КЪАЙГЪЫГЪА ТЮБЕРГЕ ХАЗЫРЛЫКЪ

Тенгизден ургъан салкъын аязгъа

Джугъутур бетин тутуб, иссилейди.
Тенгиз чыпчыкъланы къычырыкълары

Теке къалкъыуун бузмайла аны.

Гелеу кырдыкдан отлаб тойгъанды –

Рахат джатыб кюушенеди ол.

Кесин къоркъуусуз кёреди ол.

Насыблыды – сезмейди, билмейди

Уучу аны ызлаб, мараб,

Ышаннга салыб тургъанын.

Биз да алайбыз. Къайгъы

Къайдан, къачан, къалай,

Не тюрсюнде келир – билмейбиз.

Джаныуарды аны къылыгъы.

Андан къутулур джокъду амал –

Эртде-кеч болса да тутады бизни.

Джалыныб да къалмазса джаудан.

Джангыз аны бла аямай сермешиб,

Керти эркишича ёлюудю сый.

Эки башлы къушду къайгъы...

Къарт болсанг да нартма деб,

Керекди сермеширге.
Къайгъыны джетерин билиб,

Анга тюберге хазыр болуб,

Акъ кюн да къара кюннге хазыр болуб

Джашауду – акъылманлыкъ.

Къайгъыны бий этиб къоймазбыз.

Джашарбыз-ёлюрбюз-тирилирбиз,

Тейри адамыча кёрюнюрбюз.

Аскерлеча кемеде,

Джюджюлеча тёбеде:

Джокъду бизлеге тынчлыкъ.

Кемиред бизни сагъыш,

Къар басхан кибик джайны,

Джерни кючлегенча къыш.

Биз чакъыргъан затла тюл.

Джулдузла да кюелле,

Чачылалла болуб кюл.

Келликди ахырзаман.

Аны ангылагъанлыкъгъа

Хош болалмайды адам.

Къара джерге кирирге.

Айырылмай джашлыкъдан,

Айырылмай саулукъдан

Джашаб турургъа излейд.
Излегенликге не келсин –

Саулукъ кетсе бир кере,

Бакъдырсанг да минг кере,

Къайтармазса ызына;

Алайды буйрукъ, къадар.

Кеси кетсе да, къалса

Дунияда джашы, къызы,

Иши, оюму, ызы –

Ол да кеси къалгъанча,

Ол да кёлюне асыу,

Ол да ёлюмге къаршчы.
Алай а, бютеу дуния

Тюб болуб къаллыкъ эсе,

Кюл болуб къаллыкъ эсе –

Сора къайда магъана

Джашаудан, джашагъандан?
Джаныуардан, хайуандан

Баш болургъа кюрешдик,

Китаб ачдыкъ, тюшюндюк,

Аллах бла сёлешдик.

Джетмей эсе кючюбюз

Дуниябызны сакъларгъа,

Кесибизи джакъларгъа.

Ахыр кюн келлик эсе,

Ол Ахыргъа дери да

Биз Адамча джашайыкъ.

Башха дуния боллукъду,

Къыямат кюн боллукъду –

Боллукъду соруу-сууал»,-

Азабладан къоркъуб тюл,

Биз адамча джашайыкъ

Адам болгъаныбыз ючюн.

Шашаргъамы керегек?

Хайуанлагъа, джаныуарлагъа

Ушаргъамы керегек?

Намысдан къоркъуб джашайыкъ,

Шыйыхлагъа, файгъамбарлагъа –

Аллах сюйгенлеге ушайыкъ.

Адетлерин а – огъай.

Мен былайда ангылай тебрегенме

Тёрге нек ётгенин Къарачай.

Динлерин а – огъай.

Ёлсем да –

муслиманлай, таулулай къалырма,

Джюрегимде – Аллах, Къарачай.
Быланы динлери,тиллери, адетлери да башха,

Была да кеслерича бир джамагъат.

Болгъанма тансыкъ Терекге, Ташха,

Бурху Къарачай уллу Аллахха аманат.

Къызла, тиширыула уялгъан, къызаргъан

Не болгъанын билмейле мында.

Бутларын, киндиклерин, ёшюнлерин ачыб,

Алай джюрюрге кюрешелле мында.

Ёкюре келген ийнеклеге ушайдыла была.

Къойла, ийнекле, къатынла да семиз –

Бир-бирине ушаб къалгъандыла мында.

Къайгъы, сагъыш джокъ, бирча таза-темиз,

Адет-намыс демей, гюнах-сууаб демей,

Хайуанлача джашайдыла мында.
Кёбдю мында дуния мал, харекет.

Алай а, иман, намыс болмагъан джерде

Болурму насыб, болурму берекет?
Къамыжакълача бир-бирине джабышыб,

Эркек-тиши айырылмай, къатышыб,

Бир-бири бла хайуанлача джатышыб,

Башларын хаулеликге, хауле юйлеге атыб,

Къартларын къартлыкъ юйлеге атыб,

Къыз-джаш – бары – намысларын байлыкъ ючюн сатыб...

Иги затларын кёрюрге кюрешейим.

Тренлерин, арбаларын, вокзалларын,

Орамларын, юйлерин, арбазларын,

Эллерин эмда шахарларын

Къалай джарашдыргъандыла была,

Къалай таза тутадыла была.
Бойсуналла барысы да джорукъгъа,

Чыкъгъандыла къарангыдан джарыкъгъа,

Къутулгъанла унукъдургъан джарлылыкъдан,

Алай а шашханла, эсиргенле, къутургъанла

Иги джашаудан, тынч джашаудан, байлыкъдан.
Тёнгеклерин, джюреклерин да басханды джау.

Ма былайды бу джанында джашау.

Рахат, бай джашагъан джамагъатны да кёбдю къайгъысы,

Бизни къайгъыларыбызгъа ушамасала да ала.

Бир кишиге болмайма тёре:

Динлерин, адетлерин а – огъай.

Ёлсем да муслиманлай, таулулай къалырма,

Джюрегимде – Аллах, Къарачай.

Кёклени, Джерни, таша-туру дунияланы,

Алада болгъанны барын

Ким джаратхан эсе –

Олду мени Аллахым,

Мен анга къуллукъ этеме джангыз.

Аны джоругъуна, буйругъуна бойсунмай,

Джангы джорукъ, джангы дуния,

Джангы джашау, джангы заман,

Джангы адам, джангы джаныуар,

Джангы битим, джангы билим,

Къураргъа излегенле,

Оюллукъ дунияны ишлеб,

Ахырзаманны джууукълашдырыб кюрешелле.
Ала табигъатны, бир-бирин да тонаб, ёлтюрюб,

Къарыулу къарыусузну юлюшюн ашаб,

Керпеслениб джашар умут этелле.

Джангылалла ала. Джазыкълалла ала.

Кёкден эннген Китабланы алдауукъгъа,

Кеслери джазгъанланы уа кертиге

Санайла ала.
Аллах айтхан бир джорукъгъа сыйынмай,

Кеслерича къралла, джорукъла къураб,

Тюрлю-тюрлю джамагъатлагъа юлешиниб,

Бир-бири бла кюрешелле.

Ол айтханча джашайыкъ,

Ол бергенни сакълайыкъ, джакълайыкъ, къатлайыкъ дер орнуна,

Ол бергенни къурутуб кюрешелле,

Джашауну къурутуб кюрешелле,

Ахырзаманны чакъырыб кюрешелле.

Аланы тохтатмагъанла,-

Биз да болабыз ассы,

Аланы бирлерича болабыз.

Бизде да барды.

Имансызланы дженгалмай эсек,

Алагъа хорлата эсек,

Къарыусузду сора иманыбыз бизни.

Бизге да джетерикди,

Барыбыз да сюелликбиз Тёрени аллына.
Бирлеге – харамгъа, гюнахха батханлары ючюн,

Бирлеге да – ала бла кюрешмегенлери ючюн,

Этилликди соруу-сууал.
Игилик аманлыкъдан баш эсе,

Иманлы имансыздан баш эсе,

Аманлагъа, имансызлагъа

Къалай хорлатабыз кесибизни?

Нек беребиз дунияны да алагъа?
Бу затла ючюн этилликди бизге да соруу-сууал.

Бу затла ючюн тиерикди бизге да таякъ.

Иманы толу болгъан – Аллах ючюн, Адам ючюн,

Джихад этерге керекди тохтаусуз.

Сагъайтады тау къушну уяда.

Къайда да бол – тауда, тенгизде –

Тынгы-тынчлыкъ джокъду дунияда.

Зауукъланыргъа къоймай джашаудан,

Сюрюб айланады –

Айырады джуртубуздан,

Халкъыбыздан, адамларыбыздан,

Саулугъубуздан, джаныбыздан.

Айырмазса мени имандан.

Айыралмазса мени имандан.
Ля иляха илляллах дейме,

Мухаммадун расулулуллах дейме,

Аллахдан кечмеклик тилейме,

Аллахдан сюймеклик тилейме,

Аллахдан болушлукъ тилейме, -

Аллахдан тилейме иман.

Ата джуртум да – Аллахды мени,

Халкъым да – Аллахды мени.
Тыйыншлыгъа санаса Аллах,

Къайтарлыкъды мени Джуртума,

Къайтарлыкъды мени Халкъыма,

Ана тилиме къайтарлыкъды мени.

Насыбдан, игиликден айырылмазбыз биз,

Тюзлюкден, эркинликден айырылмазбыз биз,

Иги иннетден, умутдан айырылмазбыз биз.

Аллахды джаратхан, джашатхан да бизни.
Аллахха минг-минг шукурла этеме

Мени адам этиб джаратханы ючюн,

Джарыкъ дуниягъа къаратханы ючюн,

Хакъ кертини ангылатханы ючюн,

Ангы-эс-билим бергени ючюн,

Окъу, бил, айны дегени ючюн,

Мени бек сыйлы кёргени ючюн,

Меннге ышаныб, кеси акъылым бла

Дунияда джашаргъа къойгъаны ючюн,

Джаннетге, джаханимге джолланы кёргюзтюб,

Джол сайлауну кесиме къойгъаны ючюн.
Джуртумдан, халкъымдан узакъда

Бу сагъышла келдиле башыма.

Сора кесим кибик къачхынчыла бла

Джума намазгъа атландым межгитге.

Барыбызгъа да ана тил – Къуранны тили,

Барыбыз да бир уммет, бир миллет,

Шукур Аллахха! Аллаху акбар!

Кюнорта намазны къылдым Москвада.

Экиндини Ослода къылдым.

Ашхамны къылама Ставангерде.

Джассыны да Аллах буюргъан джерде

Къыллыкъма. Иншаллах.

Ана тилсиз, Халкъсыз, Джуртсуз да тюлме,

Тюненесиз, бюгюнсюз, тамбласыз да тюлме,

Барыны орнун тутады Ол.

Барыбызны джаратханды Ол.

Андан башланады джол.

Анга келтиреди джол.
Адам, насыблы бол, иманлы бол.
АЛАННЫ ЭКИ НАЗМУСУ
1

Я с косой,

А ты - косой,

Я гоняюсь за тобой.

Ой-ой-ой.

2

У меня болит твоя голова.

Мен шайырма-поэтме.

Ауаз берген бизледе адетди –

Кесиме, сеннге да айтама:

аман сёлешме, аман аууз ачма,

аман джора этме.

Джашыныб тургъан къара кючле барла.

Уятма аланы, чакъырма аланы –

Акъ дуния да къара джинледен толуду.

Иги сёзню къозгъау, туудуруу,

Адамда джаныуарлыкъны, хайыуанлыкъны тунчукъдуруу, къурутуу,

Адамны

Буду шайырны, имамны, хар керти Адамны да борчу.

Кёк бал чибин да тюл,

Джер бал чибин да тюл,

Сёз бал чибинди ол –

Ана тилни эм ариу, эм нюрлю сёз гюллеринден

Бал джыяды да, дуниягъа чачады –

Олду аны иши.
Алай а,

Шайырланы, бал чибинленича,

Бир четеннге джыяргъа излеген,

Аланы эркинликлерин алыргъа излеген,

Шекер суу бла алдаргъа излеген –

Джангылады.

Олду аны учундургъан.

Учургъан эки къанаты да – Игилик бла Халаллыкъ.

Ол ючюсюне къуллукъ этдирген а –

Аны иманлы, бетли, ётлю эмда билимли фахмусу.

Быллай джанладыла шайырла.

Ана тилни сёз сынджыры бла

Ата джуртха байланыб тургъан

(Джангыз Терекге, Къадау Ташха тагъылыб тургъан)

Къазакъ Бёрюдю Поэт.
Кеси къазакъ болгъанлыгъына,

Джыйын джанлыды къайгъысы, сагъышы аны.

Анга кёб къыйынлыкъ джетдирген,

Аны хаджирет, абрек, къазакъ этген – джыйын джанлыды.

Джыйын джанлыды дагъыда сагъышы, къайгъысы аны.
Ол къоркъады джыйын джанлы тюб болад деб,

Ол къоркъады Ата джурт итлеге къалад деб.

Барындан да бек къоркъгъаны:

Джыйын джанлы ит джыйыннга бурулад деб,

Аны джашауу, ашауу, излеми да

Сынджыр, тегене, сюек болуб къалад деб,

Мийиклени, кийиклени да къоюб,

Къул джыйыннга, ит сюрюуге бурулад деб.

Кёб бола баралла итле бла джалгъашханла...

Тийрелеринден, Тейрилеринден да аджашханла,

Кечим джокъду сизге не дунияда, не ахыратда:

Дин, тил, халкъ, джурт ючюн къазауатда

Душманны-джауну джанына кёчгенсиз сиз,

Бёрю да тюлсюз, ит да тюлсюз сиз –

Сизни атыгъыз амантишди, сатлыкъды,

Тарихни къара багъанасында ол ат бла къаллыкъсыз.

Ёзден, къул, бий айырылмай, къатышханды миллетим,

Джыйын джанлыгъа, ит джыйыннга да ушайды миллетим.
Акъны къарадан, бёрюню итден айырыуду иннетим,

Бу Бёрю-Ит, Ит-Бёрю джумхуриетлени чачыуду иннетим,

Къазакъ бёрюледен джыйын къурауду иннетим,

Бир бетли, бир иннетли, бир Тейриге бойсуннган

Къазакъ бёрюледен кърал къурауду иннетим.
4

Мен, Къазакъ Бёрю, улуйма къараб Айгъа.

Мен, шайыр, назму окъуйма къараб Къарачайгъа.

Шийиримде джокъду къаргъыш, барды алгъыш, барды тилек,

Адам улугъа, бёрю улугъанча, урад джюрек.

Къазакъ бёрюча, чынгайды джюрегим Джерден Кёкге,

Чакъыра сизни Игиликге, Джигитликге, Эркинликге.
АЛЛАХХА АМАНАТ
Дохтурла айталла: «Тынч тур! –

Ашалгъанды, бошалгъанды джюрек».

Мен да айтама алагъа джууабха:

«Аякъ юсюнде ёледи Терек».

Ташда ёсген Терекге – сёзюм.

Ата джуртум бар, Ана тилим бар,

Ала саулукъда джокъ манга ёлюм.

Ала ючюн этеме къазауат.

Джангыз Терекча, кесилген терек болсам да,

Хорламгъа джетмей, ёлген тёрем болса да –

Диним-тилим-джуртум ючюн ёлеме,

Джаным, халкъым да уллу Аллахха аманат.
ЧАЛКЪЫЧЫ ++++++++
1

Кийиз бёркюн да башына къаблаб,

Тенгиз джагъасы бла гузаба атлаб,

Барады. Чалкъысы бойнунда.

Белине тагъылыб тёшю-чёгючю,

Джанында хыршысы, къайрагъы.

Тенгизни бош джагъасына джетиб,

Джаныу этиб чалкъысына,

«Бисмилля» деб, чалыб башлайды.
Толкъунлана тургъан кёк биченликни

Чалады эртденден ингирге дери.

Биченликни теблеб, зее эте баргъан

Кемелеге, къайыкълагъа ачыуланады.

Юй бийчесине эсгертеди:

Азыкъны артмакъгъа джарашдырыб къой.

Кёб салма. Кюлде бишген нартюх гырджын бла

Джууурт айран эмда бышлакъ болса болду.

Кёгет-мёгет деб кюрешме».
Юй бийчеси биледи баш иесини къылыгъын.

Джылла бла чалады тенгизни къарт.

Эртден бла кеси кесине азан къычырыб,

Намаз къылады.

Ингирде кеси джырлаб, кеси эжиу этиб,

Орайда тарта, къайытады.

Сер къарт бла кюрешмейди киши да –

Аны да джокъду кишиге хыянаты.

«Шашхан таулуду» былайлада аты.

Мен анга къалай тюбегеними да айтайым.

Сууда кемеле – байракълы, байракъсыз,

Джагъада адамла – иманлы, имансыз,

Чабакъчыла къайыкъладан сата балыкъ,

Тёгерек дауур-сюйюр, къалабалыкъ.
Былайлагъа биринчи къазыкъ ургъан таулу

Менме деб, махтаныб, ёхтемлениб,

Кийиз бёркюмю да башыма къаблаб,

Тенгиз джагъасы бла баргъанлай атлаб,

Бир-бирибизге тюртюлюб къалдыкъ –

Кийиз бёрклюле эки адам.

Эки бирча мукъладис бир-бирине тюбеб,

Илгениб, артха туракълагъанча,

Бир-бири кёзюбюзге къараб,

Тилибиз тутулуб,

Биразны сын болуб турдукъ.

Мурулдады – ангыламадым джукъ.

Кийиз бёркню къайдан алгъанса дедим,

Джукъ да айтмай, къысылды джууукъ.

«Джаш, джыйындан джанлаб айланнганынг болду.

Чалкъынгы да алыб, терк ызымдан джет!».
Кетди къарт. Ызындан къараб къалдым.

Шимал тенгизни джагъасы элледе

Башха таулугъа джолукъгъаным болмады.
Не къыйынлыкъ тюшюрген болур аны да бери?

Не къыйынлыкъ алгъан болур эсин да?

Тюзетиб хапар айталмады ол да.

«Хы, иги болду келгенинг,

Бирге чалкъы чала турурсуз энди»,- деди.

Энди аны бла бирге чалкъымы чалайым,

Огъесе, ызыма, Джуртха кетибми къалайым?!
КЪРАЛ БОЛМАЙ КЪАЛЛЫКЪ ТЮЛДЮ КЪАРАЧАЙ
Мен Джуртумдан кетгенли бир ай...

Бир ай бла джарым...

Не эте болур анда Къарачай?..
Бир кёреем Къарачай бла джаным.

Бир кёрсеем джангыдан аны.

Къарачай – джуртум, халкъым, тилим,

Тарихим, ангым, эсим,

Къууанчым, джарсыуум, къайгъым,

Аманым-игим, тюзюм-терсим.

Тёрем-Тейрим – Къарачай,

Намысым, адетим да – Ол,

Джаханимим, джаннетим да – Ол.

Джюрегими джаргъан да – Ол,

Джаныма джарагъан да – Ол,

Аурууум да – ол, дарманым да – Ол.

Акъ кюнюм да, къара кюнюм да – Къарачай.

Узакъдады...тузакъдады Къарачай,

Узакъдады, тузакъдады джулдуз, Ай.

Къутуллукъду джелмауузладан Къарачай да.

Эркин болмай къаллыкъ тюлдю Къарачай,

Энчи болмай джарырыкъ тюлдю Къарачай.

Ол сёзлени уа намаз керекнича къайтарама:

Эркин болмай къаллыкъ тюлдю Къарачай,

Кърал болмай къаллыкъ тюлдю Къарачай!

Шимал Кавказны тауларындан

Шимал тенгизни джагъаларына

Келиб тюшерме деб.

Келиб тюшдюм.

Къаргъышмы джетди меннге, алгъышмы?

Эркинлик ючюн сермешгенлеге

Джан аурутхан джырым-алгъышым ючюн

Кърал бла арам аманнга кетди...

Кесим, юйдегим да къутулдукъ.

Алай а, анда къалдыла: Джуртум,

Адамларым, бютеу халкъым.

Аладыла мында да къайгъым, сагъышым.
Халкъым ненча сынады сюргюнню, ёлюмню.

Сау къалгъан бурхусу ызына къайыта да,

Джуртуну сууун иче, ташын джалай,

Джангыдан джашау къурай турду.

Бу къауумла болмасала,

Ала Ата джуртха къайытмасала

Къарачай деб, болмаз эди не Джурт, не Халкъ.

Боллукъ тюлдю Къарачай деб, не Джурт, не Халкъ,

Къаллыкъ тюлдю Къарачай деб, не Джурт, не Халкъ.
Тышына кетген тюзюн дуниягъа айтыргъа,

Мадар болгъанлай – Джуртха къайытыргъа,

Тышында да халкъын, джуртун унутмазгъа,

Анга не джаны бла да болушханлай турургъа –

Алай бла келликди хорлам, эркинлик.

Алай бла сакъланныкъбыз барыбыз да биз.

«Амин» дегиз быллай тилеклеге сиз.

Тоска по Женщине.

А Женщину?
ДЖАНГУР БЛА ДЖЮРЕК
Кече узуну джауады джангур,

Кече узуну –

Андача – тауладача-джуртдача.

Кече узуну этеме сагъыш.

Сагъыш этеме кече узуну.
Джылайды кёк. Улуйду джюрек.

Не ючюн? Нек?

Джуртха тансыкълыкъ кемиреди мени.

Адамларыма къой, джауларыма да

Болгъанма тансыкъ.

Дуниямча, тынгысыз-тынчлыкъсыз джюрегимча,

Чачакъ-чачакъ бола, кюеди кёкде элия.

Джукълана, джана, ёле, тириле,

Кече узуну джанады джюрек-элия.

Джауады джангур.

Джарылады кёк, джарылады джюрек.

Арада

Къарангы бла джарыкъ.

Танг аласына тохтайды джангур.

Тохтайды джюрек.
Къабыргъада, къабырлада

Бир къалынды, бир джашилди кырдык.

Кече узуну джаугъанед джангур.

Фатиха.
ДЖАЙГЪЫ КЮН СТАВАНГЕРДЕ

Къызланы огъуна, къуйрукълары

Орамгъа сыйынмайды.

Къарын джаулары кёнчек башларындан салыныб,

Аны да дуниягъа ачыб, ёхтемлене,

Алай джюрюйле.

Ставангерде орамда баргъан

Тиширыулагъа къарасам,

Джайгъы ингирде элге джайлыкъдан

Гелеу кырдыкдан тоюб, чайкъала,

Къызгъан джелинлерин кючден кёлтюрюб келген

Семиз ийнекле тюшелле эсиме.

Тёгерекге адам айтыб айталмазча

Бир рахатлыкъ, берекет джайылыб турады.
Кетген дуниядан, буруннгу заманладан,

Буруннгу адамладан къалгъан бир суратха

Къарагъанча болуб турама кесим да.
АЛЛАХХА ШУКУРЛА ЭТЕМЕ
Аллах бирди.

Аллах джаратхан Адам-Хауа –

Ата-Ана бирди. Алай а,

Аллах джаратхан Къарачай да – бирди.

Бирди Ата джурт, Ана тил.

Къауум-къауум этгенди бизни Аллах.

Аллахны барлыгъына, бирлигине,

Мухаммад гъалейхиссалам да

Аны къулу эмда келечиси болгъанына

Хакъ кёлю бла ийнаныб, айтады:
1.Ашхаду ан ля иляhа илля Aллаh

Уа ашхаду анна Мухаммадан гъабдуху уа расулуху.

Бу айтханына да шагъатлыкъ эте, бегите:

2.Кюнюне беш кере намаз къылады;

3.Джылда бир кере мюлкюнден зекят береди;

4.Рамазан айда бир ай ораза тутады;

5.Ёмюрюнде бир кере болса да, хаджиликге барады, хадж къылады.
Бу беш шарт акъылы-саулугъу-кючю джетген

муслиман адамгъа борч болгъан кибик,

Аллах джаратхан, Аллах берген, Аллахха бойсуннган затланы

Сакълау, джакълау, айнытыу да борчду.

Кесини, юйдегисини, ахлусуну, халкъыны аллында да борчу барды –

Аланы сакълау, джакълау, айнытыу.
Аны себебли,

Халкъын, Ата джуртун, Ана тилин сакъламагъанны,

Ала ючюн къан-джан аямай кюрешмегенни –

Муслиманлыгъы-адамлыгъы толу тюлдю.

Мени адам этиб джаратханы ючюн,

Мени бу тилни, бу джуртну, бу халкъны келечиси этгени ючюн,

Аланы сакъла дегени ючюн,

Умметчи эмда миллетчи этгени ючюн.

Минг-минг, сансыз-санаусуз шукурла Аллахха болсун.

2.Хар махтау Аллаhхады – бютеу Аламланы Иесине,

3.Чексиз хатерлиги, джумшакълыгъы болгъан

4.Къыямат Кюнню Тёресине!

5.Джангыз Сеннге къуллукъ этебиз эмда умутчубуз джангыз Сенден:

6.Тюз джолгъа тюзет бизни

7.Сени чамландыргъанла эмда аджашханла баргъан джолгъа тюл,

Сен разылыгъынгы бергенле баргъан джолгъа.

Аминь.
НАЗМУЧУЛУКЪ НЕДИ? +++++++
Мен джазгъанны окъур ючюн

Кёз керек тюлдю;

Мен джазгъанны эшитир ючюн

Къулакъ керек тюлдю;

Не джазгъанымы билир ючюн

Тил билирге керек тюлдю;

Мен джазгъанны ангылар ючюн

Ангы да керек тюлдю;

Мен джазгъаннга ийнаныр ючюн

Не иман, не билим, не илму керек тюлдю;

Джаныуардача джыйы, адамдача сезим да керек тюлдю;

Кераматлы болургъа да керек тюлдю.

Мен джазгъан ёлгенлеге аталгъан зат да тюлдю;

Мен джазгъан башха дуниялагъа,

Башха тюрлю инсанлагъа,

Башха тюрлю джашаулагъа да джораланмайды.

Мен джазгъан адамгъа, мёлекге, джиннге да тюл,

Аллахха джораланады –

Эм узакъ, эм джууукъ Олду меннге.

Олду –

Алада болгъанны барын

джаратхан, джашатхан, къаушатхан, тирилтген.

Ие, Тёре да – Олду. Анданды умут.

Бир-бирине тагъыб, мектуб этиб, ашырама

Ёлюмсюз-ёмюрлюк Аллахха.

Джууаб сакълайма Андан.

Келирми-келмезми, билмейме.

Аллахдан башхала бла мени ишим джокъду.

Ат-бет атасала да, не деселе да,

Ала бла мени ишим джокъду.

Ала тюлдюле мени окъуучуларым.

Ала тюлдюле Тёре манга.

Не имам, не кърал – бир киши да.

Джазгъанымы мен адамгъа тюл,

Аллаху тагъалагъа джазама. Аны ючюн,

Мени адамла англарламы-англамазламы,

Окъурламы-окъумазламы – манга башхасы джокъду.

Аллахны аллында тургъанча,

Анга окъугъанча кёреме.

Мени тилими, кесими да джаратхан – Олду.

Аны да билеме.

Эмда ол харифледен къуралгъан

Аллах деген чексизликге юретирге керекди,

Ызы бла да Аллахны Сёзюне – Къураннга.

Андан сора ана тилде назмулагъа.

Ол заманда сабий муслиман адам болуб ёсерикди,

«Адам не айтыр»,- деб, тюл,

«Аллах не айтыр»,- деб, сагъыш этерикди.

«Адам не айтыр», «кърал не айтыр»,- деб, тюл,

«Аллах не айтыр» деб, джазама джазгъан затларымы.

Мен ангылагъаннга кёре,

Назмучу болуу, назмучулукъ джолу – Олду.