Ад быдлаын (< роч); ад гуран скр., шс.; вакрамеш

О. Уляшев

Уна мукöд войтыр моз жö комияс зарнисö йитлiсны медводз лунъюгыд сетыськöд. Йöзкостса поэзияын сiйöс традиция серти нимтöны зарни шондiöн. Шондi сетö олöм, шоныд, югыд. Метафора зарни пасйылiс мичлун, джуджыдлун, бурлун, царственность. Шондiсö тшöкыда нимтöны лун синмöн. Та понда зарниыс йитчылiс аддзыны вермöмкöд, а тасянь и мывкыдкöд да вежöркöд. Зарни öтувтö шондiлысь, дона металл-лысь да шеплысь рöм, символизируйтö озырлун да судзсьöм.

Ыштöданторйöн озырлун (зарни) петкöдчö быличкаясын пеж да нимкыла кладъяс йылысь, пеж вынъяс йылысь мойдъясын да с.в. Татшöм сюжетъясыс ëнджыкасö паныдасьлöны перым-комияслöн. Но и зырян мойдъясын зарнисö тшöкыдакодь судзöдöны, воöны либö нажöвитöны, геройыс мырддьö сiйöс васалысь, вöрсалысь, чöртлысь, беслысь да с.в.

Шондi да тöлысь – гозъялöн традицияа метафора (жöник да невеста, верöс да гöтыр). Шондi да тöлысь йитчöмны зарни да эзысь чунькытш образкöд. Комияслöн зарниыс лыддьыссьö нывбаба металлöн. Öбрада да лирическöй поэзияын зарни чунькытш топыда йитчöма невесталöн образкöд, верöс сайö петöмкöд, мойдъясын – багатырлöн невестакöд, мамкöд, нывкöд. Уна сюжетын сарныв козьналö геройлы чунькытш да тайöн пасйö верöс сайö петöмсö; геройлöн мамыс сетö сылы чунькытш невестаыслы сетöм вылö да с.в. (öтл. кöлысьöдзыс либö кикутiгöн комияс вежсьöны чунькытшъяснас). Гортсьыс мунiгас мойдса (эпическöй) герой сетö нöбасьысь гöтырыслы зарни чунькытш (чужас кö ныв) да эзысь перна (чужас кö пи). Медтшöкыда зыряна лелькуйтана нимтöны нывкаясöс зарни нылöн.

Аслыспöлöсöн коми фольклорын петкöдчö “сiмысь зарни”. Эпосын сiмысь зарни чунькытш мойдса сiмысь пурт моз жö, кодöс геройыс туйö петтöдзыс сатшкö матичö, пасйö геройлысь кулöм (видзöд Педöр Кирон) Анекдот сяма мойдъясын сiмöм чунькытш атöдö гозсö пöръявлысь гöтырöс либö верöсöс.

Дзебан бöрдöдчöмын зарни вичко юр, вичковыв зöлöтитöм крест, зарни лун сьöмöс шондi, зарниöн гартöм сись метафораяс пасйöны кулöмаöс. Сьыланкывъясын зырян зарни юрси да зарни кöса, перым-коми зарни чикись петкöдлöны нывлысь мичсö.

Шемöса мойдъясын зарни эзысь моз жö пасйö шемöса кöлуй (зарни яблöк – эзысь тасьтi, зарни дора эзысь чышъян, зарни пöлян, мельнича); шемöса пемöсъясöс (зарни сюръяс, зарни бурысь – эзысь бöж, гöн); дивö челядьöс (зарни ки – эзысь кок, зарни юр пыдöс – эзысь коклябöр да с.в.) либö шöр персонажыслысь туй тшупöдсö (зарни двореч, сийöс-кöлуй, кыдз, зарни паськöм да с.в.).

Комияслöн видзöдласъясын зарниыс сувтöдсьö паныд кöртлы, кыдз озырлунлöн (творчество вынлöн) ыджыдалöм эбöс-вынйöрлöн ыджыдалöмлы.

Медводдзаысь Зарни ань йылысь юöртöны XVI нэмын рытыв-Европаса путешественникъяс да гижысьяс асланыс небöгъясын, кöнi найö гижöны Роч государство йылысь. Юöръясыс öта-мöдыслы паныдаöсь. “Трактат о двух Сарматиях” небöгын (1517) М. Меховский иналö Зарни аньсö Вятка сайö “при проникновению в Скифию”. Мукöд авторлöн (С. Герберштейн, 1549; А. Гваньини, 1578; Д. Флетчер, 1591) Зарни ань паныдасьлö Об вомладорын нин. Идолсö петкöдлöны оз öткодя: пöрысь нывбаба мыгöра статуя, кынöмас сылöн пиыс, да тыдалö нöшта öти кага – гöгапи (С. Герберштейн); пöрысь нывбаба мыгöра пуен, моздорас кага, а орччöн нöшта öти – гöгапи (А. Гваньини); лëк паськöма нывбаба мыгöра кырта, моздорас кага (Д. Флетчер). Асьныс авторъясыс идолсö абу аддзылöмаöсь.

Патриаршöй либö Никоновскöй роч кроникаса (летопись) öти текстын, кодi юöртö комиясöс пыртысь Перымса Стефанлöн кувсьöм йылысь 1396. воын, висьтавсьö, мый комияс кевмысьлöмаöсь быдсяма пуенмыслы, тшöтш и Зарни аньлы. Никоновскöй кроника туялысьяс пасйöны, мый сэтчö унатор содтöма сëрöнджык. Сёръя содтöдöн лоö и пасйöм текст, сы вöсна мый сэнi висьтавсьö вежа Стефанлöн кувсьöм йылысь, а канонизируйтiсны сiйöс сöмын 1549. воын. Позьö чайтны, мый Зарни ань йылысь информациясö босьтöма рытыв-Европаса авторъяслöн небöгъясысь. Тайöс тшöт вылö босьттöг нималана роч историкъяс В. Н. Татищев, Н. М. Карамзин да Г. Ф. Миллер асланыс уджъясас, кодъясöс ас кадö тöдiс быд велöдчöм морт, гижисны, мый важöн комияс кевмысьлiсны Зарни аньлы.

XIX нэмын ас му туялысьяслöн уджъясö пырис Зарни ань термин. Тадзи вуджöдiсны идоллысь нимсö рочысь. Öнöдз коми фольклорысь абу пасйöма весиг ылöсас индöд сы вылö, мый коркö вöвлöма Зарни ань нима ен. Та вылö видзöдтöг тшöкыдакодь весиг наукаын пасйöны, мый тадзи пö комияс нимтылöмаöсь вылi енсикасöс, чужтöмлунлысь да бур олöмлысь символ, но ыстысьöны сöмын Никоновскöй летописьлöн текст вылö.

Н. Конаков

ЗУД быдлаын.

Уна войтыр чайтлiс, мый вундан да бытшкан кöрт кöлуйлöн (торйöн нин черлöн, чарлалöн, пуртлöн) эмöсь сакральнöй тöдмöсъяс. Вундан кöлуйсö колiс лэчтыны, та понда зудсö тшöтш жö лыддьылiсны сакральнöйöн.

Комияс эскылiсны, мый гумыльгаöн ветлысь вöрсаöс позьö лöньöдны, шуны кö “кöнi нö зудйыс?!”, сы вöсна мый сiйö пö зэв ëна полö зудсьыс. Челядьöс “тшыкöдöмысь” бурдöдiгöн тöдысьяс киськалiсны найöс пож пыр “нимкыла” ваöн. Медым содтыны ваыслысь сöстöммöдан вынсö, пожъяс пуктылiсны сов, пурт либö чарла да зуд. Печораса комияслöн зудйыс казьтывсьылiс кöлысь сëрнитчöмын. Невесталöн батьыс юавлiс жöниклысь: “Зуд сетан он?”. Жöникыс кöсйысьлiс сетны и невесталöн батьыс восьтлiс öдзöссö да лэдзлiс невестасö.

‘Кувны’ вежöртаса архаическöй зуд дзебны индö сы вылö, мый водзтiсö зуд мöдар югыдса вынъясысь вуджöр туйын вöлöма ëна тöдчанаджык. Сiйö видзöма весиг кулöма да ловъя муюгыд öтлаасьöмысь.

Зудлысь ыджыд сакральнöй вежöртассö тöдчöдöма и коми фольклорын. Шуам, мойдъясын нывка пышйö скöр Ёмаысь да шыбитö зуд, зудсьыс артмöны джуджыд гöраяс. Чукöртан мойдъясын зуд сулалö сьöрсьöн-бöрсьöн мунысь вöчöмторъяс визьын медводзын либö медбöрын. Шуам, лëльö оз кöсйы котöртны, сiйöс повзьöдлöны гезйöн, но гезйыс оз жö кöсйы лëльöсö джагöдны. Водзö тэчсьö татшöм визь: шыр–кань–тшын–би–ва–öш–чер–зуд. И сэсся тупыльыс разьсьö мöдарö: зуд кöсйö черсö ныжмöдны, черыс – начкыны öшкöс да с.в. Тшöтш и абумойда фольклорын зуд петкöдчö логическöй визяс юрнуöдысь элементöн. Шуам, öти текстын челядьлы висьталöны, мый зуд колö, медым лэчтыны коса, коса колö турун ытшкыны, туруныс – мöс вердны, мöскыс – йöв сетны, йöлыс – челядьöс вердны, челядь – пес вайны, пескыс – пач ломтыны, пачыс – нянь пöжавны.

Торъя видзöдлас зуд вылö вöлi и мукöд финн-йöгра войтырлöн. Шуам, йöгра узьны водiгас пуктылiсны пыранiнас ортсыладорас зуд, а пытшкöсладорас чер, медым войнас эз лок кулöма да эз вермы воськовтны на вомöн. Хантъяс, эз кö удитлыны кульны ошкöс пемдытöдз, водтöдлiсны сiйöс кымынь, чужöм водзас сатшкылiсны чер, а юр вылас пуктылiсны зуд. Чайтлiсны, мый зудйыс черсьыс ëнджык, сы вöсна мый лэчтö черсö, сыкöд ошкыс чеччыны оз вермы. Манси горт петкöдöм бöрын пуктылiсны горт местаас шонöдöм зуд. Зудсö эз позь пуктыны гортйö. Мувывса мукöд войтырлöн археология да этнография материалъяс индöны, мый зудсö енмö пуктöмыс универсальнöй и, буракö, öткодь.

Литература: Конаков 1985, Семенов 1986, Сидоров 1928.

жүктеу/скачать 1.79 Mb.

Достарыңызбен бөлісу: