ЭКИ КЮН бла ЭКИ АЙНЫ ИЕСИНЕ

ЭКИ КЮН бла ЭКИ АЙНЫ ИЕСИНЕ

Къарадыла эки Кюн,

Къалтыралла эки Ай:

Ачыла тургъанча гюл –

Мен сени кёрдюм алай.
Адам да джандетде

Джалан кёрюб Хауаны,

Тутхан болур джюрекден:

Мен ангылайма аланы.

Биз да бу Джер джандетден

Къысталсакъ да таб алай –

Сокъуранмам бир джукъгъа:

Къарайдыла джууукъдан

Эки Кюн бла эки Ай.

Джангы толгъан эки Ай

Мукъладисча тарталла –

Къошулалла джаз бла джай.

Гюнахлы адамма мен.

Сюймеклик – Аллах эсе,

Анга табынама мен.

Эки ёшюнюнг – эки Ай...

Насыбым тутар мени,

Ишим да болур къолай...

Шериатдан, ахратдан,

Сени ючюн дунияда

Артха турмам бир затдан.

Соруу, джууаб да меннге,

Джууукъ, узакъ да меннге –

Джангыз Сенсе.

Джашырама атынгы...

Кюрешеме сакъларгъа

Сени кёзден, сёзден да.

Кийик – чабханча тауда,

Джулдуз – джаннганча Кёкде,

Сен алайса джюрекде.

Къалтырайла эки Ай.

Сюйсенг ийнан, сюйсенг кюл –

Ёзге бил:

Мен – аны келечиси.

Джазыуубуз болур бир –

Буду сёзню игиси,

Буду ишни игиси.

ПОМПЕЯНЫ КЪАТЫНДА САГЪЫШЛА

Балчыкъгъа, кирге барабыз бата,

Гюнахдан, харамдан тыймай кесибизни.

Везувий Помпеяны басханча,

Минги Тау басар деб, къоркъама бизни.
Бизге джау эселе да хоншула, кърал,

Къыйынлыкъ алада тюлдю – къарагъыз:

Бир-бирибизни алдай, тонай, къыра,

Адебден-намысдан, тёреден-джорукъдан да чыгъа,

Адамлыкъдан, муслиманлыкъдан да чыгъа,

Кеси-кесибизни тюб эте барабыз.

Ичкичилик, хаулелик бошайла бизден,

Къууат, берекет къачалла бизден...

Минги Тау басар деб къоркъама бизни.

Бизге джийиргениб къарагъанча кёреме,

Бизге чамланыб къарагъанча кёреме –

Акъ тау къара балчыкъгъа тёзмез къатында.

Андан джаханим от къуюлур юсюбюзге...

Везувий басхан Помпеяны кёрдюм да бюгюн,

Быллай ачы сагъышла келдиле кёлюме.

Джуртумдан, хакъымдан болсам да узакъ.

Огъай, мен этмейме аман къууум, аман джора –

Джангыз, къоркъама тюб болады деб, халкъ:

Азаб чегеди, тюб болады Хакъ бла болмаса халкъ.
Кюл болгъан Помпея. Ол кюлде

Къызара, агъара чагъалла гюлле. Кимге?

Шаула саулагъамы берелле салам?

Бери келген-кетген минг-минг адам

Джашауларына, халкъларына, джуртларына

Сагъыш эте болурламы? Къайдам.

Аны этегинде джашагъан халкъым да...

Ичкиге, хаулеге, уругъа, мурдарлыкъгъа,

Балчыкъгъа, кирге – харамгъа, гюнахха

Къаллай бирни тёзерикди Минги Тау?
Балчыкъгъа, кирге барабыз бата,

Гюнахдан, харамдан тыймай кесибизни.

Везувий Помпеяны басханча,

Минги Тау басар деб къоркъам бизни.

АШХАМ БОЛА

Джюрек къатханды, болгъанды берч.

Таш болургъа эртде эсе да,

Терек болургъа уа болгъанды кеч.

Джокъду энди чагъыу, джашнау –

Кетди джашлыкъ, кетди джашау.

Кёб къыйынымы этдим зая,

Болалмадым тау не къая.

Хар не башланса эди аллындан,

Джашасам эди джангыдан –

Джашар эдим башха тюрлю.
Ийнанмайма мен алагъа –

Айтханлагъа:

«Джангыдан башласам да джашаб,

Джашагъанымча джашар эдим».

Кёзбау сёзлеге ийнанмайма.

Джангыла, джыгъыла, кюреше къобаргъа,

Сокъурлана, сокъурана, тюшюне, къайыта тобагъа –

Алай джыябыз эс, акъыл.

Алай а, ол кёзюуге

Джууукълашады бизлеге ахыр.

Джангыдан джашаргъа болады кеч.

Джюрекни хар элиси – не джара, не таб, не берч.

Джаш тёлюге береме ауаз:

Тынгыласа, ангыласа – джангылмаз.

Алай а – тюлдю тынгыларыкъ:

Башымдан ётген затды ол.

Къартла деученелле, бере ауаз:

«Уллу айтханны этмеген – уллаймаз».

Джангыдан джашаргъа кеч болгъанды.

Заман не заманды? – Ашхамды.

Ай бла джулдуз кёрюнелле Кёкде.

Минг къайгъы, джарсыу, сагъыш кёлде-джюрекде.

ЧАМ НАЗМУ

Къалай сейирди джашагъан,

Ариу къызлагъа къарагъан,

Махталыргъа излегенни махтагъан,

Алданыргъа излегенни алдагъан.
Ариу къыз неге да джууабды,

Этген гюнахы да сууабды.

Шайыр джюрек а къачан да –

Къана билмейди, суусабды.

Бу ариу къызланы кёрмесем,

Аланы джанымдан да сюймесем,

Ала амалтын ёлмесем,

Сюймеклик не болгъанын билмесем –

Джашаудан татыу къалмазед,

Сау, шау эсем да сезмезем,

Джашагъанымы да билмезем.
Къалай сейирди джашагъан –

Ариу къызлагъа къарагъан.

Махтаугъа тыйыншлыны махтагъан,

Алдаргъа излегенни да алдагъан.

Къалай сейирди джашагъан.

СЕННГЕ УЗАКЪДАН КЪАРАБ

Сейирсиниб къарайма тёгерекге –

Джерге, Кёкге эмда джюрекге.

Махтау салама Сюймекликге –

Ич-тыш Ариулукъгъа кёзюмю ачхан.
Сен багъалыса меннге

Ана тилимча, Ата джуртумча, къыйынлы Халкъымча.

Дунияча, джашауча, саулукъча багъалыса меннге.

Сен – джюрекдесе, Джердесе, Кёкдесе.

Шайыр, Адам этген да Сенсе мени.

Сени кючюнг бла келгенди меннге

Кертиге, Тюзлюкге, Ариулукъгъа да сюймеклик.

Сенсе халкъыма, джуртума къайтаргъан да мени.

Джуртуму суратыса Сен –

Акъ Минги Тауну, джашил нарат чегетлени, чокъуракъ сууланы –

Барын кёреме Сенде.
Ана тилими сыфатыса Сен. Сеннге къарасам

Халкъ джырланы, ийнарланы, кюулени –

Ол ёлюмсюз сейир макъамланы, шийирлени

Кёреме, эшитеме.

Тилни, Халкъны, Джуртну да ёлюмсюзлюгюсе Сен.

Сенсе назмуланы, сабийлени да Анасы.

Сени къууандыргъан да болурма, джанынга да болурма тийген.

Ахрат азабым да, дуния намысым да Сенсе мени.

жүктеу/скачать 2.02 Mb.

Достарыңызбен бөлісу: