С: Ислам дініндегі оразаның үкімі қандай?
Ж: Рамазан айында ораза тұту балиғат жасына
толған, ақыл-есі түзу, дені сау әрбір ер және әйел
мұсылманға парыз. Алла Тағала Құран Кәрімде:
«Әй, мүміндер! Сендерге бұрынғыларға парыз
қылғандай ораза парыз қылынды. Әрине
сақтанарсыңдар», – деген. (Бақара, 183). Рамазан
айынан басқа уақытта тұтылған ораза ерікті болып
есептеледі. Мұнан өзге тұтуға міндетті ораза түріне
нәзір етіп, бірақ уақытында тұта алмаған ерікті
оразаның қазасы ғана жатады. Ораза араб тілінде
саум деп аталады.
С: Саум яки ораза сөзінің анықтамасы қандай?
Ж: Саум араб тілінде барлық нәрседен тыйылу
деген мағынаны білдіреді. Ал шариғаттағы мағынасы
таң атқаннан күн батқанға дейін ораза ниетімен
ішуден, жеуден және төсек қатынасынан тыйылу.
С: Рамазан айында кімге ораза тұтпауға рұқсат
етіледі?
Ж: Алыс жолға шыққан жолаушыға, ораза
ұстаса ауруы асқынып кететін науқасқа рамазан
айында ораза тұтпаса болады. Бірақ кейін қазасын
өтейді. Ораза көп зарар бермейтін жолаушыға ораза
тұту абзал.
С: Жағдайларына байланысты ораза тұта
алмаған жолаушы немесе науқас қайтыс болып кетсе,
сол ораза мойнында қарыз болады ма?
Ж: Жоқ, қарыз болмайды.
С: Жолаушы еліне қайтса немесе науқас айықса,
оразаларының қазаларын тұтулары керек пе?
Ж: Иә, тұтуға міндетті.
С: Рамазан айында жолаушы мен науқастан
басқа адамға ораза тұтпауға рұқсат жоқ па?
Ж: Екіқабат әйел мен емізулі баласы бар әйелдер
өздерінің, балаларының денсаулығы үшін қауіптенсе,
ораза тұтпауларына болады. Бірақ кейін қазасын
өтеулері парыз.
С: Кімге ораза тұтуға рұқсат етілмейді?
Ж: Етеккірі келген әйел мен босанғаннан кейін
қан көрген әйел ораза тұтпайды. Өйткені етеккір мен
нифас қаны ораза тұтуға кедергі болады.
Достарыңызбен бөлісу: |
