз болса, 2012 жылы 47 пайызға артты. Ауылдық үміткерлердің аз қатысуына байланысты кепілдікпен қамтамасыз етуге қатысты талаптар қайта қаралып, бұл проблема шешілді. Соңғы жылдары «Болашақ» бағдарламасы өз әлеуетін күшейтті.

38

Енді біз «Қазақстан – 2050» стратегиясында қойылған жаңа міндеттерді орындауды бастадық. Атап айт­қанда, аймақтарды экономиканың сұранысына сәйкес білікті мамандармен қамтамасыз ету. Бұл мәселені мынадай жолмен шешуді ұсынамыз. Өңірлік даму министрлігі жергілікті атқарушы органдармен бірлесіп, жыл сайын аймақтың мамандарға сұранысы бойынша мақсатты өтінім жасайды. Біздің министрлік оларды аймақтарына қайтара отырып, бағдарламалық-мақсатты даярлауды үйлестіреді. Осыған байланысты Білім және ғылым министрлігі мен Өңірлік даму министрлігі арасында меморандум жасауды орынды деп есептейміз. Енді Халықаралық бағдарламалар орталығы жергілікті жерлерде құжаттарды жинау арқылы ақпараттық жұмыстар жүргізеді.

//Дала мен Қала.-2013.-22 сәуір.-3 б.

39

Еркін ДОСЫМБАЙ.

ҰЛТ ДАМУЫ БІЛІМГЕ БАЙЛАНЫСТЫ
Ақордада Мемлекет Басшысы Н.Назарбаевтың төрағалығымен «Назарбаев Университеті», «Назарбаев интеллектуалды мектептері» және «Назарбаев қоры» жоғары қамқоршылық кеңесінің екінші отырысы өтті.

Отырысты ашқан Мемлекет Басшысы алқалы жиын болашақта істейтін жұмыстарды саралап, тиісті құжаттар дайындау үшін өткізіліп отырғанын, бұған дейін көптеген жұ­мыстар атқарылғанын атап өтті. «Біз келешекте әлемнің ең дамыған 30 елінің қатарына кіру міндетін алға қойдық. Сондай-ақ, индустриялдық-инновациялық даму бағдарламасын іске асыруды жоспарлап отырмыз. Бұл міндеттердің орындалуы білім, ғылыммен және кадрлар даярлау ісімен тығыз байланысты», – деді Елбасы. ХХІ ғасырда Қазақстанның дамуы халыққа білім беру ісімен тікелей байланысты болатынын айта келе, Елбасы күні кеше Президенті елімізге алғашқы мемлекеттік сапармен келген Финляндияның дүниежүзінде білім саласын барынша жоғары игер­гендігін, басқа салаларда да өркендеп отырғандығын мысал ретінде келтірді. «Біздің университетіміз аз уақытта үлкен беделге ие болды. Қазір бұл оқу орны әлемнің жетекші университеттерінің қатарында келе жатыр. Халықаралық стандарттарға сай мамандарды дайындайтын боламыз. Әлемдік экономикалық және білім, ғылыми бәсекеге лайықты болады деп санаймын», – деді Н. Назарбаев.

Кеңес отырысына ұсынылған құжаттардың қабылдануымен университетте әлемдік стандарттарға жауап беретін құрылым жұмыс істей бастайды. Бұл орайда, Мемлекет Басшысы қазірден бастап негізгі академиялық және атқарушылық функциялар бірыңғай органға біріктірілетінін жеткізді. Ректор, Академиялық және Ғылыми кеңестер тек академиялық бағытпен шектелмей, университет қызметіне белсене қатысатын болады. Консультативтік-кеңес беруші Академиялық және Ғылыми кеңестерге дербес органдар өкілеттігі беріледі. Сондай-ақ, Елбасы университет классикалық академиялық басқару жүйесіне көшуді аяқтағанын атап көрсетті. Университеттің өзекті бір міндеті зияткерлік-инновациялық даму міндетін шеше отырып, экономиканың сұранысын қамтамасыз етуге бағытталған инновациялық кластер құру екеніне тоқталды. Бұл орайда, Мемлекет Басшысы университетке ірі ұлттық және халықаралық компанияларды кластер қалыптастыруға тарту жұмысын жандандыруды тапсырды. «Бұған өзінің ғылыми-зерттеу бөлімшелерін орналастыру жағынан «Самұрық-Қазына» қоры алғашқы бастамашы болуға тиіс. Үкімет инновациялық кластер инфрақұрылымдарын құру үшін қаражат көздерін қарастыруы керек. Кластер қызметінің бақылануы мен ашықтығын қамтамасыз ету үшін университетке Байқаушы кеңесін құруды тапсырамын. Кеңес құрамына бизнестің, оның ішінде өнеркәсіп секторының өкілдерін қосуды ұсынамын. Тағы айтқым келеді, бұл басты іс болады. Кластер аумағын арнайы аймақ деп жариялап, оның орналасқан жерін университет меншігіне беру керек, – деді Мемлекет Басшысы. Осы арада айта кетелік, отырыс барысында «Назарбаев Университеті» ААҚ атқарушы кеңесінің төрағасы Аслан Саринжипов Бурабайда ғылыми білім беру, сауықтыру орталығының бас

40

жоспары әзірленгенін, ол жерде «Назарбаев интеллектуалды мектептері» аясында жұмыс істейтін сауықтыру орталығы болатынын баяндаған болатын. Алайда, бұл нысанның «Қазақстандық артек» сияқты жыл бойы сабақ өтетін мектеп болатындығын, қызметі мен мақсатын, Үкімет басшысының орынбасары Ербол Орынбаев анықтап айтып берген соң Елбасы асыра сілтемеуді талап етті, бұл мәселені күн тәртібінен алып тастауға тапсырма берді. Университет құрылымында Тау-кен ісі мектебі мен Инженерлік мектептің болуы маңызды. Кен өндіру салалары ел экономикасының локомотиві болып қала беретініне тоқталған Мемлекет Басшысы бұл бағыттағы зерттеулерді дамытуға мүдделі екенімізді білдірді. Сөзінің соңында Мемлекет Басшысы кеңес отырысында қабылданған шешімдер жоғары білімді ұлт пен бәсекеге қабілетті мемлекет құруға жасалған тағы бір қадам екенін айта келе шешімдерді жүзеге асыру мақсатында Үкіметке ағымдағы және келесі жылғы бюджетті нақтылауда қажетті қаражат қарастыруды тапсырды.

//Дала мен Қала.-2013.-22 сәуір.-2 б.

41

Қанат ҚАБДІЛМӘЖИТ,