ЮЧ ДУНИЯ Сюркелген – арыйды; Джюрюген джарыйды; Учхан а – насыб. БИР КИТАБ ДЖАЗАРГЪА ИЗЛЕЙМЕ

Джюрюген джарыйды;

Учхан а – насыб.
БИР КИТАБ ДЖАЗАРГЪА ИЗЛЕЙМЕ
1

Норвей къызны къучакъласанг да,

Белине къучакъ джетмейди.

Таулада субай наратчыкъ

Бир да эсимден кетмейди.
2

Мында шахар алай тазады,

Сюркелсенг да – букъу къонмайды.

Богъурдакъданды мында хар не да –

Мени уа отум джанмайды.
3

Тиширыула алай джюрюйле,

Къарын джаулары салыныб.

Хар не да бир къуджур кёрюнеди,

Къалмагъан эсем алыныб.
4

Мында ишсизле алгъан ачханы

Бизде ишлеб да алмайла.

Эки джанын тенглешдирсенг,

Джюрек джарылмай къалмайды.
5

Ичген-эсирген кёрмейме мында,

Ач-джаланнгач да кёрмейме.

Джарлы Эресей эсиме тюшсе –

Мен не этерге билмейме.
6

Джер-суу байлыкъ халкъныкъыды,

Ишлеген къыйынын табады.

Къуу таякъгъа ушаш къачхынчы да

Мында юй-кюн болуб къалады.
7

Кёзюнг къысыкъды, теринг къарады,

Бурнунг къынгырды демейле.

Гыл тюшюребиз деб, полисле

Сени тыймайла, сюрмейле.
8

Мында оноучу тоноучу тюлдю,

Джокъду урлагъан-тырнагъан.

Анда джашау – дыгалас джашау,

Мында зауукъду джашагъан.
9

Джангыз бир джылны ичине

Мен юй, арба да алгъанма.

Халкъым, Джуртум демесем,

Джашаугъа батыб да къалгъанма.
10

Шимал Кавказны таулусу –

Шимал тенгизни балыгъы...

Анда эресейли, мында норвейли,

Къарачайлы уа къачан боллукъма?!

11

Таулу джокъду кесимден сора...

Джукъ да джокъду. Джуртсуз, элсиз –

Болуб турама санграу эм тилсиз.
12

Акъ булутланы къызартса да Кюн,

Къара булутладан къараса да Ай,

Акъ бла, къара бла джазсам да –

Бир сёз чыгъады – Къарачай...
13

Джуртха тартхан ауруу болмаса,

Аман тюш мында да кёрмезем.

Амантиш итле тил этмеселе,

Ата джуртдан да кетмезем.
14

Джюрек джарылмай не этсин,

Ишлеген къаламы ойгъанма:

Ана тилни, Джуртну, тарихни

Къоюлмазлыкълагъа къойгъанма.
15

Халкъны, Джуртну да сатыб кюрешелле

Ол ит мурдарла, гудула.

Къара багъанагъа тагъарыкъма барын –

Келлик тёлюле да окъурла.
16

Бир китаб джазаргъа излейме

Хар адам кесин кёрюрча.

Бизде джашауну тюзюн, кертисин

Аллах, адам да билирча.
УЛЛУ АЛЛАХ КЕСИНГ БОЛУШ
Орнундан тебмей турса,

Ташха да урады тюк.

Орнундан чыкъгъан итни уа,

Бёрю ашар – билебиз.

Сабыр тюбю – сары алтын.

«Тёзген тёш ашар» да дейле,

Ёзге нени да – мардасы.

Былагъа къатылгъаннга

Джокъду тёзюу, кечмеклик да.

Алалла бизни Адам этген,

Алалла бизни Халкъ этген.
Аласыз биз хайуан сюрюуге,

Джаныуар джыйыннга бурулурек.

Не да джинли, шайтанлы болуб,

Джаханимге къуюлурек.

Болур эдик къул-къарауаш,

Не да болуб мурдар, гуду,

Къара кючлеге табынырек.

Ана тилибизге къатылгъаннга,

Ата джуртубузгъа къатылгъаннга,

Намысыбызгъа къатылгъаннга

Къазауат, джихад этерге

Аллах кеси чакъырады,

Аллах кеси буюрады –

Барыбызгъа да борчду ол.

Аллах айтханны этмеген а –

Имандан чыгъады ол.

Амантиш сатлыкъды ол.

Бизден да тюлдю, ёзден да тюлдю –

Ибилисни къауумунданды ол.

«Зорлукъ этме, зорлукъ да этдирме».

Ол джолну баргъанлагъа

Уллу Аллах, кесинг болуш.

Келишиб, ит джыйын болуб,

Джорукъну-законну билген

Тиши эм аман Амантишни

Кеслерине башчы этиб,

Оноу этгенле:

Къазакъ бёрюден бошаргъа.

Къралдан чын, саугъа алыб,

Сюйгенлерича джашаргъа.

Улугъанын эшитгенлей,

Къансыб, арбазгъа кириб,

Андан юрюрге кюрешгенле.

Бири да сюймейд ёлюрге.

Ётлери джетмегенден

Быллай оноу этгендиле.

Бизлеге джашау къалмагъанды.

Андан къралгъа тил этмей,

Къралны анга юсдюрмей,

Андан бошаргъа джол да джокъ.
Тебрегенле джазыб-бузуб, бузуб-джазыб:

«Къазакъ бёрю ваххабистди,

Къазакъ бёрю террористди,

Къул-къарауаш дейди бизге,

Амантишле дейди бизге.

Кесин халкъгъа башчы этеди,

Халкъны къралгъа къаршчы этеди.
Ол сау болуб джокъду тынчлыкъ

Не бизлеге, не къралгъа.

Не ёлтюрюгюз, не тутугъуз,

Не да джуртдан къурутугъуз».

Къачыб, чекден ётгенди. Энди

Джуртда итле чабыб, юрюб,

Снджырларын зынгырдатыб,

Тегене къатында талашыб,

«Ох» этелле.

Ёзден адамгъа чабсала,

Аны бутундан къабсала

Джигитлик этгеннге санайла.

Къуру да бирчад джырлары:

Хырылдашыу, юрюу, чабыу,

Эжиу этген да – сынджырлары.

Къул джашауну сайлагъанла.

Сыйсызлыкъны сыйлагъанла –

Ой ит джыйын, кёпек джыйын.

Тюлсюз сиз къарачайлы:

Башына эркин болсун – демейсиз,

Джуртуна ие болсун – демейсиз,

Динине, тилине бош болсун – демейсиз,

Къарачай баш болсун – демейсиз.

Тилигиз айтса да, кёлюгюз айтмайды.

Кесигиз да айтасыз аны:

Андан-мындан келгенбиз дейсиз,

Къарачайлы тюлбюз дейсиз.

Тюл эсегиз – келген джеригизге барыгъыз.

Джыйымдыкъбыз дейсиз. Алай эсе,

Чачылыгъыз. Келген джеригизге барыгъыз.

Къарачайны къарачайлылагъа къоюгъуз –

Огъай, тюшерге ушамайды къазакъ бёрюню азауу...

Акъ джаным, къызыл къаным.

Бу эки элден чыкъгъанды

Ата эм ана джаным.

Адурхайым, Трамым –

Къадау Ташым, Терегим,

Сизсиз мени джюрегим.

Хурзугум, Учкуланым;

Акъ Къалам, Къызыл Къалам.

Сизсиз мени нюр къалам.

Сизсиз меннге нюр къалам.
ЭРЕСЕЙ
адамла ичинде кёрмейме Адам:

Бары – эки аякълы джаныуар, хайуан.

Хазырла хайуанча, джаныуарча джашаргъа,

Онглу онгсузну джегерге, эзерге, ашаргъа.

Туралла мурдарла, гудула – аманла – баш болуб,

Амантишле да алагъа къул-къарауаш болуб,

Игиле да къоркъуб, тынгылаб, къойдан джууаш болуб.

Аны тюрлендирирге джокъмуду амал?

Дуния намысдан, ахрат азабдан къоркъгъанла къайда?

Муслиманлыкъ-акъылманлыкъ-адамлыкъ-джигитлик къайда?

Миллет ангы, эс – чалдышда, бугъоуда.

Джюреклени кючлегенди шайтан,

Джашау джокъду къутулмай андан.

Къара халкъ да – аджашыуну джолунда.

Кърал кюрешеди тамада тёлюню, эсли тёлюню къырыб, союб,

Джангы аякъланнган джаш тёлюню да,

Джукъбилмез этиб, хайуан этиб, джоюб.
Ичкичиликни, хаулеликни джаяды кърал.

Харамны джутланыб, къууаныб алады халкъ.

Балтада, сабда да барды терслик, гюнах.

Аны ючюн чамланады, чамланыбды бизлеге Аллах.

Халкъгъа уа: «башынга бошса – эркин джаша»,- дегенди.

Тонагъанын кёргюзтмез ючюн, халкъны кёзюне ау этгенди.

Кърал къайгъылы болмазча, къралгъа къаршчы турмазча,

Халкъланы бир-бирине джау этгенди.
Къазауат бла, ачлыкъ-джаланнгачлыкъ бла къоркъутады энди.

Халкъла бир-бири бла тюл,-

Кърал халкъы бла этеди къазауат.

Джангыз, аны ол баям этмей, джашырад.

Ибилис кърал не да айтыр, не да этер.

Аны иннети – бизни хайуан этиудю,

Бизни имандан, намысдан, адамлыкъдан айырыуду,

Бизни джуртсуз-джерсиз, мюлксюз этиб, джарлы этиб къоюуду,

Биз анга – башсыз къул не да къарын джалчы болурча.

Къыйыныбызны – халал, кексибизни харам этиб,

Ат-бет атаб, дуниягъа бизни эрши кёргюзтюб.
Алай а, нени да болады ахыры.

Бу империяны да боллукъду ахыры.

Чачыллыкъды ол да, къалгъанла чачылгъан кибик,

Бизлеге да ачыллыкъды кюн,

Башха халкълагъа ачылгъан кибик.
Алай а, ол кюнню келтирир ючюн,

Зорлукъну-зулмуну ёлтюрюр ючюн,

Аллахдан башха бир джукъдан къоркъмазгъа керекбиз,

Харам джукъудан уяныргъа керекбиз.

Аны кетерликбиз акъыл бла, амал бла.

Не къадар эртде ангыласакъ аны,

О къадар эртде келликди насыб кюн.

Аджирге тургъан байталча,

Бутларын къалтыратыб,

Ёшюнлерин тургъузуб,

Къойнун, белин ачыб,

Чачын тозуратыб,

Орамда баргъан бу къызны

Ынгычхатыб, къычыртыб,

Ёмюрге джетерча бир бууар эди...
ТЕЙРИ ХАЛКЪЫ, ТЕЙРИ АДАМЫ – ТЮРК

Тейрини джамчысыды Кёк,

Къамчиси уа аны – Элия.

Тейри адамы, Тейри халкъы – Тюрк,

Алгъынлада сеникиед дуния...
Ол заманлада бир эдинг, биригиб эдинг сен,

Джанынг-къанынг да – Къуран бла Туран...

...Сизни бла сёлеширге излейме

Адурхай, Будуян, Науруз эм Трам.

Джигит аланла, уланла, къауумла,

Бабаларыгъыз Тимур бла Тохтамишни урушларына къатышыб,

Алан къралны къойдула къырдырыб.

Чачылгъанына болгъансыз шагъат.

Къуш тюгюнлей чачылгъан Тюркню

Туудукълагъа этгенсиз аманат.

Дини, тили, халал ашы – бары бир.

Джетген къыйынлыкъланы чурумун табар, оюм этер,

Аллахы бир, иннети бир – биригир.

Къамчиси уа аны – элия.

Тейри адамы, Тейри халкъы – Тюрк,

Геледжекде сеникиди дуния.

Бурун кибик, сеники болур дуния.

Тейриден Аллахха келтиргенди джолунг.

Джетишеди айрангынг да, иманынг да –

Уллуду сенде фахму эм болум.

Бёрю джортууул сени джюрюшюнг.

Тюнененг баред. Тамбланг да барды.

Бюгюнюнг а сеннге бираз тарды.

Къамагъа устаенг, энди уста бол къаламгъа.

Иман бла, билим бла джетериксе Хорламгъа.

Сени иннетинг – Туран бла Къуран, Къуран бла Туран.

Тейрини джамчысыды Кёк,

Къамчиси уа аны – элия.

Тейри адамы, Тейри халкъы – Тюрк,

Аллах айтхан Хакъ джолда барсанг –

Сеникилле ахрат эм дуния.
ЮЧ КЮН БЛА ЮЧ АЙ
Дуниягъа къарайма джулдуздан, Айдан –

Къарачайдан.

Дуния къарайды джулдузгъа, Айгъа,

Мен – Къарачайгъа.

Джулдуздан, Айдан,

О къадар джууукълашама

Джулдузгъа, Айгъа.

Кюндюздю, кечеди.

Тюрк-муслиман ёлсе,

Ол сын ташха кёчеди.

Джулдузу бла Ай:

Джердеди, Кёкдеди

Эмда джюрекдеди.

Ташдан джулдузгъа дери

Юч Кюн бла юч Ай –

Къарачай.

Сабийча джукълаб турады тенгиз.

Аны уятыргъа кёзлери къыймай,

Тенгиз чыпчыкъла да къычырыкъларын

Аз этгенле. Мен да,

Джашил терекча джагъада сюелиб,

Салкъын аязчыкъгъа бетими тутуб,

Сагъышха кетгенме.

Узакъда таула рахат агъаралла.

Сабыр аязны къулакъгъа алмай,

Аякъ юсюнде къалкъыйды чегет да.

Айрымканнга тартылгъан кёпюрню

Юсю бла арабала,

Тюбю бла да кемеле, къайыкъла

Тохтаусуз баралла.

Тынчлыкъ джокъду джангыз адамгъа.

Олду билмеген тохтай, солуй –

Бютюн тынгысыз, къайгъылы бир джанды.

Джаннетде не джетмей эди,

Не джетмейди джерде да анга?!

Неди сюрюб айланнган аны,

Нени сюрюб айланады ол?
Джер, кёкмю джетмейди анга,

Огъесе акъылмы, иманмы?

Огъесе, джаханимни бир кёрмеген

Джандетге кёл сала болмазмы?

Джашаудан тоюб къалыргъамы излейди?

Огъесе, кеч болгъунчу,

Ёлюмсюзлюкге джолламы излейди?

Тынчны тебгени къыйын деб,

Ала тебгенден Аллах сакъласын.
Адамгъа джокъ тынчлыкъ-рахатлыкъ.

Кесиди кёбюсюне къурутхан да аланы.

Кёкге, тенгизге, таулагъа къараб,

Бурху адамны – къайгъылы джанны –

Джашаууна, къадарына этеме сагъыш.
ТАНСЫКЪЛЫКЪ НАЗМУ +++++++
Шимал тенгизни джагъасында базар...

Къайсы тилде джаншамайла былайда!

Алай а, кюн, ай, джыл да озар

Эшитилмегенлей къарачай дауур, орайда.

Тауушлагъа норвейча, ингилизча, алманча...

Джарылгъан джюрегим а дарман орнуна кюсейди

Сёз эшитирге къарачайча-аланча.

Байракъларына, джазыуларына къарайма.

Тансыкълыкъ ауруу толкъунлана, кемире,

Биз джанындан адам кёрмей джанлайма.

Джюрегим да алача къычыра болур.

Кюн сайын мен алагъа аш чачама –

Къыйынлы джаныма бир себеб болур, сууаб болур.

Джан, тёнгек да къанатсыз болуб, къыйыллыгъын.

Адам табмайма ана тилде сёлеширге –

Андан башха бир да джокъду къыйынлыгъым.

Къачхынчы джамагъат бирге намаз къылабыз.

Къыйынлыкъ сюргенле Аллахны юйюне джыйылыб,

Бир-бирибизге билек, дагъан болабыз.

Рахатлыкъ а табалмайма джаныма:

Кюнмюд, Аймыд, Къарачаймыд тутулгъан? –

Киргенчама отдан чыгъыб джалыннга.

Къарачай-Малкъар халкъымы джазыуу, джашауу, къайгъысы.

Излейме, сорама: къайда болур, къайсы болур

Насыбладан джулдузлусу, Айлысы?

Халкъымы уа къутхаралмай джарсыйма.

Халкъымы, джуртуму амантишлеге, джаулагъа къоюб кетдим,

Алай кетген эркишиге ол сыймыд?

Диним ючюн, халкъым ючюн, джуртум ючюн.

Аллах бизни ючюн джаратханды дунияны, ахратны –

Шейит болгъунчу кюреширикме Аллах ючюн, Адам ючюн.

Биз джашайбыз былайда:

Ол тартады аракъы,

Мен тартама орайда –

Экибиз да ишсизле,

Экибиз да тишсизле.

Къайдан келесе?- десем,

Айтыр туракълаб, созуб:

- Болду болсакъ сау-эсен.

Тенгиз къушла къычыра,

Биз да ушаб алагъа,

Олтурабыз джагъада.

Къачыб тюшгенек бери.

- Эй, дуния джарыгъындан,

Айтчы, не болур иги?

Башына эркин адам

Бармыд насыблы сенден?

Тилине эркин адам,

Джуртуна эркин адам –

Олду насыблы менден.

Башына эркин болса,

Джуртуна ие болса,

Джазыуун кеси джазса,

Келир кюнюне базса,
Сен да халкъынг бла болсанг,

Хакъ кертисин айталсанг,

Халкъынга болушалсанг,

Насыб деген ма олду...

Даулашабыз тохтаусуз.

Ёлмегенибиз да сейирди

Минги Халкъсыз эм Таусуз.

Тенгиз къушла къычыра,

Биз да ушаб алагъа,

Олтурабыз джагъада.

Бирди тилек эм алгъыш,

Бирди къайгъы эм сагъыш:

Халкъыбыз эм Джуртубуз.

Джуртуна ие болуб,

Кърал болуб, юй болуб,

Джазыууна бий болуб,-

Биз да аны бир кёрсек,

Ёлдюк демезек, ёлсек.

Тенгиз къушла къычыра,

Биз да ушаб алагъа,

Сирелебиз джагъада.

Ол дунияны да не болгъанын ким биледи?

Къарангыгъа разы болуб, ашыгъырча, атланырча тели тюлбюз.

Таурухлагъа ийнанырча, алданырча джахил тюлбюз.

Аллах кеси бизге ийген Къуранында

Айтыб турады ахратны да барлыгъын, кертилигин.

Къыямат кюн бир джан къалмай тириллигин.

Соруу-сууал – къуру джашауубуз, этген ишибиз ючюн тюл,

Иннетибиз, муратыбыз, сагъышыбыз ючюн да – этиллигин.

Барыбызны да джаратхан, барыбызгъа да оноу этген!

Джашауну, ёлюуню, тирилиуню да керти Иеси, Тёреси!

Джанымы алыргъа ашыкъма, джалбарама:

Бир кёб ишим, муратым барды – толмагъан, башланмагъан.
Болджал джетмей, адам ёлмейд – билеме,

Кёрюрюн кёрмей, кёрге кирмейд билеме.

Къадарынга бойсунсам да, тилейме:

Энтда бир кесек заман эмда мадар бер,

Ишлерими, муратларымы толтуруб, къууаныргъа,

Узакъ джолгъа да хазыр болуб, къуралыргъа.

40 джылымдан сора сегиз джыл джашагъанма мен.

Хар нени да энди ангылай башлагъанма мен.
Энтда бир кесек заман бер тюшюнюуге, кюймекликге,

Къуллукъ этерге Игиликге-Сюймекликге,

Джууукъ болургъа кесиме да Хакъ Кертиге,

Джууукъ этерге халкъымы да Хакъ Кертиге.

Къыйын дунияда къыйынлы джюреклени

Джумшатыргъа, джарытыргъа.
Тауусулайым джарыкъ чача, джана,

Мени сюйгенле да ол затха къууана...

Джарыкъ къалсын мени орнума дунияда.
КЪАН. ДЖАН. СЁЗ
Назмуланады

Джарылгъан джюрекден тёгюлген джарыкъ.

Къанатланады

Тохтай ургъан джюрекден джарыкъ.

Къанча уюгъан назмула.

Къанча бурулгъан назмула.

Джаралы джюрекден къанча къуюлгъан назмула.

Къанча уюгъан назмула.

Джанча чыкъгъан назмула.

Дагъыда тирилген назмула,

Къайытхан назмула.

Джансыз назмула,

Джанлы назмула.
Хакъды

Джашау да, ёлюу да, тирилиу да.

Джаны болгъан, къаны болгъан затды Сёз да.

Ёлюмсюздю Сёз.

Джашагъаны Джерде, джюрекде, тилде.

Тартханы, учханы,

Кетгени да Кёкге.

Къан. Джан. Сёз
УРУШ САУУТНУ МАГЪАНАСЫ
Къанджал-къынджал (кинжал).

Къан-джан ал.

Тау суула ашыгъалла тенгизге.

Зикир айта саркъгъанларына аланы

Къарайма, тынгылайма сейир эте.

Тилек эте, къарайма дуниягъа.

Шыйыхла зияратха джюрюучю Минги Тау

Агъарады, кёллендире, кюч бере.

Ачылыб, нюр тёге турады тёгерекге.

Аны окъуйла шыйыхла бла мёлекле –

Ол - нюр джарыкъ, нюр ауаз - кераматы болгъанлагъа ачыкъды.

Къыш да, джай да бирча кёгергенлей,

Кёк бла Джерни байлагъанлай туралла,

Дарман хауалары да джюреклени, ёпкелени да тазалай...

Басхан-Чегем-Холам-Бызынгы-Малкъар-Къарачай.

Аны кёрюрча кёз джокъду бизде ансы.

Джана-джана тауусулады, джукъланады джулдуз –

Чексиз къарангыгъа кёмюледи ол да.

Къанатлы сёзюм а согъулгъанды нюрден, джарыкъдан.

Кетсем, кетгеними киши да эслерик болмаз эшда,

Бир нарт сёз, не бир мёлек назму, не бир бёлек оюм

Дуниягъа менден къалыргъа да болур.
Джан, джюрек, джаннганча джулдуз,

Джукълансанг да, джулдузча джукълан.

Ёлген джулдузну джарыгъыча,

Назмуларынг келе турурла..

Ахырзаман келмесин дуниягъа.

Аны келлиги хакъ болгъанын билсем да,

Дагъыда ёлмезча бир зат болургъа керекди,

Дегенлей, умут бла джашайма дунияда.
Ёлмезлик бир зат болургъа керекди.

Ёлюм бла бошалмазгъа керекди джашау.

Джашау кесин ёлюмге хорлатмазгъа керекди.

Бу сагъышла бла къылама намаз,

Бу сагъышла бла джазама назму.
ШИЙИРНИ КЕЛИУЮ-КЁРЮНЮУЮ
Намаз къылгъанча джазама назму.

Джангыз ол керекди кимге:

Аллаххамы, адамгъамы, кесимеми?

Ким ючюн, не ючюн джазама шийир?

Кимни, нени тюрлендираллыкъма сёзюм бла?

Кимге, неге джоралайма аны?

Кёк-кёк Кёк, чыммакъ таула, джашил табигъат,

Чайкъала тургъан тенгиз, шоркъулдаб келген суула,

Къозула, тайла, сабийле, къызла...

Эмда адам къолу къурагъан ариулукъла:

Юйле, шахарла, кемеле, арбала, арабала, билгесаярла,

Дагъыда была кибик кёб зат.
Алай а, джанлы, джансыз ариулукъланы ичинде

Барына да ушагъан, бирине да ушамагъан,

Хар неден да юлюш алгъан,

Таша, туру дунияладан да кюч алгъан,

Къайдан, къачан, къалай, не ючюн келгенин

Киши да билмеген,

Окъугъанны, тынгылагъанны, кёргенни сейирсиндирген,

Ариу сезимлени, таза иннетни къозгъаб джюрекде,

Нюр къанатла битдириб, учургъан-учундургъан,

Хар къуру да игиликге-тазалыкъгъа-мийикликге кёллендирген

Бир тамаша кюч барды: Назму-Шийир –

Ма ол керамат къудуретни аты.

Бар затланы бирича бир зат.

Алай а, ол аланы барындан да алады къарыу,

Барыны ариулукъларын джыяды да кесине,

Джангы ариулукъ болуб къошулады алагъа.

Алай келеди, кёрюнеди Шийир дуниягъа..

Сыйрат кёпюрча тартылгъан назму,

Дуния, ахыратча кёрюннген назму,

Иман шахадатча айтылгъан назму,

Дуача джазылгъан назму,

Китабча ачылгъан назму,

Джихад назму, шейит назму,

Хакъ ючюн,

Халкъ ючюн,

Адам ючюн,

Ата джурт ючюн,

Ана тил ючюн

Джашагъан, сермешген, ёлген назму.

Дагъыда тирилген назму,

Аллах къабыл этген

Ёлюмсюз назму,

Ёмюрлюк назму.
УЛЛУ АЛЛАХДАН ТИЛЕЙМЕ ИМАН ++++++
Ызына да чыгъалмай, батыб да кеталмай,

Кече тенгизде къалтырайды Ай.

Тенгиз да, сарыубекча, аны джуталмай,

Таракъ тишлерин чакъдырады къалай.

Умут джилтиннге ушайды Ай да.

Ёлюм бла джашау – джелмаууз бла Ай –

Кече узуну сермешигиз, хайда!

Эгерлени уятырыкъла тышындалла джангыз.

Къара кючле бары бирикгенле,

Мени джанымда – Джангы Ай бла Джулдуз.

Барына къаршчы тургъанды джюрек.

Аланы юсдюрген – Ибилис, шайтан,

Меннге кюч берген – Таш бла Терек.

Джуртда Джангыз Терек да джюрегимделле мени.

Джыйын джанлы да, Къазакъ Бёрю да

Къанымда-джилигимделле мени.

Акъ бла къараны арасында барады кюреш.

Иннетинг бла, сёзюнг бла, ишинг бла

Сен къайсы джанына къошаса юлюш?

Ма анга кёре боллукъду, ийнан.

Бу къазауатда хорлатмаз ючюн

Уллу Аллахдан тилейме иман.