Ад быдлаын (< роч); ад гуран скр., шс.; вакрамеш

Н. Конаков

Коми мифологияын Ен кодь либö Омöль (Куль) кодь жö вöчысь-артмöдысь аньен абу. Мукöд коми мифын казьтывсьö Енлöн гöтырыс, код вöсна пинясисны вокъяс-демиургъяс, но сылöн асшöр серпасыс эз сöвмы. Зыряналöн эскöмъяс серти, первой нывбаба лои пеж кутысьöн. Пежсö сылы сетiс Омöль, кодi вöчис Енмöн заводитöм нывбабалысь яндзимсö. Мöд сюрöс серти, öдзыс нывбаба вöлöма сöстöмöн, но босьтöма ас вылас Омöльлöн лёкöдчöмысь муюгыдсö тыртысь пежсö. Перым-коми мифъясын медводдза нывбабалы вичмöдöма вылiджык тшупöд: сэнi йöзыс артмöмаöсь му выв зонсянь (Пера) да öшкамöшка кузя енэжысь лэччöм нывсянь (Зарань), Шондiлöн нывсянь. Комилöн чудь йылысь текстъясын нывбабалöн ненога вöчöмторъясысь енэжыс торъялö муысь да артмö историческöй кад-ылдöс.

Кöть и пернатöмлуна коми мифологияын аньенъяс эз вöвны, векжö сöвмис кристианалысь босьтöм вежа эньловъяслöн культ. Торйöн нин пыддипуктылicны Енмамöс (нывбабаяс дор сувтысь), Параскева Пятницаöс (нывбаба могъясын дорйысь), Варвараöс (бурдöдысь) да с.в. Эскисны, мый найö отсасьöны кага вайигöн, нывбаба висьöмъясын да уджъясын.

Комияслöн медулыс мифологияса персонажъяс пиысь медся тöдсаясыс вöр ань да вауса (‘вакульяс, нывбаба васаяс’), но найöс нимтöма вöрсалöн да васалöн гöтыръясöн. Мукöддырйи вöрса да васа аньяс лоöны мортлöн (багатырлöн, вöралысьлöн) гöтырöн. Шуам, перым-коми, Эжва кытыдса да луза-леткаса преданиеясын Пера вермö вöрсаöс да гöтрасьö сылöн гöтыр вылас. Изьваса да Эжва кывтыдса эпическöй текстъясын “Шомвуква” да “Дас кык ая-пиа” медтом пиыс вермö васа Глöтöс, васа да вöрса ошкöс да гöтрасьö налöн ныв вылын. Коми вöралысьяслöн быличкаясын гöтырсö не ас кадö казьтыштысь вöралысь ордö локтö гöтырыс кодь вöрса нывбаба да олö сыкöд вöралан кад чöжыс. Вöралысь мынтöдчö ылöдчана гöтырсьыс, кор койыштö сы вылö пуöм ва, нöйтö сiйöс пелысь ньöрйöн, кольö мöдлапöлö либö мынтöдчö сыысь чужан сиктланьыс матыстчигöн (вичко аддзöм бöрын вöрса нывбаба шыбитчö пыжсьыс ваö). Перым-коми быличкаясын тшöкыда казьтывсьöны нывбаба мыгöра йöзлы лёк вöчысь мифическöй ловъяс Калян.

Перым-коми преданиеясын нывбабаяс пырджык öтвесьтынöсь мужичöйяскöд, нывбабаяс асшöръяöсь, ыджыдаланаöсь (рöд пуктысьяс, тунъяслöн да багатыръяслöн мамъясныс: Чикысь, Потöсь, Пöвсин, Зюздя, вогул öксань Костö). Коми преданиеясын нывбаба тшöкыдджыка лоö öтдоръясысь страдайтысь, олöм пуктысь мортöн. Шуам, вöтлöм чудь йылысь, Удораса öксань йылысь преданиеясын нывбаба бöрыньтчö кристос эскöмö пыртöмысь да вöйтчö. Тадзи жö помалö асьсö и пыртöм ныв Улляна, кор öтдортö печораса тун Кыскуöс. Нывлысь паныд сувтöмсö петкöдлысь вöйтчöм мотив (кыдз дзик öти конфликтсö бырöдан ног) паныдасьлö и коми балладаясын.

Пепым-коми мойдъясын нывбаба лоö асшöр персонажöн, а зыряналöн сiйö петкöдчö геройлöн либö антигеройлöн кыйдöсöн, кöсъяна объектöн, кыдзи и кимöститчанторъяс (видзöд тшöтш мич). Коми öбрада поэзияын нывбабалöн серпасыс воссьö кык ракурсын: öти боксянь, сiйö страдайтö (сы вöсна мый öбрада поэзияын, а торйöн нин кöлысьдырся бöрдöдчöмъясын нывбабаяс мыччöдöны асьнысö), мöд боксянь, сылöн образыс кыпöдчö енкöла метафораясöдз да öткодялöмъясöдз. Буракö, буретш öбрада поэзияын медъёна тöдчö нывбаба сюрöслöн, кыдз Ыджыд Мамлöн, Мичлун идеаллöн да Енкöла Муслунлöн мифологическöй тöдчанлуныс.

Нывбабаясöс кык ногöн донъялöмыс тöдчис и оласногын. Тадз, нывбабаöс лыддьылiсны, öтар боксянь, пеж кутысьöн (видзöд пеж) да сылы пыр колiс кыв ни джын шутöг кывзысьны мужичöйлысь (айлысь, верöслысь, воклысь). А мöдар боксянь, йöзкотырас сылöн статусыс вöлi попъяс да арта йöз серти вылынджык да та понда сылы оз ков вöлi налы копрасьны.

Литература: Климов 1990, Налимов 1908, Осипов 1986, Пиотровский, Налимов 1912, Fokos-Fuchs 1956.

О. Уляшев

Комияслöн уна мукöд войтырлöн моз жö анькытшлöн вежöртас подулын куйлö рöдмöм идея. Вермас лоны, мый рöдмöм идеяыс чужис анькытш пуртöслöн фаллическöй мыгöр да тусь лыд пондаыс. Мойда фольклорын анькытшкöд йитчöма шемöса чужöм мотив. Шуам, тури уськöдас челядьтöм дöвалы водздöраас куим анькытш тусь, дöваыд сёяс найöс да чужтас сэсся куим пиöс-багатырöс. Сизимдас арöса челядьтöм пöль-пöч пуасны аддзöм анькытш тусьысь шыд. Налöн чужас пи. Öти коми миф серти, ош вöлöма Енлöн пиöн и водзсö олöма енэжын. Öтчыд сiйö аддзöма, мый му вылас кутшöмкö нывбаба уськöдöма анькытш тусь джын. Лэччöма енэжсьыс да сёйöма тусьсö. Та бöрын Енмыд кольöма ошсö пыр кежлö му вылö. Анькытшлöн кузь гумйыс, кодi ачыс вермö кыссьыны пыкöд кузя вывлань, петкöдчö комияслöн паськыда тöдса “енэжö сод” йылысь мотивын.

Анькытш гум кузя енэжö ветлöм идея веськыда йитчö сылöн шöр семантикакöд – рöдмöм идеякöд. Ай-мамтöм чоя-вокалöн бырö сёяныс. Гöбöчысь найö аддзöны анькытш тусь да юкöны шöри. Зонка уськöдö анькытш тусь джынсö джодж костö, сыысь быдмö енэжöдз анькытш. Челядь кайöны анькытш гум кузяыс енэжö, аддзöны керкатор да пырöны сэтчö. Керкаас кутшöмкö синтöм пöль изö вöлöм шобдi. Челядь гусялöны пызьтöг пöжалысь шемöса изкисö да лэччöны анькытш гум кузя му вылö. Тайö мойдыслöн мöд вариантын керкаторъяс олö синтöм Яга-Баба да изö анькытш. Челядь гусялöны сылысь анькытш пызьсö.

Литература: Климов 1991, Ожегова 1989, Старцев 1929, Wichmann 1916.

Н. Конаков
АНЬТУЙ быдлаын – нывбабалы урчитöм сям, мывкыд, кужöм, сюсьлун нывбаба уджъясын.

Аньтуй < ань + туй. В.И.Лыткин да Е.С.Гуляев торйöдöны этимология боксянь 1) туй (визь, визьöг, мунанiн, пурысь, код кузя восьлалöны, мунöны) < öтувперым *tj || финн tie ‘туй’ | эст tee ‘туй’ == перымöдзса *teje да 2) туй ‘туяна, шогмана, лöсялана’ < öтувкоми *tuj || финн tajuta ‘гöгöрвоны, вежöртны’, tajuton ‘вежöртöм’ | манси taji ‘туйны, ладмыны, лöсявны’ | хант tyjan tujil ‘оз туй, оз позь’ == перымöдзса *tajз-. Но коми кывйын аньтуй пырö ‘веськыд – юрпöла’, ‘туяна – туйтöм’, ‘пемöслöн, мортлöн либö мыйлöнкö кутшöмкö функцияяс вöчны кужöм – кужтöмлун’ вежöртаса кывъяс лыдö: туйны, туяна, туйтöм, морттуй ‘öбича, сям, мортöн лоны кужöмлун’, немöстуй ‘шогмытöмлун, омöлик’, киподтуй ‘кужанлун, масьтерлун’ (öткодяв роч путёвый ‘бур, туяна’, непутёвый ‘туйтöм’, беспутный ‘вежöртöм’).

Öткымын коми легенда серти, Омöль артмöдöма медводдза нывбабасö буретш сы вылö, медым Енмöн вöчöм мортыс пондас пинясьны да та пыр пöрас янö. Ен сэк шуöма, мый чужис кö нин нывбаба, мед найö луннас кöть кыдз пинясясны, но войнас мед вöлi мужичöйлы сыкöд лöсьыд. Мукöд сюжет серти, Ен нарошнö артмöдöма мужичöйлы “ёртöс” да отсасьысьöс. Тайöн Ен пасйö аньтуйсö, кыдз нывбабалы урчитöм могъяс олöмö пöртöм мужичöйкöд йитöдын.

Кутшöмсюрö коми мифын подулавсьö мужичöй да нывбаба костын могъяс торйöдöм: мужичöйлы Ен индö вöравны, вайны гортö кыйдöс, вöв да пон видзны, а нывбабалы вичмö гортса удж: горт, челядь видзöм, мöс да кань дöзьöритöм. Зыряна донъявлiсны мужичöйлысь сямсö (морттуй) вöралан мойвиöм сертиыс, пуртöн да черöн вöдитчöм сертиыс, а нывбабалысь сямсö (аньтуйсö) – нянь да шöрт артмöм серти, горткотырсаяскöд да гортса пемöсъяскöд ноксьöм серти (видзöд мöс, нянь).

Зыряна костын ёнакодь паськалöм чайтöм-гöгöрвоöмъяс серти, мифа кадö нывбабаяс юкöмаöсь ас костаныс пежсö, мед муыс оз вöй сы пытшкö. Сэксянь налöн эмöсь торъя шедтöдъяс, кöть и кутöны пытшканыс пеж. Тайö шедтöдъяс пондаыс налы оз ков копрасьны попъяслы ни арта войтырлы, найö вермöны висьтавны видзöдласнысö горткотырса сьöкыдлунъяс разигöн, а месайыс кö абу гортын, и бергöдны став гортса могсö.

Ставсö öтувтöмöн аньтуйöн комияс пасйылiсны нывбаба могъяс да инöдъяс горткотырын да йöзкотырын, нывбаба уджъяс вöчöм, йöзöс да вöр-ва донъялöм, мöд кывъясöн, олöмö арт да гармония пыртны кужöм.

Литература: Лыткин, Гуляев 1070, Налимов Материалы…, Fokos-Fuchs 1951, АЧМ.

О. Уляшев
АРАЛЬ уэ., изь., печ.; аральö-пöльö уд.; арале-пöле вэ.; арöй-дрöй уэ., уд. (< коми арзыны ‘равзыны, горзыны’), – лов – вöр керка месай.

Араль петкöдчö пырджык роч “Морозко” сяма мойдъясын: ичинь тшöктö пöльыслы нуны мустöм ичиньводз нывсö вöр керкаö; пöльлöн öтнасöн кольöм нылыс дасьтö сёян, чöсмöдö шырöс (гежöдджыка – петукöс); вой шöрын локтö Араль да корö ворсны гораньысь. Шырыд чöсмöдöмысь аттьöалöм пыдди отсалö нывкалы, эзысь жыннянöн котралö пельöсысь пельöсö. Петук горзiгöн Араль усьö да пöрö зарниö да эзысьö. Пöчлöн аслас нылыс мунас жö озырлуныдла, но шырöс оз чöсмöд; ворсiгöн Аральыд кутас нывсö да беддьöн вартас-вияс. Тайö мойдас Аральлöн вöр керкаö локтöм мотив матын “Нинпу кока ошлöн” (Верлиоки) дзескöдысьяс дiнö локтöм мотивлы. Такöд тшöтш Араль висьталö ассьыс туйсö, лыддьöдлö вуджöм шоръяссö да юяссö и сьылö: ”Муна ме, муна, ачым мургыль ыджда, тошкöй корöсь ыджда”.

Кыкнан пöлöс мойдас (“Морозко” да “Нинпу кока ош”) Аральлöн (либö мургыль-пöльлöн) образыс вежласьö ошлöн образкöд, а абу мойда прозаын (быличкаясын) сюрöны параллельяс вöрса ловкöд, вöрсакöд, вöр керкаса месайкöд, кодi вöтлö (накажитö) вöралысьöс либö вермасьö сыкöд.

Дзоньнас Аральлöн образыс, буракö, артмö уна сикас войтыр пöвстын паськалöм мутлак багатыръяслöн образъясысь, сы вöсна мый “мургыль-пöль, корöсь-тош” тшöкыда паныдасьлö шемöса мойдъясын багатыръяс йылысь: нöйтö кык пусьысь багатыр вокöс; кöнi сiйöс кöртавлiс коймöд багатыр, сэтчö кольö тош прать; пышйö улiса муюгыдö, сэнi сiйöс суöдö да виö мойдса герой да öти сайысь мездö мича нывъясöс.