Топтық жұмыстың түрлері: жұптық жұмыс, топтық сауалдар, топпен оқу тапсырмаларын талқылау, дөңгелек үстел, диалогтар, жоба қорғау, проблемалық пікірталастар, т.б.
Ұжымдық оқу жұмыстарын ұйымдастырудың психологиялық-педагогикалық мағынасы әрбір оқушыны іс-әрекет субьектісі ретінде, өзін өзі көрсетуіне көмектесуінде.
Лекция 24. Оқушылардың оқу-танымдық әрекетін тексеру,
бақылау және бағалау.
Мақсаты: оқыту процесіндегі бақылау мен бағалаудың маңызын көрсету, олардың формалары мен түрлерімен таныстыру.
Жоспар:
1. Тексеру мен бағалаудың маңызы
2. Бақылау мен бағалаудың түрлері, әдістері, формалары
Негізгі ұғымдар: білімді тексеру және бағалау.
Оқушылардың білім, іскерлік, дағдыларын бақылау мен бағалау – оқу процесінің маңызды және қажетті құрамдас бөлігі болып табылады. Бақылау мен бағалау арқылы мұғалім оқушының оқу материалын меңгеру дәрежесін, сапасы мен көлемін анықтайды.
Педагогтар П.Горбунов, Е.С.Березняк, В.И.Иващенко, Е.И.Перовский, т.б. еңбектерінде бақылаудың тақырыптық түрлері практикалық жағынан талданады. Ал М.Р.Львов, Н.Н.Светловский, Т.Л.Коган, т.б. бақылауды ұйымдастырудың теориялық мәселелеріне талдау жасайды.
ХХғ. 20-шы жылдары «бригадалық» әдіске негізделген «өздігінен бақылау» түрлері кең көлемде қолданылды. Бұл жағдайда оқушылар тарапынан жауапкершілік азайып, оқу сапасы төмендеп кетті.
30-шы жылдары Е.В.Гурьянов, П.Г.Ананьев сияқты педагогтар бақылаудың тәрбиелік қызметіне көңіл бөле бастады.
40-60-шы жылдары оқушылардың білімін бағалау әрі оқыту, әрі тәрбиелеу мақсатын көздеді.
80-ші жылдардан бастап оқыту нәтижелерінің бақылау мен бағалау жұмыстарының дидактикалық-әдістемелік негіздері талданып, бір жүйеге келтіру жұмыстары жүргізіле бастады.
Бақылау – кең көлемде бір нәрсені тексеру дегенді білдіреді. Бақылау оқыту процесінде оқушылардың оқу әрекетіне басшылық жасау қызметін атқарады, олардың творчестволық күші мен қабілетінің дамуына ықпал етеді.
Бақылаудың психологиялық-педагогикалық мәні – оқушыларға дер кезінде көмек көрсету.
Бағалау деп оқушылардың Б.І.Д.-ның сапасын анықтауды айтады. Бағалау арқылы оқушылардың оқу үлгерімін бақылаудың нәтижесі көрінеді.
Бақылау мен бағалаудың қызметі үш жақты сипатталады: білімдік, тәрбиелік, дамытушылық.
Достарыңызбен бөлісу: |
