Ад быдлаын (< роч); ад гуран скр., шс.; вакрамеш

Н. Конаков

Смилитöмöн нимтöны тунасян вöчöмторъяс нывбаба да мужичöй костын муслун чужтöм могысь. Паныд вежöртаса кидтыны ‘торкны радейтчöм, öтдортны’ кывйöн (< кид ‘öтдор, öтдортчысь’) пасйöны тунасян вöчöмторъяс öтдортöм, радейтöм торкöм могысь. Смилитны либö кидтыны вермö не сöмын тун, но и быд радейтысь либö вежöгтысь морт. Чайтлiсны, мый радейтысьясöс торйöдiгöн нывбабалы имитны вермöджык мöд нывбаба, мужичöйлы – мöд мужичöй.

Традицияа чайтöм-гöгöрвоöмъяс серти, мортлöн симпатияясöн позьö веськöдлыны сы вылö ас вылас веськöдöм либö вуджöр вылас, рöмпöштан пыр тыдалöм вылас либö сылы дасьтöм сёян вылö веськöдöм кывйöн, видзöдласöн либö урчитöм вöчöмъясöн. Позис смилитны и öттшöтш сёйигöн. Та вöсна верöс сайö петан арлыда нывъяслы эз тшöктывны сёйны йöз котырын, кöнi эмöсь гöтыртöм зонъяс, сы вöсна мый сэки гöсьтыс быттьöкö пырлiс горткотыр тэчасас. Пуксьöдны кö нывсö верöспуыслöн ай-мам керкаын пызан сайö да вердны чериöн, сiйöс позьö пыр кежлö кольöдны керкаас. Тадзи вöчлiсны верöспуыслöн ай-мамыс, медым нылыс сетас сöгласиесö корасигöн. Луз бердса комияс чайтлiсны, мый мустöм сайö петны öтдортчысь нылöс вермас отсавны смилитны бокысь воöм вöв бурдöдысь. Медым смилитны нывсö, вöв бурдöдысьыс пуксьылiс сыкöд орччöн да гусьöн кисьтыштлiс нылыслы чаяс ассьыс кода юансö. Видлiс кö нылыс туналöм юансö, то эз нин вермы öтдортчыны да кöсйысьлiс петны верöс сайö, кöть и эз кöсйы. Чайтöны, мый мортöс “мевйöдны” позьö и смилитан юанöн. Сiйöс дасьтылiсны пывсигöн яй бердö лясöм косьтöм кыдз пу корöсь коръясысь. Дасьтылiсны и торъя сёян. Шуам, куим лун да куим вой чöж сьöлöм бердын либö киняулын новлiсны нянь шöрöм. Чайтлiсны, мый артмас кö чöсмöдны сiйö няньнас радейтана мортöс, то сiйö быть кутас радейтны няньсö яй бердас новлысьсö. Смилитны позьö не сöмын ньылöм дукöн (“яй лов”), но и дулльöн. Зонъяс дасьтылiсны “муслун гöснечсö” тадз: разьлiсны кампет кыш, недыр видзлiсны кампетсö вомас, бöр гаровтлiсны кышас да чöсмöдлiсны сiйöн радейтана нылöс. Нывъяслы дасьтöм юмовторъяссö да сёянсö нимкылавны том зонъяс корлiсны пырджык тöдысьöс.

Зонмöс смилитöм могысь печораса нывъяс видзлiсны гортас ватлан. Ватлан бердас томнавлiсны кружка. Пыралiс кö керкаас радейтана зонмыс, нылыс восьтлiс томансö, гумовтлiс кружканас ватлансьыс ва да сетлiс мусукыслы. Юлiс кö зонмыс, то быть лолiс нылыслы жöникöн. Луз бердса нывъяс “томналöм ва” ватлансö сувтöдлiсны вой кежлö вольпась улас, медым вöтöн аддзысьлыны мусукыскöд. Вöтöн усьлöм зонсö позьö смилитны, пыр жö вöталöм бöрас кö чеччыны, мыссьыны да шуны колана нимкыв. Тунасигöн вöдитчылiсны символа рöмпöштан вежысьясöн. Шуам, сiдз шусяна “шабдi рöмпöштанöн” нывка вермис мевйöдны весиг сэтшöм зонмöс, кодi сы вылö оз весиг видзöд да ветлö мöдкöд. Луд вылын колiс пуктыны шабдiсö кытшö, медым йывъясыс вöлiны пытшкас, а вужъясыс ортсыын, да тшöктыны зонмыслы видзöдлыны тайö “рöмпöштанас”.

Смилитiгöн гусьöн имитлiсны мортыслы аслыс либö тöдмавлiсны сылöн кöсйöмъяс йывсьыс сылöн паськöм, кок туй либö ним пырыс, кодъяс вöлiны мортсьыс торйöдтöмторйöн. Шуам, зонлöн кок туй отсöгöн ныв вермис тöдмавны, радейтö зонмыс сiйöс али оз. Та могысь кок туйсьыс колiс босьтны му тор да сыкöд паныдасигöн гусьöн шыбитны мусö кок улö – тальччас кö зонмыс сiйö тор вылас, сiдзкö, радейтö. Эжватас зонъяс нылöс смилитöм могысь гижлiсны морöсас лыаöн либö сёйöн либö тэчлiсны бадь коръясöн нылыслысь нимсö да гожйöдчылiсны. Смилитлiсны и магия вына кöлуйöн. Емваса комияс чайтлiсны, мый ныв вермас мевйöдны зонмöс либö сылысь вуджöрсö, кужас кö йитны платтьöсö да зонмыслысь паськöмсö сьöд каньлöн магияа лыöн. Радейтчан магияын эм некымын лягуша лы судзöдан да вöдитчан сям. Нывъяс косьтылiсны лягушасö либö ув костö топöдöмöн кольлiсны кодзувкоткарö. Кор кольлiс сöмын лыыс, босьтлiсны мегыра лысö да зонкöд паныдасигöн гусьöн сюйлiсны сiйöс сылы пинжак зептас либö шапкаас. Мöд тöдмöсъяс серти, колiс дасьтыны кык мегыра лы. Кык лягушаöс – эньöс да айöс – пуктылiсны розя гырничö да нулiсны матыса кодзувкоткарö, а куим лун мысти перйылiсны колана лыяссö. Инмöдчывны кö öтинас мортлöн паськöмö, позьö мевйöдны сiйöс, а мöднас – кидтыны, кор дышöдас.

Радейтчöм торкöм подулын вöлiны тшöтш жö чайтöм-гöгöрвоöмъяс мортлöн сьöлöмкылöмъясöн гуся веськöдлöм йылысь сылöн вир-яй либö вуджöр пырыс. Шуам, зонсö нывъёрт дiнас вежöгтысь ныв вермас вайöдны найöс пиньö, сюяс кö мусукыслы зептас курöг сiт либö нидзулöс. Имитана вöлi и син вежöм. Жöник бöрйигöн либö верöс сайö петiгöн лёк сиöм могысь нывлöн пöдругаясыс вермисны имитны и сылöн оланiнлы: шуам, тшукöдлiсны нылыслöн ай-мам керкаас öшинь наличникас ем – “медым петiс чöрт сайö” (öшиньыс танi – син метафора). Чайтöм-гöгöрвоöмъясын кидтан магия йылысь позьö торйöдны гозъя кост олöм торкан вöчöмторъяс. Шуам, Эжватас комияс чайтлiсны, мый гозъяöс пиньö вайöдöм могысь колiс босьтны гöтырыслысь чувки, вöчны кык гöрöд (гöрöдъясыс пасйисны гозъясö) да керыштны чувкисö гöрöдъяс косттiыс. Горткотыр олöм торкны позис и кöм кöрттув чукöр отсöгöн. Та могысь кöрттувъяссö колiс кольны керкаас. Эз кö вермыны кидтыны гозъяöс, босьтлiсны налысь пернаяссö, чеглiсны, кöртавлiсны шабдi сунисöн да пуктылiсны вичко сись видзан дозйö (сись видзан дозйыс танi – горт метафора). Бур гозъя олöм киссьöм гöгöрвоöдлiсны öтдор нывбабалöн либö матыса эньрöдвужлöн лёк вöчöмöн. Кидтыны вермис быд ныв, но унджыкыс эз лысьтлы татшöмторсö вöчны, сы вöсна мый тадзикöн позис тшыкöдны бур нимтö, а сiдзкö и, пыр кежлö кольны пöрысь нылöн. Пырджык нывъяс шыöдчылiсны тунъяс дiнö (зонлы имитöм могысь) либö нывбаба-тунъяс дiнö (нывъяслы имитны).

Унджык смилитан вöчöмторсö позьö пыртны психотерапия техникаö, сы вöсна мый тайö символа вöчöмторъясыс отсалiсны сюрöдны психологическöй зумыдлун. Та боксянь петкöдланаöсь чайтöм-гöгöрвоöмъяс сы йылысь, мый вочакывтöм радейтчöмысь мучитчöмсö позьö бырöдны тшыкöдöм либö мöд висьöм моз жö. Та могысь шыöдчылiсны тöдысь дiнö, кодi урчитöм нимкывъяс отсöгöн бурдöдлiс “муслун висьöмсö”. Эжватас эскöмъяс серти, ныв вермис бурдöдчыны муслун висьöмсьыс öбвет крест дiнын, кöнi водзтi сулавлöма “Енмамлöн шемöса икона петкöдчылан юкмöс ваяс” вылö лэптöм вичко. Нылыс подöн мунлiс сэтчö, пуктылiс юр вылас крестбердса вежа из (гöгрöс нянь кодь еджыд из) да Вежа Енмамöс славитан кевмысянкывъясöн куимысь гöгöртлiс вежаинсö шондi ньылыд. Сэсся сылы колiс мыссьыны вежа юкмöс ванас.

Ёртъяскöд, рöдвужкöд либö тунасьны кужысь йöзкöд сёрнияс радейтчан магия йылысь сетлiсны мучитчысь мортлы лача да восьтлiсны сылысь сьöлöмкылöмъяссö мукöдыслы. Радейтчан магиялöн “гуся кывйыс” вöлi симпатия-антипатия мыччöдан сямöн да татшöм ногöн отсалiс ладмöдны котырпытшса да гозъякостса волысьöмъяссö.

Комияслöн чайтöм-гöгöрвоöмъяс серти, совлöн магияа выныс зэв ыджыд. Медся вынаöн вöлöма Ыджыд четвергсянь во чöж ен пельöсын видзöм сов. Сов видзöма пеж ловъясысь, сы отсöгöн бурдöдчылöмаöсь висьöмъясысь да тшыкöдöмысь. Пищальысь солöн лыйöмöн позис мынтöдчыны бесъясысь, а вöрсалы вöзйылöмаöсь ёны сола сёян. Сов да сир вурлöмаöсь ладанкаö да новлöмаöсь пернакöд тшöтш. Кагаöс медводдзаысь либö öтдор йöзлы петкöдлiгöн сылы юрлöманяс кисьтыштлöмаöсь сов. Тшыкöдöмысь видзчысьöм могысь совсö кисьтыштлöмаöсь и верстьöяслы юр вылас, кор найö паныдасьлöмаöсь тункöд либö ветлöмаöсь йöзаинö. Öтдор йöзлы йöв сетiгöн йöвсö öнöдз на солалöны, совсö крестöн-крестöн коялöны йöв дозъяс. Тшыкöдöмысь видзчысьöм могысь солöн коявлiсны кöлысясьысьясöс либö бокö нуöдан мöскöс. Вир сувтöдöм могысь удорасаяс шулiсны “вир – топ, яй – топ”, сьöлыштлiсны джоджö да кисьтыштлiсны дояс сов.

Торйöн имитанаöн вöлi нянь-сов öтувлун. Ачыс нянь-сов кывтэчасыс нин абу сöмын гöсьти корöм, но и шуд, тыр-бур олöм да дзоньвидзалун сиöм. Ньöбöм мöслы мыш вылас месаньяс шыбитлiсны ассьыныс вöньсö да вердлiсны сiйöс ки помысь сола няньöн. Висьысь мöслы сетлiсны нянь, сов да йöв. Комияслöн чайтöм-гöгöрвоöмъяс серти, нянь да сов йитчöны му вылын: “Нянь судзöдны – колö мусö солöн киськавны”. Нянь вылö нимкыв лыддигöн тунъяс крестöн вундылiсны кöрышсö да кисьтавлiсны вундöминас сов. Татшöм сяма öбрадъясын крестыс абу йитчöма кристос эскöма символикакöд. Сiйö гöгöрвосьö шондi пасöн, енэж символöн, кодкöд топыда йитчöма сов.

Мöдар боксянь, сов вылö видзöдласыс вöлi кык нога: гуляйтысь верöсыслы юр вылас гöтырыс гусьöн кисьтыштлiс сов, медым косöдны сiйöс. И мöдарö, невестаöс да жöникöс торйöдöм могысь сёйигöн гусьöн пуктылiсны на костö сов чепöль. Виччысьтöг сов кисьтöм вöлi лёк пасöн. Сэки колiс видзöдтöг койыштны шуйга пельпом вомöныд сов чепöль, а нöшта бурджык – биö да шуны: “Биö”. Совсö эз позь сетны уджйöзöн, сы вöсна мый солыскöд пö мунас и шудыд. Сетöм сов отсöгöн пö позьö тшыкöдны да с.в.

Совлöн вылi статус вылö индö и мифа утка-мам мыгöра сов доз, соландöг. Сов доз кындзи утка мыгöраöн вöчлiсны сöмын ритуал кöшъяс да сур яндöваяс. Сов доз быть вöлi кöлысь öбрадын, тшöкыда сiйöс сетлiсны приданнöй туйö да козьнавлiсны.

Литература: Плесовский 1968, Сидоров 1928, АЧМ.

О. Уляшев
СОЛОВЕЙÖС ПЕТКÖДÖМ – тулыс колльöдан öбрад.

Соловейöс петкöдöм вöлi паськыда тöдса сöмын емваса комилöн. Öбрадсö нуöдлiсны нывъяс да нывбабаяс Петыр видзö медводдза луннас. Öти нывбаба кышавлiс важ косясьлöм паськöм, мукöдыс ветлiсны сы гöгöр кытшöн да сьылiсны. Быд сьыланкыв бöрын кытшписа нывбабаыс копыртчылiс сьылысьясыслы. Сэсся сiйöс колльöдлiсны сикт сайö. Татшöм сяма жö тулыс колльöдан öбрадъяс вöлiны и рочьяслöн.

Тайö тувсов луна-воя öткузя кадся (астрономическöй тулыс заводитчöм) лунсö Русьын важысянь пасйылiсны няньшомысь ыбшаръяс пöжалöмöн. Кöнсюрö комияс тшöтш жö пöжавлiсны лэбачьясöс, но пырджык пöжавлiсны мукöдтор (соченьяс, шаньга да с.в.). Пызан вылö вайлiсны бытьöн нелямын пöжас. Челядь чуксавлiсны тулыс, вöчлiсны нелямын бедь, лыддьöдлiсны нелямын плешка мортлысь нимъяссö.