Ўқитувчи раҳбарлиги остида “Туркий тил бўйича араб тилида яратилган луғатлар ва грамматик асарлар” мавзуида илмий семинар ўтказинг. Семинарда слайдлардан кенг фойдаланинг

XV–XVI асрлардаги ўзбек тилшунослиги.

Навоийнинг ўзбек тилшунослиги тарихидаги улуғ хизматлари.

“Муҳокамату-л-луғатайн” асари.

Навоийнинг талқин принциплари. Турли оилага кирувчи тилларни чоғиштирма-типологик ўрганиш масаласи.

Алишер Навоийнинг луғатчилик фаолияти. “Сабъат абҳур” луғати.

Навоий асарлари ва “чиғатой туркийси” бўйича луғат тузиш анъанасининг юзага келиши.
“Қутадғу билиг” қўлёзмасида айрим сўзлар учун берилган изоҳлар
Шарқ, хусусан, туркий луғатчилик анъанасида қизиқ бир ҳодиса кузатилади. Бадиий асарни кўчираётган котиб, унда қўлланган, бироқ ўз даври ўқувчиси учун тушунарсиз бўлган сўзлар маъносини ҳошияга ёки сатр остига ёзиб кетган. Кези келганда, бу нарса луғат вазифасини ҳам ўтаган. Буни машҳур бир қўлёзма мисолида кўриб чиқамиз.

“Қутадғу билиг”нинг уйғур ёзувли ҳирот нусхасини кўпчилик эшитган. Ушбу қўлёзмани 1439 йили ҳиротлик Ҳасан Қора Сайил Шамс бахши кўчирган эди. Уйғур ёзувли қўлёзма ҳозир Вена Миллий кутубхонасида (А.Ғ.13) сақланмоқда (факсимили учун қаранг: Радлов 1890).

Муҳими шундаки, уни кўчирувчи бахши матнни ёзаётганда, ўрни билан, айрим сўзлар ёки ҳарфлар остига уларнинг ўқилишини, ўз даври учун тушунарсиз бўлган сўзларнинг маъносини ёзиб кетган. Буни ҳам луғатчилик тарихидаги ўзига яраша усул сифатида баҳолаш мумкин. Чунки, ўтмишда тарихий асарлар кўчирилаётганда кўпинча шундай йўл тутилган (Масалан, шунга ўхшаш ҳодисани “Ҳибату-л-ҳақойиқ”нинг XV-XVI асрларда кўчирилган қўлёзмаларида ҳам учратамиз. Ёки XVIII асрда Алишер Навоий “Хамса”сини кўчирган котиб матн теварагига тушунарсиз бўлган сўзларнинг маъносини изоҳлаб кетган. Бу ишга катта куч кетказгани учун ҳатто матнга янги от бериб, уни “Хамса бā ҳалли луғат” деб атаган).

Матнда асар тилига хос, лекин қўлёзма кўчирилган кезда ишлатилмай қўйилган ёки айни маънода ўша давр китобхони учун таниш бўлмаган архаик сўзлар изоҳлаб кетилган. Котиб асар тилини аслидай сақлаш, уни замонасига зўрма-зўраки мослаштириб юбормаслик учун шундай йўл тутган кўринади. Сўзларга берилган бундай сатр ости изоҳлари араб ёки уйғур хатида.

Изоҳланиш йўллари қуйидагича:

Асар кўчирилган чоғларда қўлланилмай қўйган қадимги туркий сўзлар уларнинг синонимлари билан изоҳланган. Масалан: bodun~bozun сўзининг остига el, raiyat деб ёзиб қўйилган (30.13; 20.10), qumardqu~qumaru сўзининг остига yādgār (7.3; 59.20); arqïš – karvān (14.2), otačï – tabib (9.26), sawčï – rasul (23.19), ög – ’аql (16.21), yuluğ – fidā (12.6), yula – čïrağ, yaryqluq (12.4; 6.12), hajib(~xas hajip) – vazir (3.16; 30.9), munduz – gol (32.30), bor – šarāb (55.10), yalawač – elči (9.9), qurdqa – qarï (24.5), yaŋluq – ādam (20.22) сингари.

Айниқса, астрономик атамалар мунтазам равишда изоҳланган. Чунки, бу даврда қадимги туркий атамалар ўрнида уларнинг арабий, форсий вариантлари қўллана бошлаган эди. Масалан: Yašïq – Āftāb (13.20), Sekäntir – Zuhal (16.1), Oŋğay – Muštariy (16.2), Körüd – Mirrih (16.3), Ökäk – Javzā (16.9), Ud – Savr (16.9), Qozï – Hamal (16.9), Ülgü –Mezān (16.10), Könäk – Dalv (16.11.1), Balïq – Xut (16.11.1) сўзлари билан изоҳланган ва б.

Кўп маъноли сўзларнинг айни байтдаги маъноси изоҳланади. Масалан, асарда қўлланилган öd сўзи “вақт” маъносини билдирган. Ушбу ўзакдан ясалган ödsiz сўзи “бевақт” маъносини ифодалайди. Матнда қуйидаги мисрада ҳам у айни маънода келган:

Мисрадаги ödsiz сўзининг остига ajal деб изоҳланган. Бу билан мазкур сўз “бевақт, ажалсиз” маъносини ифодалаётганига ишора этилади: “Киши онадан туғилиб бевақт [яъни ажалсиз] ўлмайди”.

Байтдаги qut сўзи “давлат, бойлик” маъносини ифодалайди. Шунга кўра, унинг остига davlat деб ёзиб қўйилган. Байт мазмуни шундай бўлади:

Бу билим билан, кўргин, элини сақлади,

Давлати кунда ортиб, юқори кўтарилди.

Бу билан асар персонажларидан бири бўлмиш Ойтўлдининг мажозий маъноси назарда тутилмоқда: “Бу Ойтўлди дегани – қутдир [яъни иқболдир], кўргин уни”.

Изоҳларнинг айримлари форсчада. Матнчиликдаги бу ҳодиса Ҳирот адабий-маданий муҳитининг таъсирида юз берган дейиш мумкин. Чунки мазкур муҳитда икки тиллилик анъанаси устивор эди. Чунончи: туркий sïğït ни котиб girya деб изоҳлаган (48.22), qapuğ ни dar (9.23). Баъзи изоҳлар туркий ва форсийда. Жумладан, adïn сўзи бир ўринда туркий özgä (5.6), бошқа бир ерда эса форсча digar (6.8) сўзи билан изоҳланган.

Баъзи изоҳлар бирикма ҳолида: ol edgü özün – dar ān vaqt (20.10), bezänip ödü – ārasta damā-dam (24.8), qutadğu сўзи эса ya’ni hujasta ёки hujasta bud (22.7) деб изоҳланган.

Сатр остида сўзларнинг қўлёзма кўчирилган даврда қўлланган фонетик вариантлари келтирилади. Жумладан: уйғур ёзувли сатрдаги qulğaq сўзининг остига qulaq (82.6), adïrdï остига ayïrdï (16.8), qulağuz остига эса [qula]wuz деб ёзиб қўйилган (15.31).

Шундай қилиб, бахшининг ушбу изоҳларидан ХV аср тилида (“чиғатой туркийси” деб аталаётган ёзма адабий тилда) архаиклашган луғат қатламини тиклаш мумкин.