Лайпанов б. А

ЮЧДЕН ДАГЪАН

Джуртуму

Миллети эсе – алан,

Тауу эсе – Минги,

Чегети эсе – орман,

Зем-земи эсе – Къобан,

Хауасы эсе – дарман.

Кёкге тартхан таулары,

Кёк-Акъ-Джашил табигъат –

Аллах берген керамат.

Тауу эсе – Минги, Акъ,

Ёзени эсе – джашил...

Нарт Алан Джуртум, джаша.

Тюлсе къарангы, джахил –

Байрагъынг – Кёк-Акъ-Джашил,

Байлыгъынг – кёк, акъ, джашил...

Кёлюнгде – джулдуз бла Ай,

Китабынг эсе – Къуран...

Халкъым, джукълама, уян.

Ана тилинги сакъла.

Халкъым, джукъланма, тирил,

Джуртунг – дунияны тёрю.

Тыйыншлы бол дининге,

Тыйыншлы бол тилинге –

Нарт алан халкъым, джаша.

Тюрк тил да – тилинг сени,

Кавказ да – джуртунг сени...

Барды хар ненг да сени.

Неди джетмеген сеннге?

Къайдан келеди къоркъуу –

Ким берир джууаб меннге:

Миллет орайданг къайда,

Миллет байрагъынг къайда,

Къайда тамгъанг-мухурунг?

Алан кърал эдинг сен.

Андан сора да тирилиб,

Къарачай Эл болалдынг.

Къралынг-къраллыгъынг.

Эркин тюлсе сен башынга,

Джазыуунга тюлсе эркин.

Джокъду башчынг, имамынг.

Ала – Хакъны, Халкъны тюл, –

Къулларылла шайтанны.

Отуз кюмюш, капек-шай.

Аны ючюн къуруйду

Кюнден-кюннге Къарачай.

Бек болмаса тилине,

Бек болмаса джерине –

Къурурукъду джарлы халкъ.

Нарт сёз айталгъан халкъым,

«Диним, тилим, джуртум» деб,

Алай джашагъан халкъым,

Эслемезча кесинги?

Тауларынгдан кетесе,

Тюзге ийиб эсинги.

Былай айтхан да сен,

«Тюзлюк тюзде къалмаз» деб,

Артха къайытхан да сен.

Заранмы джетди сеннге?

Дининг, тилинг, джуртунг ючюн

Нек этмейсе къазауат?

Орус патчахла бла да

Сермеше келген халкъым,

Сюргюнледен да артха

Къайыта билген халкъым,
Ёмюрлени узагъына

«Хурриет, Джумхуриет»

Иннети болгъан халкъым,

Энди не болду сеннге?

Сынаб айтханса кесинг.

Дининг, Тилинг эм Джуртунг –

Таймаз дагъанынг сени,

Ючден дагъанынг сени.
Ол ючюсюнден бирин

Кетерсе да душманынг,

Ауарыкъды дагъанынг –

Джыгъыллыкъса, халкъым, сен.

Ючюсюнден да къуру

Къоя турады, къара:

Къала тураса, халкъым,

Динсиз, Тилсиз эм Джуртсуз.
Ичкичилик, хаулелик –

Троян аты душманны.

Биз а, эслемей аны,

Ийгенбиз ичибизге.

Тохтатмасала бизни,

Орус мыжыкъла кибик

Боллукъду ахырыбыз.

Итлеге боллукъбуз аш.

Дин да, тил да, джурт да джокъ –

Боллукъбуз къул-къарауаш.

Болмагъанды джыйгъан эс.

Итлеге кесин ашатса,

Джыйын джанлы кесиди терс.

Кесим джангыз да кюреширикме,

Сермешгенимча сермеширикме,

Къошуллукъ къошулсун меннге.

Ислам диним ючюн къазауатды,

Ана тилим ючюн къазауатды,

Ата джуртум ючюн къазауатды.

Ёлюмсюз шейит олду джангыз.

Джанады Кёкде, кёлюмде да

Джангы Ай бла джулдуз.

КъарачАЙ бла джулдуз.

МЕНИ БЛАДЫ АЙ БЛА ДЖУЛДУЗ

Халкъ поэтле кёбдюле бизде,

Хакъ Поэт а – менме джангыз.

Джанымы, джолуму, сёзюмю, ишими да

Джарытады Джангы Ай бла Джулдуз.
Джангыз Анга этеме къуллукъ –

Хакъ Кертиге, Тюзлюкге – Хакъгъа.

Олду этген оноу, берген да буйрукъ,

Билдириб къалай джарарымы халкъгъа.

Халкъдан башха джокъду къайгъым.

Халкъгъа Хакъын билдириу, танытыу,

Халкъны Хакъына буруу, къайтарыу –

Олду мени иннетим, антым.
Джашагъан къурт, къамыжакъ да джашайды,

Мен а – Адамма.

Къара таныгъан, «Хакъ» дей билген,

Акъ сёз бла къара халкъ ючюн сермешген,

Аны адамлыгъын, халкълыгъын, ёзденлигин сакъларгъа кюрешген

Тейри адамыма мен.

Аны джырын джырлагъан,

Анга махтау салгъан

Амантиш джырчыла,

Халкъны алдар ючюн,

Аман тишлерин алтын къабукъ бла

Джабхан джырчыла,

Амантиш джырчыла, алтынтиш джырчыла -

«Халкъ джырчыла» кёбдюле бизде.
Ала къуллукъ этмейле Хакъгъа,

Тюз сёзню, Керти сёзню айтмайла халкъгъа,

Къарагъа къара демейле, акъ демейле акъгъа.

Къул сёздю сёзлери аланы,

Отуз кюмюшдю багъалары аланы.

Намыс-адет, сый-бет деген джокъду алада,

«Харам, гюнах» дей билген джокъду алада.
Алгъын бар эдиле керти Джырчыла –

Хакъ джырчыла, Ёзден джырчыла.

Эндигиле уа –

Душманланы, амантишлени арбаларына миниб,

Аланы джырларын джырлаучу мискинле, къулла...
Ит джыйын, джыйын джанлы да кёбдю бизде.

Энди ала къошулгъанла бир-бирине.

Ит-Бёрю, Бёрю-Ит джумхуриетле къураб,

Юре, улуй, джашайдыла бирге.

Къазакъ Бёрю дейдиле меннге.

Ит-Бёрю, Бёрю-Ит джыйынланы джауума мен,

Ит-Бёрю, Бёрю-Ит джумхуриетлени джауума мен,

Аланы иелери сарыкъулакъ Аюню да джауума мен.
Къул поэтле кёбдюле бизде.

Ёзден поэт а – менме джангыз.

Ит поэтле кёбдюле бизде,

Къазакъ бёрю уа – менме джангыз.

Хакъ поэт а – менме джангыз.

Алай а, тюзлюгюм къаллыкъ тюлдю тюзде –

Мени блады Ай бла джулдуз.