БУ ДУНИЯ БИЗНИКИ ТЮЛДЮ

Анам айтыучу тюшеди эсиме:

Бу дуния бизники тюлдю.

Къыйын кюн кёл этеме кесиме:

Бу дуния бизники тюлдю.
Джашагъандан джашай барсам,

Тюшюннгенден тюшюне барама:

Бу дуния бизники тюлдю,

Бу дуния бизники тюлдю.

Бизледен къаллыкъ – топракъды, кюлдю.

Къучакълайма Таш бла Терекни –

Бу дуния бизники тюлдю.

Джана, джана джукъланныкъды Кюн да.

Суусуз къалгъан чабакъча, умутсуз къалгъан кёлюм,

Булгъанады: бу дуния бизники тюлдю.

Игилик аманлыкъны, Тюзлюк терсликни

Думп эталмайла, не бек кюреше эсек да биз.

Аманла болалла баш –

Бу дуния бизники тюлдю.
Къайда джинли, шайтанлы – оноуда.

Иманы, адамлыгъы болгъан – чалдышда...

Хайыр бар эсе да, дуадан, тилекден, алгъышдан –

Бу дуния бизники тюлдю.

Аллахларын отуз кюмюшге сатханла,

Иманлары дуния мал болгъанла –

Аладыла бюгюн къууанныкъ, тамбла джыларыкъ.

Аладыла джаханим отунда кюерик, джанарыкъ.

Бу дуния аланыкъыды.

Нек беребиз дунияны да алагъа?

Нек дженгдиребиз къара кючлеге кесибизни?

Нек хорлатабыз кесибизни шайтаннга?

Нек беребиз джол аманлыкъгъа, аманлагъа?

Бу сорууну сормазмы Аллах адамлагъа?

Нек бошлайбыз кесибизни да, башхаланы да гюнахха?

Не дерикбиз Къыямат кюн Аллахха?

Бу Къара ташдан къарайла Кяба эм Кавказ.

Бу Къара ташдан къарайла: Джулдуз бла Ай

эмда

Ол чыкъгъанды джети къат джерден,

Сынагъанды кёкню да, джерни да,

Сынагъанды тёрню да, кёрню да.

Къазакъ Бёрюню кючюгю къатында,

Къуш ауанасы аны юсюнде –

Кёб зат барды Ташны эсинде.

Сосуркъа тууармы, туумазмы андан? –

Аны билген джангыз Сатанайды,

Аны билген джангыз Къарачайды.

Таш-Терек ючюн этеме къазауат,

Дуния-Ахрат ючюн этеме къазауат,

Аллах-Адам ючюн этеме къазауат.

Бу Къара ташдан къарайла Кяба эм Кавказ.

Бу Къара ташдан къарайла: джулдузу бла Ай

эмда

Тюб къаты – таш, баш къаты – агъач.

Таш бла Агъач.

Бу да – насыб, бу да – къууанч.

Назмума киргенча, киргенме.

Тик къабыргъада орналгъанды юй.

Тенгизге, тенгизни ол джанында акъбаш таулагъа

Къараб, аладан ургъан салкъын аязгъа

Бетин тутуб, иссилейди юй.

Джыл узуну джашиллей тургъан:

Къыш, къар, боран болмайды мында.
Мени эм бек сейирсиндирген а –

(биринчи кёргенимде ийнанмазча болгъанем)

Нарт Ёрюзмекни къара бугъасыча,

Бачхада джатхан Къара таш, Къадау таш.

Гара сууладан аямай тогъуб,

Энди сыртын да Кюннге тутуб,

Рахат джатыб, кюушене тургъанча;

Къазакъ бёрюча улудум-джыладым,

Ёзге терк эс джыйдым, чыдадым:

Эркишиге кёлсюз болгъан гюнахды.

Адамны къадарын джазгъан – Аллахды.
Дагъыда эследим ол Ташны къатында

Кесилген Нарат Терекни дюккючюн...

Барына тёзерге къайдан джетсин кючюнг.
Къарачайда Къадау Таш кёрюндю кёзюме,

Джуртда Джангыз Терек тюшдю эсиме.

Джангы юйюм да – таш бла агъач.

Назмум, Китабым да – Таш бла Терек.

Тёнгегим, джаным да – Таш бла Терек.

Кёкде да, Джерде да – Таш бла Терек.

Хар къуру, хар къайда – Таш бла Терек.
Кюйсе да мыйы, джарылса да джюрек –

Аладан къарарыкъла Таш бла Терек.

Мени къадарымды Таш бла Терек.

Этсем да джыр-назму, дуа-тилек

Джашасынла дейме Таш бла Терек.
Ёлсем – кирликме джерге, кетерикме кёкге...

Алай а сизге къарарыкъма Ташдан, Терекден.

Саным-джаным буруллукъла Ташха, Терекге,

Ол да асыуду кёлге-джюрекге.

Къарашауайча, Минги Тауну буз сюммеклерин эмиб ёсдюм.

Халкъымы джауларын – джетибаш эмегенлени, экибаш къушланы да,

Амантиш итлени да сёз къылычым бла аямай кесдим.

Кетерге меннге да джетгенди кёзюу.

Кёзюуюнде туугъан, джашагъан, ёлген,

Иман бла джашагъан, ёлген –

Ол да насыб. Олду – насыб.

Ол насыблыланы бирлериме мен да.

Аладан къарайма мен да сизге.

Алача джашадым, ёлдюм.

Ала ючюн джашадым, ёлдюм.

Джюрегим, джаным да – Таш бла Терек.

Ич дуниям, тыш дуниям да – Таш бла Терек.

Сын-суратым, эскертмем – Таш бла Терек.

Джангыз Терек болса да – кесилди джюрек.

Алай а ёлюм джокъду Къадау Ташха, Джангыз Терекге,

Халкъым, Джуртум деген иманлы джюрекге.

Сизге къалалла Таш бла Терек.

Сизге аманатла Таш бла Терек.
Барыгъыз да уллу Аллахха аманат.

Мен шейит болдум, эте къазауат.

Джандетлени эм игисинде сакълайма сизни,

Алай а унутмагъыз ала келирге

Таш бла Терекни. Таш бла Терекни.
ТАМЫРСЫЗ ДУНИЯНЫ АДАМЛАРЫ
Терекни тамыры кесилиб тургъанын билмей,

Бутакълары туралла кёгере,

Чууакъ кёкге, джарыкъ кюннге узала,

Джылы джауумгъа, чыпчыкъ джыргъа къууана.

Шууулдайла, шыбырдайла джазгъыда.

Тамырсыз къалгъанларын, тамырсыз болгъанларын

алкъын билмейле ала –

Къууаналла, кюлелле джазыкъла.
Тамырсыз къалгъанларын, тамырсыз болгъанларын

алкъын билмейле ала...

Эшда билиб а...

ала билмеселе ким билликди сора?

Бутакъ тамырындан хапарсыз къалай болур?

Тамырсыз къалгъанларын, тамырсыз болгъанларын билелле бутакъла.

Ёрге ёрлеб, бутакълагъа джетгинчи,

Бутакъла къуу болгъунчу, ёлгюнчю,

Джашаб къалыргъа, джашаудан тояргъа излейле.

Къанатлылагъа уя болалла.

Кёгетлери бла сыйлайла хар кимни,

Джолоучулагъа кёлекке, ышыкъ болалла.

Терекни урлугъун джел башха джерледе себерча,

Аладан джангы терекле ёсерча.

Алай а, алагъа да келликди ёлюм.

Ахырзаманнга къараб тургъан бутакълары,

Ахырзаманнга тирелиб тургъан бутакълары

Кёб затха сагъыш этдирелле мени.

Тамырсыз дунияны адамлары –

Биз да кюрешебиз джашаргъа, къууаныргъа,

Дуния джашауну къуруругъун билсек да.

Джаратылгъан кюнюнде да белгили эди...

Тамырсыз терекни бутакъларыча,

Дагъыда кюрешебиз джашаргъа.
АХЫРЗАМАН
Бек алгъа джарыгъы джетди –

Кёзлени сокъур этди.

Ызы бла тауушу джетди –

Къулакъны сангырау этди.

Кюн кёмеуюлча джетди.

Джаны болгъанны, болмагъанны да

Кюл этди, учхун этди.

Тёбен джаным – суу, тенгиз.

Тауну, сууну, агъачны –

Ючюсюн сюйдюм кемсиз...

Къайнайд мени джюрегим.

Кёрюнелле кёзюме

Джуртда Ташым, Терегим...

Джаларча бола ташын.

Джурт-халкъ деген сагъышдан

Къазан къайнайды башым.

Джаралы Ташха таяныб,

Сорады

Джангыз Терекге айланыб:

Бир заман, бир джашау, бир дуния?

Дарманы уа – ёлюмдю аны...»

Къайсы насыбсыз айтханды алай?
Башха дарман табмай, табалмай,

Ёлюмню излерча, тилерча, кюсерча –

Ой алллай къыйынлыкъдан, палахдан

Барыбызны да сакъласын Аллах.

Эртде-кеч болса да,

Не къыйын ауруугъа да табылады дарман.
Не ауруугъа да биринчи дарман – иманды,

Олду адамгъа кёл берген, тирилтген.

Джашаргъа, ёлюрге да таукеллик берген олду,

Джанны дарманыды иман.

Палахла бары башланалла андан.

Имансыз адам, имансыз кърал,имансыз джорукъ –

Не къыйынлыкъ да келеди бизге аладан.

Аладан да бизни къутхарады иман.
Джашау ауруу тюлдю – сынауду,

Адамлыкъ сыналады бизде.

Иман бла джашагъан, ёлген –

Адамгъа Ол саналады бизде.

Ёлюм да тюлдю дарман.

Умут джангыз Аллахданды –

Джанны дарманыды иман.

Тиширыуду эркишини ёлтюрген.

Аны джюрегин джаргъан,

Замансыз къартлыкъ, ауруу, аджал да келтирген,

Тауладан мийик кёлюн тенгизледен алаша этген,

Учхан Борагъын джегилген ат, бир къотур алаша этген –

Тиширыуду.

Кишнегени – кёк джашнагъанча,

Джаз аны сыртында джюрюгенча,

Ол джазны алыб джюрюгенча,

Не джазны къачырыб келгенча,

Джерге, кёкге сыйынмай джюрюген –

Аллай къушкъанат эмилик аджирни

Джерлеб, джюгенлеб, кишенлеб, аркъанлаб къойгъан –

Тиширыуду.
Тиширыуду эркишини бичген.
2

Тиширыуду эркишини кёлтюрген,

Анга насыб, къууанч, зауукълукъ да келтирген,

Мийиклеге учундургъан, учургъан да аны.

Тиширыуду – эркишини къанаты.
Тиширыу саулукъда эрге джокъду ёлюм.

Сюймеклик тюрлендиреди адамны кёлюн –

Этеди Адам, этеди тулпар.

Тиширыуду – эркишини къанаты.

Эркишини джазыуун джазгъан Тиширыуду.

Эки кере джаратылады эркиши:

Биринчи кере Аллах джаратады аны,

Экинчи кере – Тиширыу.
Эркишини тиширыудады джаны.

Саулугъунда да тиширыудады джаны,

Ёлсе да тиширыуда къалады джаны.

Тиширыудады эркишини джаны.

Тиширыуду эркишини къанаты.

Тиширыу эркишиге Кюндю, Айды.

Нарт Ёрюзмекни да баш этген Сатанайды.

Къарт Ёрюзмекни да джаш этген Сатанайды.
Тиширыу болса да эркишиге джан эм къанат,

Аллах Тиширыуну Эркишиге этгенди аманат.

Эркиши Тиширыу ючюн,

Тиширыу Эркиши ючюн

Этелле къазауат.

Джашау аны ючюн кёрюнеди

Сейир, аламат.
БЁРЮДЕН ТУУГЪАН ИТ КЪАЛАЙ БОЛУР?
Акъ къаяны ташы

Къара къалай болур?

Ёзден халкъны джашы

Къул къалай болур?

Ит къалай болур?

Аллай зат болса –

Джашау къалай болур?

Не къалыр Халкъдан?

Ичиу-ашау болур –

Хайуан джашау болур.

Ит-къул болур халкъ:

Къарын тюбю, къарны –

Оноучусу аны.

Ахрат азаб демез.

Дуния намыс билмез.

Итча айланыр,

Итча сойланыр.

«Халкъ, джурт» деб, кюрешмез.

Талашыр...не ючюн?

Тегене, сюек ючюн.

Баш болгъан джерде –

Амантишле, къахмеле

Ётерле тёрге.

Акъ къаяны ташы

Къара къалай болур?

Ёзден халкъны джашы

Къул къалай болур?
Алай къалай болур?
Джаратхан джанларына

Аллах да къарай болур.

Бёрюден туугъан

Ит къалай болур?

Къутсуз, огъурсуз, сууукъ къачхы джел.

Акъ кийиз бёркюмю кесине уя этиб,

Бир къара къанатлы гурт чыгъарады дейле.
Акъ кийиз бёркюмде къара къанатлы...
Анам кеси къолу бла этиб,

Акъылсыз башыма кийдирген акъ кийиз бёркюм,

Сабий болуб, атамы ызындан

Чалкъы чала, башымда агъаргъан акъ кийиз бёркюм...

Акъ кийиз бёркюм бла алыб,

Къара суудан кёб ичгенме суу.

Адам аягъы басмасын деб,

Акъ кийиз бёркюмю сакъал тюбюме салыб,

Кёб кере ауузланнганма.

Чалкъы джетмез джерге

Акъ кийиз бёркюме салыб кёчюргеним –

Ол да тюшдю эсиме.

Башына кюн ётмесин деб,

Акъ кийиз бёркюмю кюнлюк этгеним –

Эсиме тюшдю ол да.

Башыма Айны къаблагъанча кёргенем.

Бузоучу, джарым чалкъычы да тюл –

Кесими джыйын тамада болгъанча кёргенем.

Къара къанатлы гурт чыгъарады.

Артда уа Хасауканы джырлаучу къарт,

«Таулучукъла, сиз да ёсюб джетерсиз,

Бу къан дертни джууабларын этерсиз» деб,

Мени кёзюме къараб туруучу къарт,

«Бёрю атарыкъ бёркюнден» деучю къарт,

Ол дуниядан салыб келмезми, чамланыб?

Кёб къыйынлыкъ кёрюб, кетген атам-анам,

Ала уа не дей болурла манга?

Хасаука шкокну алдым къолума:

Огъай, кёлсюзлюк этиб, ёзден бетими джоймам,

Къара къанатлыгъа акъ кийиз бёркюмю къоймам.

Акъ дуния ючюн къара къаманы тотун ачмай къоймам,

Къарча къаланы къара къанатлыгъа къоймам,

Акъ тауларымы къара къанатлыгъа къоймам –

Къан джерде къалмайды, дерт болмайды эски,

Тимурну, Сталинни да къабырлары джарылсын эки,

Орус патчахланы, амантиш, атажукин итлени да

къабырлары джарылсын эки.
Тау джумхуриет, Алан кърал да къуралыр,

Къарачай-Малкъар байракъ да Минги Тауда чайкъалыр.

Къарда акълыкъ, тазалыкъ да бар.

Кёкде, джерде, джюрекде болмагъан –

Ой бизде болмагъан – бир халаллыкъ,

Бир сабырлыкъ, рахатлыкъ да бар.
Ставангерде джауады къар.

Джети къат кёкденми энеди ол?

Огъай, Минги Таудан келеди ол,

Джуртумдан салам береди ол,

Мени чакъыра келеди ол.

Джауады къар.

Эсиме тюшеди Къарачай-Малкъар.

Аягъы, башы да – къар,

Ауалы-ахыры да – къар:

КЪАРачаймалКЪАР.
Суулары эсе – Минги Тауну бузундан, къарындан келген;

Нартлары эсе – ташдан джаратылгъан,

Минги Тауну буз сюммеклерин эмиб ёсген...
Ставангерде джауады къар.

Нартла викинглеге къар юлюш ийгенча,

Джауады къар. Чыммакъ акъ, тап-таза –

Иги иннетча, иги сёзча, иги ишча.

Къара кюн келиб къаралмасын къар.

Къан тёгюлюб къызармасын къар.

Мийикледен, мёлекледен хапар айта,

Игиликден, сюймекликден хапар айта,

Кетген кюнден, келлик кюнден хапар айта,

Бюгюнюме джауады къар.

Кёлге, юсге джауады къар.

Таш, Терек да агъаргъанла, къууаналла.

Джокъду къайгъы, джокъду джарсыу, джокъду ёлюм.

Джуртсузлукъдан, джангызлыкъдан, умутсузлукъдан керид кёлюм.

Джауады къар...

Ол ахыр кюнюм болгъанча джерде.

Кёкден, межгитден, сын ташдан да къарай –

Эки дуниягъа да этдиреди сагъыш.
Хар назмуму джазама алай –

Ол ахыр сёзюм болгъанча мени.

Халкъым-джуртум – Малкъар-Къарачай –

Джашаугъа, ёлюмге да этдирелле сагъыш.
Хар ишими этеме алай –

Малкъар бла Къарачайны бир этгенча алай,

Кёк бла Джерни байлагъанча алай,

Эки дунияны байлагъанча алай.

Юч сёзлю бир назмуну, аятча айтханлай:

Аллах-Малкъар-Къарачай.
ДЖОЛОУЧУ
Мен –

Ёлюрюн-къалырын билмеген бир джан,

Боллукъдан хапары болмагъан бир джан –

Абдез алыб чыгъама джолгъа,

Билмейме, не сакълайды алда.
Адамгъа, шайтаннгамы тюберме джолда,

Игиге, аманнгамы тюберме джолда,

Шохха, душманнгамы джолугъурма джолда,

Джайгъа, къышхамы джолугъурма джолда –

Билмейме.

Хазырланыб а чыкъгъанма джолгъа:

Сауутуму-сабамы да алыб,

Къышхы кийимлерими да алыб.

Бойнумда дуа, белимде къама...

Джашаргъа, ёлюрге да хазыр болуб,

Ата-бабам чыгъыучуча джолгъа,

Мен да алай чыкъгъанма джолгъа.
Къайытыргъа, къайытмазгъа да болурма:

Башлыгъым – акъ, джамчым – къара,

Намазлыгъым – джашил.

Кюнюм да, кийимимча – акъ бла къара,

Джолум, джазыуум да – акъ бла къара,

Джангыз: умутум – джашил.

Барама. Джол бла кесим –

Къуру экибиз болгъанча дунияда,

Къуру экибиз къалгъанча дунияда,

Алай кёрюне, барама кетиб.
Чексиз Кёкню тюбюнде

Ахыры кёрюнмеген джол...

эмда

Бир бурху адам, джангыз адам

къайры эсе да барады кетиб...

Адам улу ёлед деб.

Бу дуниягъа ахыр кюн келед деб,

Ахырзаман келед деб.

Бир джулдуз джукъланыргъа башхасы джанады,

Бир дуния къырылыргъа башхасы тууады.
Чексиз Аламда кёбдюле

Кюнле, джулдузла, джерле, айла да;

Тюрлю-тюрлю дунияла, джашаула да.
Ёлюм келеди кырдыкга, терекге, кийикге да...

Неси артыкъды, игиди адамны аладан?

Джыларча, адам кетди деб, джашаудан.

Не да джашау къуруйд деб къоркъарча?

Къолдан келгенни этесе – болду.

Файгъамбарла эталмагъанны эталлыкъ тюлсе,

Кеси кесингден кёлюнг чыкъмаса – болду.

Иманны азлыгъынданды бары.

Адамча джашаргъа, ёлюрге да къоймагъан –

Азлыгъыды, джокълугъуду иманны.

Аллах буюргъан джол – джолу болса,

Аллах-Адам дей билсе,

Сууаб-гюнах, халал-харам дей билсе,

Ахрат азаб, дуния намыс дей билсе,

Ёллюгюн билгенча, тириллигин да билсе,

Соруу-сууал этиллигин да билсе,

Бу дуния бла джашау бошалмазлыгъын билсе –

Джангыз –

Адамча джашаргъа, ёлюрге да тырмашыр.
Таукел болур джашаргъа, ёлюрге, тирилирге да.

Иман бла джашаргъа, ёлюрге, тирилирге да.

Къутулур ючюн хар не тюрлю палахдан

Аллай иман тилейме Аллахдан.

Къыш чиллеге, джай чиллеге да чыдаб,

Ташда, къаяда ёсген терекге

Адамла этелле сейир:

Суратха салалла, джазалла шийир.

Мен а этеме сагъыш:

Тюзде, ёзенде джашаргъа къоймай,

Не къыйынлыкъ ёрлетгенди аны къаягъа?

Мылы хауадан, салкъындан къутулгъанды,

Хоншуланы зарлыкъларындан къутулгъанды.
Алай а, кёбмюлле аныча къутулгъанла?

Къайдады тюзлени, ёзенлени кюнбетлени кючлеб тургъан чегет?

Терекле къалгъанла анда-мында

Кими ташха, кими къаягъа, кими таугъа илиниб,

Чегет а – джокъ.

Агъачны кесгенле маджалын, бийин;

Кесгенле тюзюн, игисин, узунун-мийигин.

Кёкге, Кюннге созулгъанны барын кесгенле,

Агъачлы агъач къоймай барын кесгенле.

Къойгъанла къайда джараусузун – къынъырын, къууун, шылабын.

Къуу агъач, къул агъач къалгъанды къуру.

Терек, чегет болмазлыкъла къалгъанла къуру.

Джуртда Джангыз Терек – сауду алкъын.

Таудан, тюзден – хар бир джерден

Эркин джуртха къайтарыргъа,

Ёзден чегет къураргъа,

Сюрюлген халкъын ызына къайтарыб,

Джуртда кърал къурагъанча Къарча.

Кеси джангыз сермешеди Джангыз Терек,

Джуртда Джангыз Терек.
Бир-бирде ийнамы тауусулады, къуруйду.

Ол заманда Къазакъ Бёрю улуйду.

Дагъыда Къадау Таш джыйдырады эс, табдырады кёл.

Джангыз Терекни ачыуу болады сёл.

Чегет сагъышха кёчеди джангыдан.

Джурт-Халкъ анга багъалыды джанындан.

Къадау Таш, Джангыз Терек.

Джесир болуб, тутмакъ болуб, сюрюлген,

Эки кере да ызына къайыталгъан,

Мингле бла, джюзле бла джылланы

Ас-Алан деб, Къарачай-Малкъар деб, айтылгъан,

Мингле бла, джюзле бла джылланы

Эркинлик-Тюзлюк-Ёзденлик деб айталгъан,
Ай зауаллы алан халкъым, таулу халкъым.

Алан къралынгы чингисханла, тимурла къурутдула,

Къарачай къралынгы орус патчахла къурутдула.

Бюгюн сени къралынг, къраллыгъынг джокъ.

Чегетлеринги къалам этиб,

Сау ёмюрню джазыб турсанг да –

Джазыб бошаялмазса джарсыуунгу.

Джазыуунгу кесинге къоймайла джазаргъа,

Ие болургъа къоймайла джуртунга.
Итле ит этерге,

Тонгузла тонгуз этерге

Кюрешелле сени.
Адамма, Халкъма дегенинг ючюн,

Адамлай, Халкълай къалыргъа излегенинг ючюн,

Миллет, кърал болургъа излегенинг ючюн,

Дининг, тилинг, намысынг бла джашаргъа излегенинг ючюн –

Тюб этерге излейле сени.

Сени тюб этерге кюрешгенле –

Хоншу итле бла кесибизни амантиш маскеле.

Аладыла сеннге къралны юсдюрген,

Алалла сени джуртдан сюрдюрген.
Къахмелеге, амантишлеге, итлеге

Алдатсанг кесинги, хорлатсанг кесинги,

Ол джийиргеншлилеге къол берсенг,

Ичкичиликге, зийналыкъгъа джол берсенг,

Алай бла кеси кесинги тюб этсенг –

Сора, кимни, нени терслейик, айт, халкъым?

Имансыз джорукъну сюргюнюн, зулмусун сынадым.

Хар не палахны да сынаугъа санадым.
Манга эс Китаб да, дерс Китаб да болду Къуран.

Джашаргъа, назму джазаргъа да юрендим Андан.

Хакъ-Халкъ-Адам ючюн кюреширге юрендим Андан.
Файгъамбарлагъа ушаргъа кюрешдим.

Сынсымай, сынмай джашаргъа кюрешдим.

Дуниядан ала да кетгенле,

Ёллюклерин ала да билгенле,

Аджал базманнга ала да миннгенле:

Файгъамбар болсала да, ала да – адам.
Алай а,

Алагъа нюр берген, кюч берген –

Аллах, иман.

Аллай иманны тилейме мен да Аллахдан.

Кече узуну джаугъанды къар –

Чыммакъ, таза, джумшакъ.

Акъсакъал къартлача ныгъышда,

Акъ таула ышарыб къарайла.

Къара джерни агъартханды къар.

Акъ къар джаугъанды джерге.

Тенгизге уа кёк къар джаугъанды –

Аны ючюн кёгереди тенгиз.
Къобан суу да кём-кёк кёгереди,

Эки джагъасы уа – чыммакъ акъ.

Эки джагъасы – эки къанаты акъ болгъан

Бир кёк къанатлыгъа ушайды ол.

Кёкню джерге тюшген кесегине –

Тенгиз дейдиле адамла.

Чингиз дейдиле адамла.

Кече узуну джаугъанды ол.

Къараны, къарангыны да джарытханды ол.
Кёкден тюшген мёлеккеча,

Бу чыммакъ, таза, джарыкъ, джумшакъ къаргъа

Къууаныб айтама:

«Кюнден эримей, бораннга да кесинги сюрдюрмей,

Джазгъа сау-эсен чыкъ».
2

Къар алай акъды, тазады, джумшакъды –

Кюрерге да бармайды кёлюм,

Сууукълугъуна да разыды кёлюм –

Къар алай акъды , тазады, джумшакъды.
Къар джаумагъан джерле да бар.

Къар кёрмеген адамла да бар.

Джылны бир чагъындан хапарсызла ала –

Къалай насыбсызла ала.

Джазы, джайы, къачы, къышы да бар,

Ёзени, тауу да бар, агъачы, ташы да бар.

Джаннет джуртду Къарачай-Малкъар.

Заманында джаугъанынг ючюн,

Джуртуму да эсге салгъанынг ючюн,

Кёб джаша, къар.