Лайпанов б. А

ГОСПИТАЛЬДА САГЪЫШЛА

Кемирселе да къайгъыла, сагъышла,

Алкъын саума, къууанама анга.

Къыйнагъан а – тенгле, танышла

Кетедиле, кетедиле, кетедиле.
Ызларындан къараб къалама аланы,

Къанаты сыннган къанатлы

Учуб кетген джыйыныны ызындан

Къарагъанча, сау къанатын къагъа.

Джанымдагъыла да аз бола баралла.

Ызымдан келген а, джокъну орнунда –

Олду эм бек къоркъутхан мени.

Ана тилибизни джашил байрагъын

Ким кёлтюрлюкдю тамбла ёрге?
Ата джуртну, Ана тилни къоя бизге

Нарт ата-бабала кетгендиле кеслери.

Ала бизге къойгъан Ана тилни, Джуртну

Биз а кимлеге этейик аманат?

Джашау, ёлюм да – хакъды. Алай а,

Не уллу къыйынлыкъды, бушууду

Ана тилинги ёле тургъанын кёрген.

Халкъ ангыламай аны,

Джакъламай, сакъламай, къатламай аны

Ёлтюре турады кеси кесин.

Не этейик, кърал да бизлеге – джау.

Алай а, кеси кесибизни ёлтюре эсек,

Аллахха, адамгъа да салмайыкъ дау.

Ата джуртун да башхалагъа кючлете тургъан,

Ана тилин да кеси ёлтюре тургъан,

Бизден башха аллай халкъ болурму?

Интеллигенция да кёрмегенча, билмегенча этеди аны.

Аны бла къалса уа...

Алагъа – ол амантиш итлеге – салады махтау.

Аланы арбаларында барыр дыгаласда

Аланы джырларын кюрешеди джырлаб.

Оноучусу – оу, интеллигенциясы – шау.

Эм ахырында кёзюм бурулады кесиме:

Джашаугъа, ёлюмге да ачхан эшик,

Сен кесингсе, халкъым, эшит.

Сатлыкъ интеллигенция да сеникиди.

Джашайым десенг – джашарыкъса халкъым,

Ёлейим десенг – анга да джол бош:

Джуртсуз, тилсиз да къал.

Дини, тили, джурту ючюн ёрге турмагъан халкъ,

Хакъы ючюн кюрешмеген, сермешмеген халкъ

Дуниядан болады талкъ.
Тарих – эсингдеди. Сайлау – кесингдеди.

Джашаугъа, ёлюмге да ачыкъды джол.

Сау къал, халкъым. Аллахха аманат бол.

КЪАЛАМГЪА БУРУЛГЪАН КЪЫЛЫЧ

«Хакъ» деген адамны

Кёлю батырды, джюреги кенгди.

Бюгюн Назир Будайны

Къаламы

Татаркъанны къылычына тенгди.

Назирни къолуна тутдургъанды къадар:

«Бу сауутха сени тыйыншлы кёреме,

Эт,- дегенди,- халкъынга мадар».

Къурч къалам бла джазгъанды Будай.

Сёзню айталгъаны ючюн хакъ кертисин –

Аны джолун джарытханды джулдуз бла Ай.

Тарих къаланы сюегенди ёрге.

Минги Тау да, Минги таулула да разылла

Халкъ джигити Будайланы Назирге.

Исмайыл Мызы тюб ташларын салгъан къала.

Ма ол къаланы къабыргъаларын ёсдюргенди

Назир – Будай тукъумдан джигит туугъан улан.

Мен да – бурундан келген тёрени бузмам.

Татаркъанны къылычыды бюгюн

Назир Будай къолунда тутхан къалам.

Кертини айырыб ётюрюкден.

Анга – сайланнган адамгъа – берилгенди

Къурч къалам, къылыч къалам ёмюрлюкден.

Керти тарихчи, джазыучу болалмаз.

Керти адам, тюз адам – ол Хакъ адамыды,

Хакъ адамы болмагъан Эл – тюб болмай къалмаз.

Тукъум, сыныф, халкъ, кърал ючюн кюрешген адамла.

Алай а, джарым адамладыла ала бары.

Керти адам, толу адам – Хакъ адамыды джангыз.

Атагъа-анагъа да тюл, эгечге-къарнашха да тюл,

Бир Аллахха – Хакъгъа-Кертиге-Тюзлюкге –

Къуллукъ этиудю баш борчу адамны.

Джан басыуду бизни чынгылгъа элтген.

Джангыз Керти бла, Тюзлюк бла – Хакъ бла джашау,

Олду бизни Адам этген, Халкъ этген.

Хакъгъа къуллукъ этеди Назирни къаламы.

Алай бла джарайды адамгъа, халкъгъа, къралгъа да,

Аны ючюн уллуду магъанасы, дараджасы да аны.

Хакъ адамы Будайланы Назир,

Хакъ джолунда баргъан тарихчи,

Халкъ, инсан хакъларын джакълагъан тарихчи.

Бурундан келген тёрени мен да бузмам.

Акъ къылычды, Хакъ къылычды бюгюн

Назир Будайны къолунда къалам.

ДЖЮРЕК БЛА АНГЫНЫ КЪАЗАУАТЛАРЫ

Алгъын джюрек айтханны этмей къойгъаным ючюн,

Энди мен айтханны этерге унамайды джюрек.

Алгъын джюрек сюйгенни алмай къойгъаным ючюн,

Энди меннге, кесине да тынгы бермейди джюрек.
Излейди – джашаргъа тюл, – ёлюрге,

Къазакъ бёрюча турады улуб.

Сюйгенин табаргъа излейди джюрек –

Биягъы Намыс бла Ангы болалла буруу.

Сюйгенден, кюйгенден джарылады джюрек –

Ёлтюреди кесин да, мени да.

Мыдахлыкъ кючлейди Джерни да, Кёкню да –

Джюрек сюйген сеземиди экен аны?

Намыс бла Ангы джюрекни сюйгенине иймей,

Тыядыла. Джюрек а, джюрек,

Сюйгенине тарала джашагъандан эсе,

Ёлюмню сайлайды – джарылады джюрек.

Мен джюрекден бошадым, джюрек да – менден.

Не ючюн ёлгенибизни киши да билмез.

Бизни джашатхан Сюймекликди,

Сюймекликди ёлтюрген да бизни.

Ангыгъа бойсунмагъан джюрек,

Джюрекге тынгыламагъан Ангы,

Граждан къазауатны отунда

Кюйдюле, ёлдюле, кетдиле экиси да.

жүктеу/скачать 2.02 Mb.

Достарыңызбен бөлісу: