Ад быдлаын (< роч); ад гуран скр., шс.; вакрамеш

И. Ильина

Христианскöй öбрадъясын Илля лун пырö медшöр празникъяс лыдö и эскöмъяслöн да овмöс приметаяслöн лыд боксянь, и тайö лунся öбрадъяс боксянь. Йöзкостса чайтöм-гöгöрвоöмъяс серти, христианскöй пантеонын шöр местаын тшöтш и Илля-пророк. Чайтлiсны, мый Илля ыджыдалö енэжса ва вылын. Сiйö вермö ставсö косьтыны либö ыстыны зэр да шер. Илля – гымлöн да чардлöн месай, гым да чард – сылöн кипельыс. Юлианскöй календарын (этша вылö 19. да 20. нэмын) Илля лун лöсялiс нелямынöд лун вылö шондiлöн гожся фаза бöрын. Та понда, дерт жö, сiйöс нöшта нин пондiсны чайтны вуджан датаöн.

Коми йöзкостса чайтöм-гöгöрвоöмъяс серти, кодъяслöн подулас йöзкост-христианскöй видзöдлас Илля вылö, гым дырйи Илля-пророк ветлö кымöръяс вывтiыс сьöд вöла биа доддьöн. Чайтлiсны, мый Илля радейтö ветлыны вöлöн. Та вöсна печораса сиктъясын Илля лунö ветлiсны верзьöмаяс, медым петкöдлыны пророклы сiйöс пыдди пуктöмсö. Зонъяс, нывъяс, а тшöкыда и пöрысь пöльяс верзьöмöн ветлiсны сикт кузя да сьылiсны. Вöвъяс вылын катайтчисны тайö луннас и мукöдлаын: Луздорын, Емва, Удора да Изьва бердын, кутшöмсюрö перым-коми сиктъясын.

Удорасаяс чайтлiсны, мый Илля-пророк дорйö подаöс ошъясысь. Сэкжö эскылiсны, мый мунан кö Илля лунö вöрö, ош косялас. Ёвкöджын Илля лунсö пасйылiсны куим лун чöж. Эм легенда, мый коркö пö буретш тайö луннас ошъяс чукöрöн пондöмаöсь усьласьны пода вылö. Мынтöдчыны наысь вермöмаöсь сöмын Илля-пророклöн иконаясöн ветлöм бöрын. Медым аттьöавны сiйöс таысь, сиктса олысьяс шуисны пасйыны Илля лунсö куим лун. Перым-комияс Илля лунö подасö луд вылö эз лэдзны, сы вöсна мый сэки пö яй сëйысь пемöсъяс шöйтöны вöрöд да налы позьö вöчны ставсö, мый кöсъясны. Вермас лоны, мый йöзкостса вежöрын аслыспöлöс ногöн вежсис библияса сюжет Иллялöн велöдчысь да уджсö водзö нуöдысь Елисей-пророк йылысь. Елисей аддзылöма Иллялысь шемöса кайöмсö енэжö да мöдöдчöма сэсся Вефиль карö. “Кор сiйö мунiс туй кузя, посни челядь петiсны карсьыс да сералiсны сы вылын да шуисны сылы: мун, плешка! мун, плешка! Сiйö бергöдчис да аддзис найöс да ëрис найöс Ен нимöн. И петiсны вöрысь кык энь ош да косявлiсны на пиысь нелямын кык кагаöс” (4 Цар. 2: 23-24).

Тайöн жö позьö гöгöрвоöдны и эскöм, мый Илля-пророк видзö йöзöс висьöмъясысь. Эжва катыдса Вöльдiн сиктын Илля лунö часовняö ваялiсны зэв уна козин (чими юръяс, межъясöс, дозмöръясöс да с.в.). Козинъяссö водзвыв кöсйысьлöмаöсь пророклы висьöмъясысь видзöмысь. Библияын оз эськö висьтавсьы, мый Илля вöлi бурдöдысьöн, но гижöма сы йылысь, мый юр сюянiнысь сiйö ловзьöдöма öти дöвалысь висьöмысь кулöм писö (3 Цар. 17: 19-23). Рочьяс чайтлöмаöсь, мый мыссян кö Илля лунся зэрöн, видзан асьтö висьöмысь да тшыкöдöмысь.

Сьöкыд висьтавны, кутшöма имитiс Илля лунся обычайяс вылö Библияса мöд эпизод – енэж би отсöгöн Илля вайö висьö куканьöс. Авторитета туялысьяс думысь, уна войтырлы тöдса Илля лунся öш начкан öбрад чужöма Илля-пророк образлöн да сыöдз вöвлöм енсикасъяслöн, кодъяслы и вайлöмаöсь висьяссö, öтлаасьöм пыр. Öшъяссö силöмаöсь скöр вылi енсикаслы нянь быдтöмысь, медым небзьöдны гым вылын ыджыдалысьöс. Илля лунся вира вись йылысь медводз гижлiс И. И. Лепехин, кор 1771. воын волiс Абъячойö: “Илля лунö став матiгöгöрса олысьыс чукöртчöны Абъячойö; быд сикт, а мукöддырйиыс и кык сикт öтувтчöмöн вайöдöны öшкöс либö куканьöс, начкöны сiйöс тайö луннас да öтув сëйöны”. Уна коми сиктын тайö обычайыс олiс 20. нэм заводитчытöдз. Öтувтчöмöн ньöбöм подасö начкылiсны пырджык кöнкö сикт сайын. Мындакö яй сетлiсны вичкоö, а коляссö пулiсны ю дорын пöртъясын да сëйлiсны. Начкысьны да пуны яйсö вермисны и вичкосянь матын, весиг йöр саяс. Перым-комияс видзлiсны медся пыдди пуктана пöльяс ордын буретш та вылö думыштöм вежа пуртъяс. Яй пуан лемсö нулiсны гортаныс. Перым-комияс вурлiсны яй тор рузум пытшкö да пыр новлiсны сiйöс сьöрсьыс быдсяма неминучаысь видзчысьöм могысь. Унаöн нулiсны яй торсö рöдвужыслöн гуяс вылö либö гуавлiсны нянь му вылö, медым няньыс бурджыка воис. Интереснöйторъяс Илля лунся вись вайöмын пасйöма Эжва бердса Паль сиктын. Висьö ваян пемöсъясöн танi вöлiны öш, ялавич, ыжъяс да межъяс. Колö пасйыны, мый вайлытöм на ялавичыслы быть колiс лоны тыраöн. Начкöм ялавичыслöн кö пытшкас эз вöв пытшпиыс, начкылiсны мöдöс. Танi ясыда тöдчö чужтöм идея.

Илля лун вöлi вуджан кадöн и йöзкостса овмöс календарын. Та вылö индö коми примета: “Петыр лунся зэр коссö бырöдас, а Илля лунся оз”. Илля лун вöлi ар вылö вуджан кадöн. Шулiсны весиг, Илля лунö пö лун шöрöдзыс гожöм, а лун шöр бöрас ар. Та понда тайö лунся поводдя серти урчитлiсны локтан арыслысь сямсö: “Илля лунö мича поводдя – мича ар”. Илля лунсянь дугдылiсны купайтчыны. Бырлiсны нянь дзордзалан кадся öлöмъяс. Чайтлiсны, мый сюын олысь пöлöзнича дугдылiс видзны сюсö. Илля лунöдз кöзöдса йи колiс новлыны вевттьöмöн, “медым шондi эз аддзы, а то ыстас шер”. Тайö эскöмас ясыда тöдчö христианскöй да öдзыс вöвлöм чайтöм-гöгöрвоöмъяслöн öтувтчöм – дöзмас да шерсö ыстас оз Илля-пророк, а шондi. Позис нин ворсны пöлянöн. Няньяс вöлi воöмаöсь нин либö воан выйын, оз нин ков вöлi повны, мый шумитöм да пöлясьöм понда лоö лëк поводдя. Тайö луннас став челядьыс вöчалiсны чипсанъяс да пöлянъяс и асывсянь рытöдз чипсасисны-пöлясисны. Та понда комияс нимтiсны Илля лунсö тшöтш и чипсасян, пöлясян лунöн.

Вöлiны и Илля лунся фенологическöй приметаяс. Чайтлiсны, мый кöк (гожöм кольöмлöн символ) дугдö кöкны Илля лунöдз вежон водз. Илля лунсянь позис нин вотчыны вöрын. Заводитлiсны кыбны чери – войясыс вöлiны пемыдöсь нин да позис кыйсьыны би отсöгöн. Чайтлiсны, мый Илля лун бöрын дзикöдз бырöны лöдзьяс, а öти ном виöмöн тшöтш “бырö пож тыр ном”. Но а Илля лунöдз найöс эз позь виавны, сы вöсна мый öти виöм ном пыдди “лоö пож тыр”. Илля лункöд йитлiсны кор да турун вижöдöм-гöрдöдöм. Коми йöзкостса видз-му вöдитан календарын Илля лун вöлi йитчöма турун пуктöм помасьöмкöд да нянь вундöм заводитчöмкöд. Торйöн нин пыдди пуктылiсны Илля лунсö кöрвидзысьяс, и не сöмын войвыв комияс, но и яран, кодъяс вичко празникъяссö эз ëна пыдди пуктывны, кöть и вöлiны пыртöмаöсь. Август помланьö кöръяслöн помасьö гöн вежöмыс, дугдöны дöзмöдчыны лöдзьяс, номйыс лоö этша, абу нин вывтi жар. Тайö кадсяньыс кöръясöс позьö нин доддявны кузь туйö. Илля лунö Ыджыдму (Большеземельскöй) тундраса кöрвидзысьяс важысянь гажöдчылiсны водзвыв сëрнитчöм инын. Сэтчö чукöртчылiс став кöр стада кутысьыс, кодъяс гожöмнас йирсьöдiсны кöръяссö саридз дорын. Сэнi вермасисны кöра-даддяяс, дасьтiсны уна сëян. Сэсся кöрвидзысьяс ньöжйöникöн кыссисны лунвывлань, тöвся йирсянiнъясö, матöджык оланiнланьыс. Тайö традицияыс эм и öнi на.

Коми фольклористъяс да этнографъяс шуöны, мый абу öтчыд кывлöмаöсь Илля Муромеч йылысь былина сюжет юкöнъяс (кöть эськö гижöдъясын да чукöртöм материалъясын на вылö ыстöдъяс абуöсь), мый эмöсь Илля Муромеч йылысь сюжетлöн мойда вариантъяс. Но эм сöмын öти коми кывъя былиналöн дзонь текст. Сiйöс видзöны Коми канвойтыр музейлöн наука архивын паспорт тöдмöгъястöг, гижöдыс 20. нэмлöн 20. воясся. Сылöн подулас “Илля Муромец и Идолище” былиналöн сюжет, кодi ëна паськалöма войвыв роч эпическöй традицияын. Эмöсь и элементъяс “Илля Муромец и Калика перехожий” да “Ссора Ильи с князем Владимиром” былинаысь. Сюжет тэчасас эмöсь татшöм мотивъяс: ентöм Идол пуксьöдö еджыд сарöс му тюрмаö да босьтö Еджыд сармусö аслыс; думщикъяс да сöветникъяс шуöны ыстыны багатырла сарлысь воксö Калигаöс (< роч калика) да сетöны корсьны Илля Муромечöс куим кад: квайт лун, квайт тöлысь да квайт во; Калига аддзö Илля Муромечöс дас кык во мысти ылi саридзысь тупу улысь, садьмöдö сiйöс да висьталö неминуча йывсьыс; Илля Муромеч вежсьö Калигакöд паськöмнас да багатыр вöв вылын мöдöдчö Идол дорö; Илля Муромеч воö Идоллöн гаж вылö, Идол оз тöд сiйöс да ошйысьö выннас, шуö, мый вермас Илля Муромечöс, Илля Муромеч ирония сорöн öткодялö сiйöс горш öшкöд да мунö тöлöдчыны паськыд видз вылö. Мöд луннас Илля Муромеч бара воö пир вылö, но оз висьтав збыль нимсö. Идол бара ошйысьö вынйöрнас. Илля Муромеч öткодялö сiйöс горш понкöд да барö петö видз вылö тöлöдчыны. Коймöд луннас Илля Муромеч бара локтö Идол дорö да висьталö нин ассьыс збыль нимсö. Идол дорö сiйöс кöртö да нуöдö му тюрмаö. Мунiгас Илля Муромеч орöдö чепъяссö, виö Идолöс, мездö сарöс, мунö Калига дорö да ыстö сiйöс бöр кабалаöн, мый еджыд сарлöн кулöм бöрын сарнас лоö сылöн вокыс. Йöз радлöны Калигалöн веськöдлöмлы. Гижöдас устнöй эпикаа стильсö абу вежöма, текстсö юклöма визьяс вылö: Важöн пö вöлi белöй сар,/ Белöй сарöс полонö босьтiс,/ Полонитiс невернöй идол;/ Землянöй тюрмаö йöртiс,/ Белöй сарствоын йöзöс шог босьтiс,/ Шогысь и висьöм ударитiс,/ Думшикъяс, сöветникъяс / Пондiсны дум думайтны,/ Сöветъяс сöветуйтавны... Вöрöгöс да вöрöглысь вынйöрсö пасъян эпитетъяс (“ентöм идол”), йöзкост-риторическöй формулаяс (“...синтöмъяс синмасьны, коктöмъяс кокасьны, висьысьяс бурдавны, нечистöйысь мынiны”), а сiдзжö и канса юридическöй понятиеяс (“манипест, кабала”) да мукöд реалия подув вылын позьö чайтны, мый былиналöн коми текстыс чужис 19.-20. нэм заводитчигöн важ крестлы юрбитысьяс пиын, мый комиöдiгас Илля Муромеч йылысь роч былина сюжетъяссö нарошнö вежöмаöсь, текстсö стилизуйтöмаöсь роч устнöй эпикаа традиция серти.

Былина сюжетас пыртöма герой-двойникöс, кодi öтнас вермö юöртны Илля Муромечлы Идоллöн уськöдчöм йылысь. Та пыр коми висьталысьыс аслыспöлöса петкöдлö синтöм сьылысь Калигалысь образсö. Коми текстас Илля Муромеч мыччöдö йöзлысь кöсйöмсö: сылöн кабала серти еджыд сарлöн кулöм бöрын Еджыд сармуын медыджыд мортнас лоö сарлöн вокыс-пöлыс, кодi пöртö олöмö йöзлысь кöсйöмсö лючки юралöм йылысь.

Коми версияын роч эпическöй багатырлöн образыс роч сюжетъяс дорысь ëнджыка социологизируйтöма. Функцияяс боксяньыс сiйö матын шемöса мойдъясса геройяслы.

Йи кылалöм вöлi тöдчанаторйöн войвыв крестьяна олöмын. Войвылын туйяс ëна эз вöвны, найöс вежлiсны юяс. Чери кыйöм сетлiс позянлун тöдчымöн вежны да озырмöдны тулысланьыс ëна гöльмöм сëян. Комияс оз весьшöрö шуны: “Ю воссяс – сëян вежсяс”. Йи мунöмкöд йитчылiсны и приметаяс: “Йи кылавтöдз гымалас – “ош” (сьöкыд) во лоас”; “Вöрзяс кö йиыс авъя лунö (вежалунö, воторникö, четвергö да субöтаö), йöла гожöм лоö, а шöрлунö либö пекничаö кö, сiдзкö, чери пондас бура сюрны”; “Кылалас кö йиыс ньöжйö да ыджыд костъясöн либö сылас места вылас, тулысыс да гожöмыс лоö сьöкыд”; “Колясны кö йи кылалiгас берегас йи локöбъяс, лоö сьöкыд во”; “Йи дорышыс кö кольö вылö, ыджыд ва лоö”; “Веськалас кö курöг йи вылö, бура воас ид” да с.в. Йи кылалöм бöрын медводзöн кыйöм сирлысь видзöдiсны муссö. Вöлi кö мускыс дзоньнас гöрд, чайтлiсны, мый гожöмыс лоö лëк. Вöлi кö мускыслöн вылi помыс кызджык – водз кöдза водзын, шöрыс кö вöлi кызджык – шöр кöдза, бöрыс – сëр кöдза.

Водзтi изьватаслöн вöлi йи колльöдöм нима календар празник. Джуджыд керöсын чукöртчылiс став войтырыс, и кор йиыс пондылiс кылавны, сiйöс бöрдöдчöмсорöн колльöдлiсны. Колльöдiсны шемöса пос, кодi служитiс йöзлы тöв чöж. Йи колльöдан öбрад пасйöма и удмуртъяслысь.

Литература: Гагарин, Дукарт 1968, Жилина, Сорвачëва 1971, Конаков 1993, Кочиев 1849, Сахарова, Сельков 1976, Смирнов 1891.

Н. Конаков
ЙИРКАП – Емватас преданиеса герой.

Йиркап овлöма Эжва катыдса Кони сиктын вöравлöмöн. Öтчыд Синдор ты дорын сiйö аддзöма Вöрсалысь да Васалысь тышкасьöм. Васа вермö вöлöм. И Йиркап лыйöма Васалы ньöввужйысь. Отсöгсьыс Вöрса туйдöма Йиркаплы корсьны шуд вайысь ас пу. Йиркап дыр корсьöма пусö, но аддзöма жö. Мöд версия серти, Йиркап аддзöма ассьыс пусö ачыс, кор казялöма, мый понйыс куим лун (либö куим во) чöж помкатöг увтö öти и сiйö жö пуö. Преданиелöн быд вариантын висьтавсьö, мый öтчыд керыштöмысь пусьыс сöдзтысьöма вир. Йиркап пöрöдöма пусö (пожöмсö) да вöчöма лямпа. Мöд версия серти, пуыс ачыс висьталöма Йиркаплы, мый сiйö сылöн ас пуыс да мый Йиркап вермас вöчны сыысь, мый кöсъяс. Йиркап вöчö лямпа. Коймöд вариантас пуыс тшöктö Йиркаплы вöчны лямпа пöв либö пуктыны чагсö бöр. Ас пуысь вöчöм лямпалöн (лямпа пöвлöн) öдыс вöлöма шемöсмöдана. Пач абу удитлöма ваймыны, а Йиркап бöр нин волöма 366 км сайса лэч туйяс вылысь. Синдор ты муртса вевттьысьлöма вöсни йиöн, а Йиркап тöвзьöма нин сы кузя вöравны. Лямпаыс ачыс нуöма, колöма сöмын мöвпыштны, кытчö. Лямпасö сувтöдiгöн колöма шыбитны ас водзад шапка да кепысь; мед лямпаыс сулалiс, колöма пуктыны сы вылö шапка.

Сиктса еретнича öтчыд шуöма Йиркаплы, мый ю мöдарас пондас йирсьыны лöз кöр. Кыяс кö сiйöс Йиркап, лоас медся сюсь да шуда вöралысьöн. Мöд асывнас Йиркаплöн мамыс нянь пöжалiгöн аддзöма кöрсö да садьмöдöма Йиркапöс. Йиркап чеччöма, питшöгас сюйöма пöсь ид нянь да шемöса лямпанас шыбитчöма вöтöдны кöрсö. Вöтчöма Уралöдз. Сэнi кöрыс пондöма вильдавны изъяс вылас, и Йиркап вöтöдöма сiйöс. Сэк лöз кöрыд тымбыльтчöма юр вомöныс и пöрöма зэв мича нылö. Нылыс пондöма корны, мед Йиркап оз вöрöд сiйöс. Но Йиркап сiйöс виöма, перйöма сьöлöмсö, сюйöма питшöгас и мöдöдчöма гортас. Сиктас воигöн сiйö чегöма сьöрсьыс босьтöм няньсö шöри – няньыс шоныдсьыс руалöма на. Йиркап нуöма кöр-нывлысь сьöлöмсö еретничалы да пуктöма пызан вылас. Мöд версия серти, еретничаыс заклад вартöма сыкöд, мый Йиркап кокниа кыяс комын кöрöс, а вот комын öтиöдсö, лöз кöрсö, вины оз вермы. И збыль, Йиркап зэв öдйö кыйöма комын кöрöс, а комын öтиöдыслысь дыр абу вермöма аддзыны кок туйсö. Бöрыннас сэсся аддзöма жö кöрсö, дыр вöтчöма, но векжö вöтöдöма. Кöрыс пöрöма катшаö, но лэбзьыны абу вермöма, сы вöсна мый Йиркап чегöма бордсö беддьöн. Йиркап виöма сiйöс. Вöлöмкö, кöрнас вöлöма еретничалöн нылыс.

Йиркап вöйöма сылöн жö восьтöм Синдор тыö вуджигас. Сiйö сьöктаммöма вöлöм нямöд пожъялан ваысь. Öти версия серти, нямöд пожъялан ванас сiйöс юктöдöмаöсь мукöд вöралысьяс, сы вöсна мый Йиркап понда найö пыр кольлöмаöсь кыйдöстöг. Мöд версияын нямöд ванас сiйöс юктöдöма мамыс мусукыслöн тшöктöм серти. Мусукыс тшöктöма кöтöдны нямöдсö ырöшын да юктöдны Йиркапöс, а то пö Йиркап кыяс став звер-пöткасö да найö куласны тшыглы. Коймöд версияын нямöдсö кöтöдöма винаын да юктöдöма Йиркапöс ичиньыс тунлöн тшöктöм серти.

Йиркапкöд öтвыв згинитöма и сылöн лямпаыс. Öти вариантын висьтавсьö, мый йисö поткöдöма прöстöй лямпа пöлыс, а шемöсаыс нетшыштчöма да тшукöма (буракö, ас пуысь кольöм) мырйö. Мöд версияын Йиркап пондöма вöйны да мездысьöм могысь разьöма лямпа кöртöдсö. И шемöса лямпаыс шуöма, мый эз кö пö Йиркап разь кöртöдсö, лямпаыс эськö кыскис сiйöс васьыс, а тадз сiйö помалiс и асьсö, и лямпасö. Сэсся лямпаыс нетшыштчöма да лэбöма джуджыд пожöм пыр. Вöянiнсö нимтöмаöсь Йиркапулöн.

Литература: Доронин 1947, Рочев 1984.

Н. Конаков
ЙÖЛА быдлаын, йöлöга ем., печ., йöлэга вэ., ëла лл., говк п.-к.

Зарань да Пера йылысь преданиеяс серти, йöла – Пармалöн вöчöмтор. Кор Шондiлöн нылыс Зарань бöр кöсйöма кайны енэжö, Парма-мам, кодi быдтöма Зараньлысь да Пералысь челядьсö, дöзмöма да вöчöма йöла. Йöла торкалöма Зараньлысь чуксасьöмсö да челядьыслысь горзöмсö, и найö абу аддзöмаöсь öта-мöдсö. Шондi нывлы ковмöма кольны челядьсö Му вылö.

Комияс чайтöны, мый йöла эм сöмын таладор югыдын. Йöла абутöм серти, кыдзи и вуджöр абутöм серти, позьö тöдмавны мöдар югыдсаöс (видзöд вуджöр I). Тадз, комияс чайтöны, мый Вöрса понлöн увтöмыс оз йöлöгаав.

Мукöддырйиыс дзебан бöрдöдчанкывъясын кулöмаяслöн муюгыдыс, “кысянь ни зарни синлыска синъясöн он аддзы, ни эзысь кöлича пельöн он кыв”, сэтшöм ин, “кытчи тöвру оз инмывлы, кытчи йöла оз сибавлы”. Öтл. не ас кулöмöн кулöмаясöс дзеблiсны сэтчö, кытчöдз эз судз жыннян гор, жыннян шы, жыннян йöла (видзöд дзебöм).

Йöн петкöдлiсны вундан кад заводитчигöн. Печора вылын нянь му вылысь петкöдлiсны туй вылö медыджыд йöнсö да бöрдлiсны: “Шондiбанöй, тэ мича турунвиж платтьöа, дзордзалан алöй дзоридзöн. Кöть и зэв дона тэ миян, нуам тэнö сэтчö. Танi тэнö кераласны, вундасны. Петкöдам тэнö сэтчö, пондан овны-вывны, мича платтьööн дзордзавны”. Йöнсö петкöдлiсны туй вылö да садитлiсны сэтчö. Чайтiсны, мый таысь бырас и мукöд йöн-ëгыс. Перым-комияслöн тайö öбрадыс вöлi мöд пöлöс. Ёгсö нетшкылiсны да кöртавлiсны öкмысöн-öкмысöн. Чукöръяссö нулiсны ва дорö вужъяснас водзлань. Öти нуис ëгсö, а мöд вачкылiс ньöрйöн. Мукöдыс бöрдöдчисны: “Му вылысь тэнö нетшкам, мед эн быдмы сэсся. Нетшкам тэнö, мед бöр эн кос. Став рöдтö тэнсьыд нетшкам. Став чукöртö тэнсьыд нетшкам, став чой-воктö”. Эмöсь и кузьджык бöрдöдчанкывъяс.

Перым-комияс петкöдлiсны йöнсö чинысь тöлысь дырйи. Перйылiсны йöнсö вужнас да бöрдлiсны: “Ок, тэ миян дона, тэныд танi лëк овныд. Нуам тэнö мöдлаö, кöнi тöв оз нетшкы, кöнi оз дойдны ни гöрйöн, ни агасöн. Тэ, донаöй миян, нуöд став рöдтö, нуöд му вывсьыс”. Йöнсö петкöдлiсны туй вылö да садитлiсны сэтчö.

Литература: Климов 1991, Микушев, Чисталëв 1968, Сахарова да мукöд 1976.

Н. Конаков
ЙÖРА вэ., печ., скр., шс., п.-к. (косов.); лола ем., уэ., уд., п.-к.; асахат зюзд. (< роч сохатый); кыбöрда (< яран habarta); кузь кок вэ.; вöрмöс п.-к.

Коми этиологическöй мифъяс серти, йöраöс вöчис Омöль, а Ен содтiс торъя лы, кодлöн öти помыс вöлi паськыдджык, а мöдыс векниджык. Та бöрын пондiсны чайтны, мый йöрасö вöчис Ен. Йöра – ай вынлöн да вермöмлунлöн символ. Сы вылын верзьöмöн ветлö фольклорса Кудым-Ош. Йöра вылö кыйсьыны вöлi ошкысь öпаснöйджык: “Ош вылö мунан – дасьты вольпась, йöра вылö – гу да горт”. Видзöдласыс тайö кык гырысь вöрпа вылас вöлi зэв öткодь. Шуам, эскылiсны, мый гыжсö-пиньсö нетшкытöг виöм ош вермис ловзьыны, а йöра вермис ловзьыны, кокчöрйыс кö вöлi керавтöм. Чайтлiсны, мый ошкöс да йöраöс кыйны кужысь вöралысьяслы отсасьöны вöрса ловъяс. Накöд вöралысьяс йитчöны пö асланыс тун кужанлунъяс отсöгöн.

Водзтi йöра кыйöм вöлi зэв тöдчана, торйöн нин тувсов чарöм кузя вöтлiгöн, сы вöсна мый позис заптыны яй дзоньнас тулыс-гожöм кежлö. Та вылö индö и коми шусьöг “Талун пöтöсь, а аски, гашкö, йöра öшинь улö воас”. Шусьöгыс – Эжва катыдын да Удораын вись вайöм йылысь сюжетлöн реминисценция. Висьö вайлiсны йöраöс либö кöрöс, кодi Богородича лунö волывлiс часовня (вичко) дорö.

Öнi на керка öклупеньясö öшйöдлöны сюра (пырджык збыль сюра) йöра юр серпас. Эжва бердысь сюрöм шöр нэмъясся вöралан календарын энь йöра серпас восьтö арся-тöвся кадколаст.