«Туған топырақтың тума таланттары» атты әдеби поэзиялық кеш Сидагалиева Алия Мураткановна Атырау қаласы №31 мектеп-гимназияның жоғары санатты қазақ тілі мен әдебиеті пәні мұғалімі

Мақсаты: Жас ақындарға қолдау көрсетіп, олардың шығармашылығының шыңдалуына ұйытқы болып жүрген жерлес ақын, «Армантау» жас ақындар мектебінің жетекшісі Қойшығұл Жылқышиевпен кездесу. Оның шығармашылығын насихаттай отырып,

оқушылардың поэзияға деген құштарлығын арттыру

Өту барысы:

- ақын Қ.Жылқышиевпен сұхбаттасу, өлеңдерін оқу

«Арман-тау» жас ақындар клубының өкілдерімен сұхбат

- мектеп оқушыларының шығармашылығы

1- ж: Қайырлы күн, қадірменді өнерсүйер, өлеңсүйер қауым, қонақтар!

2- ж: Бүгінгі «Туған топырақтың тума таланттары» атты әдеби-поэзиялық кешімізге қош келдіңіздер!

Кең даланың ескек желіндей аңыраған ақындар мен жыраулар біздің Жайық бойынан көп шыққаны әдебиет пен өнер тарихынан жақсы мәлім. Әдебиет тарихына үңілер болсақ, біз өз өлкеміздің дарындыға кенде болмағанын көреміз. Атадан балаға мұра болып, жалғасын тапқан асыл өнер ешқашан өлмейді.

1- ж : Олай болса, сол бабалардың сарқыты бүгінгі кешіміздің қадірлі қонақтарын қошеметтеп қояйық.

Бұл өмірді зерлеген нұр-өлеңмен,

Сыр қозғайтын тұңғиықтан, тереңнен.

Ортамызда асыл қалам иелері,

Қойшығұл ағамыз бен шәкірттері

2- ж: «Туған топырақтың тума таланттары» атты поэзиялық кешіміздің арнаулы қонағы Қазақстанның еңбек сіңірген қайраткері, «Тамаша» ойын-сауық отауының алғаш ұйымдастырушыларының бірі, Махамбет Өтемісұлы және Ахмет Байтұрсынов атындағы сыйлықтардың лауреаты, мәдениет қайраткері, белгілі жерлес ақын – Қойшығұл Жылқышиев ағамыз

1- ж: «Шәкіртсіз ұстаз тұл» дегендей, Қойшығұл ағаның жанында шәкірттері отыр, Гүлзада Ниетқалиева- филология ғылымының кандидаты, Бақытгүл Бабаш – ақын, халықаралық «Шабыт» фестивалінің лауреаты және жас ақын, Х. Досмұхамедов атындағы АМУ-ң ІІІ курс студенті, поэзиядағы кейінгі жас буын өкілі - Артур Яһуда. Мектебімізге қош келдіңіздер!

- Қойшығұл Өмірұлы, алғашқы сұрағымды өзіңізге қойғалы отырмын.

Сіздің жас ақындарды жетелеп, қолдау көрсетіп жүрген игі істеріңіз туралы көптеп естіп, көріп жүрміз. Сол жөнінде және шәкірттеріңізді толық таныстырып өтсеңіз.

- Қойшығұл аға, әрбір ақын- жазушының өзінің сүйікті тақырыбы болады.

Ал сіздің сондай сүйікті тақырыбыңыз бар ма?
- Өлең деген тумайды жайшылықта,

Өлең деген тулайды қайшылықта.

Ақын болсаң, жарқыным, алысқа аттан,

Күнделікті тірлікке бой суытпа - деп Мұқағали ақын жырлағандай,

өлеңді қай кезде және қандай уақытта жазасыз ?
- Қазіргі кезде балалардың көркем шығарма оқуға деген құштарлығы төмен, не себепті деп ойлайсыз?

Ойлы жас, өлең менің сырласымдай,

Сырлассам да құмарым тұр басылмай.

Назын айтқан ақында арман бар ма,

Жүрегінің түбіне кір жасырмай.

Ақын ағаның өлеңдерінің бір тобы туған жер, атамекенге арналады, соның бірі - «Атырау» өлеңін Бисембаева Ақтолқын оқиды.

(Ақын өлеңдерін оқу)

Хас ақын жүре алмайды көңіл демеп,

Алады елден- қуат, өмірден –от.

Барлығын жан-жүрекпен жырлау үшін,

Бәріне ақын ғашық болу керек - деп Қойшығұл ағаның өзі жырлағандай, ақын ағаның «Асаукер» атты өлеңіне кезек берейік. Оқитын Рысалиев Досхан

- Аға, қазіргі жастардың өлеңдерінде мұң басым, неліктен деп ойлайсыз?

- Сіздің өміріңіздің қай кезеңі жиі аңсатады?

- Еркелігімді кешіріп,

Өркен гүлімді өсіріп.

Мұңайған кезде қосылып,

Сыр айтатұғын шешіліп.

Жігіттің бағы-қорғаны,

Досының адал болғаны

Сенгені сендер,достарым,

Ақынның алыс жолдағы- деген өлең жолдарыңызға қарап отырып, өмірде адал достарыңыз көп-ау деген ой көкейге оралады.

«Сенім» Оқитын Досжанова Әсел

- Қойшығұл аға, сонау 1979 жылдары сіздер кірпішін қалап кеткен «Тамаша» ойын-сауық отауы көрермендер көңіліне мәңгі ұялап қалды,өйткені халық сол кездегі тамашаны аңсайды, сезіммен еске алады. Қазіргі кездегі тамашаның жағдайы сіздің көңіліңізден шыға ма?

- Аға, неден қорқасыз, неден сүйеніш іздейсіз ?

- Қазіргі «Арман- тау» клубының аяқ алысы қалай?
- Келесі сұрақты шәкірттеріңізге қойсам ба деймін. Сіздер қаламнан нәрді де, қуатты да таудай талаптарыңыз, ізгі ізденістеріңіз арқылы таптыңыздар.

Өлеңдеріңіз Атырау қаламгерлерінің туындылары жинағына еніп, жеке жинақ болып та шығып жатыр. Осы әдебиет табалдырығын алғаш аттаған немесе алғаш жетістікке жеткен сәттеріңіз туралы айтып берсеңіздер.

( Оқушылар сауалына кезек беру)

1- ж: «Өлеңге әркімнің-ақ бар таласы» деп ұлы Абай айтқандай, талаптың мініп тұлпарын, ағалардың ізін басып, қалам тербеп жүрген оқушыларымыз бар.

2- ж: Жандары қаламайтын аласаны,

Шәкірттер алда талай бел асады.

Әлемге туған халқын танытатын,

Осылар – еліміздің болашағы – деп, сол оқушыларды өз туындыларын оқып, сізден бата алсын деген ниетпен ортаға шақырайық

1. 
   Жанғалиева Айдана
   
2. 
   Бисенова Жанаргүл
   
3. 
   Орынбасарова Нұргүл
   

1- ж: Бүгінгі «Туған топырақтың тума таланттары» атты поэзия кешіміз де аяқтала келді. Сөз кезегі мектеп директоры Ғаділжан Хисметұлына беріледі.

2- ж: Өлеңім, өрге баста, өрге баста,

Таңылар тұсым келді енді Алашқа.

Тәж- тағы болмаса да, шабыт жырдың

Шапаны тисе тағдыр, сен таласпа.

Құрметті қонақтар, алтын уақыттарыңызды бөліп, біздің ұсынысымызды қолдап келгендеріңіз үшн алғысымыз шексіз. Бүгінгі кеш өнерсүйер көпшілікті өлеңдеріңізбен тамсандырып, талай шәкірттеріміздің көңілдеріне қиял сезімін ұялаттыңыздыр.

1- ж: Сіздерге зор денсаулық, таудай талап, шалқыған шабыт тілеп, өлеңдеріңіз өскелең әдебиетіміздің озық үлгілерінің қатарынан көріне берсін демекпіз.