Лайпанов б. А

ДЕФТЕР:

ДЖЮРЕК БЛА ТЁНГЕК

ДЖЮРЕК бла ТЁНГЕК

Аякъ таяды –

Этеме хахай:

Тёнгек къартаяды...

Джюрек а – огъай.
Кюнюм таркъаяды,

Кючюм да алай:

Хар не къартаяды,

Сезим а – огъай.

Тёнгек бла Джюрек.

Келишелле, келишмейле

Джер бла Кёк.

Таш бла Терек.

Тёнгек бла Джюрек –

Джер бла Кёк.

Кёкча джашнай.

Тебеди, урады – турады

Джашиллей, джашлай.

Джюрек къартаймайды.

Къыз а – джюрекни тюл, тёнгекни кёреди –

Джууаб къайтармайды.

Ма ачы-татлы мийик къадары шайыр джюрекни.

Тёнгек къартайгъанлыкъгъа, джюрек къартаймайды.

Къызла, къалгъанла да аны ангыламайла.

Тёнгек къартаяды, джюрек а – огъай.

Ёледи джюрек, кюе, джана.

Джангыз, ёлюммюдю дарман анга?

Ич дуниямдан хапар айтыр сизге.

Ангыламасагъыз а ол заманда да аны –

Сора, ёмюрде да тынчлыкъ табмаз джаным.

Джангы акъ сёз бла кийиндириу, сюйюндюрюу,

Тыш дуниягъа ич дунияны кёргюзтюу, билдириу, сюйдюрюу –

Бу тюлмюдю, ёлюб кетгинчи, борчу, джазыуу да шайырны?

Алай а, ангылаялмагъанлагъа,

Аны айтыб, ангылатыб кюреширге да керекмиди?

Шайыр джюрек ёледи – кюе, джана.

Сёздю дарман да, дууа да, кёр да, тёр да, тёре да анга.

Сёздю Аллахы шайырны.

Сёздю джаратхан, ёлтюрген, тирилтген да аны.

ДЖАРЫКЪ

Мени джюрегимде къаллай бир сюймеклик

Болгъанын сезселе эди къызла,

Мени джюрегимде къаллай бир джарыкъ

Болгъанын билселе эди адамла...
«Джарыкъ къарангыны джарытыр ючюн

Джаратылады эмда джайылады» дейле.

Аллай джарыкъла да болурла.

«Тыш дунияны кёрюрге излеген

Ич дунияды джарыкъ» дегенле да барла.
Мени кёлюме уа башха зат келеди:

Къарангыны джарытыргъа излегенден сора да,

Дунияланы кёрюрге излегенден сора да, –

Неден да алгъа –

Къарангыда башха джарыкъны излей,

Джайыла болур джарыкъ.

Башха джарыкъны излеген тохтаусуз.

Сезимле-сёзле, кюн таякълача,

Джайылалла башха джюреклеге-аламлагъа.

Джюрек джарыгъым джеталмаз узакъда болур.

Ансы ёмюрюм тауусулады,

Кёралмагъанлай, тюбеялмагъанлай анга.

Сени излей, кёрдюм тюрлю-тюрлю дунияланы да,

Сени излей, джарытдым къарангыны, башхаланы да.

Да ол да джаныма сууаб болур,

Къыямат кюн Аллахха джууаб болур.
Алай а, мени джюрегимде

Къаллай бир джарыкъ, сюймеклик

(джарыкъ сюймеклик, джазгъы сюймеклик!)

Кетеди дуниядан.

Мен кёб къызгъа чачыб кюрешгенликге,

Назму сёзлеге да буруб кюрешгенликге –

Джазалмадым джазыууму, джазалмадым кёлюмю.

Айталмадым эм керти сёзюмю.

Бошалды Кёкню да тёзюмю –

Бошалды меннге берилген болджал.

Къояргъа бир ариу джан табалмагъандан (табылмагъандан),

Аны халкъыма, джуртума, бютеу дуниягъа

Къояргъа, чачаргъа кюрешдим.

Ол бир дунияда болурму мен излеген джарыкъ?

Джерде табылмады эсе,

Кёкде болурму ол мен излеген джарыкъ?

Джер дуниядады мен излеген джарыкъ.

Табалмагъаным, тюбеялмагъаным анга –

Олду кюйдюрген, къыйнагъан мени.

Кёгети кёбден сыннганча бутакъ,

Сюймеклиги кёбден джарылгъанды джюрек.
Алай а, андан – къызыл не къара къан тюл –

Джумшакъ джарыкъ тёгюледи дуниягъа.

Къарангы тюл, джарыкъ джутады мени.

Ийнанама, насыбым алдады мени.

КЁК-АКЪ-ДЖАШИЛ

Кёк-Акъ-Джашил

Меннге кераматча кёрюннгендиле

Болгъан кюнюмде да джахил.

Къара таныгъанлы бери уа,

Кёргенча болгъанма Кёкню башын:

Миллет Байрагъыбыз, Тамгъабыз эмда Орайдабыз –

Кёк-Акъ-Джашил.

Кёк-Акъ-Джашил дуния ючюн

Къаныбызны тёкгенбиз, джаныбызны этгенбиз къурман.

Кёк-Акъ-Джашил Джурт бизге ачылгъанды,

Тейри эшиги ачылгъанча, ачылгъанча Къуран.

Кёк-Акъ-Джашил къудурет –

Кём-кёк чууакъ Кёк,

Чыммакъ акъ Минги Тау,

Джап-джашил табигъат –

Аллахны саугъасыды бизге.
Тейри адамларына –

Минги таулулагъа –

Ёмюрлюкдю эмда ёлюмсюзлюкдю

Кёк-Акъ-Джашил.

СЁЗНЮ КЪАЙГЪЫСЫН КЁРСЕК

Къайдады ол къанатлы сёз?

Къайдады джазгъы-джайгъы сёз?

Эм ахырда айтылгъан а –

Къайгъы сёздю, къайгъы сёз.
«Рахматлы болсун» дейле,

«Джандетли болсун» дейле,

«Гюнахы къурусун» дейле...

Джараймыды къайгъы сёз?

Ёлген сёзге сау сёзле

Джыйылалла бушуугъа.

Хар бири да кесине

Къоркъуу этед ичинден.

Тил терекни бир чапрагъын

Заман джели юзгенди.

Къалгъан чапракъла шууулдайла

Джылауун эте аны.

Сёзле болалла эски,

Къартаялла, ёлелле,

Джангы къошулгъан а джокъ.
Джюрюгени аз бола,

Ауазы да шош бола,

Акъырын ёледи тил.
Бизбиз ёлтюрген аны.

Ана тилде сёлешмей,

Айнытыргъа кюрешмей,

Джангыртыргъа кюрешмей,

Бизбиз ёлтюрген аны.
Тилин ёлтюрген адам –

Кесин ёлтюреди ол:

Башха тилге кёчеди –

Амантиш сатлыкъды ол.

Тилин ёлтюрген адам –

Халкъын ёлтюреди ол,

Башха тилге, башха халкъгъа

Къуллукъ этеди ол:

Башха тилни, башха халкъны

Джуртха келтиреди ол,

Башха тилге, башха халкъгъа

Джуртун кючлетеди ол.

Ана тилин ёлтюрген –

Анасын ёлтюргенчады.

Ата джуртун тонагъан, сатхан –

Атасына аманлыкъ этгенчады.

Халкъны джаны – дининдеди,

Халкъны руху – тилиндеди.

Ким марай эсе аланы –

Олду эм уллу душман.

Неди китабым мени?

Назму джыйын десем да –

Къуугъун аскерди ол.
Сёзню къайгъысын кёрсек,

Сёзюбюз болмаз къайгъы сёз:

Къанатлы сёз къайытыр артха,

Къайытыр джазгъы сёз, джайгъы сёз.

жүктеу/скачать 2.02 Mb.

Достарыңызбен бөлісу: