Ад быдлаын (< роч); ад гуран скр., шс.; вакрамеш

Н. Конаков

Комияслöн чайтöм-гöгöрвоöмъяс серти, вöр-ваын быд мортлöн эм магияа вына ас чвет. Тайö дзоридзыс петкöдчö олöм чöж сöмын öтчыд, да сiйöс асалысь морт вермас видзны асьсö быд висьöмысь да неминучаысь. Ас чвет тöдмавны сьöкыд: сылöн оз овлы конкрет дзоридзалан мыгöр, кад ни ин. Кольöмны сöмын зэв гудыр чайтöмъяс сы йылысь, мый гумсö чегигöн пö сöз пыддиыс сöдзö вир. Уна информатор жаляддза казьтылö, мый, буракö, вочаавлöмны ас чветсö, кодi шемöсмöдöма найöс тешкодь мыгöрнас, лэчыд рöмнас либö чужтöма кутшöмкö аслыспöлöс аскылöмъяс, но абу нетшыштöмны гöгöрвотöмнысла либö кöсйöмны бöр мунiгас нетшыштны.

Кöнсюрö ас чвет йылысь эскöмъяс гартчöмны европаса войтыръяс пиын паськалöм преданиеяскöд папоротник йылысь.

Литература: АЧМ.

И. Ильина
БАДЬ ВУЖЬЯ вэ.; ва вужья уд.; ва вужля вэ; кокора вэ., изь., печ. ‘вужля’ – вужляö пöрöм васа лов.

Йи кылалiгöн кытыськö вайöм вужля пондö вöйтны йöзöс. Сöмын вужлясö кералöм да сотöм бöрын матiгöгöрас дугдöны вöйны йöз.

Коми мифология серти, бисö йöзлы сетiс Ен. Ен артмöдлöма бисö зэв мича гöрд бана мортöн, но сiйö пондöма лёк вöчны, ветлыны му вывтi да öзтавны вöръяс. Сэк Ен пöртöма бисö биа изйö да тэгйö, да йöзыс пондöмаöсь судзöдны бива кöрт да истöг отсöгöн би. Перым-коми фольклорса Пера йылысь легендаын Пера вайö йöзлы енэжса би. Сiйö кайö öшкамöшка кузя енэжö да кöсйö матыстчыны Шондi бердö, мед чегны тор, но оз вермы. Сэсся Шондi ёна скöрмö Зарань нылыслöн да Пералöн гöтрасьöм вылö да пондö ёна пöжны, кöсйысьö сотны ставсö мусö. Пера сизим пиыскöд зэвтöны ньöввужъяснысö да лэдзöны ньöвъяссö Шондiлань. Шондiысь усьö öти ыджыд тор да торъялö уна би вылö парма (Урал бердса вöр) пасьта, а му вылын пöжöмыс помасьö. Мойдъясын тöдтöм пöль сетö бисö вöрын битöг кольöм вöралысьяслы вöвлытöмтор мичаа висьталöмысь. Перым-коми “Кам дорö била” мойдын би видзысьöн петкöдчö Кам, кодi олö вöр керкаын да пöльтö пачас би. Кам дорö била ыстöм зонка тöдмалö Камлысь нöдкыв, гусялö öгыр да сьöрсьыс босьтöм кимöститчанторъяс отсöгöн пышйö. Бöрыннас сылöн чойыс (сэк кежлö найö ай-мамтöммöны) кимöститчанторъяс да велöдöм отсöгöн, кодъясöс сылы сетö тшыкöдчысь ань, виö Камöс. Челядь асьныс лоöны би видзысьясöн да юксьöны бинас йöзкöд.

Комияслöн ловъяс-би месайяс йылысь чайтöм-гöгöрвоöмъяс абу пасйöма. Кутшöмкö вын би вылын вöлi пывсян айкалöн да рыныш айкалöн. Найö вермисны мыйыськö лöгасьны да мунны оланiнсьыныс, и сэн вермис лоны пöжар. Нöдкывъясын биыс öткодявсьö лэбачкöд, кодi котöртö потш кузя да уськöдалö гöрд колькъяс. Перым-комияс чайтлiсны, мый öти сиктын ыджыд пöжар лоöма сы вöсна, мый кык зонка куштöмаöсь лэбач поз, вайöмаöсь лэбачпиянсö гортас да сетöмаöсь каньлы. Некымын лун мысти йöзыс аддзöмаöсь лэбачöс, кодлöн вомас вöлöма öзйысь сартас. Сiйö пуксьыштлöма поз куштысьяслöн идзас вевта керкаяс вылас да керкаясыс öзйöмаöсь.

Коркö вöвлöм би культлöн колясъяс эмöсь вöралысьяслöн олöмын. Сёйтöдз вöралысьяс быть вердлiсны бисö – шыблавлiсны биö нянь торпыриг. Биö оз позь вöлi сьöлавны, а торйöн нин кудзавны – кывзывсьтöмъяслöн вомдорыс либö кудзасянiныс лöмöссьылiс. Бисö оз вöлi позь талявны, кусöдны колiс ваöн. Билöн вöлi сöстöммöдан вын. Торъя вын вöлi зыртöмöн судзöдöм билöн – дзурк билöн. XX нэм заводитчигöн на öти сыктывбердса сиктын крестьяна вывтi рöдмöм кöинъясысь мынтöдчöм могысь зыртöмöн судзöдöмны би да сотöмны öти кыйöм кöинöс. Сотiганыс бура кыйöдöмны, мед некутшöм тор соттöг эз коль.

Рочьяслöн моз жö, комияслöн Благöвештшенньö лун пасйис тулыс воöм. Тайö лун кежлас вöралысьяс дугöдлiсны дона куа вöрпа вылö кыйсьöмсö да бергöдчылiсны гортаныс. Крестьяналы Благöвештшенньö лун кежлö быть колiс помавны турун вайöм. Благöвештшенньö лунö оз позь вöлi уджавны. Орлiс кö кага дöрöмлöн кизьыс, мамыслы позис сöмын муртса кöлавны кизьсö, рытнас колiс бöр нетшыштны да прамöя вурны позис сöмын аскинас. Обса комилöн Благöвештшенньö лунö нывъяс весиг чикисьсö эз кылыны. Тайö луннас вайöм курöг кольк колiс шыбитны. Эскылiсны, мый Благöвештшенньö лунö уджалысьлöн косьмас киыс. Мöд эскöм висьталö, мый Благöвештшенньö лунö кöк вöчöма аслыс поз и та понда пыр кежлö кольöма горттöмöн. Тайö луннас эз ков пасьтавны выль паськöм, а важсö бöрйылiсны сьöд рöмаöс. Татшöмсяма эскöмъяс да öлöмъяс вöлiны и рочьяслöн.

Об бердын Мужи сиктса коми пиысь кöрвидзысьяс Благöвештшенньö лунö козьнавлöмаöсь вичкоö кöрöс. Попыс кöрсö вузавлöма сиктсаяслы, а сэсся кöрсö начкылöмаöсь, пулöмаöсь да öтув сёйлöмаöсь яйсö.

Благöвештшенньö лунсянь заводитлiсны зiля дасьтысьны тулыс-гожся мувыв уджъяс кежлö. Вогöгöрся овмöс циклын медматысса када тшупöдöн вöлi Ёгорей лун. Та вöсна тайö кык луныс йитчöмаöсь приметаöн: “Благöвештшенньö лунö кö лымйыс керка вевт вылын на, сiдзкö Ёгорей лунö лымйыс му вылын на”. Важ стиля рака 25. лунöдз кö эз на воны джыджъяс, виччысисны кöдзыд тулыс. Благöвештшенньö лунся гым тунавлiс шоныд гожöм да няня во.