Сюймекликге харс экитомлукъ лирика назмула

Къалдым къалгъанча тёнгек.

Себеб табайым къайдан?

От тюшген орман – джюрек.

Чексиз кёкге тенг эди.

Анда эм джарыкъ джаннган

Чолпан джулдуз сен эдинг...

Аллай джулдуз джокъ энди.

Бюгюннгю халы джюрекни –

Джулдузсуз заманы Кёкню.

Джараша эдик алай.

Кёрюнмейди энди джукъ –

Къайда джулдуз, къайда Ай?

Джюрек чачыллыкъ болур –

Алай ачыллыкъ болур

Бир джангы дуния, Алам.

Таймы эди, огъесе, джазмы эди?

Огъесе, сабийлигимми эди?
Ол къалгъанды анда – сюргюнде, узакъда –

Къайыталмазлыкъла бла бирге.

Ай джарыгъында тай кишнеген таууш

Кече, кюн да къулагъыма келгенлей турады.

Европа бла Азияны арасында аууш,

Тау бла тюзню арасында аууш,

Тюз бла терсни арасында аууш,

Кёк бла Джерни арасында аууш,

Эки дунияны арасында аууш –

Ай джарыгъында тай кишнеген таууш.
КЯМАР
1

Сени белинги буугъунчу,

Не эди ол? Джукъ да. Бош алай –

Бир темир, къанджал, тогъай.

Сени белинги буугъандан сора,

Болгъанды ол алтын. Табханды атын.

Табханды насыбын.

Алтын кямаргъа бурулгъанды ол.

Насыблы, сени белинги буугъанды ол.
2

Сеннге атаб ишлегенем ол кямарны.

Сеннге саугъагъа бергенем аны.

Алай а болмады джазыу –

Юй ишлеген балта эшикде къалды.
КЁЛДЕГИ

Л.Ф.
Сен къайтаргъан джылланы тансыкълай,

Сен ийген джырлагъа тынглай,

Джюрегинге тынглагъанча болама,

Сёз бла айтылмазлыкъны англагъанча болама.

Джыгъылгъанча, учханча да болама

Джыллагъа-джоллагъа-джазыулагъа къарай,

Джылыма, джолума, джазыуума къарай.
Джангы Айны толгъанын, тутулгъанын да

Кёргенча болама.

Ёлгенча, тирилгенча да болама

Сен джазгъан джазыулагъа-дууалагъа къарай.

Мен тургъанча джуртумда-элимде.

Бир къызчыкъ да, кямары бла белинде,

Мени таба келгенча атлаб.

Джерде болгъан ол сейирликге...

Мен ол кюнню унутурма къалай –

Ачыкъ эди джол...сюймекликге.

(Сюймекликге джол къуру да ачыкъды!)

Тюбегенча джаз бла джай,

Биз ол кюн тюбегенек алай,

Ёзге джетмеди таукеллик.

Кёлю къалгъан сюймеклик –

Турна тауушха бурулду Кёкде.

Джюрекде уа, джюрекде

Не болгъанын айтмай къояйым.

Джазгъанларынгы окъуйма къайтарыб:

Ала меннге, башхасы джокъ, намаз керекча.

Сен кесинг а меннге – Джуртда Джангыз Терекча.

Джюрегим а мени – джарылгъан таш, джаралы таш,

Алай а – Къадау Таш.

Сен джазгъан сёзлени окъуй,

Терезеден къарайма:

Кесин джагъагъа уруб,

Къайры эсе да барыргъа излегенча,

Таулагъа ёрлерге излегенча,

Кёкге къошулургъа излегенча,

Чайкъалады тенгиз.

Кёкден а –

Къачхы шылпы бла бирге

Турна таууш энеди Джерге.
Тенгизни ол бир джанында уа –

Кёк бла Джер къошулгъан мийик чекде,

Чыммакъ акъ тауну башында,

Джашил джазны дуниягъа кёрюнюуюча,

Меннге къол булгъай, бир къызчыкъ сюеледи.

Мёлекге ушаш бир къызчыкъ сюеледи

Кямары бла белинде.
Арабызда уа чайкъалады тенгиз...
Узакъдама джуртумдан-элимден.

Джууукълугъум, узакълыгъым да – чексиз.

Сюймеклигим, кюймеклигим да – кемсиз.

Мен кесими къойгъанма Сенсиз.

Кюннге, джылгъа да къарамай,

Джаз ала джашайды, джашнайды кёлюмде.

Ол къызчыкъ джашайды кёлюмде

Алтын кямары бла белинде.

ЁМЮРЛЮК СЁЗ
Сёзле меникилле,

Кёзле – сеники.

Кёзле – меники.

Кёзюм къарайды сёзюнге.

Арабыз – узакъды.

Джууукълукъ, узакълыкъ да

Къычырымла бла тюл, заман бла да тюл,

Сёз бла тергеледи.
Сёздю ёлче хар небизге да –

Адамлыгъыбызгъа, сюймеклигибизге да.

Джети къат Кёк да,

Джети къат джюрек да.
Ол Сёзде –

Джети къат Кёк да,

Джети къат джюрек да.
Ол Сёзню табхан да,

Айтхан да,

Анга кертилей къалгъан да –

Сюймеклиги болгъан адамды,

Кераматы болгъан адамды,

Шыйыхлыгъы болгъан адамды,

Шайырлгъы болгъан адамды.
Алагъа ачылады ол Сёз.

Ол Сёзню ачалла ала.

Джети къат джюрекни

Джарытхан бир джарыкъды ол,

Байлагъан бир насыбды ол.

Анга тыйыншлы болгъандан

Уллу насыб да болмаз дунияда.

...Кёзюме кёрюнеди Арабия –

Атынг болгъаны ючюнмю Рабият,

Атангы аты да – Буниамин?

Джюрекденми чыгъады таууш:

«Джангызлыкъ джолунгу тауус –

Ёмюрлюк тюлдюле не ёмюр, не джаз,

Джазыуунгу кечикдирме, джаз».
Джети къат Кёкден башхасын унамазлыкъгъача,

Мен Сеннге джазама Назму.

Бу акъ къагъытха да, намазлыкъгъача,

Къабланама – Кёкдендиле алхам бла назму,

Кёкдендиле илхам бла джазыу.
Джазыула джазылалла Кёкде,

Биз а джашайбыз – Джерде.

Мадар этгеннге этиледи къадар,

Аятчады атынг да кёлде.

Халкъыма-джуртума байлагъанды мени.

Джюрекге насыбды, къууанчды –

Сайлагъан, сыйлагъан да сени.

Джашлыкъгъа къайытама, тёзелмей.

Сени аллынгда болгъаным ючюн терс,

Джюрекни аллында болгъаным ючюн терс –

Джашауум да барады тюзелмей.
Ёзге сени джашауунг-джазыуунг

Кесинг къууанырча болгъан эсе,

Меннге да къууанчды ол,

Къууанч бла джаша, насыблы бол.

Акъ чакъгъан тереклени кёргеним сайын,

Акъ халатлы дохтур къызчыкъланы кёргеним сайын,

Джюрек чынгаргъа излейди кёкрекден,

Джан чыгъаргъа излейди тёнгекден.
Ма алай эте джашайма мен –

Кюе, сокъурана –

Кеси кесинден бошагъан бир адам,

Кеси кесин насыбсыз этген бир адам.

Сезимлеге уа къатылмайды заман.

Ай медет, артха къайытмайды заман.

Кечиксем да, береме салам.

Алай эте турлукъ болурма,

Тауусулгъунчу не сыннгынчы къалам.

Джазыуун кеси джазады Адам,

Джашауун кеси къурайды Адам.

Джангылгъанын а ангылайды артда –

Тюшгенден сора атдан.
Рабият, сени атынг эмда сыфатынг –

Джюрекге джара эмда дарман.

Насыблы бол, къууан джашаудан,

Джерде, джюрекде, назмуда да джаша.

Чексиз джууукъ эди насыб –

Кёкча тура эди басыб,

Джерча тура эди тартыб.

Кёкге мийикди дедим,

Сылтаула къаза уру,

Насыбдан къалдым къуру.

Къыз сакълайды, бойнунда – къачы.

Не ючюн тюбешдиле ала?

Не тилде сёлешдиле ала?

Къыз да джарлылыкъдан ёлмезча болду.

Шайыр а – ышармазча, кюлмезча болду.

Назмусу да – шыбыла ургъан терекча болду.

Сайлагъан джолунда барады хар ким.

Алай а, ариулукъну сатылыб кёрсем –

Къыйналама, терс болгъанча кесим.

Бир таза сууда джууундурургъа,

Сора – кёлтюрюрге ёрге,

Ол джулдуз орнун алырча Кёкде.

Ариулукъ къалай къутхарыр дунияны?

Къалай тюшген эсе да балчыкъгъа ариулукъ,

Къутхарыргъа борчлума аны.

Алайсыз, учаллыкъ тюлдю джырым.

Ариулукъ бла Сюймеклик – эки къанатым.

Ала мени чыгъарыр ючюн Кёкге,

Сакъларгъа керекме аланы гюнахдан-харамдан-кирден.
Мен – аланы, ала да – мени,

Сакълай, сыйлай, кёлтюре бир-бирибизни,

Чыгъабыз ёрге, мийикге, Кёкге,

Андан къарайбыз Джердегилеге, Джерге.

Алалла бизни учундургъан – къанатлы этген,

Джюрекни тазалагъан, нюрлю этген,

Бизни Аллахха джууукълашдыргъан, Адам этген.

Ариулукъну къутхарыуду борчум.

Джыгъылгъанны тургъуза ёрге,

Къарата, тарта, чыгъара Кёкге,

адамны Адам этиудю борчум.
Мен шайыр адамма.

«Джюрегинде сюймеклиги болгъан» – атым мени,

«Джюрегинде иманы болгъан» – атым мени,

Ариулукъну кёрюу, сакълау, къутхарыу – антым мени.

Алай ёсдюргенди, юретгенди

Ана тил бла Ата джуртда Халкъым мени.

Кёк тартады мени кесине...

Аланы экисин да хорлагъан кюч барды –

Сен тюшесе мени эсиме.

Мени бютеулей тартаса сен:

Санымы, джанымы да тартаса сен –

Кёкден, Джерден да кючлюсе сен.

Кёкге керек – мени джанымды.

Джер тартады кесине санымы,

Кёк тартады кесине джанымы:

Бири санымы, бири да джанымы

Алыргъа деб, сакълайла ахырымы.

Джан, тёнгек деб, юлешмейсе экиге.

Джанымы, санымы да тартаса кесинге,

Джанымы, санымы да джыяса кесинге –

Экиге юлешиниуден сакълайса мени,

Ёлюмден, ёлюмсюзлюкден да къутхараса мени.

Мен кёчеме сеннге.

Сенсе кюн, кече да меннге.

Сенсе туру, таша джашау да меннге.

Тирилтген, джангыртхан да сенсе мени..
Мен кёчеме сеннге

Дуниягъа джангыдан тууар ючюн,

Джангыдан джашар ючюн...

Кёкде, Джерде да болмагъан,

Дунияда, ахыратда да болмагъан

Бир сейир джанса сен...

Дуния, ахырат да болмагъан,

Ючюнчю дунияса меннге.

Бир башха дунияса меннге.

Джангы джашау къуралады алай.

Джазыу джазылады алай.

Сёз джаратылады алай.

Адам джаратылады алай.

Мен, Сен эмда Ол –

Ючгюл дуния къуралады алай.
ЁМЮР СЮЙМЕКЛИК
Сюеме Сени:

Джандетден, джаханимден да,

Ёлюмден, ёлюмсюзлюкден да

Къутхаргъанса мени.

Къыш дуниядан кетеди ахсына, джюрексине, джылай.

Тырнакълайды, кетмез дыгалас этеди –

Алай а, къалмагъанды алгъын залимлиги энди.

Ахыр кюн бири да болмай къатында,

Ахыр кюн биринден да болмай болушлукъ,

Огъурсуз, къутсуз, къыяма къыш

Айырылады бизден, джан-джанын ашай, чамлана.
Айырыла да, артха айланыб къайырыла, барады.

Кетеди – заман кючлю болду андан да.

Дунияны къырдым деб тургъан фыргъауун къышдан

Чыпчыкъла огъуна къалгъандыла сау.

Джюуюлдеб, сызгъырыб, къанат къагъыб, джырлаб,

Бютюн ачыу этелле ёле тургъан къышха:

Чыпчыкъла огъуна кючлюлле андан.

Болса иман, чыдам, тёзюм, сабырлыкъ –

Боллукъду не аман къышны да хорларгъа:

Анга тюшюндюреди бизни табигъат.

Джюуюлдейле. Ала огъуна кёллендирелле мени.

Ёлюмден къарыусуз тюлдю джашау деб,

Джырлайла бурху джанла – чыпчыкъла.

«Ёлюмден къарыусуз тюлдю джашау».

Джашай, ёле, тириле да билген

Табигъатха салама махтау.

Не игиди тирилген, джангыргъан.

Къышны къайытырын да билеме артха.

Тюшерими да биле, минеме атха.

Джашау, ёлюм да тюлле ёмюрлюк.

Билеме: ёлюмсюз болмайды джашау.

Алай а, ёлюм бла бошалмайды джашау.

Джашау, ёлюу эмда тирилиу.

Ёмюрлюк – ол таша, туру да – тюрлениу:

Джашау, ёлюу эмда тирилиу.

Алай а, басама кёлюмю:

Джаратыла, джашай, ёле, тириле

Тургъанын эслейме табигъатны.

Джаз келеди дуниягъа джангыдан.

Келгенча огъур чакъ.

Барды окъур зат –

Къууандым алагъа.

Джазгъанынг да келди:

Ёлдюм, тирилдим –

Нек тюлбюз бирге?

Терекле да чагъа,

Джангыдан келгенча

Болдум дуниягъа.

Кеси кесини...» -

Бекден бек чыгъады

Ауазы эсими.

Терслей кесими,

Дууа орнуна

Тута сёзюнгю.

Сёзле-джюзюмле.

Туралла къайнай

Кёлде сезимле.

Минерча болдум.

Сен тургъан джуртха

Кетерча болдум.

Чекле, чекистле...

Джол джокъду артха –

Къарадым Кёкге.

Къучакълайла мени:

«Аккыллы болма,

Сакълайбыз сени.

Сен керексе, керек...»

Сюйгенден, кюйгенден

Джарылады джюрек.

Джюрегим базмай,

Джазыуубузну

Къойгъанма джазмай.

Къарайма Кёкге:

Джазыула джазылалла

Джерде тюл, Кёкде.

Кёк айтады меннге:

«Сен этсенгед мадар,

Мен этерем къадар».

Этмесе хар ким,

Болушмаз анга

Хеким, не Хаким.

Сенден келген Сёз

Кюйдюрелле мени.

Тёз, джюрек, тёз.

Чыгъаргъа боллугъем кёб тауну башына...

Энди бирине да ёрлеялмам, чыгъалмам –

Кюч да, заман да къалмагъандыла энди.

Насыблы – къанатлары сау.

Учар Кёгю бар, къонар Джери бар,

Нёгери да болур сакълаб тургъан.

Къанатлы къанатсыз бла джашамаз.

Къанатлыны нёгери да къанатлы болур.

Некях да Кёкде этилгенди алагъа.

Ашыгъа болур эди къанатлы.

Къанат тауушунда, къычырыгъында да

Бар эди бир къоркъуу, къайгъы, умут да.

Къанатлы джанны ызындан къарадым.

Огъесе, тёнгегимден айырылгъан

Кесими джаным болурму эди ол?

Айырылады эртде-кеч болса да.

Кёкден келген ол къанат таууш, къычырыкъ,

Ким биледи, мёлекники эсе да.

Билмейме, ол учуб баргъан Кёкде.

Алай а, аны къанат тауушу, къычырыгъы

Не бек къатыладыла джюрекге.

Нек къатыладыла джюрекге?
Акъ къанатлыны къанат тауушу, къычырыгъы

Джюрегиме-кёлюме тюшюб,

Сезимлениб, сёзлениб, тиллениб,

Акъ сёз болуб къайытады ызына,

Акъ сёз болуб чачылады дуниягъа.
Огъесе, ол учуб баргъан къанатлы

Мен тюбемей къалгъан сюймеклигим болурму?

Джерде толмай къалгъан умутум болурму?

Акъ иннетим, акъ сёзюм, акъ назмум болурму

Чууакъ Кёкде учуб баргъан къанатлы?
КЁЗЮУЛЕДЕН КЪУРАЛАДЫ ДЖАШАУ

Кюн тийген кёзюу бла хайырлан,

Джабхынчы булут.

Кюн тийгенлей турлукъду деб,

Этме умут.
Къыз разы эсе, разы эт аны да.

Хар нени – кёзюую.

Дунияда бир затха да

Къалмасын къарагъанлай кёзюнг.

Артха къарай, кетмезсе ахратха да.

«Не этеме миниб атха да,

Тюшерик эсем» десенг – къан джауду.

«Не этеме джашаб, ёллюк эсем» десенг –

Саудан ёлдюнг, тюб болдунг.

Кюн таякъны тийириб чыкъгъа,

Аны бла джазаргъа керекди назму да.

Табигъатды джан салгъан джюрекге да, Сёзге да.

Табигъат алай ачылгъан кёзюуде,

Айтырынгы айтыб, этеринги этиб къоймасанг –

Артда кеч боллукъду,

Тилегинг да боллукъ тюлдю къабыл.
Кёзюуледен къуралады джашау,

Саниеледен къуралгъанча заман,

Харифледен къуралгъанча Сёз.

Хар нени да иги джанын кёре бил,

Хар неден да къууана, зауукълана бил –

Олду джашау.

Сюйюмчюлюк айтхан аяз,

Не бек къууандырды мени:

Болдум кёргенча сени.

Джазгъы кюн – джети тюрлю,

Къыз джюреги да – алай.

Билдирейим мен сеннге

Сюймеклигими кеъалай?
Ышанмайын джазыугъа,

Джюрек толад къайгъыдан.

Салыннганча болама

Суудан тутуб къаядан.

Къоймайды тюнгюлюрге.

Сени бир къучакъласам,

Таб, разыма ёлюрге.

Джетдирир джазгъы аяз.

Сени ийнакълаб, къучакълаб,

Халымдан айтыр хапар.

Табынмайма алгъынча.

Сёзле да табылмайла,

Тагъылмайла алгъынча.

Кёкден тюшген кёгамат сёз,

Кёлде бишген кёламат сёз,

Джюрек ачар керамат сёз,

Къууанч берлик саламат сёз

Излейме да, табалмайма.

Алайсыз а, джюрекдегин

Айтыргъа базалмайма.

«Джаз келеди»,- дейди аяз.

Ийнаныб да къалалмайын,

Къышхы тонуму да тешмегенлей,

Джабалакъ къар да джауа-джауа,

Джазны аллына атлайма мен.

Къызны аллына атланама,

Джазыуну аллына атланама.
Къар да джерге тюшер тюшмез,

Джюрек да сени кёрюр кёрмез,

Эрийдиле. Келеди къыз, келеди джаз.

«Назмунгу, кёлюнгю, джазыуунгу да джаз»,-

Дейди меннге бир таша кюч, тамаша кюч.
Келеди джаз. Келеди къыз. Келеди Сёз.

Джазны-къызны-джазыуну аллына барама мен.

Джауум да джокъ, джел да джокъ.

Сёз да бузмасын шошлукъну:

Тынгыла да тур, айтма джукъ.

Агъаралла узакъда.

Толкъунла да тенгизде

Баш кёлтюрмей джукълайла.

Этмей сыйыт-къычырыкъ –

Кёллери иги болур –

Учадыла тауушсуз.

Турады тынгылаб тенгиз.

Джюрегими ургъанын,

Джюрегинги тебгенин

Эшитеме мен джангыз.
Узакъ эсе да арабыз,

Сенсе эм джууукъ меннге.

Акъсакъалча ышара,

Къарайды Кёкден Минги.

Шошду, рахатды алай –

Джангыз, джюрекни тебиую,

Джангыз джюрекни тебиую,

Адам джюрекни тебиую

Эшитилинеди Аламда.

Таулагъа къарайма мен.

Сагъышым кёб болса да,

Джукъ айтмай тынгылайма мен.

Къара кёлде джуууналла акъ къызла.

Акъ къызланы сюеди Къара кёл,

Акъ кёл а, къара къызланы сюеди.

Ушамагъан да джугъады дейме.

Акъ къаядан къуюлады къара суу,

Акъ санларынга тёгюледи къара чачынг...

Джангкъылычла къурай,

Акъ къаядан секириб келген къара суу,

Джюрекни къозгъай,

Акъ санларынга толкъунланыб тёгюлген къара чачынг...
Сезимлеринг – Акъ къаядан чынгагъан Къара суу.

Сезимлерим – Къара къаядан чынгагъан Акъ суу.

Къошулдукъ, къошулгъанча Акъ тенгиз бла Къара тенгиз.

Къошулдукъ, къошулалмай да къалдыкъ.
Къара къаядан акъ булутха чынгадым.

Санга джетген а, къолунга тюшген а –

Джангыз бу сюймеклик сёзюм болду.
Эй, Акъ къаядан чынгаб келген къара суу,

Сенден тутуб мен салындым къаядан.

Акъсан, къарачач, татлыауаз – Сенден

Тансыгъымы алалмагъанлай, кетеме дуниядан.

Акъ Къаядан чынгаб келген къара суу,

Джюрегими, тёнгегими да джуугъан суу,

Дуниямы акъ этген къара суу,

Къандырмагъанлай, сусабымы кесген къара суу.
Ол бир дуниядан келген акъ мёлек – къара суу,

Дуния джашауну сейир этген къара суу,

Сёзюмю да акъ этген къара суу,

Кёлюмю да джарыкъ этген къара суу.

турлукъма Сени –

Акъ къаядан чынгаб келген къара суу,

Кёзюмю, сёзюмю, джюрегими да сугъаргъан

Сынау дунияны акъ джарыгъы – къара суу.
Нюр джарыкъча, джангкъылычла къуршалаб,

Акъ къаядан чынгаб келген къара суу,

Сенден таза, сенден татлы не болур?

Бирлени сен толтурдунг суулукъларын,

Мени уа кёлюмю-джюрегими толтурдунг.
Акъ къаядан чынгаб келген къара суу!

Разылла сеннге Таш да, Терек да,

Разылла сеннге джан да, тёнгек да.

Джашауубузну алгъан ким эсе да,

Джашауну берген а Сенсе бизге.
Акъ къаядан чынгаб келген къара суу,

Сенсе меннге джандет суу, зем-зем суу.

Мен сендеме, Сен мендесе,

Акъ къаядан чынгаб келген къара суу.

Танг аласында.

Къанатлы джырла тууалла

Танг аласында.

Тийириб гюл бачхада чыкъгъа,

Джазама назмуму-саламымы

Бир къызчыкъгъа.

Кёкде-Джерде-Джюрекде джашагъан,

Джулдузгъа, джанкъозгъа да ушагъан,

Джазгъа, джайгъа, къачха, къышха да ушагъан,

«Джашауум, джаным, джазыуум» деб, айтырым келген,

Аллай бир къызчыкъгъа эте сагъыш,

Ачама кёлюмю-джюрегими.
Къанатлыла, джырлаб, уяталла джюрегими

Танг аласында.

Къанатлы сезимле, сёзле, умутла

Тууалла танг аласында.

Эсде-кёлде тургъан бир къызчыкъны,

Джюрегим джаратхан бир къызчыкъны

Табыб, къуаннганча болама.

Къозгъалады тёгерек.

Кюн тийген джюрек

(Сюймеклик тийген джюрек!)

Джарытады дунияны.
КЪУУАНЧ КЮНДЕ ДЖАРСЫУУМ
1

Хекимликге окъуй тургъан къызла,

Акъ кийимлери бла тёгюлгенча арбазгъа,

Кюле-ышара тургъанча сабийле –

Не ариу чакъгъандыла балийле.
Не ариу чакъгъандыла балийле –

Сюелгенча акъ джаулукълу келинле,

Этиле тургъанча къууанч той, алгъыш,

Унутулгъанча халкъны къыргъан къач бла къыш.

Ачылгъанча таша къудурет, керамат,

Тюзетилгенча хар бир терслик, джангылыч,

Кёкден Джуртха тартылыбды джангкъылыч,

Кёкден джюрекге, джюрекден джюрекге

тартылыбды джангкъылыч.

Джандет джуртуна къайыталды халкъ –

Кёгюбюз чууакъ, джерибиз джашил, тауубуз акъ.

Буду Аллах берген КЁК-АКЪ-ДЖАШИЛ бетли байракъ.

Таймазбыз Аллах буюргъан джолдан.

Кёк джашнай, джер джашнай, келгенди май:

Къайытханды Ата джуртуна Къарачай.

Айтылалла Хакъ сёзле, халкъ сёзле, нарт сёзле:

«Адам туугъан джерине...» дейдиле,

«Тюзню малы тюзде къалмаз» дейдиле,

«Ата джуртсуз халкъ Халкъ болмаз» дейдиле,

«Хакъсыз – халкъ Халкъ болмаз» дейдиле,

«Къобанны ташын джалаб, сууун ичиб турсакъ да...» дейдиле.
Кёб заман кетди ол майдан бери.

Къарайма Архыздан Доммайгъа дери:

Миллет байрагъыбыз къайдады?- кёрмейме,

Миллет орайдабыз къайдады?- эшитмейме.

Джуртубузну кючлейдиле башхала,

Амантишле болгъандыла башчыла,

Халкъны, Джуртну тонагъан, тонатхан, сатхан да – ала.

Джукъ айтмай, джукъ этмей, манкъуртла болуб тургъан да – биз.
Айтылмайды, не эсе да, Хакъ Сёз.

Айтылмайды, не эсе да, Акъ сёз.

Къайда Хакъ, къайда Халкъ, Байракъ да къайда?

Бу затлагъа сагъыш этеме хар къуру эм хар къайда.

Джуртунда да халкъ хакъсыз, джуртсуз, тилсиз къалыр деб,

Кимни эсине келлик эди 1957-чи джыл, майда.