Методическая разработка Предметная неделя коми языка и литературы

____________________________________________________________________

Талун общество и государство сувтöдöны зэв ыджыд корöмъяс быдмысь войтыр дорö. Челядьлы колö кужны вöчны унатор: пöртны олöмö туялан, велöдан да социальнöй могъяс; асшöра мöвпавны; кужны висьтавны да дорйыны ас видзöдласъяс и сэк жö пыдди пуктыны видзöдласъяс да олан сям мöд йöзлысь. И медым ставсö тайöс пöртны олöмö уна вын колö пуктыны не сöмын бать-мамлы да челядьлы, но школалы. Та могысь велöданiнъясö пыртöны выль стандартъяс, не сöмын урочнöй, но и внеурочнöй уджö.

Ми ставöн бура тöдам, мый внекласснöй удж – бур да вына отсöг урокъяслы, сы вöсна мый сы дырйи велöдчысьяслöн эм позянлун пöртны олöмö ас кöсйöмъяс творчествоа нырвизьтi, петкöдлыны ас вынйöрсö (эбöслун, мичаа серпасасьöм, сочинение гижöм, артасьöм, лыддьысьöм серти и с.в.); велöдчыны уджавны öтвылысь мукöдяскöд да воöдчыны йöзкöд öти кывйö. Буретш внекласннöй удж дырйи велöдчысьяслöн могмöдчöны корöмъяс асьсö гöгöрвоöмын, петкöдлöмын, пыдди пуктöмын да иналöмын.

Медым пöртны олöмö велöдчысьяс дорö став корöмъяс да вöзйöмъяс, талунъя школаясын котыртöны да нуöдöны быд сикас внекласснöй удж (колö пасйыны, мый татшöм уджыс нуöдсьö важöн, а оз ло кутшöмкö выльторйöн).

Ме уджала сиктса школаын витöд во, школаным миян ичöт (малокомплектнöй), велöдчöны тані 1-11 классöдз. Коми кыв да литература велöдігöн ме тшöкыда кывла челядьсянь сэтшöм юалöмъяс: «Мыйла миянлы колö тöдны коми кывсö, öд ми сы вылын зэв бура сёрнитам, кужам лыддьысьны?» либö «Мыйла миянлы колö тöдны сійö либö мöд гижысьлöн олантуй да творчество йылысь да нöшта на кужны анализируйтны налысь гижöдъяс?» Первöй воясö ёна чуймывлі татшöм юалöмъясысь. Артмö, мый коми челядь, коді олöны Коми муын, оз кöсйыны велöдны ас кыв да тöдмасьны ас коми гижöдъясöн. Кöть эськö торъя мотивация коми кыв да литература велöдöм серти век жö эм – обязательнöй экзамен коми кывйысь 9-öд класс комалысьяслöн (диктант) да коми литератураысь 11-öд класса помалысьяслöн (билетъяс серти вомгора вочавидзöм).

Став индöм мытшöдъяс лоисны подулöн меöн бöрйöм методическöй материал лöсьöдöм темалы «Коми кыв да литератураысь предметнöй вежон».

Удж лоö колана öти-кö сы боксянь, мый коми кыв да литератураысь внекласснöй удж серти материал сьöкыд судзöдны, а мöд-кö, сійö сетас позянлун пыртны челядьöс велöдан-быдтан уджö инновационнöй технологияяс.

Уджлöн мог: сöвмöдны велöдчысьяслысь асьсö гöгöрвоöм, петкöдлöм, пыдди пуктöм да иналöм коми кыв да литератураысь тöдöмлунъяс сöвмöдöм да паськöдöм пыр.

Могсö олöмö пöртöма некумын тшупöдын:

• 
  видлалöма методика литература индöм тема серти;
  
• 
  бöрйöма коми кыв да литература нуöдан вежон кежлö материал (нагляднöй, теоретическöй, творческöй и с.в.)
  
• 
  лöсьöдöма предметнöй вежонся мероприятиеяслысь план,
  
• 
  котыртöма да нуöдöма коми кыв да литературалы сиöм вежон.
  

Предметнöй вежондырся уджыс сöвмöдö:

• 
  гöгöрвоны ас водзын сувтöдан мог, ведöдан уджлысь шöр визьяс, öттшöтшъяяскöд да велöдчысь костын йитöдъяс, корöмъяс ас удж дорйöм кежлö;
  
• 
  аддзыны помся уджсö да висьтавны сы йылысь;
  
• 
  пöртны стöчмöдöмъяс водзвыв вöчöм уджö;
  
• 
  донъявны артмöмсö;
  
• 
  корсьны да аддзыны асшöра колана материал;
  
• 
  подула видлавны артмöмсö да уджлысь быд тшупöдвывса мытшöдъяс.
  

Уджлöн выльлуныс сыын, мый кыв да литература велöдысьяс тшöкыда паныдасьлöны сэтшöм мытшöднас, кыдз велöдчысьяслöн лыддьысьны абу окотитöм. Та вöсна сувтö юалöм велöдан выль методъяс да подходъяс корсьöм могысь. Коми кыв да литератураысь предметнöй вежон котырмöм-нуöдöмыс сетö позянлун пыртны уджö быдсикас велöдан технология, кодöн он век вермы вöдитчыны урокъяс дырйи.

Таысь кындз, талун эм уна сикас небöг, пособие да интернет ресурс предметнöй вежон нуöдöм серти став общеобразовательнöй предметъясті, велöдысьяслöн кö лоасны та серти кутшöмкö мытшöдъяс, найö вермöны вöдитчыны дась уджтасъясöн да материалöн, мыйöн, дерт жö, лишöдöны аслыныс унджык прöст кад. Коми кыв да литература велöдысьяслöн жö татшöм позянлуныс абу, сы вöсна мый пöшти абу практическöй матерал тайö тема серти. Колö пасйыны, мый Коми республикаса культура да национальнöй политика министерство Национальнöй политика департаменкöд öтвылысь 2005-öд воын котыртöма «Оланноглöн коми сер» коми кыв вылын сценарийяса конкурс, кодлöн материалъяс серти вöлі йöзöдöма кык сборник – «Коми муын – коми гаж» (2006) да «Шондібана оландыр» (2007). Тайö небöгъяс лоöны бур отсöгöн коми кыв да литература велöдысьяслы.

Идея: лöсьöдныа коми кыв да литература велöдан внекласснöй удж серти методическöй материал информационно-коммуникативнöй технологияяс пыртöмöн.

1. 
   Предметнöй вежон – внекласснöй удж форма
   

Ышöданторнас внекласснöй уджын лоö унджык тöдмавны кöсйöм, интерес. Урок дырйи велöдчысь сöвмöдö ас тöдöмлунъяс, кужанлунъяс, а внекласснöй уджыс сетö унджык асшöрлун да творческöя асьтö петкöдлöм, а сiдзжö позянлун вöчны сiйöс, мый кöсъян и кужан: видлыны асьтö актёрöн, серпасалысьöн, экскурсоводöн. Таысь кындзи, внекласснöй удж дырйи велöдчысь ёнджыка воссьö кыдз личность.

Внекласснöй уджлöн могъяс да помкаяс ёна торъялöны содтöд занятиеяслöн могъясысь. Велöдчысьяслöн внекласснöй удж котöртiгöн медшöр корöмъясöн лоöны:

1. 
   кыскыны-пыртны уджö став велöдчысьясöс налысь кужанлунсö тöд вылын кутöмöн;
   
2. 
   лöсьöдны топыд йитöд велöдан да внекласснöй удж костын;
   
3. 
   ышöдны творческöй уджö;
   
4. 
   вынсьöдны тöдчанлунсö кыдз ассьыс велöдчысьлысь, сiдз и челядьлöн котырлысь (самоуправлениелысь)
   

Пыр нуöдан мероприятиеяс:

• 
  кружокъяс,
  
• 
  котыра занятиеяс,
  
• 
  факультативъяс,
  
• 
  туялан удж
  

• 
  коми национальнöй культуралы сиöм лунъяс,
  
• 
  олимпиадаяс,
  
• 
  конкурсъяс,
  
• 
  интеллектуальнöй марафонъяс,
  
• 
  викторинаяс,
  
• 
  рытъяс, паныдасьлöмъяс.
  

2. 
   Коми кыв да литературалы сиöм вежон
   

«Коми кыв» да «Коми литература» кыдз велöдан предметъяс лоöны аслыспöлöсöсь велöдан материал серти. Ми олам Коми республикаын, кöні кык государственнöй кыв – коми да роч. Чайта, ставöн воаныд мекöд öти кывйö сы серти, мый роч кыв бергалö ми олöмын ёнджыка (учреждениеясын, СМИ-ын, интернетын и с.в.). И та серти миян чужан коми кывным кольö ёна бöрö. Кöть эськö сиктса челядьыс кызвыннас сёрнитöны комиöн, мöвпалöны комиöн, век жö роч кыв тöдчö и на вылö, торйöн нин тайö ёна петкöдчö сочинениеясын. А нöшта коми кыв тöдöмыс челядь чайтöм сертиыс оз ковмы налы олöманыс, сы вöсна мый абу сылы практическöй применениеыс. Ас урокъяс вылын ме кыдз верма зіля лэптыны коми кывйыслысь тöдчанлунсö и тшöтш петкöдлыны, мый коми кыв – тайö не сöмын мöда-мöд костын сёрни, но и аслыспöлöс культура, коді ас пытшкас шымыртö зэв уна тор.

Коми кыв да литература велöдан предметъяс топыда йитчöны и мукöд велöдан предметъяскöд, сідз тшöкыда урокъяс вылын ме челядькöд шыöдчывла историяысь, географияысь, биологияысь, музыкаысь, ИЗО-ысь тöдöмлунъяс дорö (дерт жö, Коми му тöд вылын кутöмöн). Та вöсна ас велöдан предмет серти внекласснöй вежон дасьтігöн думышті йитны став Коми мукöд йитчысь велöдан дисциплинаяс и нимті коми кыв да литература вежон – Коми национальнöй культуралы сиöм лунъясöн (ачыс нимыс нин индö сы вылö, мый сёрниыс мöдас мунны оз сöмын кык велöдан предмет йылысь). Тайö сетö позянлун петкöдлыны коми кыв да литературалысь став озырлунсö, а сідзжö чужтыны интерес велöдчысьяслысь велöдан дисциплинаяс дорö.

Коми национальнöй культуралы сиöм лунъяс котыртан удж дырйи тöд вылö босьта кутшöм класса велöдчысьяс пырöдчасны уджö, кадсö, кодöс индöма вежон нуöдöм вылö, класснöй руководительяслöн прöстлун. Ыджыд ин босьтö мероприятиеясö пырöдчöмö ышöдöм да школасö колана ногöн оформитöм-мичмöдöм.

Коми национальнöй культуралы сиöм лунъяс миян школаын нуöдсьöны тöв шöрнас. Воддза воясö нуöдлi мероприятиеяс вежон чöж. Таво нюжöдi став тöлысь вылö. Öти-кö, эм та выö позянлун – тайö тöлысьö некутшöм мукöд мероприятиеяс оз нуöдны; мöд-кö, зэв сьöкыд Выль во бöрти сизим лунöн нуöдны уджсö – челядьыс век на шойччöны; а быдса тöлысьнас эм бур позянлун качественнöя да унджыка нуöдны мероприятиеяс став тшупöд вылын: дошкольнöй группаын, начальнöй, шöр да вылыс тшупöда классъясын.

Коми найиональнöй культуралы сиöм лунъяслöн темаяс воысь воö торъялöны (Содтöд 1-2), подувнас босьтчöны тшупöда пасъяс, матысмысь праздникъяс, тöдчана лоöмторъяс.

Коми национальнöй культуралы сиöм лунъяс дасьтысьöны водзвыв (тöлысь – тöлысь джынйöн). Нуöдан мероприятиеясысь афиша–план лöсьöдчö ыджыд кабала вылö гырысь мича да югыд шыпасъясöн, öшöдам сiйöс фойеын.

Сiдз жö водзвыв котыртам комиссия лунъяс нуöдöм серти, кöнi индам мероприятиеясысь веськöдлысьясöс, урчитам уджалан план, арталам, уна-ö ковмас приз, грамота да дасьтам-лöсьöдам найöс. Сэки жö лöсьöдам уджъяс видлалан-донъялан жюри (сэтчö пырöны ог сöмын велöдысьяс, но и челядьлöн бать-мамныс да общественнöй организацияысь войтыр). Зэв топыд йитöд коми культура лунъяс нуöдiгöн кутам школаса да сиктса библиотекаръяскöд, накöд öтвылысь дасьтам мероприятиеяс, небöгъяслысь выставкаяс, стендъяс, компьютернöй презентацияяс, класснöй часъяс, библиотечнöй часъяс и с.в.

Коми культура лунъяс быд во восьтам торжественнöй построениеöн, кöнi велöдчысьяс лыддьöны Коми мулы сиöм кывбуръяс, юргö Коми республикалöн кып, петкöдам дöрапас. Коми литература велöдысь тöдмöдö велöдчысьясöс нуöдан мероприятиеясöн, быд класслы разöдöны конкурснöй заданиеяс (плакат лöсьöдöм, презентация дасьтöм, кроссворд думыштöм и с.в.).

Тайö лунсянь и вежон помöдз фойеын öшалö гырысь шыпасъяса гижöд: «Коми национальнöй культуралы сиöм лунъяс». Фойеын оформитöма и торъя стендъяс (быд во разнöйöсь): «Петiм öти вужйысь» (финн-угор войтыр йылысь), «Коми кухня», «Удора сьöлöмшöрöй» (Удораса гижысьяс йылысь), «Тöвся вöтъяс» (Тöвся кадлы сиöм кывбуръяс), «Небыд, мича, гора» (Коми кывлы сиöм кывбуръяс) «Ме радейта» (Радейтчöм йылысь кывбуръяс) (Сöдтöд 3), «Удорские заповедники», «Города Республики Коми», «Ожерелье Удоры», «Коми Край в Отечественной войне 1812 года».

Стенъяс öшöдалам и школаса коридоръястi.

Фойеын öшöдам быдсикас викторинаяс, кроссвордъяс, конкурсъяс условиеясöн да сдайтан кад урчитöмöн. Школаса библиотека дорын оформляйтам небöгъяса выставка да öшöдам «Муса коми кывйöн уна небöг лыддям» акция нуöдан плакат.

Став синмöн аддзана материал кыскö велöдчысьясöс ас дорö, ышöдö пырöдчыны öтувъя уджö, паськöдö тöдöмлунъяс да пестö сьöлöмын и юрын муслун чужан кыв дорö да сы йылысь унджык тöдмавны кöсйöмсö.

Коми культуралы сиöм лунъяс помын котыртчö ыджыд мероприятие – гаж (Содтöд 4), кöнi вöчсьö кывкöртöд став удж серти, пасъям да чолöмалам конкурсъясын вермысьясöс. Пырджык зiлям, мед призъяс да грамотаяс шедöдiсны унджыкаöн, и дзик быд класслы вичмылö коллективнöй грамота да козин.

Коми культура лунъяс дырйи зiлям шымыртны дзик став велöдчысьясöс да классъяс. Огö вунöдö и дошкольнöй группаö ветлысь челядь йылысь. Налы вöзйылам серпасалысьяслысь конкурс (таво вöлi «Менам чужан сиктöй» тема серти), нуöдам коми мойдъяс лыддьысян часъяс, петкöдлам инсценируйтöм мойдъяс да висьтъяс. Татшöм торъяссö ичöт челядь ёна радейтöны да окотапырысь видзöдöны, овлö, мый и асьныс зiльöны пырöдчыны творческöй процессö.

Быд классын нуöдам торъя мероприятие: конкурсъяс, ворсöмъяс (Содтöд 5), беседаяс, викторинаяс, класснöй часъяс (Содтöд 6) нималана йöзкöн аддзысьлöмъяс. А нöшта нуöдам школаса тшупöд вылын 5-11 классъяс пöвстын олимпиада (Содтöд 7), кöнi участвуйтöны став окотитысьяс. Олимпиаднöй уджъяс тэчсьöны кыдз кокни заданиеясысь (медым быд велöдчысь кылiс ас пытшкас верман вынсö да ышöдiс асьсö сьöкыджык удж вöчöм вылö), сiдз и сьöкыдджыкъясысь, кöнi колöны содтöд тöдöмлунъяс. Олимпиадаын вермысьясöс пасъям грамотаясöн да призъясöн. 9-11 класса велöдчысьяс, кодлöн лоины медыджыд результатъяс дорйöны школалысь ним коми кыв да литератураысь районнöй олимпиада вылын.

Коми кыв да литература кабинет бердын эм неыджыд музейнöй экспозиция. Коми культуралы сиöм лунъяс дырйи котыртам да нуöдам ичöт класса велöдчысьяслы экскурсияяс (Содтöд 8), кöні экскурсоводъясöн лоöны гырысь класса велöдчысьяс. Музейнöй экспозиция артмö некымын юкöнысь: «Коми сёян-юан дозмукъяс», «Коми нывбабалöн XIX-öд немся паськöм», «Пöчö кудйысь», «Вöралан да кыйсян кöлуй».

Сідзкö, коми предметнöй вежон паськöдö велöдчысьяслысь тöдöмлунъяс торъя дисциплинаяс серти, сетö позянлун петкöдлыны асьсö творческöя, чужтö да вынсьöдö муслун чужан кыв да чужан му дорö, а сідзжö отсалö гöгöрвоны ас водзын сувтöдан мог, ведöдан уджлысь шöр визьяс, öттшöтшъяяскöд да велöдчысь костын йитöдъяс, корöмъяс ас удж дорйöм кежлö, донъявны артмöмсö, корсьны да аддзыны асшöра колана материал.


Бöркыв

Предметнöй вежон кыдз внекласснöй удж форма босьтö ыджыд тöдчанлун челядьöс велöдöмын-быдтöмын, сійö сетö позянлун вöдитчыны уна пöлöс методöн. Уджыс котыртчö медся ас дінö кыскана формаясöн: ворсöмъяс, конкурсъяс, эрудитъяслöн вермöмъяс, рытъяс да рытпукъяс, КВН-яс и с.в.

Коми национальнöй культуралы сиöм лунъяс лоöны аслыспöлöсöсь сы боксянь, мый найö öтувтöны торъя арлыда велöдчысьясöс и сетöны позянлун налы сöвмöдны познавательнöй да творческöй сямлун. Мероприятиеяслöн татшöм формаяс паськöдöны велöдчысьяслысь кругозор, чужтöны коми кыв да литература дорö муслун, отсалöны аддзыны выль ёртъясöс, сетöны слаба велöдчысьяслы эскöм ас вынъясö. А велöдысь татшöм мероприятиеяс нуöдігöн казялö-аддзö енбиа челядьсö, кодъяскöд водзö колö нуöдны удж торъя нырвизьті.

Дерт, татшöмсяма вежонъяс нуöдігöн велöдысь видзö зэв уна кад материал корсьöм-дасьтöм вылö, мероприятиеяс котыртöм да нуöдöм вылö, да и велöдысьлы аслыс колö мыйтакö лоны режисёрöн, сценаристöн, актёрöн (творческöй мортöн). Но став сьöкыдлунъяс вылö видзöдтöг уджыс лоö коланаöн. Информационнöй технологияясöн вöдитчöмыс паськöдö велöдысьяслысь позянлунъяс вöдитчöм материал да форма серти, занятиеяс лоöны яркöйджыкöсь, увлекательнöйджыкöсь, сьöлöмкылöмъяс серти вынаджыкöсь. Коми культуралы сиöм лунъяс сöвмöдöны велöдчысьяс пöвстын коми кыв да литература велöдан предметъяс дорö интерес.

Коми культура предметнöй вежондырся уджыс сöвмöдö гöгöрвоöдан, юöртан, котыртан, сёрнитан писькöслун да кужанлун:

• 
  гöгöрвоны ас водзын сувтöдан мог, ведöдан уджлысь шöр визьяс, öттшöтшъяяскöд да велöдчысь костын йитöдъяс, корöмъяс ас удж дорйöм кежлö;
  
• 
  аддзыны помся уджсö да висьтавны сы йылысь;
  
• 
  пöртны стöчмöдöмъяс водзвыв вöчöм уджö;
  
• 
  донъявны артмöмсö;
  
• 
  корсьны да аддзыны асшöра колана материал;
  
• 
  подула видлавны артмöмсö да уджлысь быд тшупöдвывса мытшöдъяс.
  

Ме думысь, коми кыв да литературалы сиöм вежонъяс колö сöвмöдны, котыртны да нуöдны школаясын, медым петкöдлыны чужан кывлысь коланлун, озырлун. Такöд йитöдын лыддя коланаöн водзö нуöдны удж тайö тема серти, медым водзö кежлö паськöдны вежонся мероприятиеяс аслыспöлöс методикаяс да формаяс боксянь.

1. 
   Шондібана оландыр «Оланноглöн коми сер» республикаса конкурслöн гижöд чукöр. Сыктывкар, 2007. 200 л.б.
   
2. 
   Коми муын – коми гаж «Оланноглöн коми сер» республикаса конкурслöн гижöд чукöр. Сыктывкар, 2006. 320 л.б.
   
3. 
   Новикова Л. И. Педагогика детского коллектива: Вопросы теории. - М., 1978.
   
4. 
   Ильин Е. Н. Путь к ученику. - М., 1988.
   
5. 
   Обучение и развитие / Под ред. Л.В.Занкова.-М., 1975.-С. 49-55.
   
6. 
   Стефановская Т.А. Педагогика: Наука и искусство. - М., 1998. -С. 141.
   
7. 
   Педагогическая энциклопедия: В 4т.-М., 1964. Т. 1. С. 340-346
   
8. 
   Виды внеклассной работы по русскому языку/ Сост. М. М. Морозова – М.: - Просвещение, 1968 -273с.
   
9. 
   Внеклассная и внешкольная работа по русскому языку и литературе в национальной школе/ Под ред.К.В.Мальцевой, М.Н.Борисовой.- М.: Просвещение,1982.-185с.
   
10. 
    Воспитание творческого читателя: Проблемы внеклассной и внешкольной работы по литературе / Под ред. С.В. Михалкова, Т.Д. Полозовой. - М., 1981.
    
11. 
    Щукина Г.И. Активизация познавательной деятельности в учебном процессе / Г. И.Щукина.- М.: Просвещение, 1986-126с.
    

1. 
   http://festival.1september.ru
   
2. 
   http://www.eidos.ru
   
3. 
   http://edu.tatar.ru
   
4. 
   http://www.prodlenka.org
   
5. 
   http://metodsovet.su