Сюймекликге харс экитомлукъ лирика назмула

1. ДЖАШАУГЪА КЪАЙТАРГЪАНСА МЕНИ

Таянама Ташха, Терекге.

Суугъа, таугъа, чегетге къарасам,

Рахатлыкъ келеди джюрекге.

Тюзледен таулагъа ёрлетгенди мени.

Тургъанлай, адамдан, джашаудан да суууб,

Мийикден къараб кёргенме Сени.

Джуууна тура эдинг Сен.

Кюлюб сууну чачханынг сайын,

Джанкъылычла къура эдинг Сен.

Энгишге салынырым келди.

Къутхарыр ючюнмю мени къайгъыдан

Кёрюннген болур эдинг Сен?!

Адам да менича тюрленнген (нюрленнген!) болуред:

«Керти джандет меннге Сенсе»,- деб,

Хауаны артыкъ да сюйген болуред.

Алай а, сюймей, не этейим Сени?

Кёзкёрмезден мёлекча чыгъыб,

Джашаугъа къайтаргъанса мени.

Ол кюн-суу секиртмени тюбюндеча,

Сезим-сёз секиртмеми ичинде

Нюр чача, кюле, ойнай,

Сансыз-санаусуз джылланы

Сакъланныкъса халкъны эсинде.

Адамгъа, джашаугъа, къадаргъа да

Дау айта тургъанлай ичимден,

Бир да ажымсыз, мени ассылыкъдан

Къутхарыр ючюн кёрюннгенсе Сен.
Таубагъа къайтаргъанса мени,

Джашаугъа къайтаргъанса мени,

Шийирге къайтаргъанса мени,

Тынгысыз сабырлыкъ бергенсе –

Сюймезге боллукъмуду Сени?
Кераматча ачылгъанса меннге,

Кёкден, кёлден да кетгенди булут.

Джюрекге къайытыб, бегигенле

Иман, Сюймеклик эмда Умут.

Бергенди, билдиргенди Кёк.

Игилик-Тюзлюк ючюн сермешир ючюн

Джангыдан тирилгенди джюрек.

Алай а сюймезге боллукъмуду Сени?

Чыкъгъан джанымы ызына къайтаргъанса,

Джашаугъа къайтаргъанса мени.

2.ТАБИГЪАТХА КЪАРАСАМ
адамладан арысам,

таянама Ташха, Терекге.

Суугъа, таугъа, чегетге къарасам,

Джерге, Кёкге къарасам,

Бир тюрлю сезимле келелле джюрекге.
Бир Аллах джаратханды бизни –

Джанлы, джансыз, таша, туру табигъатны барын.

Джокъдан джукъ бола, джукъдан джокъ бола,

Джашайбыз-ёлебиз-тирилебиз.

Сабий тилибиз, тинибиз, динибиз да – Олду.

Джангылай, джашлай, джашиллей тургъан

Бизни эски джуртубуз, биринчи джуртубуз – табигъатды,

Ахыр юйюбюз, ахыр джуртубуз да – Олду.
Аны ючюн болурму бир-бирде

Адамладан, халкъдан эсе,

Ата джурт кесине бегирек тартханы?!
Таш, Терек, Суу, Къая, Тау,

Кийикле, къанатлыла,

Кёк, Джер, Ай, джулдуз – бары да

Эм узакъ, эм джууукъ джууукъларыбыз тюлмюлле бизни?

Бизни сакълаб тургъан эски джуртну

Келечилерича эшитилмеймилле?
Сен – Терек, мен – Адам, ол – къанатлы...

Къанатлы учады, адам джюрюйдю,

Сен а, Терек, бир джерден тебмей, ёсесе.

Сени тилинги эшитген, ангылагъан да джокъду.

Алай а, барыбыздан да онглуса сен –

Сен бизге солургъа хауа бересе.

Терек джашатады адамны.

Билген, ангылагъан аны

Кесин табигъатдан баш кёрюрмю?

Терек да, адам да, къанатлы да

Табигъатны балаларыбыз.

Бир-бирибизден не онглу, не акъыллы тюлбюз.

Хар ким кесича онглу, акъыллы.

Алай а, бары да хайырлылла адамдан.

Адамдан заранлы джан джокъду табигъатда.
Адамладан арысам,

Таянама Ташха, Терекге.

Суугъа, таугъа, чегетге къарасам,

Джерге, Кёкге къарасам,

Бир тюрлю сезимле келелле джюрекге.
3. ТАБИГЪАТ
Сёз бла айтылмазлыкъ, айтылынмазлыкъ зат –

Табигъат деген олду.

Сёзню, тилни кючю джетмеген чекде

Башланады ол.

Ол кючлюдю сёзден.

Ол тюрлендиреди бизни.

Ол тюрлендиреди сёзню.

Аны кеслерини джорукъларына бойсундурургъа излегенле –

Артда сокъуранмай къалмагъанла.
Табигъатха

Не бий, не къул болургъа излеме.

Анга тынгыларгъа, аны ангыларгъа кюреш.

Андан чыкъгъанбыз, анга къайытырыкъбыз.

Ол бир кесекге бошлагъанды бизни.

Не мурат бла? Ким биледи.

Бизни тышыбыздан, ичибизден да къараб турады.

Андан къутулургъа джокъду мадар.

Къутулуб да барлыкъса къайры?

Ансыз джукъ джокъду.
Ёзге, табигъатны кесине бойсундурургъа,

Андан баш болургъа излейди адам.

Джазыкъсыннган да этеди аны.

Биз билмегенни биледи ол.

Анга тынгыларгъа, аны ангыларгъа кюрешейик.

Акъ дунияны сакъ къызы Ра... бла

Боллукъмуду экен джазыуум мени?

Огъесе,

Апсатыны къызына да ушагъан

Фа... бламы байларыкъса мени?
Назмула бла салсам да таш,

Сорууума табмадым джууаб.

Бирин онг джаныма,

Бирин да сол джаныма салыб,

Джашаргъа излей эдим алай.

Экиси – экиге бёлюннген джюрегим,

Экиси – мен бирча сюйген эки сюйгеним.

Экиси – эки къанатым,

Кёклеге учхан санатым,

Къууаныр, ачыр сагъатым.

Бирини да гюнахына кирмез ючюн,

Экисинден да къалдым къуру.
Ючюбюз – ючгюл бир дуа,

Поэзияны бойнунда турлукъ,

Поэзияны сакълаб турлукъ.

Хоу,

Ючюбюз – ючгюл бир дуа.

Экинге да этеме сагъыш,

Экинге да этеме алгъыш:

Джазыгъыз-джайыгъыз насыблы болсун, узакъ болсун,

Сизге ёмюрде да келмесин къыш.
Джуртда къалгъан къанатларым,

Бюгюн сизни тюшюреме эсге.

Мёлеклени айта атларын,

Гюнахлы кесими санайма терсге.

Адам кеси кесин этеди джарлы.

Тюзелирча тюлдю джангылыч.

Джазыуум – эки юзюлген джангкъылыч

Башында чынгылны, джарны.
Алай а, сиз барсыз – мен саума.

Дунияда сизден ариу джокъду бир джан,

Джандет джуртубузгъа сизден тыйыншлы джокъду бир джан,

Сюймекликге, насыбха сизден тыйыншлы джокъду бир джан.

Джашауну, поэзияны да джаны, бети, сыйы да – сиз.
Сиз джашагъан дунияды меннге керти дуния.

Сиз джашагъан дунияды – сейир, аламат.

Сизни Аллахха этеме аманат.
Мындан, джалгъан дуниядан, сизни таба къараб,

Кёб затха тюшюнеме, сокъуранама, ойланама.

Сизни юсюгюзден этеме сагъыш.

Къадарыбызгъа этеме сагъыш.

Джаш джырчыгъа

Джашил ырджыда

Акъ чакъгъан балий –

Мюйюшде сюелген

Келинчикча кёрюнеди

Ау джаулугъу бла башында.
2

Арабызда чекде, ырджыда

Джазгъы сезимледен Акъ чакъгъан Терек.
Эки джанында бачхала,

Сюрюлюб, тырнау салыныб,

Баразала тартылыб,

Урлукъ атарча болгъанла.

Бир-бирин сюрюб ойнагъандан, тебсегенден талсала,

Ырджыда акъ чакъгъан Терекге къонуб,

Ийнар айтышыргъа кёчелле.

Сызгъыралла, джюуюлдейле, джырлайла. Ала бла бирге

Терек кеси да джырлагъанча кёрюнеди.

Мылы джер, Кюннге тынгылаб, тютюнлейди.

Излейди ол тирилирге, тилленирге, джашаргъа, джашнаргъа да.
Къарайма

Джашил ырджыда Акъ чакъгъан Терекге.

Урлукъ сакълаб тургъан къара сабаннга да

Къарайма. Сен да къарайса алагъа.

Бир къайгъыбыз, сагъышыбыз джокъду.

Алаймыды?
СЁЗЮН ТАС ЭТГЕН ШАЙЫР
Заманында тюшюрмей къагъытха,

Бир сёзню, бир тизгинни тас этдим.

Малын тас этген

Аллай бир къыйнала болмаз.

Сансыз этдим да ансыз къалдым.

Къыйналдым:

Андан башланныгъед назму,

Огъесе, бир джангы дуния, джашауму башланныгъед андан?
Сёзюн тас этген шайыр,

Чапракъсыз къалгъан терекге тюл,

Терексиз къалгъан чапракъгъа ушайды.
АКЪ ДЖУРТНУ АКЪ КЪЫЗЛАРЫНА АКЪ НАЗМУ
Шимал тенгиз кёлтюрюлюб ёрге,

Буз, къар болуб джауады джерге.

Былайы – джашауу, адети, тили да –

Меннге бютюн зорду, къыйынды.
Алай а,

Бу тенгиз къушла да, викинг къызла да

Кёзюме кёрюнелле ариу;

Сёзюме да берелле къарыу.

«Къара терили бир къарт болсам да мен, –

Дагъыда, къаджыкъмай, талмай, –

Орус тилге юренир эдим мен,

Ол тилде сёлешгени ючюн Ленин».
Огъай, Маяковский джолдаш, огъай.

Мен бир тышкъраллы тилге юренник болсам,

Ол тилде джюуюлдеген ариу къызла бла

Сёлешир ючюн, юренникме джангыз.

Чам этсем да, къонакъгъа чакъырсам да, кюрешмейле къызарыб.

Чалдырыб сёлешгениме тынгылайла ышарыб.

Хахай этгенле тенгиз къушлалла къуру:

Сакъ болугъуз, алдатырсыз кесигизни,

Назмуларына да бёлмегиз эсигизни –

Сакъланыгъыз аны аууна тюшгенден...».

Ауузугъузну таш бла, аш бла да джабарым келмейди.

Этмегиз да быллай бир къалабалыкъ,

Тенгизге барыгъыз: андады сизни ашыгъыз – чабакъ-балыкъ».

Тенгиз къушла зарланалла, чамланалла,

Джулуу алгъанлай а – шох болалла, рахатланалла:

Тёгерек – шош, джол да ачыкъ болады.

Бу халкъны кёлюн-джюрегин ангылар ючюн,

Сюймеклигими, разылыгъымы да айтыр ючюн.
Тенгиз толкъунла шын-шын туруб келелле –

Сезимлериме, сёзлериме да ушайла ала.

Узакъда таула да агъарыб сюелелле –

Джуртха къайытырымы сакълайла ала.

Викинг джуртха ургъанма къазыкъ,

Викинг къызны къачыргъанма базыб.

«Акъыллыдан тели зауукъ» деб,

Джангыдан башлагъанма джашаб.
Бир да ажымсыз, джазыуум сюрюб,

Джангы дуниягъа терезе, эшик ачар ючюн,

Нарт джюрегими да викинг къызгъа ачар ючюн,

Келген болурем, эшда, мен бери.

Гяхиник уруб тебрегенди джерге.

Санатлы, къанатлы, джанатлы да сёзюм

(Сан атлы, къан атлы, джан атлы сёзюм)

Кёлтюрюлгенди джашнай тургъан Кёкге.
Эслери кёкге кетиб, малла да

Эриниб узалалла биченнге.

Кийик заманларын эсге тюшюрюб тансыкълай, ала да

Базладан, арбазладан турадыла ёкюре.

Силкинеди, тириледи.

Джаз келеди, Кёк, Джер да джашнай.

Ким биледи, ёлгенле да бир кюн алай,

Джан кириб, силкиниб турлукъ эселе да ёрге.
Мал ёкюрген, къой мангырагъан, ат кишнеген,

Ит чабхан, адам тауушла чыгъалла ёзенден.

Джазгъы хауады бу къалабалыкъны этген –

Джаз кючлюдю, къууатлыды, берекетлиди бизден.

Джашаугъа къайытдым. Унутдум ахратны.

Алай а бу кёзюуню тургъанча мараб,

Кёрдюм кюнбетге чыгъыб баргъан джамагъатны.

Джан кирген джерни, гяхиникни юсю бла

Къабырла таба бараелле адамла,

Бу джазгъы кюннге келишмейелле ала.

Не этейик, джашау, ёлюм да – хакъ.

Гяхиникни юсю бла, джазны ичи бла

Джаназыгъа ашыгъады халкъ.

Джанны берген, алгъан да – Аллахды.

Бютеу эл барады ашыра аны. Ол а – насыб.

Къара кюнню акълыгъыды ол.
Кёзюме кёрюнелле сюргюнде, тутмакъда, тузакъда

Ахлуларындан, джуртларындан да узакъда

Джаназысыз, кебинсиз къалгъан ёлюкле.

Бюгюн да къайдагъылары белгисиз ёлюкле.

Гюнахы къурурукъгъа сукъланнган да этдим:

Ким биледи джазыу къайры атар мени –

Къайда, къалай тюберме ахырыма?

Адам адамына, халкъына, джуртуна,

Тюзлюкге, эркинликге,

Джашаргъа не да ёлюрге

Термилирча берме къыйынлыкъ.
Къадардан тилейме:

Сау – ёлгеннге, ёлген – саугъа

Сукъланырча берме къыйынлыкъ.

Джашау, ёлюм да акъ

Кёрюнюрча бер насыб бизге.
Джазгъы кюн кёлюмю да джазды,

Бу назмуму да джазды.

Джангыз мен аны – сагъышымы дуниягъа, ахратха –

Тюшюрдюм къагъытха.

Тёгерек бура келиб,

Ичине, тереннге тартады бизни:

Шериат, уят да тыялмай,

Сюймеклик кёмеуюл джутады бизни.
Сюймеклик кёмеуюл джутса да бизни,

Къарагъаннга – небиз да ачыкъ:

Таша сезимле да болалла туру –

Сёзден, кёзден да къутулмазбыз къачыб.

Кюн, нюр толкъунлу джарыкъды ол.

Саныбызны, джаныбызны да

Ёрге, мийикге чыгъарады ол.

Къанатсыз джанладан айырады.

Джерде тургъанлай Кёкдебиз биз –

Джууукълашабыз джулдузгъа, Айгъа да.

Табигъатны эм ариу сезимлеринден.

Аны сёз бла айтхан, ангылатхан да къыйынды,

Музыка, сурат да кёлеккелерилле аны.

Джангыдан тууады дуниягъа адам.

Мен да сюймеклик кёмеуюлге кёмюле барама,

Чыгъаргъа, къутулургъа да излемей андан:

Дунияда Олду керти зат, къалгъан бары – джалгъан.
2

Сюймеклик кёмеуюлге тюшгенек бирге,

Учханек ёрге, чыкъгъанек тёрге.

Алай а мийиклик джарашмады сеннге,

Унутдунг – ким, не бергенин къанатланы бизге.
Сюймекликге уллу кёллю болдунг, ассы болдунг,

Аны ючюн Кёксюз, къанатсыз да къалдынг.

Тыялмадым сени –

Ибилисча, атылдынг, джыгъылдынг, тюшдюнг джерге.

Зардан, ачыудан къара кюйюб, къаргъыш айта, къарадынг ёрге...
Кёк кёмеуюлде джангыз кесим къалдым.

Сюймекликге тюз, керти болгъанлай къалдым.

Къанатсыз джанлагъа джазыкъсыныб къарадым,

Алагъа да къанат битер кюн келир деб, ийнандым.

Излеб турса учаргъа мадар,

Эртде-кеч болса да, анга

Къанатла береди къадар.

Тыйыншлы болмай, тёнгересе андан,

Экинчи къанатла битмезле анга –

Ол, джер тырнай, кетер дуниядан.

Кёб кюрешдим къутхарыргъа сени:

Мен сени тартыб ёрге,

Сен а мени тартыб джерге –

Кёб заманны барды къазауат.
Сеннге къанат битеринден тюнгюлдюм.

Эки сайлау берилди меннге да:

Не – мийик кёкде джангыз кесим къалыргъа,

Не – къанатсыз болуб сеннге къошулургъа.

Кимге да битеди къанат.

Алай а, кёбюбюз артда

Къанатсыз къалырча ишле этебиз.

Мен да аладан болалыр эсем а...

Къанатсызлыкъны, къанатсызланы да сыйламай, сайламай,

Джангыз къала эсем да, къанатларым бла къалама.

Кёксюз, къанатсыз къалгъаннга,

Бу къанат тюгюмю иеме Кёкден.
Ол сюймеклигимден хапар айтыр сеннге,

Кёб затны да тюшюрюр эсинге,

Кёб затха да кёзюнгю ачар,

Кёкге къаратханлай турур сени.

Кёкде, Джерде болса да,

Къадар энтда тюбетир бизни.
ЭНЧИ ДЖАЗЫУУН АДАМ ДЖАЗАДЫ КЕСИ
«Учакъгъа миннгенме. Къатымда орун бошду –

Бир мёлек къыз хоншу болур деб, этеме умут.

Алайгъа уа келиб, бир гебен олтурады –

Тёгерегин малла ашагъан бир хойнух гебен.

Кетген ёмюрден къалгъан бир гебен.

Гебен десем да – барыб тохтагъан алмасты.

Кёзлерими къысама – халымы билдирмез ючюн.

Солургъа хауа джокъду къатында.

Тиширыула бла мени насыбым тутмайд –

Джерде, кёкде да, тышында, юйде да»,-

Эслеб къарадым аны кесине, тиширыуларына да.

«Ушамагъан джукъмайды» деб,

Джашны джанына тийдим.

Алай а кертиге керти демей, не этгин?!
Гебенни заманында къоратмай, сыртда къоюб,

Маллагъа ашатхан эсек – кимдеди айыб?

Сен анга «гебен» дей, ол да сеннге «хамхот» дей,

Бир-биринги эркелете барасыз джашай.

Тыйыншлы болмасагъыз – тюбеген да этмезегиз.

Ким бла джашарын, къалай джашарын адам сайлайды кеси.

Энчи джазыуун адам джазады кеси –

Хайуан болмай, Адам эсе ол.
ДЖАЗЫУ
Толгъан Айгъа, тийген Кюннге

Ушаенг сен.

Акъ къаяда къызыл гюлча,

Джашаенг сен.

Къайдаса сен?

Акъ къарда къан тамчыла...

Къайдама мен?

Не Джер, не Кёк.

Акъ къаяда къызыл гюлге

Учду джюрек.

Къан ыз къарда.

Джашау-ёлюм – къыйын аууш,

Джанджурт къайда?

Къарайма мен.

Джашил Джерни, Акъ къаяны,

Акъ къаяда къызыл гюлню

Излейме мен.
Тынгы-тынчлыкъ бермейдиле

От бла джалын.

Кёк бла Джерни арасында

Тынгы-тынчлыкъ табалмайын,

Тас этгенин табалмайын

Учад джаным.

Бир Тиширыугъа тюртюлдюм орамда.

Эки ёшюню – эки бишген кертме...
Бачхада зырма битген кертме терек,

Эсиме тюшдю.

Энди ол Тиширыу кёрюнеди кёзюме.

Эки къолумда эки бишген кертме...

Не къысхады джашлыгъы, насыбы, ёмюрю да адамны.

Чыммакъ къарда сокъмакъ сала барама,

Мен барама джашил джазны аллына.

Къыз кёрюрге баргъан кибик барама,

Таб кесим да сейирсине халыма.
Истемейме къыйынлыгъын джолуму,

Джюрегим да – урад, барад джангызгъа.

Бара-бара, бир кюнбетде тюртюлдюм

Тахсачыгъа-келечиге – джанкъозгъа.

Джюрегиме къысдым аны, ийнакълаб.

Къайгъыргъаным эритди да джанкъозну,

Кёлюн айтды къулагъыма шыбырдаб:

Барыбызны да ол тюлмюдю ёлтюрген?!

Къара къышны, акъ къарны да ичи бла

Сюймекликди джашил джазгъа ётдюрген.

Кюрт тюбюнде джаталла санлары.

Алай а, аланы да джанлары

Джашил джазгъа, джашил нюрге тутубла джол.

(Ёлюмсюз джанланы ёмюрлюк джоллары – арыды).
Сюймекликни джокълугъу не азлыгъы –

Барыбызны да ол тюлмюдю ёлтюрген?!

Къыяма къыш, халек аууш да тыялмай,

Сюймекликди джашил джазны келтирген».

Джулдузгъача къарадым мен джанкъозгъа,

Ол джарытды, танытды джолуму къышдан джазгъа.

Джаш къызгъача къарадым мен джанкъозгъа –

О биринчи! Сабий сюймеклигим мени!

Къар тюбюнден чыкъгъанча джанкъоз,

Мийик кёкде джаннганча джулдуз,

Къая ранда чакъгъанча балий,

О биринчи сезимлерим мени!

Джанкъылыч эшмели къайытмаз джазым мени!

Кетген джазымы ызынданмы барама?

Келлик джазны аллынамы къарайма?

Умут джулдуз, бошунамы джанаса?

Сюймекликни джокълугъу не азлыгъы

Ёлтюреди бизни.

Джанны гырджын тюлдю азыгъы

(«Къуру гырджын бла джашамайды адам») –

Ой ол таша магъанасы Сёзню,

Чексиз магъанасы Сёзню,

Сууча, алыб барады мени.

Джюрек, аны магъанасын сез, сюз – англа.

Сора – сабыр бол, тёз:

Джашил джаз сакълайды алда.

Энди Сёзге сыйынмайды джюрек.

Сезе, ангылай башлагъанма энди

Нек тынгылагъанларын Таш бла Терек.

Дуния – джангы эм сейир.

Сюймекликсиз илхам джокъ,

Илхамсыз а – джокъ шийир.

«Ритм», «рифма» бугъоуладан,

Ол джахилликден, меджисуудан –

Азат этгенча къулланы –

Тау шийирни азат этдим.
Къул назмула джазгъан къулла,

Азат болургъа излемейин,

Эркин Сёзню да истемейин,

Кеслери да, сёзлери да –

Хакъ Кертиге, Тюзлюкге тюл –

Имансыз къралгъа, ит джорукъгъа,

Къара кючлеге, залимлеге,

Зорлукъгъа, зулмугъа, ётюрюкге

Баш урургъа кюрешдиле.
Мен айтдым назмулагъа:

Къул болмагъыз сиз къуллагъа,

Къулну да этигиз ёзден –

Хар не да башланад Сёзден.

Къул болмагъыз сиз къуллагъа.

Эркин болугъуз кесигиз да.

Халкъны да этигиз эркин,

Джуртну да этигиз эркин.
Акъ сёзден, назму сёзден,

Иги сёзден, керти сёзден,

Ёзден сёзден, эркин сёзден

Башланады Эркинлик да,

Хар не тюрлю Игилик да.
Джаным да кёче алагъа,

Мен айтдым назмулагъа:

Болушур ючюн адамгъа,

Къуллукъ этигиз Аллахха.

Эшитирикди сизни адам,

Эшитирикди сизни Аллах,

Тилек да боллукъду къабыл.

Дуния да болуб сейир,

Айтырыкъды:

«Аллахны нюрюнденди Адам,

Аллахны Сёзюнденди шийир».

Мен – Адамма, Шайырма, Хаджиме.

Эки дуниядан да сыйлыды меннге.

- Нелени сандырайса, тохта,

Хыйнымы этилгенди сеннге?

Таулу адетни, намысны, сыйны.

Дууангы къойгъанса Шаркъда,

Гъарбда уа сеннге этгенле хыйны.

Этилмегенди хыйны да меннге.

Асры сюйгенден Кёк бла Джерни

Кёлюм, Тауубузча, болгъанды Минги.

Меннге ол заманда джанады джулдуз.

Ансыз а, ансыз –

Кёк, Джер да, джюрек да болалла джансыз.

Анга джукъ айтхан гюнах эм харам.

Олду меннге Кёк да, Джер да, джандет да.

Ансыз джокъду джашау да, адам да, поэт да.

Эки дуниягъа да ауушдурмайма мен.

Джырчысыма мен ариулукъну,

Сюймекликни къанатыма мен.

Мен барама джангызгъа.

Меннге татлы ышаралла

Джулдузла бла джанкъозла.

Ушагъан ма бир къызгъа,

Джаным кирген бир къызгъа

Джазыуум тартыб бютюн,

Учама джертин, кёктюн.
Атым – тарпан, эмилик,

Бош ат тюлдю – Боракъды.

Учундургъан – сюймеклик,

Джюрегиме – къанатды.

Кёлеккеси – кёкде Къой Джол.

Сеннге этген джырымы

Этгендиле джерде той джыр.

Салгъан кибик – ма алай,

Мен сеннге махтау салдым,

Болмасанг да джулдуз, Ай.

Къаралтханед джанымы...

Сен а аны тазалаб,

Аллах джаратхан Кюнде

Болгъаны кибик этдинг.
Кёзден, кёлден кетди чарс.

Сюймекликге ура харс,

Джюрек бара джангызгъа,

Тюбедим мен джулдузгъа.

Сыйындыла джюрекге.

Джерде тургъанлай, Кёкге

Учхан насыблыма мен.

Сан да, джан да – насыблы,

Къууанч – чексиз, ёлчесиз...

Не айтасыз анга сиз?

Бизге да къайгъы, джарсыу –

Алайды джашау, джазыу.

Алай а, джаннга асыу –

Бюгюннгю къууанч-насыб.

Аладан толгъан кёл, джюрек

Къалмазла суууб, азыб.
Сюймекликден толу джюрек

Сынаулагъа да чыдар.

Къара джолну тауусуб,

Акъ таулагъа да чыгъар.

Тенг болайым джулдузгъа,

Тенг болайым джанкъозгъа.
Кюеме, джукъланама демей,

Къоркъмай джанады джулдуз.

Джаз алдар, сууукъ юшютюр демей,

Къар тюбюнден чыгъады джанкъоз.

Джаныуум бошунады демей,

Джулдуз джанады, джанады.

Джаз бегисе чыгъарма демей,

Ол заманда чагъарма демей,

Джанкъоз да къар тюбюнден чыгъыб,

Кёллендиреди кёлсюзлени,

Къууандырады бизлени.

Алагъа ушагъан къызгъа да

Тыйыншлы этген мени –

Сюймеклигимди мени.

Джанкъоздан джулдузгъа дери,

Джаздан джазгъа дери,

Къыздан къызгъа дери,

Сюймекликден сюймекликге дери,

Джашаудан джашаугъа дери

Къууанчым-насыбым мени,

Джашауум мени.

Сюймекликге – махтау!!

Джашаугъа – орайда!!!