ҚҰран кәрім хикаялары
жүктеу/скачать 0.91 Mb. Pdf көрінісі
|
- Бұл бет үшін навигация:
- Мұғжизаның қайталануы
| ЖИЫРМА СЕГІЗІНШІ ХИКАЯ
ИСА (АЛӘЙҺИС-СӘЛӘМ) (2) Ауылға қайту Жаңа босанған Мәриям ананың көңiлi тынышталып, бiраз күш-қуат жинаған соң, кiшкентай нәресте – үлкен мұғжизаны көтерiп, ауылға, алғашқы тұрған жерi «Бәйт әл-Мақдисқа» қарай беттеді. Ол жердегi адамдар Мәриямның басынан кешкен бұл iстері жайынан бейхабар еді. Жас ана дала кезiп, белдерден асып, бiрнеше ай бұрын тастап, шығып кеткен елiне жақындады. Бiраз уақыттан кейiн ол ауылға жеттi. Адамдар оның жас нәресте көтерiп келе жатқанын көрдi. Олар бұл кездейсоқтыққа таңданып қарап қалысты. «Бұл көптен берi көрiнбей, ұзақ уақыт жоқ болып кеткен Мәриям ба? Ол көтерiп тұрған бұл сәби кiм? Бiз не көрiп тұрмыз?» – деп таңданысып, бiр-бiрiнен сұрасты. Бұл хабар бүкiл ауылға тарады. Тiптi әрбiр үйде «Мәриям ұзақ уақыт жоқ болып кеткеннен кейiн бiр бала көтеріп келiптi» деген сыпсың өсек айтыла бастады. Олар өзара: «Мәриям қайда болған едi? Қайдан келдi? Бұл баланы қайдан алған? Баланы көтерiп, ауылға алып келуге қалай дәтi шыдады екен?» – деп сұрасып, Мәриям туралы жаман ой өрбiтiп, күдiктене түсті. Адамдар өздерiн мазалаған бұл сауалдарға, күдiктi ойларына жауап таба алмай, ақырында барлық жайды Мәриямның өзiнен барып сұрауға бел байлады. Расында, олар бұл iске қатты таңданған болатын. Өйткенi бұған дейін Мәриямның отбасы туралы ешбір жаман сөз естiлмеуші едi. Сондықтан да Мәриямның өзiне келiп: «Ей, Мәриям! Сен туылып өскен отбасы беделдi, әкең – қандай керемет адам, анаң – қандай тақуалы, iзгi әйел. Сен қайда болдың? Бұл баланы қайдан алдың? Сен тұрмыс құрмаған болсаң, осы уақытқа дейiн сенен тек жақсылықты көрген болсақ, бұл iсiң не? Қане, жауап бершi», – деп iстiң мән-жайын ашық сұрады. Мұғжизаның қайталануы Олар Мәриямның намысына тиетiн, күдiктi ой-пiкiрлерiн ашық түрде айтты. Ал Мәриям бұл жалалардың, күдiкке толы ойлардың баршасынан пәк едi. Ол бiр ауыз сөз айтпастан тек ыммен ғана баланы нұсқап, «бұл баланың өзiмен сөйлесiңдер» дегендi ұғындырды. Олар оның бұл iсiне тағы да таңданысып, бұрын күдiктенген болса, ендi: «Мәриям анық бұзықтық жасаған, сондықтан ол сөйлеуге де ұялып, баланы нұсқап тұр», – дестi. Олар Мәриямды келемеждеп, күлiсiп: «Бесiктегi сәбимен қалай сөйлесемiз?» – деп таңданды. Бiрақ олар кездейсоқ iстiң боларын күтпеген. Мазақ етулерiн жалғастырып, Аллаһ тағаланың құдiретiн естен шығарып ұмыта жаздаған- ды. Сол сәтте бала Аллаһ тағаланың құдiретiмен алғашқы туған сәтiнде 123 анасына сөйлегенiндей, тағы да тiлге келiп сөйлей бастады. Адамдардың тiлi байланып, үнi шықпай қалды. Бала анасын өсек пен жаладан қорғап: «Мен – Аллаһтың құлымын. Ол маған кiтап бердi. Менi пайғамбар еттi. Және қай жерде болсам да, берекелi еттi әрі менi тiрi кезiмде намаз оқуға, зекет беруге бұйырды. Сондай-ақ менi анама мейiрiмдi етiп, менi зорлықшыл, бақытсыз етпедi. Маған туылған күнiмде де, өлер күнiмде де, қайта тiрiлетiн күнде де тыныштық, амандық болады», – деген сөздi айтты. Мiне, бұл – нағыз жауап әрi пәк ананың абыройын пәле-жаладан нағыз қорғау. Жас сәби олардың қателесiп тұрғанын өте сыпайы, әдемi сөзбен түсiндiрді. Ол алғашқы сөзiнде «Мен – Аллаһтың құлымын» деп өзiнiң де олар сияқты адам екенiн, Аллаһ тағаланың оларға көрсеткен мұғжизасы екенiн ұғындырды. Мәриямға жас баласы сөйлеп, үлкен мұғжизаның қайталанғанынан артық басқа қорғаныс керек емес еді. Осы үлкен мұғжизаның қайталануының өзi адамдардың Аллаһқа деген сенiмiн дұрыстап, анасының пәктігiн дәлелдеуге жеткiлiктi. Расында, ол – Аллаһтың құлы. Аллаһ оны әкесiз етiп Өзi жаратты. Аллаһ тағала – ұлы құдірет Иесі. Адамды (аләйһис-сәләм) әкесiз де, шешесiз де жаратқан Аллаһтың барлық іске күш-құдіреті толық жететiндiгi күмәнсiз. Бұл оқиғадан кейiн қауым адамдары көз алдарында жүзеге асқан Аллаһ тағаланың мұғжизасынан өздерiне ғибрат алып, қате ойларын өзгертiп, бұл нәрестеге болашақта ұлы бiр iстiң жүктелетінін мойындады. Мәриям Исаны тәрбиелей бастады. Баланың есейген сайын жас болуына қарамай, пайғамбарлық белгiлерi көрiне бастады. Ол өзiнiң достарына не iшiп-жегендерiн, үйлерiнде ненi жасырып қойғандарын айтып тұратын. Оның күннен-күнге ақыл-ойы дамып, бiлiмi артты. Сонымен, Аллаһ тағала Исаны пайғамбар етiп, бәну исраил қауымын жаңадан Аллаһқа сенуге шақыруға бұйырды. Бәну исраил Аллаһ тағаланың көрсеткен хақ жолынан бет бұрып, адасушылықтың азғын жолында күн кешіп жатқан-ды. Иса оларға келiп, пайғамбарлықты жеткiзiп, хақ дінге шақырды. Аллаһ тағала Исаны көптеген мұғжиза берiп, қуаттады. Ол лайдан құс жасап, бiр үрлесе, құсқа жан бiтiп, ұшып кететiн. Сондай-ақ өлгендi тiрiлтетiн, соқыр, алапес болып туылған адамдарды емдейтiн. Мұның барлығы Аллаһ тағаланың қалауымен, құдiретiмен жүзеге асатын. жүктеу/скачать 0.91 Mb. Достарыңызбен бөлісу:
|