Ад быдлаын (< роч); ад гуран скр., шс.; вакрамеш

Кöч | удмурт лудкеч быд кыв вуджöдöмöн ‘дикöй, луд выв кöза’ < öтувперым keć ‘кöч’ < важчуваш, öтл. чуваш kač | татар käÊä ‘кöза’, чуваш mulkač ‘кöч’.

Коми этиологическöй мифъясын кöчлöн нимыс Ен ыж. Öтл. удмурт лудкеч быд кыв вуджöдiгöн ‘дикöй кöза’ = ‘кöч’. Мифъяс серти, кöчöс вöчис Омöль, но кор висьталiс Енлы “ыж” вöчöм йылысь, Ен шуис, мый вöчис татшöм жö пемöс, но пасйис пель йывъяссö сьöдöн. Öткодялiсны пемöсъяссö да артмис, мый став кöчыс Енлöн. Мöд версия серти, кöчьясöс вöчис Ен, а Омöль кöсйис найöс бырöдны. Сiйö сьöдöдiс налысь пельяссö да пондiс вöтлыны бужöдлань. Таöдз Омöль шуис, мый сюрас кö кöчысь полысьджык пемöс, то сiйö найöс оз ви. Кöчьясысь повзис лягуша, и та вöсна найö эз бырны. Коймöд версия серти, Омöль сьöдöдiс Енлöн кöчьяслысь пель йывъяссö да шуис, мый найö абу Енлöн “ыжъяс”, а сылöн “понъяс”. Демиургъяс тшöктiсны ручлы кыйны кöчöс да вайны Енлы. Ен видзöдлiс кöч вылас да гöгöрвоис, мый тайö сылöн вöчöмтор, но Омöль сiйöс тшыкöдöма. Найö дыр вензисны, но сэсся сёрнитчисны, мый кöчыс налöн кыкнаныслöн и та понда йöзлы позис сëйны кöч яй. Нöшта найö шуисны, мый кор кöчлöн пель йывсьыс бырас сьöдыс, воас му вежöм. Татысь и кык нога видзöдласыс кöч вылö: унджык комиыс чайтöны кöчöс Енлöн вöчöмторйöн и та понда колана кыйдöсöн. Мукöдыс, торйöн нин удораса, Эжва катыдса да печораса важ крестлы юрбитысьяс, лыддьöны сiйöс пеж вöчöмторйöн гыжъяс пондаыс, кодi абу мукöд турун сëйысь пемöслöн. Та вöсна кöч яй найö оз сëйны да нимтöны кöчсö вöр понйöн. Кöчкöд йитчöмаöсь Эжва катыдса важ крестлы юрбитысьяслöн эсхатологическöй чайтöм-гöгöрвоöмъяс сы йылысь, мый му вежöм воас сэк, кор кöчлöн пель йылыс едждас.

Быличкаясын кöчöс тшöкыда йитöны пеж ловъяскöд, мöдар югыдкöд. Тадз, быдлаын эмöсь сюжетъяс вöралысь йылысь, кодлы отсасьöны пеж ловъяс, вöрса либö кöч месай. Сылöн кыйöм кöчьясыс поп дырйи пöрöны сэрапомъясö (пипу чуркаясö). Перым-коми текстъясын нимкыла кладъяс йылысь кладыс вермö петкöдчыны кутшöмкö кöлуйöн да пемöсöн, тшöтш и (гöрд мышка да еджыд пель йывъяса) пырыс тыдалана либö сьöд кöчöн. Зыряналöн чайтöм-гöгöрвоöмъяс серти, кöчöн вермö петкöдчыны урэс (неминуча либö висьöм йылысь юöртысь), гежöдджыка тун. Сэкжö Эжва катыдса важ крестлы юрбитысьяс чайтлiсны, мый öдзöс весьтö пуктöм кöч юр повзьöдлö висьöм ловъяс.

Кöчлöн кык сяма характера образыс тшöкыда паныдасьлö шемöса, кумулятивнöй да пемöсъяс йылысь мойдъясын. Шемöса мойдъясын кöч отсасьö, вайö ловъя ва, отсалö уджöн либö сöветöн сыысь, мый геройыс сiйöс эз ви. Но мукöддырйиыс сiйö лоö антагонистлöн (Кощей, вöрса) ипостасьöн. Пемöсъяс йылысь мойдъясын кöч – страдайтысь герой либö трикстер. Ручöс, ошкöс, кöинöс сëйысь шыр йылысь сюжетлöн некымын вариантын кöч-трикстер вежö шырöс. Кумулятивнöй мойдъясын да челядь фольклорын, кöнi кольöмаöсь архаическöй мифа мотивъяс, кöч, кыдз асшöр герой, петкöдлö сылы лöсялана кужöм, пельклун да наянлун и тшöкыда казьтывсьö öти визьын мойдса сэтшöм персонажъяскöд, кыдз Шондi Пи, Шондi Ныв, Тöлысь Öш да с.в. “Руч да Кодзöм Уж” мойдын Шондi Пи юö кöч йöв, медым вынсявны да петкöдны енэж гидысь Тöлысь Öшкöс.

Литература: Климов 1990, Микушев 1980, Плесовский 1956, Рочев 1984, Рочев 1991, Сидоров 1928, Fokos-Fuchs 1951, Fuchs 1924, ВШ ЧМ, ОУ ЧМ.

Н. Конаков, О. Уляшев
КРЕШТШЕННЕ быдлаын (< роч); ва вежöдан лун быдлаын, важ ног тöвшöр 6. лун.

Крештшенне öдзса лунö месаньяс пöжавлiсны пемöс да лэбач (вöв, мöс, порсьпи, кöч, косысь да с.в.) мыгöра няньяс. Татшöм пöжассö нимтылiсны чибö-чаньöн. Сiйöс ëна радейтлiсны челядь. Эскылiсны налöн магияа вынö. Найöс пуктылiсны ен пельöсö, а вежадыр бöрын вердлiсны подалы, медым сiйö вöлi дзоньвидза. Вöв мыгöра пöжасъяс пуктылiсны сю видзанiнъясö тувсов кöдзаöдз, медым сюыс эз тшык да бура чужис.

Комияслöн эскöмъяс серти, Крештшенне водзын рытнас да войнас шöйтiсны торйöн нин повзьöдчана пеж ловъяс. Та понда чайтлiсны, мый крештшеннеса гадайтчöмъяс медся эсканаöсь, но и медся öпаснöйöсь. Куття лунö рытнас вöралысьяс петавлiсны ю дорö кывзысьны. Ю мöдарас кö кылiс пон увтчöм, сiдзкö, арнас позяс бура кыйны “пожöм” ур. Кор лëка воö коз пу кöйдыс, уръяс сëйöны пожöм кöйдыс. Татшöм уръяссö кыйны кокниджык, но куыс налöн лëкджык. Кылiс кö пон увтчöмыс вöрладорсянь, позяс бура кыйны “коз” ур. Крештшенне öдзса рытпукигöн кö вöлiны пасьтасьöмаяс, быть сиптылiсны пачвесьтса öшинь. Он кö пö сипты, öшиньöдыс пырас быд пöлöс мыгöра чöртыс. Найö вермисны пöртчыны чальпаса вöв кокö. Вöтлыны найöс вермис сöмын керка месаньыс. Сылы колiс пасьтавны венчайтчан платтьöсö, икона весьтö öзтыны сисьяс да кевмысьны. Сöмын та бöрын чöртыс бöр петлiс сiйö жö öшиньöдыс. Медым пеж ловъяс эз пырны керка-картаö, куття лунö öшинь да öдзöс кöсякъясö сирöн серпасавлiсны крестъяс. Тайö луннас лун шöр бöрын эз пыртлыны керкаö пес ни ва, эз петавлыны вердны подаöс, эз вöчлыны шума уджъяс (пес поткöдлöм, сартас торйöдлöм да с.в.).

Печораса поптöм важ крестлы юрбитысьяс, кодъяс эз признайтны официальнöй веськыд эскöма вичко, Крештшеннеöдз вой шöрнас лэччылiсны ю дорö да öзйысь сисьясöн пуксявлiсны нарошнö вöчöм йöрдан дiнö. Найö чöла пукалiсны да виччысисны ваыслысь вöрзьöмсö. Кор ва веркöсыс пондылiс веравны, найö уськöдчылiсны юкмöсланьыс да гумлалiсны дасьтöм дозмукъясас “вежа ва”.

Крештшенне водз асылö нывъяс вежадырйи медбöръяысь гадайтлiсны жöник йылысь. Комияс гадайтлiсны став гортсалöн дзоньвидзалун йылысь. Та могысь быдöнлы кынтылiсны паньясын ва. Кодлöн паняс йиыс вöлi гурана, сiйö вермис висьмыны либö весиг кувны. Чукъя йи туналiс бур дзоньвидзалун, кык мыльк – котырын содтöд (зонлы гöтрасьöм, нывбабалы кага чужтöм).

Быд вичкоа сиктын Крештшеннеöдз ю вылö вöчлiсны йöрдан. Орччöн йиысь вöчлiсны иконостас, кытчö ва вежöдiгас вайлiсны енпöвъяс. Йиысь жö вöчлiсны и крестъяс, мукöддырйиыс сизимöс. Асъя литургия бöрын став олысьыс иконаясöн да крестъясöн мöдöдчылiс юкмöс дiнас ва вежöдны. Сэнi поп нуöдлiс молебен да вежöдлiс васö. Йöзкостса эскöмъяс серти, вежöдöм ваыс вöлi торйöн нин бурдöдана да олöм сетан вына. Ва вежöдiгас кö йöрдан дорас лымъялiс, сiдзкö, лоас “пожöм” ура во, а зэрыштлiс кö либö вöлi кö кижа – “коз” ура во. Васö вежöдöм бöрас мыссьылiсны, мукöдыс купайтчисны юкмöсас. Быть колiс купайтчыны налы, кодъяс пасьтасьлiсны вежадырйи, торйöн нин кулöмаöн пасьтасьысьяслы. Купайтчылiсны и бурдöм кузя либö кутшöмкö неминучаысь мынöм кузя öбвет сетöмаяс. Висьысьясöс быглявлiсны йи выв ваын, улыс дöрöмсö гортас пöрччöдлiсны, а мöд луннас нулiсны ю вылö да вöйтлiсны. Мукöд войвывса комияс купайтлiсны юкмöсас доддялöм кöръяснысö. Вежöдöм васö нулiсны гортас сюмöд буракъясын, коявлiсны пода вылö, юктöдлiсны висьысь челядьöс. Тшöкыда васö видзлiсны во чöж. Сы вылын пöжавлiсны рудзöгысь “вежа нянь”, кодi пö бура бурдöдлiс подаöс. Кос “вежа няньсö” крöшитлiсны, кöтöдлiсны да содтылiсны помöйö. Нянь кöтöдан ваыс тшöтш жö вöлi вежаöн, сiйöн мыськылiсны йöв гырничьяс, веськавлiс кö сэтчö шыр. Тайö жö ванас вöдитчылiсны и выль юкмöсъяс вежöдiгöн да с.в.

Изьваса том йöз васö вежöдöм бöрас ветлiсны керкаясöд кабалаöн кышöм пу гулюöн да сьылiсны крештшеннеса тропарь (праздник сьыланкывъяс да кывбуръяс), таысь найöс славитöмысь моз жö чöсмöдлiсны. Изьва бердын тайö луннас гöняйтiсны верзьöмöн да кöра-даддяясöн, та дырйи ëна горзiсны да шумитiсны. Чайтлiсны, мый та бöрын куття войсаяс (вежа пуляк) бöр пырасны ваö.

Крештшеннеса поводдя серти тöдмавлiсны локтан поводдясö. Чайтлiсны, мый Крештшенне лунö кö чизыр, сiдзкö, Прокопей лунö (важ стиля сора 8. лун) лоö кошкым. Рöштвосянь Крештшеннеöдз кö вöлi кöдзыд, кошкымыс лоö Петыр лунсянь (важ стиля лöддза-номъя 29. лун) Прокопей лунöдз (кызвын турун пуктан кад) да с.в.

Кудым-Ош ним йылысь эм некымын фольклорнöй версия: сiйö вöлi ош кодь ëн; вöлi ош кодь; мамыс Пöвсин “Син пöла”, ëн да тун кужöмлунъяса нывбаба, чужтiс сiйöс ошсянь. Медъëна паськалöм версия серти, Кудым-Ош вöлöма Иньваса перым-комияслöн рöдса вождьлöн пиöн. Батьыс вöлöма тшöтш и памöн (панöн), сiдзкö, юрнуöдöма рöдыслöн йöзкотырса, ожманса да культа олöмöн. Батьыс усьöма тышын и Кудым-Ошöс бöрйöмаöсь выль юралысьöн да сетöмаöсь торйöдана пасъяс: жезл да нëль пельöса ош серпас, кодöс сiйö пыр новлöма морöсас. Важ перым-коми рöдъяс пиысь Кудым-Ошлöн рöдыс вöлöма медвына, а вождьяс письыс некодi абу вермöма сыкöд вермасьны. Кудым-Ошлöн вöлöмаöсь и тун тöдöмлунъяс: сылы абу öмрччöма чер; дойдлöмаöсь кö сiйöс ньöвйöн кувтöдзыс, топöдчылöма му бердö и дойыс бурдлöма, тадзи вермöма ловзьыны куимысь; медым вöтлыны вöрöгöс, вермöма лэптыны ю вылын бушков.

Кудым-Ош дырйи карвывсö вуджöдöмаöсь увтасiнысь Гöрд Чой нима джуджыд кыркöтшö. Сэнi вöлöма рöдлöн вежаин, кöнi ыджыдалöма Потöсь либö, мöд версия серти, Чикыш (< чикись). Потöсь кöсйöма торкны вуджöмсö да повзьöдлöма, мый енсикасъяс пö скöрмасны. Но Кудым-Ош шыöдчöма Шондi дiнö, и сiйö ыстöма ошкана пас. Кудым-Ош нималöма абу батьыс моз ожманöн ветлöмъяснас, а ылi муясын вузасьöм-ньöбасьöмнас. Нöшта Кудым-Ош не сöмын аслас рöд пытшкас, но и дзоньнас перым-коми муын паськöдöма мукöд войтыръяслысь культурнöй судзöдöмторъяссö. Тадз, сiйö вайöма быдсяма туся кöйдыссö да велöдöма перым-комиясöс быдтыны нянь. Сы отсöгöн жö перым-комиясöдз воöма кöрт: Кудым-Ош ачыс корсьöма кöрта из куйлöдъяс, сывдöма кöрт да вöчöма медводдза кöрта кöлуйсö. Кор лоöмаöсь кöрт инструментъяс, перым-комияс пондöмаöсь кодйыны пыжъяс, а таöдз найö ветлöмаöсь пуръясöн.

Кудым-Ош йылысь преданиеясын вевтыртö сюжет сы йылысь, кыдзи сiйö коралö да гöтрасьö манси öксань Костö вылын. Кудым-Ош мöдöдчö корасьны Потöсьлöн (Чикыш) велöдöм серти. Но Потöсь татшöм ногöн кöсйис сiйöс вины, сы вöсна мый тöдiс, мый Костööс корасьысьяс пиысь некод бöрсö абу волöма. Ставнысö тшöктöма вины манси öксы, сы вöсна мый найö öтдортчöмаöсь гöтрасьöмсьыс, кор аддзöмаöсь невестасö. Жöникъяссö повзьöдöма Костöлöн вöрпалöн кодь мисьтöм гöна чужöмыс. Збыль вылас сiйö вöлi зэв мича, но мамыс ляскалöма сылы чужöмас кукань кучик торъяс, медым нылыс ачыс вермис бöрйыны верöссö. Костöлысь збыль чужöмсö абу аддзылöма весиг батьыс. Öксаньлöн чомйысь Кудым-Ош аддзис зэв мича синма, но му выв мисьтöм чужöма нылöс. Костö аддзис Кудым-Ошöс да гöгöрвоис, мый тайö сылöн жöникыс. Сiйö нетшыштiс öти кучик тор да петкöдлiс, мый улiас шыльыд, еджыд ныв чужöм. Кудым-Ош шуис öксылы, мый кöсйö гöтрасьны ныв вылас. Мамыс весалiс Костöлысь чужöмсö. Ворсiсны кöлысь, а кор Кудым-Ош гöтырыскöд воис аслас карвылас, и мöдöс.

Кудым-Ош олiс зэв дыр. Öтчыд сы дорö волiс кулöм, но Кудым-Ош сiйöс вöтлiс. Кор сiйö кылiс помсö, чукöртiс рöдсö да шуис, мый кулöм бöрас сылöн вомсьыс пондас петны быг, кодi чаль чуньнас чукöртас быгсö, сылы вуджас сылöн багатыр эбöс юкöн. Мöд версия серти, Кудым-Ош олöма 150 арöдз, а кувтöдзыс тшöктöма дзебны асьсö кöрт асыка кодйöм сус пу гортйö. Нöшта содтöма, мый коркö волас на тайö му вылас.

Литература: Климов 1964, Ожегова 1971.

Н. Конаков
КУЛÖМ быдлаын; кулэм вэ., изь.; смерт уд., уэ.; сьмерть вэ., сыкт., печ., изь. (< роч); сурым важмöм шс. (< ? манси).

Кулöм кывлöн вужйыс зэв важ. Сiйö паськалöма не сöмын финн-йöгра кывъясын: удмурт кулыны ‘кувны’ < öтувперым *kul || мари колаш, мордва куломс, финн kuolla, манси ]#L, хант χăl-, венгр hal- ||| нганасан ku-, энец kaa-, селькуп qu-, камас kü- < прафинн-йöгра *kōle- (кувны). кулöм кывлöн коми кывйын куим вежöртас, тшöкыда найö торйöдсьöны терминология боксянь: шонъян, поконча (< роч покойник, покойница) (видзöд кулöма); кулöм, сурым – кулöм процесс; сьмерть, смерт – кулöм персонификация. Лыткин да Гуляев серти, сурым кыв босьтöма йöгра кывъясысь: манси sorim, sorum ‘кулöм’, хант sarçm ‘кулöм’.

Языческöй кадö комияс чайтлiсны кулöмсö сьöд ошкöн. Дас кык ая-пиа сюжетын (видзöд Шомвуква) Васа Ыджыд Ошлöн образыс вежласьö ваувса гундырлöн образкöд (видзöд глöт, сир) – öтл. ошлöн да ящерлöн образъяс перымса пемöс стиля композицияяслöн улыс юкöнын. Зыряналöн гуасян бöрдöдчанкывъясын кулöм ыджыд сьöд ошкöн “пуксьö гöрд пельöсö”, “тупкö вит (квайт) öшинь”, “гыöрöн вевттьö пач”. Татшöм жö сяма чайтöм-гöгöрвоöмъяс кольöмаöсь и коми нöдкывъясын, кöнi пач öткодявсьö ошлöн ньылалысь вомкöд либö сьöд сiтанкöд. Удораса, Эжва катыдса да Эжва кывтыдса кöлысь бöрдöдчанкывъясын невеста нимтö жöникыслысь вежайсö скöр сьöд ошкöн, кодi кöсйö сiйöс сëйны (параллелизм кöлысь = кулöм).

Керкаö кöсйытöг веськалöм вöрпаясöс да лэбачьясöс чайтлiсны неминучаяс, висьöмъяс, кулöм (видзöд орт) йылысь юöр вайысьясöн, а тшöкыда и пуктылiсны на туйö. Урöс петкöдчöм йылысь шулiсны: “Тайö кулöм водзö”. Лëктор юöртысьясöн Эжва катыдса да печораса комияс чайтлiсны и пемöсъясöс, кодъяс мыйкö вöчисны не мукöдыс моз: бöръя кок вылас чеччалысь шыр, пыж нырö пуксьöм сырчик да с.в. Кулöм йылысь юöртiс и уна тöрöкан.

Комияслöн эм уна öлöм, примета, вöт гöгöрвоöдöм, торйöн нин сэтшöмыс, кодi йитö кулöмсö олöмлöн медваж символкöд – пукöд. Удораын да Эжва катыдын чайтлiсны, мый керка бердö оз позь пуктыны льöм пу – “улыс” пу, сы вöсна мый сiйö пö босьтас месайыслысь олöмсö либö керкаыс тыртöммас, кор пуыслöн вужъясыс воасны тшупасöдзыс. Öнiя кадся чайтöм-гöгöрвоöмъясын тайö жö эскöмъясыс йитчöмаöсь оржыкöд. Эз пуктывны и коз пу – кулöм символ. Но быдмысь нин козсö эз керавлыны, медым не чуксавны кулöм. (Вöтöн либö вемöсöн) косьмöм либö керка вылö усьöм пуяс тшöтш жö кулöм водзö.

Мукöд каститчöм, вöтасьöм образъяс да збыль образъяс йитлiсны лëк кулöмкöд – не ас кулöмöн кулöмкöд. Тадз, вöтöн уль яй сëйöм либö мортöс виöм – сiйö мортсö виöм либö доймöмысь кулöм водзын. Еджыд тöвдöраа караб либö ва дорын юрсисö сыналысь вауса (Эжва катыдын) каститчöм – вöйöм водзын да с.в.

Нинöм бурсö эз вай кулöмакöд вöтöн либö вемöсöн аддзысьлöм, кор кулöмаыс корис ас дорас: корöмсö öтдортысьыс висьмылiс, а кодi эз öтдорт – кувлiс. Кулöм водзын вöлi и орт петкöдчöм – Эжва катыдса комияс серти, ловлöн морт мыгöра юкöныс. Кулöма да орт олицетворяйтлiсны кулöм. Найö висьлöсöсь, косöсь, дуркöсь. Устнöй мойда да абумойда прозаын кулöмлöн образын вевтыртöны морта чертаяс. Эм сöмын öти текст нывбаба мыгöра кулöм йылысь. Сэнi кулöмнас лоöма Адамлöн медводдза гöтырыс, кодöс Ен ëрöма, сы вöсна мый Омöльлöн велöдöм серти сiйö виöма ассьыс дас кык нывсö. Сiйö вöйöма му улö, медым пыр “сëйны ассьыс челядьсö”, а дас кык нылыс лоöмаöсь висьöм да порок кутысьясöн. Тайö текстас ясыда тöдчö христианскöй апокрифъяслöн имитöмыс. Быличкаясын, мойда сюжетъясын кулöм петкöдчö еджыд савана, тшöкыда косаа мужичöйöн (оз роч Смерть моз нывбабаöн), торйöн нин тöдчöдöма кулöмлысь гирвидзан лыяссö да дурклунсö. Кулöмлöн морт мыгöра образлöн эм и лэбач мыгöра образлöн кодь жö эпитет – морт сëйысь.

Мифа чайтöм-гöгöрвоöмъяс серти, мортыс кувлiс, кор сылöн петлiс лолыс, комияслöн быдлунъя пасйöдъяс серти – кор мортыс дугдылiс лолавны. Та понда кодлыкö пыр колiс лоны кулысь дiнын да виччысьны лов петэмсö, медым рöмпöштанöн либö шыльыд кöртторйöн видлыны, збыль-ö дугдiс мортыс лолавнысö, сэсся кыдзи колö водтöдны кулöмасö да тупкыны сылысь синсö да вомсö.

Литература: Доронин 1947, Лыткин, Гуляев 1970, Микушев 1987, Осипов 1986, Плесовский 1956, Рочев 1984, Уляшев 1994, АЧМ.

О. Уляшев
КУЛÖМА вс., ем., л., уэ., п.-к.; кулэма изь.; кулöм морт скр., шс., уд.; кулэм морт вэ.; шонъян вэ.; шонъянöй печ., скр.; шонъянэй вэ.; шонъей уэ.; поконик вс., ем., изь., л., скр., уд., шс.; покооник вэ.

Кулан здукас мортыс быттьö торъялö куим пельö: шой, лов да орт. Такöд чужö кулöмалöн образ, кодi öтувтö чайтöм-гöгöрвоöмъяс и вир-яй состояние йылысь, и лов да орт йылысь.

Кулöмбöрся олöм йылысь тöдмöсъяс кык ногаöсь. Öтар боксянь, кулöма, кодöс öткодялöны кулöм мортлöн ловкöд, мунö мöдар югыдö да йитчö рöдительяс дiнö; мöдар боксянь, кулöмалöн оланiннас лоö гу, кытчö дзебöны шойсö. Артмö, мый рöдительяслöн муюгыдыс шойнаын, кöнi кулöмаыс дзебöм бöрас пыр жö аддзысьö рöдительяскöд. Чайтöны, мый налысь аддзысьöмсö позьö кывны, топöдчывны кö пельöн гу бердас. Гу – тайö ловъяяслöн да кулöмалöн ритуала йитчанiн, но кулöма вермö петны гусьыс. Чайтöны, мый кулöмаяслöн оланiныс пырö географическöй гöгöртасö, но оз тыдав, и сэтчö оз вермыны веськавны ловъяяс. Кулöма – ловъяясöс дорйысь лов (“рöдитель”) либö лëк лов, кулiс кö сiйö не ас кулöмнас (“не ас кулöмöн кулöм морт”). Не ас кулöмöн кулöмаяс лыдö комияс пыртлiсны тунъясöс, асьнысö виысьясöс, вöйтчöмаясöс, юöмысь кулöмаясöс, пырттöдзыс кувсьöм челядьöс. Найöс дзеблiсны öтув шойнаö гуалöм “рöдительясысь” торйöн. Пеж кулöмаяс вöчöны йöзлы лëк, тшöкыда лоöны вир юысьясöн, мыйыськö водзöс босьтöны ловъяяслысь. “Рöдительяс” сувтöны ловъяяс дор да вöтлöны лëк вöчысь кулöмасö нюрö. Чайтöны, мый не ас кулöмöн кулöма мортлöн лолыс кольö куланiнас да “повзьöдчö”. Тшöтш жö чайтöны, мый виöм мортлöн лолыс кольö виöминас да виччö виысьыслысь кулöмсö, медым колльöдны сiйöс адö. Татшöм кулöмаяслысь ловъяссö пасйöны повзьöдчысь либö гажтöм кывъяс. Не ас кулöмöн кулöмаяс оз вермыны вуджны ва. Та вöсна кöнсюрö найöс гуавлiсны ю сайö, мукöддырйиыс торъя шойнаö. Перым-комияслöн пеж кулöмаяс пиысь торйöдсьöны ичетикъяс – ичöтик гöна мортъяс, дзоля челядьлöн ловъясыс, кодъясöс вöйтiсны мамъясыс.

Кулöмаяс (“рöдительяс”) дорö шыöдчöны казьтылан ритуалъяс дырйи да регулярнöй корöмъяс отсöгöн. Кулöмаяс дiнö шыöдчылiсны лун шöрöдз, шуам, асъя нянь чегигöн, а тшöтш жö и гу вылын казьтылiгöн. Нянь чегигöн пачысь медводдзаöн кыскöм няньсö силiсны кулöмаяслы. Колiс чегны няньсö, кевмысьны да чукöстны кулöмаясöс: “Вошйö-сибöдчö, муса кулöмаяс”. Колö пасйыны, мый котырса став кулöмасö лыддьöдлiсны нимъяс сертиыс. Сэсся няньсö пуктылiсны торъя джаджйö öбразъяс улö. Чуксавны кулöмаöс лун шöр бöрын вöлi öпаснö. Та понда сiйöс эз казьтывны, торйöн нин вой улö. Кулöмалöн не ас кадö волöмысь полiсны, öтар боксянь, сы вöсна мый кулöма вермис ылöдны ловъя ловъяссö мöдар югыдö, а мöдар боксянь, кулöма мыгöрын вермис локны лëк лов. Ловъяяс вöчлiсны колана ритуальнöй керöмъяссö, медым кулöмаяс налы отсасисны. Чайтлiсны, мый кулöмаяс видзöны пода, вöтлöны лэчьясö пöтка да везöтъясö чери, отсалöны ытшкыны турун да с.в. Торйöн нин коланаöн вöлi кулöмаяслöн отсöгыс му вöдитан уджъясын (видзöд нянь). Дугдылiсны кö вöчны ритуалъяссö, кулöмаяс вермисны накажитны – висьмылiс морт либö пода. Медым тöдмавны, кодi кулöмаяс пиысь вöлi висьöмыслöн помканас, перым-комияслöн вöлi гадайтчöм чер öшван ‘чер öшöдöм’. Кулöмалысь нимсö тöдмалöм бöрын вайлiсны вись либö дасьтылiсны казьтылан сёян. Нöшта колö пасйыны ловъяяслысь да кулöмаяслысь сëрнитчöм серти контактъяссö. Олiганыс на йöзыс сëрнитчылiсны, мый кодi водзджык кулас, петкöдчылас мöдыслы вöтöн либö кыдзкö мöд ног да висьтасяс кулöмбöрся олöм йылысь. Кувтöдзыс морт вермö кöсйысьны ловъя рöдвужыслы отсавны кутшöмкö сьöкыд уджын. Сiйö кулöмаöн петкöдчö корöм вылö. Ловъяяс вермöны ветлыны мöдар югыдö да аддзысьлыны кулöма рöдвужыскöд вöтöн. Но вöтасьысьыслы колö кутны тöд вылас, мый оз позь сëйны кулöмаясöн вöзйöм сëян, окавны найöс, кутлыны кисö да с.в.

Тöдмöсъяс боксяньыс кулöма пырö ловъяс категорияö. Сiйö оз тыдав, вермö петкöдчыны разнöй пемöсъясöн. Морт вир-яйлöн аслыспöлöслунъясыс да тырмытöмторъясыс кольöны и кулöм бöрас. В. П. Налимов гижö, мый кутшöмкö пöль абу лысьтöма казьтывны писö вöрын, сы вöсна мый олiгас сылöн кокыс вöлi парализуйтöма. Ловъяяслы отсасигас кулöма вермö мудзны, сылöн сюмалö кынöмыс. Та понда дасьтылiсны казьтылан сëйöмъяс, артмö, мый быттьö вердöны кулöмаöс и таысь виччöны сысянь отсöг. Чайтöны, мый кулöма пöткöдчö сëян рунас. Кулöмалöн эм и сьöкта. Мыйöн унджык мыж сiйö вöчис олiгас, сiйöн сiйö сьöкыдджык. Та понда мыжа кулöмаяс оз вермыны вуджны важ йöзлысь мусö торйöдысь ю вомöн, мыжъясыслöн сьöктаыс вöйтö найöс, а мыжтöм кулöмаяс кокниа вуджöны юсö (видзöд мöдар югыд). Кулöма вермас лоны сьöкыд и кулöмлöн торъя пеж состояние понда. Шуам, вöла-доддя мужичöйлы доддяс пондiсны пуксявны кулöм рöдвужыс. Вöлыс муртса вермис кыскыны додьсö. И сöмын тун отсалiс мынтöдчыны наысь. Кулöмалöн вир-яя мыгöрыс петкöдчö и сыын, мый туйтöм кадö чукöстöм кулöм верöс вермис узьны гöтырыскöд, кулöм мам вермис локны войын да сетны кагаыслы морöссö.

Кулöма петкöдчö разнöй мыгöрын: вöтöн сiйö волö аслас кулöмöдзса мыгöрас, а збыль олöмын мыччысьö лэбачöн либö ичöтик пемöсöн. П. А. Сорокинлöн тöдмöгъяс серти, “рöдитель” волö каньöн, “лëк лов”, не ас кулöмöн кулöма – дзодзулöн. Öтл. дзодзувъясö пöрöны чудьяс, кодъяс гуалöны асьнысö (абу сöстöм кулöм) (видзöд чудь). Пеж кулöмöн кулöмаяслöн образöн пырджык лыддьыссьö пон. Мöдар югыд йылысь вöт текстъясын тöдчöдöма, мый татшöм кулöмаыс абу “рöдительяскöд” пызан сайын, а пон чомйын. Сера понйöн либö ручöн воöны гортас ëрöм да гуöм йöз. Н.Заваринлöн тöдмöгъяс серти, мыжа кулöмаяс, торйöн нин кулöм тунъяс, вермöны пöртчыны кырнышö, чикышö, кöинö. Вöтъяс гöгöрвоöдöмъясын мöс да вöв лыддьыссьöны “рöдительяслöн” образъясöн. Лэбач сикасыслöн, кодöн петкöдчö кулöма, быттьöкö и абу некутшöм тöдчанлун. Казьтылан öбрадъясын эмöсь лэбачьясöс торъя вердöмъяс. Лэбачьяслы кулöмалöн гу вылö коявлiсны сю либö кольлiсны сюсö торъя дозмукö гу весьтас. Изьватас вöчöны гу выв памятникас розь лэбачлы-ловлы. Леткасаяс чайтöны, мый гуалöм бöрас кулöмалöн лолыс лэбачöн лэбö гортас. Сэнi сылы пуктöны туся тасьтi. Мöдар боксянь, кулöмалöн эмöсь конкретнöй лэбач мыгöра персонификацияяс. Тадз, сырчикъясöс “паныдалан” праздник дырйи лунвылысь воысь лэбачьясöс перым-комияс чайтлiсны важ йöзöн. Нэм заводитчигöн дзебан öбрадъясын гу выв сëян колясъяссö сетлiсны понъяслы да ракаяслы. Чайтлiсны, мый татшöм ногöн сëяныс веськалö веськыда кулöмалы. Лэбач образ да кулöмалöн лов йылысь чайтöм-гöгöрвоöмъяс костын йитöдыс вöчö лэбачсö öпаснöйöн. Öтл. чайтöм-гöгöрвоöм вöрса лэбач йылысь, кодлöн сиктö волöмыс кайтö неминуча. Öтл. сiдзжö эскöм: пондан кö артавны лэбачьясöс тэльöбсьыс, найö вермасны нуны вежöртö.

Веськыд йитöд таладор югыдыскöд вöлi неважöн кулöм рöдвужлöн. Налысь нимъяссö помнитiсны и казьтылiсны регулярнöя. Важöнджык кулöмаяс быттьöкö вунлiсны и найöс эз казьтывны кодралан ритуалъяс дырйи. Казьтывтöм кулöмаясöс лыддьылiсны öпаснöйясöн и мыйöн важджык вöлi кулöмаыс, сiйöн öпаснöйджык да вынаджык сiйö вöлi. Медся öпаснöйöн да вынаöн, а сiдзкö и, сакральнöй авторитетöн, лыддьылiсны медваж кулöмаясöс – чудьöс. Казьтывтöм кулöмаясысь видзчысьöм могысь найöс казьтывлiсны Семик субöтö пеж кулöмаяскöд тшöтш.

Литература: Налимов 1907, Сорокин 1911, Грибова 1975, Сидоров 1928, Смирнов 1881, Лимеров 1998.

П. Лимеров
КУЛЬ ус., вс., лл., п.-к. – улi пемыд демиург, васа, христианизация бöрын тшöтш и чöрт, дявöл, сöтана.

Перым-комияс лыддьылiсны Кульöс Енлöн вокöн, кодi вермасьö Енкöд му артмöдiгöн. Термин Куль, кодöн нимтiсны улi муюгыдса демиургöс, вöлi тöдса и обса йöгралы. Зыряналöн сiйö кольöма сöмын кутшöсюрö лов нимъясын: васа – вакуль, вöрса – вöркуль, керкаын овмöдчöм пеж лов – куль-мути, муувса лов – мукуль, кодi кольö бöрсьыс ыджыдсьыс-ыджыд измöминъяс. Куль чуньöн нимтöны белемнит (öтл. сэтшöм жö вежöртаса роч чëртов палец). Этимологъяс “лëк лов” вежöртаса куль кыв йитöны перымöдзса (прафинн-йöгра) кадколасткöд: прафинн-йöгра *kuľз ‘висьöмъяс ыстысь улi муюгыдса лов’.

Коми миф серти, куль чуньяс артмöмаöсь, кор Ен да Омöль вермасьöмаöсь му вылын ыджыдалöм вöсна. Ен ылöдöма Омöльöс да сылысь отсасьысьяссö сëй гырничьясö да кöсйöма гуавны найöс муö. Öти гырнич жугалöма и ловъясыс пышйöмаöсь кодi кытчö. Налöн, кодъяс пышйисны юяс пöлöн, чегъясьöмаöсь чуньясыс. Чуньясыс пöрöмаöсь куль чуньясö. Йöзкостса медицинаын куль чунь пызь зэв бура бурдöдö быдсяма дой.

Перым-комияс пасйылiсны курöг праздниксö арын, пырджык сэк, кор страдаыс эз на вöв помасьöма. Праздник луннас сиктö, кöнi вöлi шуöма гажöдчыны, локталiсны матiгöгöрса олысьяс да вайлiсны сьöрсьыныс кокöдыс кöрталöм том петукъясöс да курöгъясöс. Посад дорын курöгъясыслысь кералiсны юръяссö, кымынöскö сетлiсны вичкоö, а мукöдсö пулiсны бипур вылын ыджыд пöртйын. Сэсся öтув сëйлiсны яйсö, юисны сур да брага. Сëйöм бöрас пöрысьджыкъяс мунлiсны гортаныс, а том йöз сьылöмöн да йöктöмöн гажöдчисны сëр рытöдз. Курöг праздниксö перым-комияс босьтöмаöсь, буракö, рочьяслысь. Шуам, орчча Вятка губернияын вöлöма зэв популярнöй Троецыплятница нима арся праздник, кöнi тшöтш жö сëйлöмаöсь курöг яй. Шöр торъялöмыс сыын, мый перым-комияслöн курöг праздник вылö вермöмаöсь локны ставöн, а рочьяслöн Троецыплятницаыс вöлöма нывбаба либö весиг дöва праздникöн. Зыряна курöг праздниксö абу тöдлöмаöсь, сы вöсна мый найö курöгсö эз ёна видзлыны.

Куттяяс пö олöны ваын, а му вылö петалöны öтчыд вонас – Рöштво войö. Вежадырйи найö ыджыдалöны му вылын, а ва вежöдан лун бöрти бöр пырöны ваö. Во чöж сэсся некутшöм волысьöмъяс налöн йöзкöд абуöсь. Торйöн нин öпаснöйöсь, тшöтш и верстьö йöзлы, найö вöлiны куття лунö. Вежадырся мукöд лунö наöн ëнджыкасö повзьöдлiсны челядьöс, медым челядь эз петны ывлаö сëрöн: “Эн пет сëрöн, куття нуас”, либö узьны водтöдiгас: “Куття локтö”. Вежадырйи челядьöс эз лэдзны иславны даддьöн крут берегъясын, медым куття юкмöсö оз ну. Куттяясöс чайтлiсны кöрт даддя ичöтик мортъясöн. Дадьяснас найö кыскалiсны пышйöдöм йöзöс. Том йöз эз повны куттяясысь. Найö чайтiсны, мый куттяяс абу ни лëкöсь, ни бурöсь, мый найö вермöны вайны и пöльза, сы вöсна мый вежадырся гадайтчигъяс дырйи висьталöны водзö лоöмторъяс йылысь.

Татшöм жö сяма чайтöм-гöгöрвоöмъяс ваысь петысь вежадырся ловъяс йылысь вöлiны и мукöд войтыръяслöн. Удмуртъяс нимтылiсны найöс вожоöн, войвыв рочьяс шуликинъясöн, шулыканъясöн, шеликунъясöн да с.в. Эскöмъяс серти, торйöн нин лëкöсь куттяяс вöлiны челядь дiнö. Тайöс, гашкö, позьö гöгöрвоöдны комияслöн водз религиознöй чайтöмъяслöн öтлаасьöмöн библияса сюжеткöд, кöнi Ирод сар нöйтö посни челядьöс Кристос чужöм бöрын. Йöзкостса чайтöм-гöгöрвоöмъяс серти, тайö трагическöй вöвлöмторйыс вермис выльысь лоны вежадырйи, но Ирод пыдди вöлiны куттяяс.

Комияслысь языческöй чайтöм-гöгöрвоöмъяссö гöгöрвоöдöны куттяяслöн дадьясыс. Водзтi кулöмаясöс нулiсны гуаланiнас пырджык доддьöн, и тöлын, и гожöмын. Дзебöм бöрас додьсö кольлiсны гу вылас. Чайтлiсны, мый доддьыс ковмас кулöмаыслы мöдар югыдын.

Зырян кутш | удмурт kuč (Лыткин да Гуляев серти: ‘кутш кодь, но сыысь ыджыдджык лэбач’), ćuńikič ‘дозмöр варыш’ < öтувперым *kuč ‘ыджыд кыйсьысь лэбач, ? кутш’ || мари kutkiž ‘ыджыд кутш’, горномари kućkiž ‘кутш’ | мордва kučkan ‘кутш’ | финн kotka ‘кутш’ < прафинн-йöгра *kočka.

Кутш – гежöд лэбач Комиын. Та понда сiйö казьтывсьö сöмын öтка мифъясын, да и то öти визьын кыйсьысь лэбачьяскöд, кодöс вöчис Омöль. Мукöдлаын кö (торйöн нин гöраясын олысьяслöн) кутш-шондiлöн, кутш-сарлöн, кутш-багатырлöн образыс зэв ëна паськалöма, то комияслöн кутш лоö багатырлун да саралöм символöн сöмын мойда фольклорын, кöнi сiйöс тшöкыда нимтöны лэбач сарöн. Танi, буракö, тöдчö иран войтыръяслöн чайтöм-гöгöрвоöмъяслöн имитöм. Важöн тайö войтыръясыскöд комияс ëна волысьлiсны.

Коми мойда сюжетъяс, кöнi эм и кутш, тöдсаöсь уна финн-йöгра, славян, тюрк да иран войтырлы. Зыряналöн медся популярнöй сюжетыс – “Ид тусь понда тыш”. Тайö сюжетнас заводитчö кузь мойд: шыр да пышкай оз юкны ид тусь да панöны пемöсъяс да лэбачьяс костын тыш. Ловйöн кольöны сöмын доймöм лапаа ош да доймöм бордъя кутш. Кутшсö куим во чöж видзö ас дорас вöралысь (вöралысь пи, купеч пи). Кутшыс сëйö сылысь став лэбачсö да подасö. Вöралысь куимысь кöсйö лыйны “лыкöдысьöс”, но кутшыс куимысь корö не вины сiйöс. Бурдöм да эбöс выв воöм кутш видлö вынсö: лэбигас пазöдö пывсян ыджда из. Сэсся мыш вылас нуö ассьыс мездысьсö (шондiа ?) “кутш сармуö” чойяс дорас да сетö сы сайö ичöт чойсö (зарни дворечса месаньöс).

Некымын коми мойдын кутш варыш да кырныш моз жö коралö куим чой пиысь öтиöс. Сюжетыслöн эм кык вариант. Öтиас батьыс мунö нывъяс дорас гöсти; зятьясыс, на пиын тшöтш и кутш, чöсмöдöны тестьсö. Мöдас чойяслöн вокыс корсьö невестасö (гöтырсö, кодöс нуöма Кощей, Кудряш), корö отсöг лэбач-зятьясыслысь, найö отсалöны сылы вермыны вöрöгöс да косöдны (аддзыны) гöтырсö.

Уна коми мойдын герой-багатыр, кодöс ëртъясыс кольöны му улын, мездö Змейысь (Гундырысь) кутшлысь пиянсö. Кутшыс отсалö сылы бöр воöдчыны му вылö. Лэбигас кутш сëйö öкмыс (комын) öшкöс да юö öкмыс (комын) бöчка ва, но медым кутшыс вермас лэбны помöдзыс, геройыс вундö аслас кок пöксьыс тор да сетö сылы юны кöш тыр вир. Кутшыс казялö, мый “бöръя яй торыс да бöръя ваыс вöлiны медся чöскыдöсь” да сьöлыштö-косöдö геройлы яйсö бöр.

Коми мойда текстъяс пиын эм куим сюжет шемöса пу (кöрт) кутш йылысь, кодöс вöчö герой, медым судзöдны мича сарнылöс.

Сьыланкывъясын кутшлöн образыс мойдса серти улынджык: збойлун да повтöмлун символ туйын сiйö паныдасьлö варыш образысь гежöдджыка, а ыджыд вежöра да мывкыда кырнышöс сöмын мукöддырйиыс вежö пöрысь кутш. “Лёк юöр вайысь” кутш – пырджык негативнöй образ.

Комияслöн кутш вылö видзöдласыс вöлi кык нога. Öтар боксянь, сiйöс оз вöлi позь лыйны да куштыны сылысь позсö: удораса, Эжва катыдса да печораса комияс чайтлiсны, мый кутшöс виысь регыд кулас ачыс, а позсö куштысь коляс горттöгыс да матi рöдвужтöгыс. Эмöсь висьтъяс сы йылысь, мый öти вöралысь лыйöма кутшöс да гортас воöм бöрас виччысьтöг кулöма.

Мöдар боксянь, кутш – кыйсьысь лэбач. Та вöсна сiйö вöлi конкурентöн, кодi мырддис вöралысьяслысь кыйдöссö. Буракö, такöд йитчöмаöсь кывтэчасъяс выжывмöм пöрысь морт йылысь, кодi вывтi активнöй, ковтöг велöдö, сюйсьö горт уджъясö да горткотырса олöмö: пöрысь кутш, няр кутш, лысöм кутш, бордтöм кутш.

Вöралысь юкталiс Кывтöмöс да дöзмöдчöмсьыс вундiс сылысь кывсö. Кывтöм пондiс вöчны йöзлы лëк – лэдзны на вылö кынмалöм. Кывтöмöс лыддьылiсны горш висьöм, ныр висьöм, насмука, несъялöм да юр висьöм помкаöн.

Комияслöн ёна пыддипуктылiсны кыдзсö, а важöн сiйö вöлi вежа пуöн. Йöзкостса преданиеяс серти, Эжва Перымын медыджыд языческöй кевманiныс вöлöма Емва вомын зэв ыджыд ышмысь кыдз бердын. Перымса Стефан лыкöдöма капищесö да куим лун да вой кералöма вежа кыдзсö. Кыддзыс ойзöма, а кералöминъяссьыс сöдзтысьöма вир. Предание серти, мöд пыддипуктана кыдз, кодысь кералiгас тшöтш жö сöдзтысьöма вир, вöлöма Эжва кывтыдын Арабач сикт бердын. XIX нэм заводитчигöн на Эжва кывтыдса сиктъяс бердын вöлöмаöсь вöрзьöдтöм вежа расъяс. Перым-коми преданиеясын Кудым-Ош йылысь висьтавсьö, мый сiйö овлöма Ку ю вомса карвылын (öнiя Кудымкар), а орччöн джуджыд кыр йылын вöлöма вежа ин, кöнi сулавлöма ыджыдсьыс-ыджыд кыдз. Сы бердын сулавлöмаöсь идолъяс, а улiас – вись пöрт.

Кыдзлöн вöвлöм вылi сакральнöй статус коляс тöдчö коми “Потöм вор дорын пöч” мойдын. Тайö мойдыс пöшти öткодь роч мойдкöд зарни чери йылысь, сöмын коми мойдас пöчлысь кöсйöмъяссö пöртö олöмö оз чери, а кыдз: “Ме тэнö керала.” – “Эн керав, сета мый колö.” Пöч лоас сараньöн, сэсся кöсъяс лоны енмöн. Роч мойдын моз жö сiйö бöр веськалö важ керкашояс потöм вор дорас.

Öти коми преданиеын висьтавсьö, мый чудь войтыр вöлöмаöсь сьöдöсь, луннас узьöмаöсь, а войнас уджалöмаöсь. Öтчыд воöмаöсь еджыд йöз да вайöмаöсь кыдз. Чудьяс аддзöмаöсь кыдзсö, пышйöмаöсь вöрö да гуалöмаöсь асьнысö.

Капищеяссö вöчлöмаöсь кыръяс йылö, сэнi сакральнöй шöриннас вöлöмаöсь кыдзьяс. Тайö индö сы вылö, мый кыдзсö йитлöмаöсь вылiкöд, “югыдкöд”. Та вылö жö индö и рöм символика: сьыланкывъясын кыдзкöд пырджык йитчö зарни рöм (“зарни коръяс”, “зарни кольяс”), тайö матыстö сiйöс “зарни” шондiлань. Календар символикаын кыдз ассоциируйтчылiс тулыскöд да гожöмкöд – вöр-ва дзордзалан кадкöд. Славяналöн моз жö кыдз вöлi быть атрибутöн Троича дырйи.

Кыдз олицетворяйтiс вöр-валысь чужтан вынсö да комияс чайтлiсны, мый сыысь позьö вöчны мортöс. Тадз, перым-коми мойдын челядьтöм пöль дугдiс эскыны, мый пöчыс вермас чужтыны кагаöс, да вöчис кагасö кыдз чуркаысь. Кагаыс ловзис да быдмис “эз часысь часö, а минутысь минутö”. Пера-багатыр ас пыддиыс вольпасяс пуктö кыдз пу гыр (кор узьö гортас) либö кыдз пу чурка (кор войколалö вöрын), медым пöръявны вöрсаöс, кодi думыштiс сiйöс вины. Нывбаба мыгöра васаяс морт пыддиыс косöдöны кыдз пу кер. Ыджыд чойяс виöны ичöтсö да гуалöны кыдз улö. Сiйö быдмö заргумйöн, кодысь батьыс вöчö пöлян. Пöляныс морт гöлöсöн висьталö, мый сыкöд вöчисны чойясыс.

Быдмöг символикаса “ас/абу ас” оппозицияын кыдз вöлi “асöн”, а сылы паныд сулалiс коз. Öти фольклор версия серти, Пера-багатыр кувсис ю вомöн чери везöт зэвтiгöн. Везöтыслысь öтар помсö сiйö кöрталiс кыдз бердö, кодi быдмис ас, веськыд берегас, а мöдар помсö пондiс кöртавны шуйга берегса коз бердö, мый понда и кувсис. Мойдын Ёма гуö зонкаöс. Пышйигас зонка кайö кыдз вылö, код вылысь сэсся сiйöс нуöны (“абу ас” муюгыдысь “ас” муюгыдö) лунвылö лэбысь дзодзöгъяс. Ёма кöсйö кайны кыдз вылас, но оз вермы.

“Энь/ай” оппозицияын кыдз лоö энь джынйын. Тайö оппозиция подулас кыдзлöн ортсы тöдмöсъяс: “кудриа”, еджыд пучера (комияслöн “сюмöд кодь” еджыд кучик – ныв мичлунлöн символ), кольяса. Зарава вöлi радейтана юанöн (кыдз – “мам-вердысь”). Кыдз пу корöсь быть вöлi пывсянын – овмöслöн аслыспöлöс сакральнöй шöринын, кодкöд вöлi йитчöма горткотырса став öбрадыс. Ляк кыдз корöсьöн пывсьöдлiсны пузчужöмаöс, кыдз пу корйысь вöчлiсны кулöмалы юрлöс (пасйылiсны “выль керкасö”). Татшöм ногöн, мортлöн олöмыс быттьöкö дзоньнас вöлi кыдз пу паса.

Коми мифологияын кырныш образ сöвмöма омöля. Öти мифын му пуксьöм йылысь кырныш петкöдчö Омöльлöн лэбачöн. Омöль тшöктö сылы торкавны гулюöс, кодöс Ен ыстiс вайны енэжö му (тайö версия сертиыс, енэжыс артмöма мусьыс водзджык).

Аслыспöлöс этногенетическöй перым-коми мифын (гижöма да йöзöдöма XIX нэм помын) рельеф да юяс вöчысьöн петкöдчö скöр Шурма енлöн ыджыдсьыс-ыджыд сьöд кырныш, кодi олö Шурмакöд шондi вылын. Кырнышлöн лэбöмысь гымавлiс, а сылöн вомысь петавлiс би. Кырнышлöн гыж туйысь артмылiс джуджыд кырöм да чужлiс джуджыд да паськыд ю. Му вылö пуктöм кырныш бöж тычулысь быдмисны да вöрсялiсны джуджыд гöраяс (миф серти – Урал).

Зырян эпосын да мойдъясын кырныш пырджык юöртö неминуча, кулöм да шог йылысь, но оз пыр олицетворяйт асьсö неминучасö. Тадз, Педöр Кирон да Кирьян Варьян йылысь эпическöй сьыланкывъясын кырнышъяс локтöны гыма-чарда кунöрöн, но вермöны сöмын юöртны гымчард (неминуча) йывсьыс. Кутшöмсюрö мойдын (“Чöрса нывка” да с.в.) кырныш оз öтдортчы гулю, пышкай, чикыш да мукöд лэбач моз юöртны геройлöн неминучаö веськалöм йылысь рöдвужыслы либö чукöстны неминучаö веськалöмалы отсöг. Сiйö жö вайö ловъя да кулан ва геройлы, кодöс виöны вокъясыс, ëртъясыс либö антагонист.

Кöлысьдырся бöрдöдчанкывъясын, торйöн нин кодъясöс сьылöны öбрад заводитчигöн, кырныш чукарöн, кырныш юкöн нимтöны жöникладорсаясöс, а жöниксö асьсö мыччöдöны невеста-юсь вылö, невеста-косысь вылö уськöдчысь кырнышöн.

Сëрниын кырнышöн нимтöны агрессивнöй мортöс. Веськыд сювъя кырныш, кыдзи и веськыд сювъя косысь, веськыд сювъя гöгöра – горш, вежöгтысь морт, сы вöсна мый налöн пытшкöсыс оз пö овлы тыртöм: сëйигас найö сiтасьöны.

Йöзкостын кырнышлысь нимсö тшöкыда артмöдöны кырны кывйысь.

Литература: Добротворский 1883, Микушев 1987, Осипов 1986, Попов 1938.

Н. Конаков, О.Уляшев
КЫСКА – Перымса Стефан йылысь преданиеса герой, печораса тун.

Предание серти, Эжва катыдсаясöс веськыд эскöмö пыртiгöн Стефан аддзис Улляна нима яр отсасьысьöс. Улляналöн выль эскöм дор бурсьылöмъясыс эз кажитчыны печораса ëн тун Кыскалы и сiйö босьтчис нывкасö накажитны. Кыска воис Эжва вылö, сотiс Улляна сиктысь часовня да кутiс нывсö. Улляна зэв ëна кажитчис Кыскалы и сiйö кöсйис нуны нывсö сьöрсьыс. Но Улляна шыбитчис пыжсьыс ваö да вöйис. Уллянаöс дзебисны сэтчö, кытчö визулыс вайис сылысь шойсö. Сэтчö жö Стефан лэптiс Улляна манастырöн. Татшöм жö нима лоис манастыр бердас артмöм сикт.

Манастырсö лэптöм бöрын Стефан мöдöдчис Печора вылö накажитны Кыскаöс. Кыскалöн оланiн дорас юыс вöлi вомöналöма кöрт чепöн (тадзи жö юсö вомöнавлiс и мöд Эжва катыдса тун Кöрт Айка). Стефан шуис нимкыв да вартiс чепас крестöн. Чепыс потiс да вöйис. Сэк Кыска чукöртiс уна чери и найö сувтöдiсны Стефанлысь пыжсö. Но Стефан бара жö крест отсöгöн вöтлалiс черисö. Кыска игнасис керкаас. Стефан тшöктiс сотны керкасö, но биыс эз вермы вермасьны тунлöн нимкывъяскöд. Бöрыннас векжö вермисны керкасö öзтыны Кыска пывсян корöсьöн. Тун чеччыштiс керкасьыс да пондiс пышйыны юлань. Стефанлöн отсасьысьясыс вомöналiсны туйсö да черъясöн кимльöскивыв кералöмöн виисны сiйöс. Сэтчö Стефан лэптiс вичко да Мылдiн манастыр.

Мукöд тунысь öтдор, кодъяс тшöтш жö вермасисны Перымса Стефанкöд, Кыска ним топонимикаын эз коль.

Роч йöзкостса календарын вежа Ласей вöлi пода дорйысьöн. Роч му христианизируйтöм бöрын сiйö вежис важ славян Волосöс либö Велесöс (подалöн ен). Коми вежа Ласейлöн тшöтш жö вöлiны подаöс доръян функцияяс. Кутшöмсюрö сиктын Ласей лунö служитлiсны молибен. Сылы сиöм часовняяс дiнö вайлiсны куканьлысь морöс яй, кокъяс да юръяс, а мукöддырйиыс висьö вайлiсны дзонь куканьясöс. Ставсö сетлiсны вичкоö.

Лëмаöс чайтлiсны няйт паськöма да беддя гöрба старукаöн. Сiйö ылöдлiс челядьöс аслас вöрса керкаö да мырдöн видзис найöс. Нимыслöн вермас лоны этимологическöй йитöд Ёмакöд. Видзöд Ёма.

Комияслöн мифа чайтöм-гöгöрвоöмъясын лов да орт – мортлöн кык лов: лов – “пытшкöсса”, орт – “ортсыса”. В. П. Налимов серти, лолыс мортлöн юрас, сiйö олöм кутысь, öткодявсьö лолалöмкöд. Кулöм воö сэк, кор морт дугдö лолавны – лов петöм. Такöд тшöтш ловлöн эм торъя субстанция. Кулысьлöн вольпась дiнын чукöртчöны рöдвужыс, медым аддзыны лов петöмсö. На йылысь шуöны: “Видзöдöны, виччöны лов петöм”. Чайтöны, мый лов – тайö еджыд ру. Эмöсь тöдмöсъяс бобув, шыр, лэбач да ичöтик морт мыгöра лов йылысь. Мортлöн кулöм бöрын лов öткодявсьö кулöмакöд. Кулöмалöн лолыс вуджö райö либö адö. Матiгöгöрыс да вöр-ва тшöтш жö ловъяöсь. Татысь и зумыд кывтэчасъяс, шуам, ловъя турун, ловъя пу, ловъя чери да с.в.

Ловсö юрö иналöм ладмö мифа чайтöм-гöгöрвоöмъяскöд морт вир-яй юкöнъяслöн да му тэчас тшупöдъяслöн символа йитöд йылысь. В. П. Налимов чайтлiс, мый буретш чайтöм-гöгöрвоöмъяскöд юр йылысь, кыдз лов видзанiн йылысь, йитчöма сир, руч, ош, сан юрöн либö нарошнö вöчöм морт юрлыöн вöдитчöм вуджöр пыдди.

Литература: Лимеров 1995, Налимов 1907, Сорокин 1910, Терюков 1979.

П. Лимеров
ЛОВПУ быдлаын.

Ловпулы эз вермыны имитны весиг медся вына тöдысьяс. Тöдысьлы эз мöрччы некутшöм кипель, сiйöс позис вины сöмын ловпу пуляöн. Медым кулöм тун эз ловзьы, сылы сiтанас сюйлiсны ловпу тув. Мойдъясын да быличкаясын эм сюжет пежысь сöстöммöм йылысь: пöль (вежа, тун) ловпу ньöрйöн нöйтö нылöс, пежлысь либö тунлысь нывсö, ныв пытшсьыс петöны гут-гаг, тваръяс, дзодзувъяс и нылыс сöстöммö. Позьö чайтны, мый тайö пуыслöн торъя тöдмöсъяс йылысь чайтöм-гöгöрвоöмъяс чужисны сы вöсна, мый ловпулöн сöзыс вир кодь, гöрдöдö. Тайö ладмö и lovpu кывлöн йöзкостса этимологиякöд – “лов-пу”, кöть и ловлöн да пу нимлöн омонимия артмис фонетическöй сöвмигöн сëрöнкодь нин.

Лудiк петкöдлiсны Иван лун (важ ногыс лöддза-номъя 24. лун) водзвылын.

Иван лун войö удорасаяс куимлаысь вайлiсны лыа да куим уль чуркатор ва дор пуктöминъясысь. Чуркаяссö косьтылiсны да сэсся сотлiсны пачын. Лыасö киськавлiсны быд гожöб-розьö. Сэккостi босьтлiсны куим лудiкöс, кöртавлiсны на бердö сунис да сунисöдыс кыскылiсны ывлаö асыввывлань. Сэсся лудiкъяссö нöйтлiсны вöсньыдик роскöн да шулiсны: “Клоп, мой гость, моë тело как кость. Моя кровь как слюна. Ты не ешь меня, ешь своего сына. Раб божий (имя)...”.

Печора катыдын лудiк бырöдан öбрадыс вöлi мöд нога. Медыджыд лудiклы “сюрас” (ускас) кöртавлiсны сунис да кыскылiсны керкасьыс. Кыскысьыс бöрдлiс: “Ой, шондiбанöй, бура жö эськö жаль тэ да, тэныд ме керка вöчи да сэтчö тэнö ми нувам. Сэнi вöд тэнö некод оз ви ни öбöдит. Мича краснэй платтьöнад да бура тэ жаль да”. Лудiксö петкöдлiсны звöз улö, сюйлiсны истöг кöрöбö да кольлiсны сэтчö. Öбрадсö нуöдiгкостiыс эз позь серавны.

Сыктывсаяс чукöртлiсны лудiксö рузум гöрöдö да шыбитлiсны кимльöскивыв кильчö вывсянь кывъясöн: “Кысь локтiнныд, сэтчö и мунöй бöр”, “Кытчö кужанныд, сэтчö и мунöй”.

Аслыспöлöс нимкыла сьыланкыв гижöма изьватас комилысь: “Лудык Хлопотович,/ Тэнö ми мöдэдам/ Бöре костэм вылад,/ Водзе вотэминад!/ Уна мьяньчумысь/ Еджыд яйнумес сёин,/ Уна мьяньчумысь/ Вирнумес юин,/ Прöсти, прöсти картыр рöдвужнад,/ Эжтыр вок-чойнад же,/ Водзе мунтэм вылад,/ Бöре костэм вылад.”

Перым-комияс лудiк петкöдан öбрадсö нуöдлiсны быть чинысь тöлысь дырйи. Кыйлiсны кык лудiкöс да бöрдлiсны: “Мусаясöй миян, мичаясöй миян! Сы дыра олiм öтлаын, сэтшöма радейтлiм öта-мöдöс, но колö торйöдчыны: миян лои кöдзыд, лои дзескыд. Пуксьöдам тiянöс выль каретаö да нуам выль патераö. А тi нуöдöй сьöрсьыныд пöль-пöчтö, ай-мамтö, ныв-питö – став рöдвужтö да котыртö”. Сэсся лудiкъяссö пуктылiсны мак юрö либö истöг кöрöбö, нулiсны вöрö да кольлiсны мыр улö либö “каретаас” кöртавлiсны сунис да “нуöдлiсны” лудiкъяссö кильчö улö.

Литература: Климов 1991, Микушев, Чисталев 1968, Сахарова да мукöд 1976, Uotila 1989.

Н. Конаков
ЛУПАРЬЯ – эжватас фольклорса герой, вына тун.

Лупарьялысь оланiнсö эз тöдлыны. Сiйö виччысьтöг мыччысьлiс Эжва вылын, лыкöдлiс сиктъяс, виалiс йöзöс да бöр вошлiс. Тунлысь рöзбойничайтöмсö дугöдiс Перымса Стефан. Стефан вöтöдiс сiйöс Эжва вылын. Лупарья чукöртiс сымда чери, мый Стефанлöн пыжыс сувтiс. Лупарья петiс берегö да пöртчис ыджыдсьыс-ыджыд кöинö. Сэсся сiйö лэдзис Стефан вылö да сылöн ëртъясыс вылö кöин чукöр, ош чукöр, бушков да с.в. Кыдзи и мукöд преданиеын тунъяскöд вермасьöм йылысь, Стефан эз сет Лупарьялы пышйыны и ëртъясыс кутiсны тунöс. Найö дыр кералiсны Лупарьяöс черъясöн, но сылы тайö эз мöрччы. Сiйöс вермисны вины сöмын сэк, кор Лупарья ачыс висьталiс, кыдзи сiйöс позьö вины.

Комияслöн эскöмъясын льöм образ пырö ëнджыкасö негативнöй тöдмöсъяса пуяс лыдö (шуам, пипу да оржы). Тайö гöгöрвоöдсьö и сiйöн, мый татшöм пуясыс оз туйны олан керка тшуны да торъя ногöн обработайттöг öдйö сiсьмöны. Тайö тöдмöсъяссö символическöй донъялöмыс бура тöдчö луза-леткаса сëрнисикасын, кöнi льöмсö нимтöны куль пуöн. Но льöмлöн аслас ин и “пеж” пуяс лыдын, сы вöсна мый льöм пу увъясöн öнi на вöдитчöны кыдз вöчасянторйöн, а тусьсö сëйöны да вöчöны сыысь бурдöдчантор.

Фольклорын льöм образлöн атрибутöн петкöдчö куим рöм: сьöд (тусьыс), еджыд (дзоридзыс), пемыдгöрд либö перкаль (яйыс). Удорасаяс пемыдгöрдсö льöм нимöн и пасйöны – льöмöвöй. Тöдса, мый уна сибирса да войвывса войтыр фольклорын пу вундасiнлöн рöмыс – вир метафора.

Сыктывса кöлысь бöрдöдчанкывъясын льöмлысь еджыд розъяссö символическöя йитöны асыввывкöд: “Асывсянь жö мем бурси да / Асыввыв льöм дзоридзыс мында”. Эжватас да изьватас бöрдöдчанкывъясын льöмлöн дзоридзьясыс петкöдчöны нылалан кад метафораöн:

Фольклорын льöм дзордзалöм топыда йитчöма чужтöм темакöд. Приметаяс серти, льöм дзордзалöм йитчöма кынталöмкöд. Льöм дзордзалöм серти тöдмалöны вотöс воöм йылысь: уна льöм дзоридз – чöд лоö, а тöлыс кö нуас дзоридзсö – оз ло. Чайтöны, мый льöм дзордзалiгöн кульмö чери: льöм дзоридз вылын ëдi кульмö. Перым-коми йöзкостса медицинаын вöдитчылiсны льöм дзоридз пуöм ваöн, медым не сьöктыны либö медым чужтыны шой.

Эскöмъясын льöмлöн сьöд тусьыс – неминуча пас, ачыс пуыс – шог символ: öтл. коми льöмзыны, льöмöстны. Чайтöны, мый льöм тусь вöталöны матыса мортлöн кулöм водзын. Льöм пу пуктöны оз керка бердö, а потшöсланьысджык. Леткасаяс шуöны: “Веськалöны кö льöм увъяс керка öшиньö – сiйö керкаас регыд кодкö висьмас либö кулас”. Удораса да эжватас комияс чайтöны, мый нюжöдчисны кö льöм пулöн вужъясыс керка тшупас улöдз, сiдзкö, олысьясыс вермасны кувны. Эжватаслöн эм эскöм, мый керка öшинь улын быдмысь льöм пу “босьтö керка месай-месаньыслысь вынсö”. Коми öбрадъясын льöм петкöдчö гуалан пуöн. Леткасалöн керка йöрын быдмысь льöм пу улын казьтылöны став кулöмаöс пöрысь йöз, кодъяс оз нин вермыны ветлыны шойна вылö да вичкоö. Печораса да изьватас комияс пуктылiсны льöм пусö пырттöм челядь гу вылö. Пырттöм челядьöс гуавлiсны эз шойна вылö, а керка дорас (пасъям, мый мукöддырйиыс хантъяс льöм пу вылö öшöдлiсны кагалöн чужан паськöма сюмöд кöрöб). Печорасаяс и öнi на кулöмалы пернасö вöчöны льöм пу сьöмöсысь. Чайтöны, мый кулöмаясöс оз позь дзебны ыргöн да эзысь пернаясöн. Удораын гижöма легенда льöм пу вылын мыччысьöм ыргöн крест йылысь. Öтчыд Крестовка сиктса олысьяс казялiсны сиктсайса льöм пу вылысь ыргöн распятие. Нуисны сiйöс вичкоö, но мöд луннас крестыс бöр нин вöлi льöм пу вылас. Тадзи вöлi куимысь. Сiдзкö, крестыс эз кöсйы мунны льöм пу вывсьыс. Сэк лэптiсны льöм дорас часовня, а сы пытшкö сувтöдiсны ыджыд пу крест, код вылö и ладмöдiсны ыргöн распятиесö.

Коми экспрессивнöй лексикаын да фразеологизмъясын льöм пыр мыччöдöны мортлысь негативнöй чертаяс: вежöртöм, асныра морт йылысь шуöны льöм пу плеш, вывтi ëна горзысь кага йылысь удорасаяс шуöны льöм пу керас, дыш челядьöс бать-мамыс шмонитiгмоз öлöдöны льöм пу сур выйим (ньöръялöм).

Перым-коми мойдъясын шемöса льöм пу бедь магическöй вына. Сы отсöгöн фольклорса герой атöдö гусясьысьясöс да накажитö кедзовтысьясöс. Татшöм жö сяма чайтöм-гöгöрвоöмъяс эмöсь Европа асыв-войвывса войтыръяслöн традицияа мöвпсямын. Шуам, Россиялöн войвыв губернияясса войтыр буретш льöмйысь вöчлiсны пастук бедь, кодлöн вöлi подалы да пежъяслы имитан шемöса вын. Неважöн на праздникъяс дырйи гöтыртöм том коми зонъяслöн быть вöлiны льöмйысь вöчöм да орнаментöн мичмöдöм сера бедьяс.

Литература: Конаков 1997, Климов 1990, Кудряшова 1993, Плесовский 1968, Финченко 1992, Штернберг 1936, Sharapov 1995б, АЧМ, ЛГ ЧМ, ОУ ЧМ, ПЛ ЧМ.

В. Шарапов
ЛЮЗИМЕР емваса (< люзьнитны) – лëк вöчысь лов.

Люзимер олицетворяйтлiс гумыльга, кодысь артмылiсны вабергачьяс, тöвнас лым пугрöдлiс, а турун пуктiгöн сiйö разöдлiс куртöм турунсö. Чайтлiсны, мый Люзимер полö табакысь. Медым сiйö дугдiс пакöститчыны, колiс сöмын шуны тайö кывсö.

Öти космогоническöй мифын лягуша – демиургъяслöн пемöс мыгöра ипостась. Видзöдласыс сы вылö эз вöв öти сяма. Öтар боксянь, сiйö вöлi йитчöма тун вынъяскöд. Нывбаба-тунъяс вермисны пöртчыны лягушаö. Кык öтлаасьлöм лягушалöн лыяс отсöгöн позис лоны тыдавтöмöн. Мöдар боксянь, лягуша вöлi Енлöн вöчöмторйöн и та понда сiйöс эз позь вины. Мöд версия серти, лягушаöс эз позь вины, сы вöсна мый водзтiсö сiйö вöлi мортöн: лягушаö пöрис медводдза морт, кодi сьöлöм усьöмöн шыбитчис керка вевт вывсянь агас вылö. Мöд мифын висьтавсьö, мый лягушаö пöрöма мамыскöд узьлысь морт.

Лягушаöс чужтöм символъяс лыдö пыртöны, буракö, сы вöсна, мый сылöн мыгöрыс зэв ëна мунö нывбабалань (торйöн нин гатшöн куйлiгас), да тшöтш и бур рöдманлун пондаыс.

Радейтчан магияын кодзувкотъясöн вильöдöм лягуша лыяс отсöгöн этшйылiсны радейтана мортöс.

Перым-коми эскöмъяс серти, кужысь тун дiнын велöдчысьлы медбöрыннас колiс войын локны пывсянö. Вой шöрнас петкöдчылiс ыджыдсьыс-ыджыд лягуша да паськöдлiс вомсö. Велöдчысьыслы колiс пырны вомас да мунны сы пыр.

Литература: Доронин 1924, Ильина, Уляшев 1998, Львова да мукöд 1989, Сидоров 1928, Fuchs 1924.