ДЖУТ Эшек мюйюз салдырама деб, Къулагъын кесдиргенча, Бу дуниядан кёбюрек юлюш алама деб, Эки дуниядан да юлюшсюз къалды. РА... , ФА

ЁЗДЕН АДАММА, ЁЗДЕН ШАЙЫРМА МЕН

Джолуму, джюрегими да джарыта джулдузу бла Айы,

Кёб кере палахдан сакъласа да къадар,

Сюйгенимча джашаргъа болмай мадар

Ёмюрюм кетеди алай.
Не болса да барама джашай,

Аллахны барлыгъына, бирлигине да болмай ишегим, экилигим.

Мени ёзден этиб джаратханды Аллах,

Къул болургъа джокъду эркинлигим.

(Аллахдан башха джокъду меннге Аллах,

Кюрешеме Ол буюргъанча джашаргъа).

Ёзден джюрекде къул сезимге орун джокъ.

Нюр сезим – Эркинликди, унамазма башхасын.

Аман хансха кесдирген а бачхасын –

Билсин – ёзден джыйында анга орун джокъ.
Сюйгенимча джашаргъа къоймаса да къадар,

Сюйгенимча джазаргъа ол береди мадар.

Алай а, Джюрекден тышына чыгъармы сёзюм –

Аны оноуун этеме кесим.

Къул, бий сезимледен кесими, халкъымы да этерме азат.

Эркин халкъым ючюн, эркин джуртум ючюн

Къалам бла, къылыч бла да этерме къазауат.

Не къул, не бий болургъа джокъду эркинлигим.

Аллахдан башха джокъду меннге Аллах –

Аны барлыгъына, бирлигине да джокъду экилигим.

Къул, бий болургъа излегенлелле – эм уллу джауум.

Меннге ёзден джюрекни, ангыны берген Кючге, Къадаргъа

Ёмюрде да болмаз чёб чакълы дауум.

Инсанла бары – къарнаш, эгеч.

Къул, бий болургъа излеу –

Хайуанлыкъданды, джаныуарлыкъданды,

Джюреклени тазаларгъа керекбиз болгъунчу кеч.
Ёзден халкъ, ёзден джурт, ёзден адам, ёзден адет –

Дуния джашауну тутуругъу, ёзеги, тамалы.

Ёзден хауа, ёзден рух кючлемей джюреклени

Дунияны палахдан къутулургъа джокъду амалы.

Ёзден адамны иннети, сёзю, иши да – ёзден.

Ёзденлик-Эринлик-Кертилик ючюн –

Адамлыкъ ючюн кюрешебиз –

Насыблы болурму дунияда бизден?
Акъ сёзледен къуралады эркин назму,

Эркин джамагъат къуралгъанча ёзденледен.

Ёзден адам, ёзден шайыр болгъаным ючюн,

Ёзденликни дунияда бегитиб кюрешгеним ючюн,

Ол кюрешимде меннге кюч-къарыу бергени ючюн,

Чеги джокъду разылыгъымы Аллахха.

Джашайма къуллукъ эте, шукур эте Анга.

ЗАМАН ДЖЕТЕРМИ ДЖАЗАРГЪА ТЮЗЮН?

Къаты джангур джаууб, мен джибимей къалмадым,

Уллу тюйюш болуб, мен къатышмай къалмадым,

Мийик тау эслеб, мен ёрлемей къалмадым,

Ариу къыз кёрюб сюймекликсиз къалмадым –

Дагъыда бу дуния джашаудан бир тоймадым, къанмадым,

Андан толу юлюшюмю алалмадым-алмадым.
Айтханым да болду: «Джашаудан, джанымдан да бездим».

Дагъыда, ташча чыдадым, тёздюм.

Бу дуниягъа къарагъанлай кёзюм,

Эшта, алай кетерик болурма дуниядан.

Мамырлыкъны, къазауатны да сынадым,

Эркинликни, сюргюнню да сынадым.

Насыбы тутханладан болдум:

Сау-эсен Джуртха къайытыб келиб,

Къобанны сууун ичдим, ташын да джаладым.

Таяннганым да болду ауар ташха, сынар терекге,

Унутуб Джуртда Къадау Ташны, Джангыз Терекни.
Да алайды джашау:

Адам кёрюрюн кёрмей – кёрюне кирмез.

Болджал джетмей – аджал да келмез.

Къулакъ юзюллюк болса уа – чыпчыкъ аягъындан.

Хайыр джокъ кесинги аягъандан, кесинги алдагъандан.

Боллукъ бирди – джазыуну алдаялмазса.

Ахырдан къутулмазса.

Келген – эртде-кеч болса да – кетеди:

Бузулмазлыкъ, тюрленмезлик джорукъду ол.

Ауалдан ахыргъады джол.

Керти сёзледен да джюрекге не асыу?

Келиу бла кетиуню арасында –

Ол къысха джолну, болджалны ичинде да –

Сюйгенингча, излегенингча джашаргъа болмаса,

Сюйгенинг бла, излегенинг бла джашаргъа болмаса...

Келиуге, кетиуге оноу этген башха эсе да,

Джазыуубузну джазаргъа

бизни кесибизге да берилгенди бираз эркинлик.

Толусу бла джазалмагъан да джазыуун,

Аны талай харифин джазаргъа боллукъду.

Бир да болмаса – бир харифин:

Не аллында, не ортасында, не ахырында.

«Мадар этсенг – къадар этерме» –

Аллахны сёзюн унутмазгъа керекбиз.
Кюрешеме джазыууму тюрлендирирге,

Насыбымы къайтарыргъа, юйюрсюндюрюрге.

Башланады ол «А»-дан, «АЗ»-дан – башланады азыу...

Алай болса да кюрешеме джазаргъа джазыууму.

Къалайындама, къалайындан башлагъанма –

Кесим да алкъын иги билмейме аны.
Алда сагъыш этмей джазабыз да джазыуубузну,

Артда сокъураныб, тюрлендирирге кюрешебиз аны.

Алай а, заман джетерми джазаргъа тюзюн?

Кёк да ол затха берирми изин?