Ад быдлаын (< роч); ад гуран скр., шс.; вакрамеш

В. Шарапов

Ен да Омöль (Куль) кындзи важ пермяналöн пернатöмлуна пантеонлöн вылi тшупöдса енсикасъяс пиысь öнöдз коли сöмын Войпельлöн нимыс. 1501 воын Симон митрополит ыстö Перымö гижöд да корö войтырöс не кевмыны Войпельлы да не кодрасьны. Тайö висьталö сы йылысь, мый XVI нэмын на Войпель вöлöма перым-комияслöн пернатöмлуна юрнуöдысь енсикасöн. Туялысьяс не öтчыдысь босьтчылiсны гöгöрвоöдны Войпельлысь чужöм-пертассö да пырджык мыджсьылiсны чайтöм вылö, мый роч гижöдас терминыс дзугöма. Чайтлiсны, мый сылöн шыпас сертиа вежöртасыс – ‘войвывса пель’ либö ‘войся пель’ – öдвакö вермис лоны кутшöмкö енсикаслöн нимöн. Медтшöкыда сiйöс гöгöрвоöдлiсны вой тöлöн. Войпельлöн могъяс лыдö лыддьылiсны вой тöв, турöб да лёк поводдя вылын ыджыдалöм, пемöсъясöс дорйöм да с.в., но мыджсьылiсны сöмын ас гöгöрвоöм вылö тэчöм кывкöртöдъяс вылö. Сэк жö перым-коми фольклорын, торйöн нин Кудым-Ош йылысь легендаясын, Войпель казьтывсьö тырмымöн тшöкыда, и тайö тöдмöгъясыслöн объектива анализ сетö позянлун мындакö реконструируйтны сылысь мыгöрсö.

Легендаясын висьтавсьö, мый Войпель вöлöма зэв вына да йöз дорö бур енсикасöн. Сiйöс корлöмаöсь видзны висьöмъясысь, вомидзысь, кежöдны вöрöгöс. Войпельлöн серпасыс сулавлiс кыр йылын вежаинын. Мукöд енъяскöд тшöтш сiйö сулавлiс вына кыдз улын, на пöвстын Войпель вöлöма медджуджыд. Сы бердын сулалöма вись пöрт, кытчö чукöртлöмаöсь куяс да орчча войтыръяслысь куяс вылö жö вежöм эзысь. Сы гöгöр вöлi тэчöма изъяс да ракпаньяс. Найöс вайлöмаöсь быд юысь да шорысь, кöнi овлöмаöсь Войпельлы юрбитысь йöз. Öтувъя гажъяс дырйи Войпельлы висьö вайлiсны пода. Вöралысьяс ньöввужъясысь лыйлiсны пуенкöд орччöн сулалысь вежа сюръяö. Перым-коми фольклор серти, водзтi вöралысьяс лыйлiсны ньöввужъясысь вежа пуö (танi сюръя) вöравны петтöдзыс, медым мойвиис кыйсигас. Войпельлöн пуен серпасавсьö нёль чужöма нывбабаöн (öтл. славяналöн нёль юра Збручса пуен да балтика славяналöн медыджыд енлöн – Свентовитлöн – серпасыс). Сы вылö, мый Войпельлöн тайö серпасыс збыль, индö важперымса культа кöрт кисьтöм, кöнi эм аньенлöн уна чужöма серпас.

Эжва катыдса, луза-леткаса, удораса комияс айлысь айсö нимтöны пöльöн, а Сыктыв катыдсаяс пöльööн. Вöрпöльöн либö вöр пöльöн нимтылiсны вöрса месайöс. Перым-комияслöн XIX нэм заводитчигöн на вöлi öнiя кывйысь бырöм нин айпэл ‘мужичöй’ кыв. Позьö чайтны, мый роч гижöдас ö-сö вежöма е-öн, сiдзкö, оригиналас вöлi Войпöль ‘Войвылын ыджыдалысь’. Тайö кывкöртöд дорыс тшöтш и сiйö фактыс, мый перым-коми легендаясын Войпельсö нимтöма Вöрпельöн (öтл. зыряналöн вöрпöль).

Но тайö этимология сертиыс, Войпель должöн лоны айлов сюрöсаöн, а тайö оз ладмы енсикаслöн нывбаба мыгöркöд фольклорын. Та вöсна эм помка корсьны мöд этимология. Вермас лоны, мый роч гижöдас важ перым-коми енсикаслысь нимсö абу дзугöма. Эжва катыдсаяс вой пельöн нимтöны торйöн нин сюсь пеля йöзöс. Татшöм ногöн, Войпельöн вермас лоны ‘ставсö кылысь, ставсö тöдысь’: тайö енсикассö пасйысь эпитет, кодöн вöдитчöны сылöн гуся ним (эвфемизм) пыдди (öтл. обса йöгра ассьыныс медвылi енсикассö Торумöс пасйылiсны эпитетöн ва лапкор ыджда пеля, сюсь пеля чöжлöн пель кодь). Войпельлöн пуен дорö быд ю дорысь да шор бердысь вайöм ракпаньяссö позьö гöгöрвоны пель символöн (öтл. роч ушная раковина). Сiдзкö, сылöн пельыс кылiс быдлаысь, кöнi овлiсны важ пермяна, да та вöсна Войпель ставсö тöдiс.

Литература: Белицер 1958, Гагарин 1978, Жаков 1901, Климов 1964, Лукина 1990, Лыткин, Гуляев 1970, Ожегова 1971, Плосков 1990, Рифтин 1989, Симон 1841.

Н. Конаков
ВОЙ ТÖВ САЙÖД быдлаын – кулöмалöн новлан кöлуйыс, кодöн вевттьылiсны гортсö.

Дзебöм бöрас вой тöв сайöдсö сетлiсны ай-мамтöм челядьлы либö сиктса медгöль йöзлы. Чайтлiсны, мый та бöрын кулöмаыс оз мöд кынмыны мöдар югыдас. Дзебан бöрдöдчанкыв контекстын, кöнi ловъяясыс месайлöн либö рöднялöн кулöм бöрын кольöны “вой тöв вылын”, вой тöв сайöд сетöмсö позьö видлавны, кыдз кулöмаöн ай-мамтöмалысьясöс (гöльясöс) дорйыны вöзйöм.

Н. Конаков

ВОЙШÖРВОЙСЯ быдлаын; войшöрся вэ., уд., сыкт.; войшöркадса уэ., сыкт.; войшöркадъя зырян; ойшöрика п.-к., – лёк лов, торъя öпаснöй вой шöрын.

Н. Конаков
ВОМИДЗ вэ., ем., изь., уэ., печ., скр.; вомыдз вс., уд.; вомдзасьöм быдлаын; вондзасьöм уд.; воньдзасьöм уд. (< коми вом); йöзасьöм лл. (< коми йöз; шыпас серти ‘йöзöдöм’); веж кыв уськöдöм п.-к. (шыпас серти ‘вежöгтан кыв уськöдöм’); озев лл., п.-к. (< роч (о)зевать); тогалöм вэ. (сöмын пон йылысь); ёрöм быдлаын, – лёк кывйöн вомидзалöм (öтл. тшыкöдöм).

О. Уляшев
ВОР УЛЫН КЕРАЛÖМ быдлаын – магияа бурдöдчан öбрад.

Сьöкыда висьысь мортöс, кодi дыр кад чöж вöлi кулан выйын, “керавлiсны” вор улын. Олан керка тагöс вылын либö пывсянын висьысьöс водтöдлiсны пу вор улö. Вор вылас тöдысь либö орччöн олысь котырса медпöрысь мортыс керавлiс кыдз пу, ляк кыдз пу либö зынтурун корöсь либö öкмыс идзас, öкмыс рос, öкмыс турун сi. Тöдысьлöн отсасьысьыс либö орчча котырса медтом олысьыс юавлiс: “Мый кералан?” Тöдысьыс либö öбрадсö медпöрысь нуöдысьыс вочавидзлiс: “Висьöм керала, омöль керала, бура да шаня керала, важсьыс бурджыка, шаньджыка” либö: “Висьöм керала, пежöс, омöльöс керала, бура да шаня важджыксьыс”.

Йöзкостса чайтöм-гöгöрвоöмъяс серти, тайö öбрадыс символизируйтiс висьöмлысь лёк ловсö бырöдöм. Öбрадсö куимысь нуöдöм бöрын, мойвиис кö тöдысьыслы, висьысьыс бурдлiс, эз кö – кувлiс.

Вор улын керавлiсны и челядьöс, кодъясöс чайтлiсны вежа войяöн вежöмаöн. Öбрадсö нуöдлiсны ай-мамсьыс “гусьöн”. Пасьтöм кагаöс водтöдлiсны керка тагöс вылö, гидын либö пывсянын (кöнi сiйö чужис) вор улö. Эжва катыдын кагасö водтöдлiсны кык вор костö. Тöдысь вор пыдöсас кералiс корöсь да шуалiс: “Ме ог кага керав, а пывсян айкасö” (зыряналöн) либö: “Сьöд чуд, тэ мун вор увсьыс и пукты ас пыддиыд миянсьым каганымöс. Он кö мун – коктö керала, китö керала, юртö керала” (перым-комияслöн).

Нуöдлiсны кö öбрадсö орччöн олысьяс, то медтомыс куимысь гöгöртлiс керкасö да юавлiс: “Мый кералан?” Медыджыдыс кералiс корöсь да вочавидзлiс кыкысь: “Потöм ворсö керала”. Коймöдысьсö: “Вежöмысь”. Кагаыс кö кувсьылiс, сiдзкö, сiйö вöлi “вежöма”. Бурдлiс кö кагаыс, чайтлiсны, мый тöдысьыс кужис кагаяссö бöр вежны да косöдны морт кагасö таладор югыдас.

Мыйкöдыра кежлö кувлöм да выльысь чужöм символикакöд йитчöм аналогияа ритуалъяс вöлiны паськыда тöдсаöсь рочьяслöн, карелъяслöн, удмуртъяслöн бурдöдчан практикаын.

Литература: Ильина 1997, Климов 1991, Янович 1903.

И. Ильина
ВОШЙЫНЫ скр., шс.; вошйинi вэ.; вошшыны п.-к., – пондыны сёйны (пызан дорö чукöстöм кулöма йылысь).

Комияс корöны кулöмаясöс пызан дорö татшöм кывъясöн: “Вошйöй-сибöдчöй, рöдительяс” (видзöд важ йöз, казьтывлöм).

жүктеу/скачать 1.79 Mb.

Достарыңызбен бөлісу: