208. Бақшадағы қояндар. Ойыншылар саны: 10-30 адам. Өткізетін орын: спорт зал, спорт алаңы.
Ойынға дайындық: алаңның ортасына 3-4 метр болатын кіші шеңбер оның сыртына диаметрі 6-9 метр болатын үлкен шеңбер сызылады. Бір ойыншы қарауыл болып сайланып, кіші шеңбер ортасына тұрады. Кіші шеңбер іші «бақша» болып есептеледі. Қалған ойыншылар «қояндар» болады, олар үлкен шеңбердің бойында орналасады.
Ойын мазмұны: белгі бойынша «қояндар» қос аяқпен секіріп, кіші шеңберге кіре бастайды. Қарауыл бақшаға кірген қояндарға қолын тигізіп ұстап алуы керек.
Ұсталған қояндар ойыннан шығып тұрады. Ұсталған қояндардың саны бес-алтыға жеткенде ұсталмаған қояндардың арасынан жаңа қарауыл сайланып, ойын жаңадан басталады.
Ұсталмаған «қоян» мен аз уақытта көп «қоян» ұстаған қарауыл ең үздік ойыншы болып есептеледі.
Ойын ережесі: қарауыл қояндарды бақша ішінде жүргенде және үлкен шеңбер ішінде де ұстауға құқығы бар; ұсталған «қояндар» жаңа қарауыл сайланғанша ойынға қатыса алмайды; «қояндар» жетекшінің бұйрығымен бір немесе екі аяқпен секіре алады; Ережені бұзғандар ойыннан шығарылады.
Ойынның педагогикалық маңызы: ойын оқушыларды шапшаңдық, ептілік сапасы мен секіру қабілеттерін дамытып жетілдіреді. Тез шешім қабылдауға, ұйымшылдыққа тәрбиелейді.
209. Түлкі мен тауық. Ойыншылар саны: 10-30 адам. Өткізетін орын: спорт зал, спорт алаңы.
Керекті құрал-жабдықтар: гимнастикалық орындықтар.
Ойынға дайындық: залдың ортасына гимнастикалық орындықтар қатарластырып қойылады. Ойыншылар арасынан 2-3 «түлкі», бір аңшы сайланады. Қалған ойыншылар «тауықтар» болады. Алаңның бір бұрышына «түлкінің» үйі, екінші бұрышына аңшының үйі сызылады.
Ойын мазмұны: белгі берілгенде «тауықтар» орындық үстінен түсіп жайыла бастайды. Екінші белгі берілгенде «түлкі» қалаған «тауығын» ұстап алып, үйіне алып кетеді. Егер жолда оған аңшы кездессе «түлкі», «тауықты» жібере салып өз үйіне қашуы керек. Босанған «тауық» қайта «тауықтарға» қосылады. «Тауықтар» екінші белгі берілгенде жүгіріп орындық үстіне шығып үлгерулері керек. Егер аңшы «түлкіні» ұстап алса, жаңа «түлкі» сайланады. Ойын біраз ойналғаннан кейін мүлде ұсталмаған ойыншы анықталады.
Ойын ережесі: түлкі тек бір тауықты ғана ұстауына рұқсат етіледі.
