Мемлекеттік шығыстар, олардың құрамы және құрылымы

Мемлекеттік шығыстар мемлекеттің жұмыс  істеуімен  байланысты  ақшалай шығындарды білдіреді. Экономикалық категория  ретінде  шығыстар қоғамдық өндірісті дамыту және жетілдіру, қоғамның  алуан түрлі қажеттіліктерін қанағаттандыру мақсатында жалпы қоғамдық өнімнің бір бөлігін үлестірумен, қайта үлестірумен және тұтынумен  байланысты экономикалық қатынастарды білдіреді.

Мемлекеттік шығыстар құрамына мемлекеттік  бюджет,  мемлекеттік  бюджеттен тыс қорлар, мемлекеттік кәсіпорындар мен ұйымдар, өндірістік және өндірістік емес сфералар мекемелерінің шығындары  кіреді.

Мемлекеттік сектор кәсіпорындары шығыстарының құрамына мыналар кіреді:

1) өндірістік, шаруашылық-пайдаланылу қызметімен байланысты шығындар;

2) ұдайы өндірісті кеңейтуге (негізгі және айналымдық қорларға);

3) бюджетке және бюджеттен тыс қорларға;

4) көтермелеуші және ынталандырушы қорларға.